Atamai i Aoaoga Faavae Iloiloga 17

Tauloto Mau Faasino ma Fasifuaitau Autu o Mau

o se tamaitai talavou o loo suesue

O le manatuaina o mau faasino ma mea o loo latou aoao mai e mafai ona faamanuiaina ai lou olaga i le tele o auala. O lenei lesona ua faamoemoe e fesoasoani ia te oe e tauloto le tele o mau faasino ma fasifuaitau autu o mau mai mau mulimuli e 12 o le atamai i aoaoga faavae i le Tusi a Mamona.

Fesoasoani i tamaiti aoga e tauloto fasifuaitau autu o mau. Pe a tauloto e tamaiti aoga mau faasino ma fasifuaitau autu o mau, o le a sili atu ona latou manatua ma faaaogaina i latou pe a faasoa atu le talalelei. Faaaoga ni metotia eseese o le taulotoina, e pei o le faisoo, taaloga faigofie, po o kata faamanatu, ina ia faaosofiafia ai le taulotoina.

Sauniuniga a le tamaitiiti aoga: Valaaulia tamaiti aoga e mafaufau e uiga i mea i o latou olaga ua latou taulotoina. Na faapefea ona mafai ona latou taulotoina nei mea, ma ua faapefea ona fesoasoani ia i latou?

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina o lesona ua saunia e le faatonu o le eria po o le itulagi po o le taitai faamaopoopo ia mautinoa ai o lesona taitasi o fuaitau o le atamai i aoaoga faavae o le a aoaoina a o faia vasega seminare.

Taulotoina

E mafai ona fesoasoani mea nei i tamaiti aoga e amata vave ai ona mafaufau e uiga i le taulotoina o mau.

I se isi itu, e mafai e tamaiti aoga ona faasoa mai se mea na latou taulotoina (e pei o laina o ata tifaga, upu o musika, lauga, ma isi) ma talanoaina pe aisea ua latou taulotoina ai nei mea ma pe faapefea ona latou faatumauina. E mafai foi ona fesoasoani le valaaulia o se faifeautalai faatoa foi mai e faasoa mai ni mau sa ia taulotoina ma molimau atu i le taua o le taulotoina o mau.

Faitau le faamatalaga lenei mai ia Elder Richard G. Scott (1928–2015) o le Korama a Aposetolo e Toasefululua e uiga i le taua o le taulotoina o mau:

Elder Richard G. Scott

E mafai ona oo mai le mana maoae mai le taulotoina o mau. O le taulotoina o se mau o le fatuina lea o se faigauo fou. E pei lava o le mauaina o se tagata fou e mafai ona fesoasoani mai i se taimi o puapuaga, tuu mai musumusuga ma faamafanafanaga, ma avea o se punavai o uunaiga mo suiga manaomia. (Richard G. Scott, “O Le Mana o Tusitusiga Paia,” Liahona, Nov. 2011, 6)

• O a mau ua e taulotoina? Aisea na e taulotoina ai na mau?

A o e punouai i gaoioiga tauloto nei, ia maua le mautinoa ma le talitonuga e mafai e le Alii ona fesoasoani ia te oe e tauloto nei mau taua ma fasifuaitau autu o mau.

O fuaitau o le atamai i aoaoga faavae ma le taulotoina

O loo i lalo se lisi o fuaitau mulimuli e 12 o le atamai i aoaoga faavae o le Tusi a Mamona ma a latou fasifuaitau autu o mau.

Atamai i Aoaoga Faavae o le Tusi a Mamona: Alema–Moronae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o le Mau
Mau Faasino Alema 7:11–13	Fasifuaitau Autu o le Mau “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma.”
Mau Faasino Alema 34:9–10	Fasifuaitau Autu o le Mau “E ao ona faia o se togiola, … o se taulaga e ao ina le gata ma faavavau.”
Mau Faasino Alema 39:9	Fasifuaitau Autu o le Mau “Aua e te toe saili atu i tuinanau o ou mata.”
Mau Faasino Alema 41:10	Fasifuaitau Autu o le Mau “E lei avea lava le amioleaga ma fiafia.”
Mau Faasino Helamana 5:12	Fasifuaitau Autu o le Mau “O luga lava o le papa o lo tatou Togiola … e ao ina oulua atiinaa’e ai lo oulua faavae.”
Mau Faasino 3 Nifae 11:10–11	Fasifuaitau Autu o le Mau “Na ou tuu atu ai i le finagalo o le Tamā i mea uma mai le amataga.”
Mau Faasino 3 Nifae 12:48	Fasifuaitau Autu o le Mau “Ia outou atoatoa e pei lava o aʼu, po o lo outou Tamā o le o i le lagi e atoatoa.”
Mau Faasino 3 Nifae 27:20	Fasifuaitau Autu o le Mau “O mai ia te au ma ia papatiso … ina ia faapaiaina outou i le taliaina o le Agaga Paia.”
Mau Faasino Eteru 12:6	Fasifuaitau Autu o le Mau “Aua tou te le maua se molimau seia uma ona tofotofoina o lo outou faatuatua.”
Mau Faasino Eteru 12:27	Fasifuaitau Autu o le Mau “Afai e o mai tagata ia te au … ona ou faia lea o mea vaivai ia avea ma mea malolosi ia te i latou.”
Mau Faasino Moronae 7:45-48	Fasifuaitau Autu o le Mau “O le alofa mama o le alofa le pona lea o Keriso.”
Mau Faasino Moronae 10:4–5	Fasifuaitau Autu o le Mau “Ole atu ma le loto faamaoni, ma le manatu moni i ai, ma le faatuatua ia Keriso … [ma] o le mana o le Agaga Paia e mafai ona outou iloa ai le moni o mea uma lava.”

© 2023 by Intellectual Reserve, Inc. Ua taofia aiā tatau uma.

O tamaiti aoga o loo mauaina avanoa i masini faaeletonika e mafai ona latou faaaogaina se polokalama faatekinolosi po o se isi polokalama e fatu ai ni kata faamanatu i luga o a latou masini. A le o lea, tufa ni fasi pepa se lua i tamaiti aoga taitoatasi mo lenei gaoioiga.

Afai ua uma ona maua e tamaiti aoga kata faamanatu, mafaufau e faasee atu i gaoioiga o loo i le vaega, “Faaaogaina o au kata faamanatu.”

Fatu se seti o kata faamanatu e mafai ona e faaaogaina i le gasologa atoa o le tausaga. A manaomia, faaaoga faatonuga nei e fesoasoani ai ia te oe e fatu ai au kata faamanatu:

Faaeteete ia aua nei soona faaaluina le tele o le taimi e fatu ai ni kata faamanatu. Ia mautinoa ua lava le taimi o tamaiti aoga e faaaoga ai a latou kata e faataitai ai le taulotoina o mau tauloto ma fasifuaitau autu o mau o le atamai i aoaoga faavae.

Laasaga 1: Fatu ni kata se 12

I le faaaogaina o se itu atoa o se fasipepa, tusi se laina agai i lalo i le ogatotonu o le pepa e fatu ai ni koluma se lua. Ona tusi lea o ni laina faalava se lua i le pepa e fatu ai ni pusa se tolu e tutusa le lapopoa i totonu o koluma taitasi, ma e maua ai le aofaiga atoa o pusa se ono. Tagai i le ata lenei mo se faataitaiga o foliga o lau itulau:

Siata gaogao

Liliu le pepa ma toe fai le mea lava lea e tasi i lena itu. Toe fai le faagasologa lenei i se isi fasipepa e fatu ai pusa e 12 o loo e manaomia.

I le tasi itu o au pepa taitasi, i pusa taitasi tusi ai se mau faasino mai le siata. E faaopoopo atu i le mau faasino, atonu e te tusia se ata faigofie i lenei itu o au pepa lea o le a fesoasoani ia te oe e manatua ai le fasifuaitau autu o le mau. E ui o le ata e tatau ona fesoasoani ia te oe e manatua ai le fasifuaitau autu o le mau, ae e tatau foi ona faaalia ai le migao e tatau ai ma le faaaloalo mo le natura paia o le fuaitau o le mau.

Laasaga 2: Tusi mau faasino o le atamai i aoaoga faavae i le tasi itu

I le tasi itu o au pepa e lua, tusi se mau faasino mai le siata i pusa taitasi. E faaopoopo atu i le mau faasino, e mafai foi ona e tusia se ata faigofie lea o le a fesoasoani ia te oe e manatua ai le fasifuaitau autu o le mau.

Laasaga 3: Tusi le fasifuaitau autu o mau i le isi itu

Liliu au pepa, ma tusi i pusa taitasi le fasifuaitau autu o le mau lea e fetaui ma le mau faasino i le isi itu.

Laasaga 4: Oti ese au kata

Oti pusa taitasi na e fatuina i ni kata.

Faaaogaina o au kata faamanatu

Ia fatufatua’i i le faaaogaina o au kata faamanatu. Filifili se tasi o manatu nei pe fatu sou lava manatu. E mafai foi ona e filifili e faaaoga punaoa o loo maua i luga o le polokalama o le atamai i aoaoga faavae.

• Suesue oe lava ia: Uu kata faamanatu ina ia mafai ona e vaai atu i le na o le mau faasino pe na o le fasifuaitau autu o le mau. Taumafai e ta’u atu le fasifuaitau autu o le mau fesootai po o le mau faasino fesootai. Toe fai lenei mea mo ni nai taimi faatasi ai ma mau faasino ma fasifuaitau fesootai taitasi.

• Gaoioiga faafetaui: Ia paga ma se tasi. Tuu atu i le isi tagata e tuu ana kata o loo faasaga i luga le mau faasino ae tuu i luga e le isi ana kata o loo i ai le fasifuaitau autu o mau e faasaga foi luga. Faafetaui fasifuaitau autu o mau i le mau faasino e fesootai i ai e ala i le tuu o le kata o loo i ai le fasifuaitau autu o mau i luga o le kata o i ai le mau faasino.

Mafaufau e vaevae tamaiti aoga i ni vaega taitoafā. Valaaulia vaega taitasi e faaaoga se seti e tasi o kata faamanatu ma vaevae lenei seti i tagata o le vaega. Tuu atu i tamaiti aoga e tuu kata uma i luga o a latou kesi faatasi ai ma mau faasino o loo faasaga i luga. Faitau se fasifuaitau autu o se mau i le vasega. O le tamaitiiti aoga i vaega taitasi o loo i ai le kata o loo i ai le mau faasino tutusa e tatau ona tuuina atu le kata i le faiaoga. Lu’i vaega taitasi e aumai le kata sa’o i le faiaoga i totonu o se taimi faatapulaaina—mo se faataitaiga, i le lima sekone. Uunaia tamaiti aoga e fesoasoani i isi tagata o a latou ‘au. E mafai foi ona valaaulia tamaiti aoga e fesuiai kata ma se isi tagata i le latou vaega e fesoasoani ai ia i latou e aoao mau faasino ma fasifuaitau autu o mau uma.

E mafai foi e tamaiti aoga ona galulue i ni paga po o ni vaega toalaiti e faia ni a latou lava auala e faaaoga ai a latou kata faamanatu.

A uma, fesoasoani i tamaiti aoga e talanoaina mea na latou aoaoina ma lagonaina mai a latou suesuega ma le faaaogaina o a latou kata faamanatu. O fesili nei e mafai ona fesoasoani i lenei mea. E mafai foi ona e faasoa atu ni aafiaga patino ia na fesoasoani ia te oe e iloa ai le taua o se tasi pe sili atu foi o fuaitau o le atamai i aoaoga faavae o loo ta’ua i lenei lesona.

• O a mau faasino ma fasifuaitau autu o mau e te lagona e aupito sili ona aoga mo oe e tatau ona taulotoina? Aisea?

• O a nisi o upumoni o loo aoao mai e nei fuaitau e uiga i le Faaola ma Lana talalelei?