Helamana 7–12

Vaaiga Aoao

O le perofeta o Nifae, o le atalii o Helamana, sa soifua i se taimi o le tele o le amioleaga. Ina ua fesiligia o ia e sa Nifae amioleaga e uiga i le mafuaaga na malosi ai lana tautala e uiga ia i latou, sa ia molimau atu ma le lototoa e uiga i le Faaola. Na ia lapataia ona tagata e faapea o le a faaumatia i latou pe afai latou te le salamo. Ina ua mavae ana valoaga e uiga i le fasiotiga o le faamasino sili, sa ia mafaufau loloto i mea uma na faaali atu e le Alii ia te ia. A o ia faia, sa ia maua se aafiaga ofoofogia lea na faamanuiaina ai o ia e le Alii mo lona faamaoni. Sa ia ole atu i le Alii e auina mai se oge i totonu o sa Nifae ina ia latou salamo. O le taunuuga, o le toatele o sa Nifae na faalotomaualaloina i latou lava, ma sa toe faamanuiaina tagata i le timu. E ui lava i lenei vavega, i le aluga o taimi sa toe liliuese le toatele o tagata mai le Alii ma faaauau i a latou amioleaga.

Saunia e Aoao Atu

O faamatalaga nei e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Helamana 7–10

Faamoemoega o le lesona: O lenei lesona e mafai ona fesoasoani i tamaiti aoga ia malamalama i le taua o le matafaioi a perofeta i le fuafuaga a le Tama Faalelagi.

Sauniuniga a le tamaitiiti aoga: Valaaulia tamaiti aoga e talanoaina ma se uo po o se tagata o le aiga pe na faapefea ona aafia o latou olaga ona o perofeta soifua.
Fautuaga faafaiaoga faavitio: Ina ia saunia tamaiti aoga e suesue ma iloa upumoni e uiga i le perofeta a le Alii, mafaufau e faaaoga le vaega o le laupapa paepae e tusi ai le ulutala O upumoni e uiga i Perofeta a le Alii. Valaaulia tamaiti aoga e lisi upumoni i lalo o lenei ulutala i le gasologa o le lesona.

Helamana 8

Faamoemoega o le lesona: O lenei lesona e mafai ona fesoasoani i tamaiti aoga ia malamalama e faapea, o perofeta e molimau e uiga ia Iesu Keriso, ma e mafai ona fesoasoani latou te lagona ai le moni o molimau a perofeta.

Sauniuniga a le tamaitiiti aoga: Mafaufau e valaaulia tamaiti aoga e vaavaai mo se faataitaiga se tasi pe sili atu o perofeta ma aposetolo o loo molimau atu e uiga ia Iesu Keriso i se konafesi aoao talu ai nei.
Anotusi e faaali atu: O le lisi o perofeta ma mau mo le filifiliga A
Fautuaga faafaiaoga faavitio: Mo tamaiti aoga o e filifilia le filifiliga A, faaali atu le lisi o perofeta ma mau faasino mai le lesona. Mo tamaiti aoga o e filifilia le filifiliga E, mafaufau e faasoa atu i le talanoaga le sootaga i le faaputuga vitio o “Molimau Faapitoa a Keriso” ina ia mafai ona latou matamata ai i ni nai molimau a perofeta ma aposetolo o aso nei.

Helamana 10

Faamoemoega o le lesona: O lenei lesona e mafai ona fesoasoani i tamaiti aoga ia malamalama i upumoni mai le aafiaga o Nifae lea e mafai ona valaaulia ai le taitaiga ma le mana o le Alii i o latou olaga.

Sauniuniga a le tamaitiiti aoga: Valaaulia tamaiti aoga e faitau le Helamana 10 ma vaavaai mo mea e mafai ona latou aoaoina mai le faataitaiga a Nifae lea e mafai ona faamanuiaina ai o latou olaga.
Pepa e tufa atu: “Mafaufau Loloto ma Faaaliga Faaletagata Lava Ia,” “Saili e Fai le Finagalo o le Alii ma le Le Vaivai,” ma le “O Le Mana Faamau”
Fautuaga faafaiaoga faavitio: Mo gaoioiga a le vaega, e mafai ona e tuuina tamaiti aoga i ni potu e taapeape i ai i ni vaega taitoatolu. Ona mafai lea ona e alu atu i potu taitasi e taapeape i ai e ofo atu le fesoasoani pe a manaomia pe na o le maitau lava o gaoioiga a tamaiti aoga.

Helamana 11–12

Faamoemoega o le lesona: O lenei lesona e mafai ona fesoasoani i tamaiti aoga ia lagonaina se manao sili atu ia faateleina le lotomaualalo i le Atua.

Sauniuniga a le tamaitiiti aoga: Mafaufau e valaaulia tamaiti aoga e faitau le saunoaga a Peresitene Ezra Taft Benson o le konafesi aoao ia Aperila 1989 ua faaautuina “Beware of Pride.” O lenei lauga e mafai ona maua i le Gospel Library po o le Ensign, Me 1989, 4–7.
Anotusi e faaali atu: O le ata ma fuainumera; o le ata o le taamilosaga o le faamaualuga
Fautuaga faafaiaoga faavitio: Mafaufau e faaali atu le ata o le taamilosaga o le faamaualuga i le amataga o le lesona ina ia mafai ai e tamaiti aoga ona kopi i totonu o a latou api faamaumau mo suesuega e faauma ai le gaoioiga suesue. I se isi itu, atonu e te manao e faapipii atu le ata ina ia mafai e tamaiti aoga ona tatala i luga o a latou komepiuta ma mafai ai ona lolomi mo le faaaogaina i le taimi o le vasega.

Atamai i Aoaoga Faavae Iloiloga 17

Faamoemoega o le lesona: O lenei lesona e faamoemoe e fesoasoani i tamaiti aoga e tauloto ni nai mau faasino ma fasifuaitau autu o mau mai fuaitau mulimuli e 12 o mau o le atamai i aoaoga faavae i le Tusi a Mamona.

Sauniuniga a le tamaitiiti aoga: Valaaulia tamaiti aoga e mafaufau e uiga i mea i o latou olaga ua latou taulotoina. Na faapefea ona mafai ona latou taulotoina nei mea, ma ua faapefea ona fesoasoani ia i latou?
Anotusi e faaali atu: “Atamai i Aoaoga Faavae o le Tusi a Mamona: Alema–Moronae”
Anomea mo tamaiti aoga: Pepa, penitala, ma seleulu mo le fatuina o kata o manatuaga
Fautuaga faafaiaoga faavitio: I le amataga o le lesona, mafaufau e tuu atu i tamaiti aoga e faasoa mai a latou tali mai le gaoioiga sauniuni a le tamaitiiti aoga.