Helamana 7–10

O Le Perofeta a le Alii

I se lalolagi ua faatumulia i leo feteenai, o fea e mafai ona tatou liliu atu i ai mo le taitaiga ma le upumoni? O se tasi o auala e saili ai le Alii e taiala ma fesoasoani ia i tatou i le olaga nei o le valaauina lea o se perofeta. O lenei lesona e mafai ona fesoasoani e te malamalama ai i le matafaioi taua a perofeta e faia i le fuafuaga a le Tama Faalelagi.

Alofa ia i latou e te aoaoina. Taumafai e faaali atu le alofa mo au tamaiti aoga. Faaali atu le naunau faamaoni i o latou olaga, faalogo ma le toto’a i a latou fesili ma manatu faaalia, faaaofia i latou i le lesona, ma faafeiloai i latou ma le agalelei pe a e vaai ia i latou. Faailoa atu lou talitonuga e faapea e mafai e au tamaiti aoga ona aoao ma ola i le talalelei a Iesu Keriso.

Sauniuniga a le tamaitiiti aoga: Valaaulia tamaiti aoga e talanoa ma se uo po o se tagata o le aiga pe na faapefea ona aafia o latou olaga ona o perofeta soifua.

Gaoioiga e Ono Mafai Ona Aoao Ai

Aisea e valaauina ai e le Atua ia perofeta?

Ina ia amata le vasega, mafaufau e valaaulia tamaiti aoga e faataitai la latou tali i le tulaga lea. E mafai ona avea oe o se uo e le o se tagata o le ekalesia. Tuu atu i ni tamaiti aoga e faasoa mai pe faapefea ona latou tali atu. Ia mautinoa ua iloa e tamaiti aoga o lenei ata faataitai o le a toe talanoaina i le faaiuga o le vasega.

Vaai faalemafaufau e faapea ua ofo se tasi o au uo e le o se tagata o le Ekalesia i le iloaina e faapea e te talitonu e valaauina e le Alii ia perofeta i o tatou aso. Ua taumanatunatu lau uo pe aisea e alagatatau ai le i ai o perofeta mo o tatou taimi.

• O a ni auala e mafai ona e tali atu ai i lau uo?

Mafaufau i ou lagona e uiga i perofeta a le Alii ma lou naunautaiga e faalogo ma mulimuli ia i latou. A o e suesue i le asō, o le a e maua avanoa e faailoa ai upumoni taua e uiga i perofeta.

I luga o se itulau avanoa i lau api faamaumau mo suesuega, tusi ai le ulutala lenei: Upumoni e uiga i Perofeta a le Alii. I le gasologa o le lesona, tusi ai upumoni ua e aoaoina e uiga i perofeta i lalo o lenei ulutala.

E mafai foi ona e tusia lenei ulutala i luga o le laupapa ma faaopoopo i ai manatu o tamaiti aoga i le gasologa o le lesona.

O le tele o anotusi ia o le a suesueina i lenei vaiaso o le (Helamana 7–12) ma le vaiaso a sau o le (Helamana 13–16) o le a taulai atu i perofeta. Mafaufau e faatonu tamaiti aoga e faaavanoa ia lava se vaega i a latou api faamaumau mo suesuega ina ia mafai ona latou faaopoopo i a latou lisi i le gasologa o le isi lua vaiaso e sosoo ai.

O le perofeta o Nifae

O le asō o le a e aoao ai e uiga ia Nifae, le atalii o Helamana. Ina ua uma ona teenaina e sa Nifae i le laueleele i matu, sa toe foi Nifae i lona aiga i Saraemila. Sa matuā amioleaga foi tagata iinā. I le faanoanoa ai i lo latou amioleaga, na alu ai Nifae i lona olo i le faatoaga ma tagi atu i le Atua (tagai Helamana 7:1–11).

Faitau le Helamana 7:12–22, ma vaavaai mo mea na fai mai ai Nifae ina ua iloa ua faapotopoto tagata e faalogo i ana tagi.

• O le a se upumoni e mafai ona e faailoa atu e uiga i perofeta a le Alii e faavae i mea na fai mai ai Nifae i nei fuaiupu?

O se tasi o upumoni atonu na e faailoaina e faapea e valaaulia e perofeta a le Atua ia tagata ia salamo. Tusi lenei upumoni i le lisi o i lau api faamaumau mo suesuega.

• O le a se mea o aoao mai ia te oe e uiga i le Atua e faapea o le a Ia valaauina perofeta e alaga atu le salamo?

E toatele tagata na feita i le savali a Nifae. Ina ia fesoasoani i tagata ia malamalama e faapea sa ia tautalagia le upumoni, sa ta’u atu faavavega e Nifae ia i latou mea na tutupu ia na taunuu a o ia talai atu ia i latou.

Mafaufau e valaaulia se tamaiti aoga e faitau le aotelega lenei o le Helamana 8:25–28; 9:1–36. E mafai foi ona valaaulia se tamaitiiti aoga e faitau nei fuaiupu a o lei amataina le vasega ma sauni e aotele lenei tala i a latou lava upu. I se isi itu, e mafai ona e faasoa atu le vitio “O Le Fasiotia o le Faamasino Sili” mai le faailo taimi 1:25 i le 4:01, o loo maua i le ChurchofJesusChrist.org.

Na muai ta’u atu e Nifae i tagata e faapea o lo latou faamasino sili, o Sesorama, ua fasiotia (tagai Helamana 8:27–28). Sa lagona e tagata e faapea “atonu sa faia e Nifae se ioega faatasi ma se tasi e fasioti le faamasino” (Helamana 9:16). Ona ta’u atu lea e Nifae i tagata e sue Seanetuma, o le uso o Sesorama, ma fai atu ia te ia ni fesili faapitoa. Sa ta’u atu e Nifae i tagata le ala tonu o le a tali ane ai Seanetuma (tagai Helamana 9:26–36). O lenei mea na taitai atu ai ia Seanetuma e tautino atu e faapea o ia o le fasioti tagata ma o Nifae e māmā (tagai Helamana 9:37).

Faitau le Helamana 9:37–41, ma vaavaai pe na faapefea ona tali atu tagata ina ua uma ona molimauina o nei mea na tutupu.

• O le a se upumoni ua e aoaoina mai le aafiaga a Nifae lea e mafai ona e faaopoopo atu i lau lisi?

O se tasi o upumoni atonu na e faailoaina e faapea o upu a perofeta o le a faataunuuina.

• Aisea e te manatu ai e taua le iloa o lenei upumoni e uiga i perofeta?

• O a nisi o faataitaiga o upu a perofeta ua faataunuuina?

Mafaufau e faasoa atu se faataitaiga patino lea e faapupula mai ai pe na faapefea ona faataunuuina upu a perofeta i lou olaga. Mo se faataitaiga, atonu o se faamanuiaga folafolaina na oo mai i le mulimuli ai i le fautuaga a se perofeta.

O upumoni faaopoopo e uiga i perofeta

E faaopoopo atu i upumoni ua uma ona faailoaina, o le tele o isi upumoni e uiga i le matafaioi ma le faamoemoega o le perofeta a le Alii o loo faaalia e Nifae i ana fegalegaleaiga ma tagata. Faaauau ona faataitai le tomai o le faailoaina o upumoni a o e suesue i fuaitau o mau nei. Faaopoopo mea na e mauaina i lau lisi.

Mafaufau e faaali atu mau faasino nei ma atofa tamaiti aoga e suesueina fuaitau taitasi i ni paga pe i ni vaega toalaiti. E mafai foi ona atofa atu i tamaiti aoga ni fuaitau eseese o mau e suesue ai ona aoao lea e le tasi o le isi.

• Helamana 7:29: O le folafolaga a Nifae i tagata o e na faapotopoto ina ua uma ona faalogo o tatalo o ia

• Helamana 8:1–4: O le tali atu a faamasino i upu a Nifae

• Helamana 8:22–23: O le tali a Nifae i tagata o e sa taufaifai e faasaga ia te ia ma ana upu

• Helamana 10:5–7: O le talanoaga a le Alii ma Nifae ina ua uma ona ia aoao atu le nuu

• O a upumoni e uiga i perofeta na e mauaina i nei fuaiupu?

Faaopoopo tali a tamaiti aoga i le lisi o i luga o le laupapa. Atonu na latou faailoaina upumoni e pei o nei.

• O le savali a se perofeta e le o sana lea. E sau mai le Alii. (Helamana 7:29)

• E le lauiloa perofeta i e amioleaga. (Helamana 8:1–4)

• Ua molimau mai Perofeta e uiga ia Iesu Keriso. (Helamana 8:22–23)

• Ua tuuina atu e le Alii i Lana perofeta le mana o faamauga. (Helamana 10:5–7)

O le a maua e tamaiti aoga ni avanoa e aoao atili ai e uiga i nei upumoni taitasi i lesona e sosoo ai. O upumoni muamua e lua o loo lisi atu o le a suesueina ma le loloto sili atu i le Helamana 13–16. O upumoni lona tolu ma le lona fa o loo lisiina atu o le a suesueina ma le loloto sili atu i lesona i se taimi mulimuli mai o lenei vaiaso.

O le taua o perofeta soifua

Faaali atu faatonuga nei, ma tuu atu i tamaiti aoga se taimi ia lava e fatu ai se tali i le ata faataitai mai le amataga o le lesona.

Ina ia fesoasoani e saunia tamaiti aoga e fatu a latou tali, atonu e aoga le fai atu i tamaiti aoga e ta’u mai nisi o luitau taatele o loo feagai ma talavou i aso nei. E mafai ona lisi a latou tali i luga o le laupapa i tafatafa o upumoni ua latou faailoaina e uiga i perofeta. Ona mafai lea e tamaiti aoga ona faasoa mai pe mafai faapefea e nisi o upumoni sa latou faailoaina i le asō ona fesoasoani i luitau sa latou mafaufau i ai.

Toe mafaufau i le ata faataitai mai le amataga o le lesona e uiga i lau uo o le sa tau mafaufau pe aisea e ao ai ona i ai perofeta i o tatou taimi.

Tusi se tali i lau uo lea e faamalamalama ai pe aisea e taua ai le valaauina e le Alii o perofeta i o tatou taimi. O lau tali e tatau ona sili atu ma le tasi le parakalafa le umi.

O fesili nei e mafai ona fesoasoani ia te oe i lau tali:

• E mafai faapefea e se tasi pe sili atu o upumoni na e faailoaina ona fesoasoani ia i tatou i luitau tatou te feagai?

• O a ni aafiaga na fesoasoani ia te oe e iloa ai le faamanuiaga o le i ai o perofeta soifua i le lalolagi?

Valaaulia tamaiti aoga e faasoa atu a latou tali i se paga. O volenitia lava ia na faatinoina le tulaga i le amataga o le vasega e mafai foi ona valaaulia e o mai i luma o le potu ma faia se isi tala faatino o le tulaga.

Molimau atu e uiga i upumoni sa outou talanoaina ma uunaia tamaiti aoga e faatino soo se uunaiga faaleagaga na latou maua i le taimi o le lesona.

Manatu ma Talaaga o Faamatalaga

Ae faapefea pe afai tatou te le ioe i mea e fai mai ai se perofeta?

Na aoao mai Peresitene Harold B. Lee (1899–1973) e faapea:

Atonu e te le fiafia i mea o le a ta’u atu e le pulega o le Ekalesia. E ono feteenai ma ou taofi faapolokiki. E ono feteenai ma ou taofi faaleagafesootai. E ono faalavelave i nisi o tulaga o lou olaga faaleagafesootai. … O lou saogalemu ma lo matou saogalemu e faalagolago lea pe tatou te mulimuli pe leai ia i latou o e ua tofia e le Alii e pulefaamalumalu i Lana Ekalesia. … Ia taulai atu la tatou vaai i le Peresitene o le Ekalesia. (Harold B. Lee, i le Conference Report, Oct. 1970, 152–53.)

Sa aoao mai Peresitene Henry B. Eyring o le Au Peresitene Sili:

O nisi taimi o le a tatou maua ai fautuaga e le mafai ona tatou malamalama i ai pe e foliga mai e le faatatau ia i tatou, e tusa lava pe a mavae ai ona tatalo ma le mafaufau loloto i ai. Aua le lafoaia le fautuaga, ae ia taofi mau pea i ai. Afai e tuuina atu e se tasi e te faatuatuaina se mea e foliga mai e leai se taua ae ua na’o ni oneone faatasi ai ma le folafolaga e faapea, o loo i ai ni auro, atonu e te uuina ma le faaeteete lea mea i ou lima mo sina taimi, ma lūlū malie. O taimi uma lava na ou faia ai lena mea i fautuaga mai se perofeta, e mavae se taimi ae amata ona aliali mai fasi auro ma sa ou faafetai ai. (Henry B. Eyring, “Finding Safety in Counsel,” Ensign, Me 1997, 26)

Aisea e talai atu ai e perofeta upumoni ia e le lauiloa i nisi taimi?

Na aoao mai Peresitene Russell M. Nelson:

O nisi taimi e tuua’ia i tatou i le faaleono popole a o tatou aoao atu tulaga manaomia a le Tama mo le faaeaga i le malo selesitila. Ae pe le sili atu ea ona tatou lē anoano i le lē ta’u atu o le upumoni—lē aoao atu o mea ua faaalia mai e le Atua?

O le mea moni lava ona e tatou te popole tele e uiga i fanau uma a le Atua o lea tatou te folafola atu ai Lana upumoni. Atonu tatou te le ta’uina atu i taimi uma i tagata mea latou te fia faalogo i ai. O perofeta e seasea ona lauiloa. Ae o le a tatou aoao atu pea le upumoni! (Russell M. Nelson, “The Love and Laws of God” [faigalotu a le Iunivesite o Polika Iaga, 17 Sete., 2019], speeches.byu.edu)

Gaoioiga Faaopoopo e Aoao Ai

O faavae taua e sefulufa e mulimuli ai i le perofeta

Ina ia fesoasoani i tamaiti aoga ia malamalama atili i upumoni e uiga i perofeta, mafaufau e faaali atu le lisi o “Fourteen Fundamentals in Following the Prophet” na faasoa mai e Peresitene Ezra Taft Benson (1899–1994). E mafai e tamaiti aoga ona talanoaina pe aisea e taua ai le iloa ma le manatuaina o mataupu faavae sa latou faailoaina mai i le lesona ma mai ia Peresitene Benson. O a ni mataupu faavae e ono tauivi ai nisi tagata? O le fea atonu e sili ona talafeagai mo le autalavou e manatua? Aisea?

Helamana 7:17–19. E apoapoai atu perofeta i tagata ia salamo

Valaaulia tamaiti aoga e faitau le Helamana 7:16, ma vaavaai mo mea e tumatila ia i latou mai upu a Nifae a o ia faamatalaina le manao o Satani mo tagata. E mafai e tamaiti aoga ona fai ni koluma se lua i a latou api faamaumau mo suesuega ona faitau lea o le Helamana 7:17–22, 26–28. I le tasi koluma, e mafai e tamaiti aoga ona lisi ai agasala a tagata. I le isi koluma, e mafai ona latou lisiina ai taunuuga o le a oo mai pe afai latou te le salamo.

O fesili nei e mafai ona fesoasoani ia te oe e talanoaina ai mea na maua e tamaiti aoga: O le a se mea o aoao atu e lenei mea ia te oe e uiga i le taua o le malamalama ai i le valaaulia a se perofeta ia salamo? E mafai faapefea e le malamalama ai i lenei mea ona fesoasoani ia te oe e latalata atili atu ai i le Tama Faalelagi ma Iesu Keriso?

O le a faataunuuina folafolag a le perofeta

Afai o le a manuia tamaiti aoga mai le faaaluina o se taimi tele e malamalama ai ma lagona le upumoni e faapea o le a faataunuuina upu a perofeta, mafaufau e valaaulia i latou e faitau mau o loo faapupula mai ai lenei mea, e pei o le Isaia 7:14; Mataupu Faavae ma Feagaiga 1:37; ma le Mataupu Faavae ma Feagaiga 87:1–3. Mafaufau e talanoaina fesili nei: O a ni faataitaiga o aso nei o loo faapupula mai ai lenei upumoni? E mafai faapefea e le iloaina ma le talitonuina o lenei upumoni ona aafia ai ou lagona agai i le perofeta? E mafai faapefea ona suia ai lou sootaga ma le Tama Faalelagi ma Iesu Keriso?