Helamana 8

E Molimau Mai Perofeta e Uiga ia Iesu Keriso

I se lalolagi lea e tele naua leo e tosoina ai i tatou i le tele o itu, ua tuuina mai ai e le Atua ia i tatou o perofeta e taula ai i tatou ia te Ia. Ina ua fesiligia Nifae e sa Nifae amioleaga e uiga i le mafuaaga na ia tautala malosi ai e uiga ia i latou, sa ia molimau atu ma le lototoa e uiga i le Faaola. O lenei lesona e mafai ona fesoasoani e te malamalama ai e faapea, e molimau mai perofeta e uiga ia Iesu Keriso, ma e mafai ona fesoasoani e te lagona ai le moni o a latou molimau.

Faamamafa atu le ala e molimau mai ai perofeta e uiga ia Iesu Keriso. O le tiutetauave autu lava o perofeta o le molimau atu lea e uiga ia Iesu Keriso (tagai Taiala i Tusitusiga Paia, “Perofeta,” scriptures.ChurchofJesusChrist.org). Ta’u atu fuaitau o mau ma isi aoaoga faaperofeta o loo molimau mai i uiga paia, soifuaga, ma le misiona a le Faaola. Uunaia tamaiti aoga e mafaufau pe faapefea e molimau faaperofeta ona aafia ai lo latou lava malamalama ma le talisapaia o Iesu Keriso.

Sauniuniga a le tamaitiiti aoga: Mafaufau e valaaulia tamaiti aoga e vaavaai mo se faataitaiga se tasi pe sili atu o perofeta ma aposetolo o loo molimau atu e uiga ia Iesu Keriso i se konafesi aoao talu ai nei.

Gaoioiga e Ono Mafai Ona Aoao Ai

O le mau a se molimau

Mafaufau e aumai se fatulaau fai atigi, e pei o se pinati, walnut[uolanati], po o isi fatu. Nana i lou lima po o totonu o se ato. Tau atu i tamaiti aoga o loo i ai se mea e lei vaaia lava e mata o le tagata pe pa’i i ai lima o tagata (o le fatu o loo i totonu o le atigi). Valaaulia se tamaitiiti aoga e sau i luga ma vaai. Ona fai atu lea i lena tamaitiiti aoga e ta’u i le vasega pe o e ta’uina atu le mea moni. Fesili i tamaiti aoga pe latou te talitonu ia te oe ma pe aisea latou te talitonu ai pe leai foi. A uma ona outou talanoaina o se vasega pe talitonu tamaiti aoga ia te oe, faaali atu ia i latou le fatu.

O le toatele o tagata e lei vaai ia Iesu Keriso, ae e toatele o loo talitonu pea ia te Ia.

• O a nisi o mafuaaga e talitonu ai tagata ia Iesu Keriso?

• O le a le matafaioi a perofeta e fesoasoani ai ia te oe ia talitonu ai i le Faaola?

O le molimau a perofeta anamua

O le galuega a le perofeta o Nifae sa talanoaina i le lesona Helamana 7–10. O lenei lesona o le a fesoasoani i tamaiti aoga e taulai atu ai i aoaoga a Nifae i le Helamana 8 e uiga i le tiutetauave o perofeta e molimau atu ai e uiga ia Iesu Keriso. Ina ia fesoasoani i tamaiti aoga e iloilo le faatatauga mo aoaoga a Nifae i le Helamana 8, mafaufau e aotele ia faamatalaga nei.

Atonu e te manatua e faapea na vavalo atu le perofeta o Nifae i sa Nifae amioleaga e faapea o le a faaumatia i latou pe afai latou te le salamo (tagai Helamana 7:22–29). O le toatele o sa Nifae na feitai ia Nifae ona o le tautala e faasaga i lo latou amioleaga (tagai Helamana 8:1–7). Sa aoai e Nifae nei tagata ma tau atu ia i latou ua latou teena e le gata i ana upu ae o upu a perofeta ua mavae, e aofia ai Mose, o lē sa molimau atu e uiga ia Iesu Keriso (tagai Helamana 8:10–13).

Faitau le Helamana 8:13–23, ma vaavaai mo mea na faasoa atu e Nifae e uiga ia Mose ma isi perofeta ua mavae. Atonu e te manao e faailoga igoa o perofeta na faailoa mai e Nifae.

• O a ni mea na tutusa uma ai nei perofeta?

O se upumoni e tasi e mafai ona tatou aoao mai i nei fuaiupu e faapea, e molimau mai perofeta e uiga ia Iesu Keriso.

Na faapea mai Elder Neil L. Andersen o le Korama a Aposetolo e Toasefululua:

O le matafaioi aupito sili ona taua a le perofeta a le Alii o le aoaoina lea o i tatou e uiga i le Faaola ma taitai atu i tatou ia te Ia. …

E le tu se perofeta i le va o oe ma le Faaola. Ae, e tu o ia i ou talaane ma faasino atu le ala i le Faaola. O se tiutetauave aupito silisili ma se meaalofa sili ona faapelepele a se perofeta ia i tatou o lana molimau mautinoa, lona iloa mautinoa, e faapea o Iesu o le Keriso. (Neil L. Andersen, “O Le Perofeta a le Atua,” Liahona, Me 2018, 25–27)

• Aisea e te manatu ai o le meaalofa silisili a se perofeta ia i tatou o lana molimau lea e uiga ia Iesu Keriso?

O faataitaiga a perofeta o loo molimau atu e uiga ia Iesu Keriso

Faaalu se taimi e suesue ai nisi o molimau a perofeta e uiga ia Iesu Keriso. A o e suesue i a latou molimau, e mafai e le Agaga Paia ona molimau atu i le moni o a latou upu i lou loto ma lou mafaufau.

Valaaulia tamaiti aoga e faauma se tasi po o gaoioiga uma e lua nei, pe e mafai foi ona e faatagaina tamaiti aoga e filifili po o le fea o gaoioiga latou te mananao e faamaea. I se isi itu, e mafai ona e tuuina tamaiti aoga i ni vaega ma atofa atu i vaega taitasi se tasi o filifiliga e faamaea. Ona mafai lea e tagata mai vaega taitasi ona faasoa atu mea na tumatila ia i latou i molimau sa latou suesueina.

Filifiliga A: Na molimau mai perofeta anamua e uiga ia Iesu Keriso

Mafaufau e faaali atu le igoa o perofeta taitasi nei o loo ta’ua i le Helamana 8:13–23, o fuaiupu nei o loo avatu faatasi ai, ma se ata o perofeta taitasi (pe a mafai) e faataamilo i totonu o le potu. A uma loa ona suesue e tamaiti aoga ni nai molimau, e mafai ona latou faamaumauina soo se lagona po o uunaiga na latou maua a o latou suesue ma faasoa atu na lagona po o uunaiga i se tasi o le vasega.

Faitau ia le itiiti ifo ma le tolu o molimau nei mai perofeta na ta’ua e Nifae. Fai se lisi o mea ua aoao atu e nei molimau ia te oe e uiga ia Iesu Keriso.

• Mose: Esoto 15:2; Teuteronome 18:15 (tagai foi 3 Nifae 20:23–24)

• Aperaamo: Aperaamo 3:22–24; Faaliliuga a Iosefa Samita, Kenese 15:12 (i le faaopoopoga i le Tusi Paia)

• Isaia: Isaia 7:14; 9:6; 53:3–5

• Ieremia: Ieremia 33:14–16; 50:34

• Liae: 1 Nifae 1:14–15; 2 Nifae 2:6–8

• Nifae, atalii o Liae: 1 Nifae 19:9–11; 2 Nifae 25:19, 23–26

Toe iloilo le lisi na e tusia. Mafaufau e tusifaamaumau soo se malamalamaaga, lagona, po o uunaiga na e maua e uiga i le Faaola a o e suesue. Tusi ni nai fuaiupu e faamatala ai pe faapefea ona ese lou olaga pe ana faapea e lei aoaoina i tatou e perofeta i nei mea e uiga ia Iesu Keriso.

Filifiliga E: Ua molimau mai perofeta o Aso e Gata Ai e uiga ia Iesu Keriso

Ina ia fesoasoani i tamaiti aoga e faamaea lenei filifiliga, mafaufau e tuuina atu ni punaoa, e pei o ni nai kopi o lomiga o konafesi aoao o le mekasini o le Liahona.

Mafaufau e faasoa atu nisi o molimau a perofeta o loo ta’ua i le vaega o “Manatu ma Talaaga o Faamatalaga” pe a manaomia.

Saili ni faataitaiga se lua pe sili atu o perofeta po o aposetolo o aso e gata ai o loo molimau e uiga ia Iesu Keriso. E mafai ona sau mai se konafesi aoao talu ai nei pe mai le talafaasolopito o le Ekalesia. Mafaufau e faaaoga le ChurchofJesusChrist.org po o le polokalama o le Potutusi o le Talalelei i lau sailiga. E mafai foi ona e faitau pe faalogologo i le “O Le Keriso Soifua: O Le Molimau a Aposetolo” i le ChurchofJesusChrist.org.

A maea le gaoioiga a tamaiti aoga, valaaulia i latou e faasoa mai ni faataitaiga na latou mauaina o perofeta o loo molimau atu e uiga ia Iesu Keriso. Ia mautinoa e tuu atu i le toatele o tamaiti aoga se avanoa e faasoa mai ai. Atonu e fesoasoani le fai atu o fesili e pei o le “O fea o molimau a perofeta ua faagaeetia ai oe?” po o le “Aisea e te manatu ai e taua le faapea ai ua molimau mai le toatele o perofeta e uiga ia Iesu Keriso?”

Afai e lava le taimi, atonu e aoga foi mo tamaiti aoga ona faasoa atu a latou lava molimau e uiga ia Iesu Keriso.

Manatu ma Talaaga o Faamatalaga

Helamana 8:19–20. O ai Senosa, Senoka, ma Esaia, ma o fea e mafai ona ou faitau ai e uiga ia i latou?

O Senosa, Senoka, ma Esaia o ni perofeta o loo ta’ua i le Tusi a Mamona. O a latou aoaoga ma molimau sa ono maua mai i papatusi apamemea, lea e le o ia i tatou i le taimi nei. Ua faamaumauina e perofeta o le Tusi a Mamona e faapea, o i latou taitoatasi na molimau mai e uiga ia Iesu Keriso (tagai 1 Nifae 19:10; Alema 33:15–16; 34:7; Helamana 8:19–20). Sa viia e le perofeta o Iakopo ia Senosa o le tusitala o le faataoto i le laau olive (tagai Iakopo 5:1–77).

O fea e mafai ona ou maua ai nisi o molimau a perofeta o aso e gata ai?

“O Molimau Faapitoa a Keriso”: O se tuufaatasiga o vitio o loo faasoa mai ai e sui taitasi o le Au Peresitene Sili ma le Korama a Aposetolo e Toasefululua lana molimau ia Iesu Keriso (o loo maua i le ChurchofJesusChrist.org)

“Ua Molimau Aposetolo Soifua e Uiga ia Iesu Keriso” (2:16): O se tuufaatasiga o molimau a perofeta o onapo nei e uiga ia Iesu Keriso (o loo maua i le ChurchofJesusChrist.org)

O le a se mea e mafai ona ou aoaoina e uiga ia Iesu Keriso mai perofeta i le Tusi a Mamona?

Na aoao mai Peresitene Russell M. Nelson:

Pe a e faitau i le Tusi a Mamona, taulai atu i le tagata autu o le tusi—mai lona mataupu muamua e oo i le mulimuli—o le Alii o Iesu Keriso, le Alo o le Atua Soifua. …

… O [Nifae] na vaaifaalemafaufau i le Togiola o le lalolagi, Lana galuega i le lalolagi, ma Lona Faasatauroga. …

O isi perofeta maoae o le Tusi a Mamona—i o latou lava ala ma taimi—na molimau atu i le paia o le Alii o Iesu Keriso. O nisi o i latou o le uso o Iareto, Senoka, Neuma, ma Senosa. O molimau e uiga ia Iesu Keriso lea na mua’i ta’ua ai Lona soifua mai i Peteleema sa faamaumauina foi mai le Tupu o Peniamina, Apinati, Alema le Matua, Alema le Itiiti, Amoleka, o atalii o Mosaea, Kapeteni Moronae, o le auso o Nifae ma Liae, ma Samuelu le sa Lamana. I se faasologa e foliga mai e le gata o folafolaga faaperofeta—o molimau a “perofeta paia uma” [Iakopo 4:4] mo “i le tele o afe o tausaga ae lei oo i lona afio mai” [Helamana 8:18]—ua faia ai e le Tusi a Mamona le folafolaga paia e faapea, o Iesu o le Keriso, o lo tatou Faaola ma le Togiola. (Russell M. Nelson, “A Testimony of the Book of Mormon,” Ensign, Nov. 1999, 69)

Gaoioiga Faaopoopo e Aoao Ai

Puipuia o aoaoga a Iesu Keriso ma Ana perofeta

Ina ua fesiligia Nifae e sa Nifae amioleaga, sa amata ona puipui o ia e nisi (tagai Helamana 8:7–8). E mafai e tamaiti aoga ona faailoa mai faataitaiga o tagata latou te iloa o e sa lototoa ma lē fefefe i le tuuina atu o a latou molimau e uiga ia Iesu Keriso ma Ana perofeta. E mafai foi ona latou vaai faalemafaufau i tulaga atonu latou te feagai lea o le a manaomia ai ona latou puipuia le perofeta, le Ekalesia, ma le Faaola.

Gaoioiga fefaasinoa’i mo le filifiliga A

O le tomai o le faafesootaiina faatasi o mau e mafai ona fesoasoani i tamaiti aoga e faafesootai ai manatu taua. Mafaufau e valaaulia tamaiti aoga e sue se faataitaiga o se perofeta o loo molimau atu e uiga ia Iesu Keriso i tusi taitasi e fa i totonu o a tatou tusitusiga faavae. Ona mafai lea ona e faaali atu ia i latou le auala e faafesootai faatasi ai fuaitau (mo se faataitaiga, e ala i le tusia o mau faasino i pito o itulau po o le faaaogaina o le sootaga i le polokalama o le Gospel Library). E mafai e tamaiti aoga ona sue i le fuaitau muamua na latou mauaina ma faafesootai i le fuaitau lona lua na latou mauaina. Ona mafai lea ona latou liliu atu i le fuaitau lona lua ma faafesootai i le fuaitau lona tolu ma faaauau ai faapena.

A uma ona faafesootai faatasi e tamaiti aoga a latou fuaitau uma, valaaulia i latou e filifili se autu po o se ulutala e mafai ona latou tusia i a latou tusitusiga paia mo nei mau fefaasinoai (mo se faataitaiga, “matafaioi a se perofeta” po o “o perofeta e molimau e uiga ia Keriso”).

O isi perofeta o e na molimau mai e uiga ia Iesu Keriso

Atonu e aoga mo tamaiti aoga le sailia o isi perofeta i tusitusiga paia o e na molimau e uiga ia Iesu Keriso, e faaopoopo atu i perofeta o loo ta’ua e Nifae i le Helamana 8. E tele faataitaiga i tusitusiga faavae, e aofia ai Atamu (tagai Mose 6:51–52, 57), Enoka (tagai Mose 7:47), Noa (tagai Mose 8:23–24), Tupu o Peniamina (tagai Mosaea 3:5–11, 17), Apinati (tagai Mosaea 15:5–9), Alema le Itiiti (tagai Alema 7:7–13), Peteru (tagai Galuega 4:8–12), ma Paulo (tagai Galuega 26:22–23). E mafai ona e faasoa atu nei mau faasino i tamaiti aoga pe valaaulia i latou e sue a latou lava faataitaiga i tusitusiga paia.