Atamai i Aoaoga Faavae Iloiloga 16

Faaaoga Fuaitau o le Atamai i Aoaoga Faavae

O le aoao ai e faaaoga afioga a le Alii i tusitusiga paia e mafai ona faamanuiaina ai oe i le tele o auala. O lenei lesona e mafai ona fesoasoani ia te oe e faaaoga ai upumoni mai fuaitau o le atamai i aoaoga faavae i le afa lona lua o le Tusi a Mamona i lou olaga.

Faaaogaina o fuaitau o le atamai i aoaoga faavae. Tuu atu ni avanoa mo tagata aoga e faaaoga ai le aoaoga faavae latou te aoaoina mai fuaitau o le atamai i aoaoga faavae i tulaga masani o le olaga. O lenei faiga e mafai ona faamalosia ai le taua o nei fuaitau i o latou lava olaga.

Sauniuniga a le tagata aoga: Valaaulia tagata aoga e o mai saunia e faasoa mai so o se faamanuiaga po o manuia ua latou maitauina mai le taumafai ai e faaaoga tusitusiga paia i o latou olaga.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina o lesona ua saunia e le faatonu o le eria po o le itulagi po o le taitai faamaopoopo ia mautinoa ai o lesona taitasi o fuaitau o le atamai i aoaoga faavae o le a aoaoina a o faia vasega seminare.

Faamanuiaga o le faaaogaina o tusitusiga paia

Mafaufau e faaali atu tulaga faataitai ma fesili nei. Valaaulia tagata aoga e faasoa atu ni mea latou te mauaina.

I le saunoaga lenei, na faasoa mai ai e Peresitene Bonnie H. Cordon, Peresitene Aoao o Tamaitai Talavou, ia faamanuiaga e mafai ona oo mai mai le suesueina o tusitusiga paia. A o e faitauina ana upu, mafaufau loloto po o le a se mea e tulaga ese ia te oe.

O tusitusiga paia e faamalamalamaina ai o tatou mafaufau, fafaga o tatou agaga, tali a tatou fesili, faateleina lo tatou faalagolago i le Alii, ma fesoasoani e faataula’i o tatou olaga ia te Ia. (Bonnie H. Cordon, “Ia Faatuatua i le Alii ae Aua le Faalagolago,” Liahona, Me 2017, 7)

• O a isi faamanuiaga e mafai ona tatou maua mai le suesueina o tusitusiga paia?

Atonu e amata ona tatou oo i nisi o nei faamanuiaga a o tatou suesue i tusitusiga paia, ae e mafai ona faaauau pea ma faateleina a o tatou faaaogaina tusitusiga paia i o tatou olaga.

• O le a le uiga o le faatatau o tusitusiga paia i o tatou olaga?

Afai e te manao e faalogo i le molimau a se tasi tagata i le taua o le mafaufau loloto ma saili e faaaoga tusitusiga paia, matamata le “Foiaina o Faafitauli o le Olaga i le Tusi a Mamona” (1:00), o loo maua i le ChurchofJesusChrist.org.

Faaaogaina o tusitusiga paia

Ina ia faataitai le faaaogaina o tusitusiga paia, faitau tulaga faataitai nei ma filifili se tasi.

Ia lagona le saoloto e fetuunai pe sui tulaga faataitai nei ina ia sili atu ai ona talafeagai i au tagata aoga.

1. Ua manao se alii talavou ia maua se molimau malosi ma faalatalata atili atu i le Alii.

2. O loo tauivi se tamaitai talavou ona o loo i ai ni ona mausa leaga ua lē mafai ona ia faatoilaloina.

3. Ua oo i se alii talavou ni lagona o le maualalo o le taua faaletagata lava ia ma ua tauivi ia lagonaina le alofa o le Atua mo ia.

Afai e te manao ai, e mafai foi ona e fatuina se tulaga faataitai fou lea e fesootai vāvālalata atili i lou olaga po o olaga o i latou e te iloa.

Faaali atu pe tuu atu i tagata aoga faatonuga ma le siata lenei.

Faitau i fasifuaitau autu o mau o loo i lalo, ma saili ia lē itiiti ifo ma le tasi e te lagona e mafai ona fesoasoani i le tagata i le tulaga na e filifilia. Faitau i le fuaitau atoa, ma fai mea nei:

1. Faailoa se upumoni o loo aoao mai e le fuaitau lea e ono mafai ona fesoasoani.

2. Faailoa se auala se tasi e mafai ai e le tagata o loo i le tulaga faataitai ona faaaoga le mau i lona olaga.

3. Faamalamalama atu faamanuiaga e ono mafai ona ia oo i ai e ala i le faaaogaina o le mau i lena auala.

(Afai e te manao ai, e mafai ona e toe faia lenei gaoioiga i se isi fuaitau o le atamai i aoaoga faavae lea e ono fesoasoani i le tulaga faataitai na e filifilia.)

Atamai i Aoaoga Faavae o le Tusi a Mamona: Alema–Moronae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o le Mau
Mau Faasino Alema 7:11–13	Fasifuaitau Autu o le Mau “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma.”
Mau Faasino Alema 34:9–10	Fasifuaitau Autu o le Mau “E ao ona faia o se togiola, … o se taulaga e ao ina le gata ma faavavau.”
Mau Faasino Alema 39:9	Fasifuaitau Autu o le Mau “Aua e te toe alu e tusa ma tuinanau o ou mata.”
Mau Faasino Alema 41:10	Fasifuaitau Autu o le Mau “E le’i avea lava le amioleaga ma fiafia.”
Mau Faasino Helamana 5:12	Fasifuaitau Autu o le Mau “O luga lava o le papa o lo tatou Togiola … e ao ina oulua atinae ai lo oulua faavae.”
Mau Faasino 3 Nifae 11:10–11	Fasifuaitau Autu o le Mau “Na ou tuu atu ai i le finagalo o le Tamā i mea uma mai le amataga.”
Mau Faasino 3 Nifae 12:48	Fasifuaitau Autu o le Mau “Ia outou atoatoa e pei lava o aʼu, po o lo outou Tamā o le o i le lagi e atoatoa.”
Mau Faasino 3 Nifae 27:20	Fasifuaitau Autu o le Mau “O mai ia te au ma ia papatiso … ina ia faapaiaina outou i le taliaina o le Agaga Paia.”
Mau Faasino Eteru 12:6	Fasifuaitau Autu o le Mau “Aua tou te le maua se molimau seia uma ona tofotofoina o lo outou faatuatua.”
Mau Faasino Eteru 12:27	Fasifuaitau Autu o le Mau “Afai e o mai tagata ia te au … ona ou faia lea o mea vaivai ia avea ma mea malolosi ia te i latou.”
Mau Faasino Moronae 7:45–48	Fasifuaitau Autu o le Mau “O le alofa mama o le alofa le pona lea o Keriso.”
Mau Faasino Moronae 10:4–5	Fasifuaitau Autu o le Mau “Ole atu ma le loto faamaoni, ma le manatu moni i ai, ma le faatuatua ia Keriso … [ma] o le mana o le Agaga Paia e mafai ona outou iloa ai le moni o mea uma lava.”

© 2023 by Intellectual Reserve, Inc. Ua taofia aiā tatau uma.

A uma ona lava se taimi o tagata aoga e saunia ai a latou tali, valaaulia i latou e faasoa mai na tali i ni paga po o ni vaega toalaiti a o le’i tuuina atu ni nai fetufaa’iga i le vasega. Ona mafaufau lea e faaali atu faatonuga nei ma valaaulia tagata aoga e faaaoga se mau i o latou lava olaga.

Iloilo fuaiupu o le atamai i aoaoga faavae, ma filifili se tasi e te lagona o le a avea ma se faamanuiaga mo oe e faaaoga i lou olaga. Tusi se ata faigofie pe tusi e uiga i le auala o le a e faaaogaina ai lena mau. E mafai foi ona e faaaofia ai se faamanuiaga se tasi pe sili atu lea e ono oo mai o se taunuuga.

Tautino e mulimuli i le faaaogaina na e mafaufau i ai.

A uma ona fai e tagata aoga, mafaufau e valaaulia i latou e faasoa mai a latou ata po o faamalamalamaga i le vasega ma i le fale faatasi ma tagata o le aiga po o uo mamae.