Alema 56

O Autau Talavou e 2,000

E mafai ona tatou aoaoina ni lesona maoa’e mai le faataitaiga faamaoni a le autalavou i le Ekalesia a le Alii. I se taimi o se taua tele, sa taitaia ai e Helamana ni alii talavou totoa e 2,000 i ni manumalo ia na faasaoina ai le tele o ola. O lenei lesona ua faamoemoe e fesoasoani ai ia te oe e malamalama ai a o e faatinoina ma le lototoa le faatuatua ia Iesu Keriso, o le a faamanuiaina oe e le Alii i Lona mana.

Ia iloa o loo i ai i au tagata aoga ni gafatia paia. Ia manatua o tagata aoga taitasi o se alo o le Atua. Pe a iloa e tagata aoga e te talitonu i lo latou gafatia e avea atili ai e faapei o Iesu Keriso, o le a tuputupu a’e lo latou talitonuga i o latou gafatia. Faailoa atu pe a taumafai tagata aoga ia usiusitai atili, taulimaina isi ma le agalelei, ma faatino i le faatuatua.

Sauniuniga a le tagata aoga: Mafaufau e valaaulia tagata aoga e mafaufau i se faataitaiga o se talavou po o se vaega o le autalavou o e na faaalia le faatuatua tele i le Alii e ui lava i luitau faigata.

Gaoioiga e Mafai Ona Aoao Ai

O le i ai o le lototele

Mafaufau e tusi i luga o le laupapa galuega nei atonu e taufaafefe pe faigata. E mafai ona e faaopoopo pe suia galuega ina ia sili atu ona talafeagai i au tagata aoga. O faataitaiga faaopoopo o galuega e aofia ai mea nei: faasoa atu lau molimau, faasoa atu le talalelei i se uo, ma salamo.

Vaai faalemafaufau pe o le a sou lagona, ma pe aisea, pe afai e talosagaina oe e fai mea nei:

• Auauna atu i se misiona faafaifeautalai

• Tausi poloaiga e tusa lava pe lē lauiloa

• Lauga atu i le lotu pe aoao atu se lesona

Valaaulia ni nai tagata aoga e filifili se tasi o galuega ma faasoa mai pe faapefea o latou lagona ma pe aisea.

• O a ni masalosaloga atonu e te lagona le faaosoosoina ia mauaina i nei tulaga?

Ina ia saunia tagata aoga ia malamalama i le taua o mea o le a latou aoaoina, valaaulia i latou e fai ma le faaeteete mea nei:

I lau api talaaga mo suesuega, tusi ai se mea se tasi atonu e finagalo le Alii e te faia i le taimi nei po o se taimi vave lea atonu e taufaafefe pe faigata mo oe. E mafai foi ona e faamaumauina soo se masalosaloga po o ni atugaluga atonu o ia te oe. (O le a e toefoi atu i lenei tusiga i se taimi mulimuli ane i le lesona.)

Mafaufau loloto po o le a se mea e tatau ona e iloa pe malamalama i ai e fetaia’i ai ma lenei galuega ma le mautinoa. A o e suesue, saili le taitaiga a le Alii e fesoasoani ia te oe ia maua ma malamalama i upumoni ia o le a fesoasoani ia te oe.

Tusi a Helamana ia Moronae

O le Alema 56–58 o se tusi na tusia e Helamana ia Kapeteni Moronae i le taimi o le taua. Na tusia e Helamana e uiga i se vaega o alii talavou mai Aneti-Nifae-Liae ua ta’ua o le autau talavou e 2,000. O nei alii talavou na taitaia e Helamana sa aufaatasi ma se autau na taitaia e Anetipa ma sa saunia e puipuia lo latou laueleele ma aiga e faasaga ia sa Lamanā (tagai Alema 56:9–12).

Fesoasoani i tagata aoga ia malamalama i le mea o loo tupu i le Alema 56:30–44. O nisi o auala e mafai ona e faia ai lenei mea e aofia ai mea nei:

1. Tusi le gaoioiga faafetaui lenei i luga o le laupapa, pe tuu atu i tagata aoga se kopi o pepa e tufa atu. O tali i le gaoioiga faafetaui o le 1-a, 2-i, 3-o, 4-e.

2. Tuu atu i ni tagata aoga se toatolu i luma o le potu e fai ni pine o igoa e tofi ai i latou taitoatasi o se tasi o autau e toatolu (O Le Autau Talavou e 2,000, Autau a Anetipa, Autau a sa Lamanā). E mafai e tagata aoga o loo i luma o le potu ona toe faatinoina ia gaoioiga a autau a o faitau e tagata aoga ia fuaiupu.

O Le Tulaga na Feagai ma Fitafita Talavou e 2,000

Tusi Lesona a le Faiaoga o le Tusi a Mamona (2024)—“Alema 56: 2,000 Fitafita Talavou”

Ina ia aoao e uiga i se tulaga taufaafefe ma faigata na feagai ma atalii o Helamana, faitau fuaiupu nei ma faafetaui i latou i faamatalaga sa’o o le aotelega.

1.___Alema 56:30–33	a. Sa faatonuina e Anetipa ia Helamana ma lana autau e 2,000 e ui ane ia Anetipara i se taumafaiga e toso ese mai sa Lamanā mai le aai.
2.___Alema 56:34-38	b. Ina ua mavae aso e tolu, sa lē mafai e fitafita e 2,000 ona toe vaai ia sa Lamanā i o latou tua. Na latou lē iloa pe na tau ane le autau a Anetipa ia sa Lamanā pe o taumafai foi sa Lamanā e faatosina i latou i se mailei. Sa fesili Helamana i ana fitafita talavou pe ua latou naunau e ō e tau.
3.___Alema 56:39-42	i. Ina ua tuua e sa Lamanā le aai ina ia osofa’ia le autau e 2,000, sa mulimuli atu le autau a Anetipa ia sa Lamanā.
4.___Alema 56:43-44	o. Nai lo le liliu atu e tau ma Anetipa, sa faanatinati atu sa Lamanā, ma le faamoemoe e fasioti le autau a Helamana a o le’i mafai ona osofa’i mai e Anetipa mai tua.

© 2023 by Intellectual Reserve, Inc. Ua taofia aiā tatau uma.

Filifili pe tau

Vaai faalemafaufau faapea sa e i ai faatasi ma le autau talavou ma sa fesiligia oe pe ua e saunia e alu e tau. Faamata e faapefea ona e tali atu? O le a se mea o le a aafia ai lau faaiuga?

Faitau le Alema 56:45–48, ma vaavaai mo mea na filifili nei alii talavou e fai ma pe aisea.

Valaaulia tagata aoga e faasoa mai mea na latou maua. Afai e lē masani ona latou faasoaina mai tali i fesili nei, mafaufau e fai atu fesili ia i latou.

• E tusa ai ma le fuaiupu 46, o le a le mea na iloa e nei alii talavou?

  Mafaufau e uunaia tagata aoga e vase le tali i lenei fesili i a latou tusitusiga paia.

• O ai na aoaoina i latou i lenei upumoni? (Tagai i le Alema 56:47–48.)

• Faamata na mafai faapefea e lenei upumoni ona tuuina atu ia i latou le lototele e o atu ai i le taua?

Vaai faalemafaufau pe o le a se finagalo o le Atua a o faalagolago atoa atu nei alii talavou ia te Ia a o i ai i se tulaga taufaafefe ma le luitauina.

Puipuiga i le taua

Faitau le Alema 56:49–56, ma vaavaai mo le mea na tupu a o faatinoina ma le lototele e le autau talavou le “lē masalosalo” (Alema 56:47), pe i se isi faaupuga, sa faatino lo latou faatuatua i le Atua.

• O a ni mea na e aoaoina mai i nei fuaiupu?

O se tasi o mataupu faavae e mafai ona tatou aoao mai le autau talavou e faapea, a tatou maua le lototele e faatino ai i le faatuatua, o le a tatou maua le malosi mai le Atua.

E taua le iloa e faapea e ui ina sa faasaoina e le Atua le autau uma a Helamana, ae atonu e lē o taimi uma e faasaoina faaletino ai e Ia ē faamaoni. Ae o le a Ia faamanuiaina pea i latou i auala Na te silafia o le a manuia ai o latou agaga (tagai Alema 60:12–13).

• O le a se mea ua aoao mai e lenei tala ia te oe e uiga i le Atua ma Lona malosi?

Valaaulia tagata aoga e filifili ma faamae’a se tasi o gaoioiga nei e fesoasoani ai ia i latou e faatatau le tala o le autau a Helamana ia i latou lava ma o latou tulaga. Atonu e aoga le faaali atu o filifiliga ina ia mafai ai e tagata aoga ona faasino atu i ai a o latou filifili ma faamae’a i latou. Faailoa atu i tagata aoga e faapea o le a latou maua le avanoa e faasoa atu ai mea na latou maua i tagata o le vasega.

Filifiliga A. Tulaga o le olaga masani

Faailoa mai se tulaga atonu e manaomia ai e talavou o aso nei ona filifili e faatino ma le lototoa le faatuatua e pei ona sa faia e fitafita talavou faamaoni a Helamana. Lisi ni nai masalosaloga e ono i ai i le autalavou i lena tulaga. Ona lisi lea o se auala se tasi pe lua e mafai ai e le autalavou ona faatino le faatuatua i le Atua e ui lava i le i ai o ni masalosaloga. Faasoa atu ni auala e ono faamanuiaina ai i latou e le Tama Faalelagi i le malosi a o latou faatino i le faatuatua.

Filifiliga E. Sa aoaoina i latou e o latou tinā

Tusi e uiga i lou tinā po o se isi tamaitai i lou olaga o lē, e pei o tinā o le autau talavou, ua aoaoina oe ia faatuatua i le Atua ma Iesu Keriso. Faaalu sina taimi e tusifaamaumau ai mea sa ia aoaoina ai oe i upu ma faataitaiga ma le auala na ia faaaofiaina ai oe. Atonu e te faaaofia ai ni auala na e mulimuli ai i lana faataitaiga e faatino ai le faatuatua i le Alii ma maua ai Lona malosi.

Valaaulia ni tagata aoga e ripoti mai i le vasega ni mea na latou aoaoina. Atonu e fesoasoani le valaaulia muamua o i latou e faasoa atu i se tasi o le vasega o lē na filifilia se isi filifiliga ese nai lo i latou.

Mafaufau i se mea se tasi atonu e finagalo le Alii e te faia i le taimi nei po o se taimi vave lea atonu e taufaafefe pe faigata mo oe. E mafai foi ona e manatunatu i soo se masalosaloga po o ni atugaluga atonu o ia te oe. I lau api talaaga mo suesuega, tusi ai mea ua e iloa e uiga i le Atua ma mea na e aoaoina e uiga ia te Ia mai le tala o le autau talavou lea e ono fesoasoani ai ia te oe i lenei tulaga. E mafai ona e faaaofia ai auala ua musuia ai oe e faaali atu le faatuatua ia te Ia ma le auala e mafai ona Ia faamalosia ai oe.

Manatu ma Talaaga o Faamatalaga

E mafai faapefea ona ou maua le lototele i le asō?

Na ta’ua e Peresitene Thomas S. Monson (1927–2018):

E tele ituaiga o lototele. Sa tusia e le tusitala Kerisiano o Charles Swindoll: “O le lototele e lē na o le tafa o le taua e tupu ai … po o le pueina ma le lototoa o se gaoi i totonu o lou fale. O tofotofoga moni lava o le lototele e tele ina lē leoa. O tofotofoga i totonu [o le loto] ia, e pei o le tumau i le faamaoni pe a leai se tasi o tilotilo mai, … e pei o le tu na o oe pe a lē malamalama isi ia te oe.” Ou te faaopoopo atu e faapea o lea lototele i totonu o loo aofia ai foi le faia o le mea sa’o e tusa lava pe tatou te fefefe, i le puipuia o ō tatou talitonuga ma e tusa foi pe faifai mai ai tagata ia i tatou, ma le faatumauina o na talitonuga e tusa lava pe faamata’uina ai le ō ese o uo po o le faaletonu ai o ō tatou tulaga faaleagafesootai. O lē e tu mausali mo le mea sa’o e ao ona lamatia ai i nisi taimi i le faitioina ma le inosiaina. (Thomas S. Monson, “Ia Faamalosi ma Loto Tele,” Liahona, Me 2014, 67)

O le a le matafaioi o loo faia e la tatou molimau e uiga ia Iesu Keriso e fesoasoani ai ia i tatou ia lototetele?

Na faamalamalama mai e Peresitene Henry B. Eyring o le Au Peresitene Sili:

Na ta’u atu e le Alii i Ona taitai o le Toefuataiga, ma ua Ia ta’u mai foi ia i tatou, a tatou tutū ma le faatuatua i luga o Lona papa, e faaitiitia le masalosalo ma le fefe; ae faateleina le manao e fai le lelei. A tatou taliaina le valaaulia a Peresitene Monson e totō i o tatou loto se molimau ia Iesu Keriso, o le a tatou mauaina le mana, le manao, ma le lototele e o atu ai e laveai mai isi e aunoa ma le popole mo o tatou lava manaoga. (Henry B. Eyring, “Aua le Fefe e Fai Mea Lelei,” Liahona, Nov. 2017, 101)

Ae faapefea pe afai ou te taumafai ia faamaoni ae lē lagonaina ua oo mai le laveaiga?

Na fautua mai Elder Alvin F. Meredith III o le Fitugafulu:

I le feagai ai ma puapuaga po o tofotofoga, atonu tou te pei o a’u ma faamoemoe o le a vave mai le lavea’i. Pe a tatau ai ona tatou faatalitali, ia mautinoa e leoleo mai pea le Faaola, ia mautinoa tatou te lē tau onosa’ia e sili atu nai lo le mea e mafai ona tatou gafatia. Ia i latou o ē o faatalitali pea … , atonu pe o i le lotolotoi o mafatiaga, ‘aua nei uma le faamoemoe. E oo mai i taimi uma le laveai i ē faamaoni, pe i le olaga nei po o i le faavavau. (Alavini F. Meredith III, “Vaai i Luma Atu,” Liahona, Nov. 2021, 115–16)

Gaoioiga Faaopoopo e Aoao Ai

O le matafaioi a matua i le aoaoina o fanau

Sa ta’ua e Helamana le matafaioi a tinā i le faamalolosia o le faatuatua o fitafita a Helamana (tagai Alema 56:47–48). O le nofouta ai i tagata aoga i tulaga eseese faaleaiga, valaaulia i latou e mafaufau e uiga i fesili nei: O le a le matafaioi na faia e tagata o le aiga ma isi i le fausiaina o lou faatuatua? O le a se mea e mafai ona e faia e faamalosia ai le faatuatua o lou aiga ma uo? Valaaulia tagata aoga e tusi atu se faamatalaga o le agaga faafetai i se tasi sa aoaoina i latou i le talalelei.

Aoaoina atu o ni lesona se tele i se aso se tasi

Afai e te manao e aoao atu e uiga i le autau talavou i se lesona se tasi, mafaufau e valaaulia tagata aoga e mafaufau loloto po o a uiga latou te mananao ai i o latou olaga. Ona valaaulia lea o i latou e vaavaai mo uiga o le autau talavou i le Alema 53:16–21, Alema 56:45–48; 57:19–21; 26–27. Ona mafai lea ona latou tusia vave se ata o i latou lava ma tusi ni uiga latou te tutusa ai ma le autau talavou ma uiga latou te mananao e atiina a’e ina ia mulimuli atoatoa atili ai i le Alii.