Alema 53

Tausiaina o a Tatou Feagaiga

Tatou te feagai uma lava ma tofotofoga i lenei olaga ia e mafai ona faaosoosoina ai i tatou e solia a tatou feagaiga ma le Atua. Na tuuina mai e le nuu o Amona ia i tatou se faataitaiga mamana o le tausiaina o feagaiga e tusa lava pe feagai ma ni tulaga faigata. O le faamoemoega o lenei lesona o le fesoasoani lea e faateleina lou naunau e tausia au feagaiga ma le Atua.

Aoao tagata aoga ia avea ma tagata tausi feagaiga. O le osiaina ma le tausiaina o feagaiga o se tasi lea o auala e mafai ona tatou faaalia ai lo tatou tuuto ia avea e faapei o Iesu Keriso. Fesoasoani i tagata aoga ia iloa le mana paia, alofa mutimutivale, ma le aafiaga e mafai ona latou maua e ala i le osiaina ma le tausiaina faamaoni o feagaiga ma le Tama Faalelagi.

Sauniuniga a le tagata aoga: Valaaulia tagata aoga e sue le upu feagaiga i le O le Taiala i Tusitusiga Paia po o le Lolomifefiloi o le Tusi Paia ma ia saunia e faasoa mai pe aisea e taua ai le tausia o a tatou feagaiga ma le Atua.

Gaoioiga e Mafai Ona Aoao Ai

O le ala o feagaiga

Mafaufau e faaali atu le ata lenei pe tusi se ata o se mea faapena i luga o le laupapa. Atonu e te filifili e tuu atu i tagata aoga ni kopi o le ata nai lo le valaauliaina o i latou e tusi le ata o le ala i a latou api talaaga mo suesuega.

I lau api talaaga mo suesuega, tusi ai se ata o se ala e pei o le ata lenei e faatusa i o tatou olaga ma feagaiga taua e manaomia ona tatou osia e toe foi atu ai i le Tama Faalelagi. Nai lo le tusiaina o ata faalapotopoto, e mafai ona e tusia feagaiga ia e faatusa i ai ata taitasi. Mo se faataitaiga, nai lo le tusia o le ata lona fa (faitauina mai le pito i lalo), e mafai ona e tusia “faaeega paia o le malumalu” faasolo i luga o le ala.

Fai se faailoga (pe tusi se ata o se faatusa o oe lava) e ta’u mai ai poo fea o loo e i ai i le taimi nei i luga o lau lava ala o feagaiga patino.

E alolofa le Tama Faalelagi ma Iesu Keriso ia te oe ma o le a fesoasoani ia te oe i au taumafaiga e tumau ai i luga o le ala o feagaiga, lea e toe taitai atu ai ia i La’ua. Faaalu sina taimi e manatua ai feagaiga ua uma ona e osia ma i La’ua ma auala o loo e taumafai ai e tausia na feagaiga. (Afai o le a fesoasoani le toe iloilo o feagaiga tatou te osia i le papatisoga ma faafou e ala i le faamanatuga, faitau le Mosaea 18:8–10 ma le Moronae 4:3.)

I se vaega o le uluai faatalanoaga [ma le au tusitala] a Peresitene Russell M. Nelson o le perofeta faato’ā valaauina, sa ia aoao mai ai:

O lenei, i tagata taitoatasi o le Ekalesia ou te faapea atu, tumau i le ala o feagaiga. O lo outou tuuto e mulimuli i le Faaola e ala i le osiaina o feagaiga ma Ia ona tausiaina lea o na feagaiga, o le a matala ai le faitotoa i faamanuiaga uma faaleagaga ma avanoa ia e maua e alii, tamaitai, ma fanau i soo se mea. (Russell M. Nelson, “A’o Tatou Agai Faatasi Atu i Luma,” Liahona, Ape. 2018, 7)

• O le a le uiga ia te oe o le “tumau i le ala o feagaiga”?

• O a faamanuiaga o le a tuuina mai e le Tama Faalelagi ma Iesu Keriso ia i latou o e tumau i le ala o feagaiga?

Atonu e te manao e tusi ni mea e pei o le “ola e faavavau,” “avea e faapei o le Atua,” “aiga e faavavau,” ma isi i le faaiuga o lau atatusi o le ala.

I se fua o le 1 i le 5 (1 o le leai o se naunautaiga po o se tuutuuga ma le 5 o le i ai o se naunautaiga poo se tuutuuga malosi), mafaufau loloto i au tali i fesili nei:

• O faapefea lou naunautai e tausia o feagaiga ua uma ona e osia ma le Atua? Aisea?

• O faapefea lou naunautai e osia feagaiga ma Ia ia o loo taoto mai pea i ou luma? Aisea?

A o e suesue i le asō, saili le fesoasoani mai le Tama Faalelagi ia malamalama ma naunau atili ai e osia ma tausia feagaiga ma Ia.

O tagata o Amona

Faaali atu se ata o le nuu o Amona o loo tanuina a latou auupega.

I le Alema 24, o se vaega o sa Lamanā na salamo na ta’ua o le nuu o Amona na osia se feagaiga tulaga ese ma le Atua e puipuia i latou mai le toe pauu atu i a latou agasala muamua ina ua uma ona faamamāina e le Faaola.

Faitau le Alema 53:10–12 e toeiloilo ai a latou feagaiga (po o tautoga).

• E tusa ai ma le fuaiupu 11, o le a le mea sa latou naunau e fai e tausia ai la latou feagaiga?

Mulimuli ane, ina ua osofa’ia e se autau malosi a sa Lamanā ia sa Nifaē, sa faamalosia Kapeteni Moronae ma ana autau i se taua matautia. Faitau le Alema 53:13 ma le saunoaga lenei a Elder Richard G. Scott (1928–2015) o le Korama a Aposetolo e Toasefululua, ma vaavaai mo le faaiuga faigata na feagai ma le nuu o Amona.

Sa i ai le nuu o Amona i se taimi faigata tele o o latou olaga faaleagaga. Sa latou faamaoni i a latou feagaiga ia aua lava nei tagofia a latou auupega. Ae na latou malamalama o le tiute o tamā o le avatu o le puipuiga i o latou aiga. O lena manaoga na foliga mai ua lava telē e tatau ai ona mafaufauina le solia o la latou feagaiga. (Richard G. Scott, “Malosi Patino e ala i le Togiola a Iesu Keriso,” Liahona, Nov. 2013, 82)

Faasino atu i lau atatusi o le ala o le feagaiga. I le va o le mea o loo e i ai nei i luga o le ala ma feagaiga i le lumanai ua valaauliaina oe e le Faaola e osia, lisi ni tulaga e ono faaosoosoina ai le autalavou e solia feagaiga ua uma ona latou osia ma faatosina ese ai i latou mai le osia o feagaiga i le lumanai, e aofia ai feagaiga o le malumalu.

Valaaulia volenitia e lisi ni tulaga pe tusi ni mea faalavefau sa latou manatu i ai i luga o le ala i luga o le laupapa.

A o faaauau pea ona e suesue, manatunatu pe mafai faapefea e le Faaola ona fesoasoani ia te oe e agai i luma e tusa lava po o fea o e i ai ma luitau o loo feagai ma oe i le taimi nei.

O le apoapoaiga a le perofeta o Helamana

Faitau le Alema 53:14–15; 56:7–8, ma vaavaai mo le apoapoaiga a le perofeta o Helamana i le nuu o Amona. (O le Alema 56 o se tusi na tusi atu ai Helamana ia Kapeteni Moronae e faamatala ai le tulaga.)

• E faapefea ona e aoteleina mea ua e aoaoina e uiga i feagaiga ma le Atua?

Atonu na e aoaoina upumoni e pei o le taimi tatou te filifili ai e tausia a tatou feagaiga ma le Tama Faalelagi ma Iesu Keriso, o le a La’ua fesoasoani ia i tatou ma faamalosia i tatou ma afai tatou te filifili e solia a tatou feagaiga ma i La’ua, o le a tatou lē maua faamanuiaga faamoemoeina.

Sa faamalamalama mai e Elder Scott le ala na faamanuiaina ai e le Atua le nuu o Amona mo le tausia o a latou feagaiga.

O la latou tautinoga lotomaualalo i le olaga atoa e lafoai a latou agasala, na tele atu mea na tupu mai ai e puipuia ai o latou aiga nai lo se isi lava mea na mafai ona latou faia i luga o le tafa o le taua. O lo latou usiusitai na lē faoa ai o latou faamanuiaga. Sa faamalosia ma faamanuiaina ai i latou ma faamanuiaina ai foi ia tupulaga i le lumanai. (Richard G. Scott, “Malosi Patino e ala i le Togiola a Iesu Keriso,” Liahona, Nov. 2013, 83)

Mafaufau e valaaulia tagata aoga e auiliili faalemafaufau ni tali i fesili nei i ni paga pe i ni vaega toalaiti foi. Ona valaaulia lea o vaega taitasi e tusi se tali i luga o le laupapa i tafatafa o le ala o feagaiga.

• O a nisi o auala e ono faamalosia ma faamanuiaina ai oe e le Alii a o e taumafai e osia ma tausia au feagaiga?

• E mafai faapefea e le tausiaina o au feagaiga ona faamalosia ai lau sootaga ma le Alii?

E lua afe alii talavou ua ulu atu i se feagaiga

O le nuu o Amona o e na osia le feagaiga sa usitai i le fautuaga a Helamana ia aua ne’i tagofia auupega. O se tasi o auala na faamanuiaina ai i latou e le Alii sa auala atu lea i le filifiliga a o latou atalii e osia ma tausia se feagaiga a i latou lava. I mataupu i le lumanai ua tatou aoao ai e faapea na faaaoga e le Atua nei alii talavou tausi feagaiga i ni auala faavavega e puipuia ai o latou aiga ma tagata sa Nifaē.

Faitau i le Alema 53:16–22. Faailoga uiga faaalia ma faamatalaga o nei alii talavou ia o le a fesoasoani ia i latou e tausia feagaiga. (Atonu e fesoasoani le iloa e faapea o le upu mamalu e mafai ona faasino i le toafimalie, manatu mamafa, pe magafagafa.)

• O a ni uiga faaalia na e maitauina i nei alii talavou ia o le a fesoasoani i le autalavou i aso nei e tausia ai a latou feagaiga?

• O le a sou manatu na faapefea ona aafia nei alii talavou i le mausali o o latou mātua i le tausia o feagaiga?

• O ai e te iloa o sē ua avea ma faataitaiga sili ia te oe i le tausia o feagaiga?

O lau ala o feagaiga

Faamaumau i lau api talaaga mo suesuega mea sa e aoaoina pe lagonaina i le asō ia e mafai ona faateleina ai lau tuutuuga e tumau i luga o le ala e toe foi atu ai i le Tama Faalelagi ma Iesu Keriso. E mafai ona e faaaofia ai soo se faaosoosoga po o ni faatosinaga e te feagai ai i luga o lou ala o feagaiga ma pe mafai faapefea e lou naunautaiga ma lou faalagolago i le Alii ona fesoasoani ia te oe e faatoilaloina ai i latou.

Mafaufau e tuuina atu lau molimau i le ala ua faamanuiaina ai oe e le Atua mo le osiaina ma le tausiaina o feagaiga ma Ia.

Manatu ma Talaaga o Faamatalaga

O le a se mea e mafai ona fesoasoani ia te a’u e tausia ai a’u feagaiga pe a faigata?

Na aoao mai Sister Linda K. Burton, o lē sa avea ma Peresitene Aoao o le Aualofa:

Mai mafuaaga uma lava e ao ai ona tatou filiga atili i le tausiga o a tatou feagaiga, o le mafuaaga lenei e sili atu le malosi nai lo mafuaaga uma—o le alofa. …

Aisea na naunau ai le Faaola e tausia Lana feagaiga ma le Tama ma faataunuu Lana misiona paia e togiola mo agasala a le lalolagi? Ona o Lona alofa mo Lona Tama ma Lona alofa mo i tatou. …

… O le tausiga o feagaiga o se tasi lea o ala e faaalia ai lo tatou alolofa mo le Togiola lē i’u a lo tatou Faaola ma le Togiola ma le alofa atoatoa a lo tatou Tama oi le Lagi. (Linda K. Burton, “O Le Mana, Olioli, ma le Alofa e Maua i le Tausiga o Feagaiga,” Liahona, Nov. 2013, 114)

Na faasoa mai Peresitene M. Russell Ballard o le Korama a Aposetolo e Toasefululua:

O nisi taimi e faaosoosoina ai i tatou e tuu atu o tatou olaga ia sili atu ona pulea e mea faigofie nai lo le feagaiga. E lē faigofie i taimi uma le ola i tulaga faatauaina o le talalelei ma tu atu mo le mea moni ma molimau atu i le Toefuataiga. … Ae e leai se mana faaleagaga i le ola ai i mea faigofie. E oo mai le mana pe a tatou tausia a tatou feagaiga. (M. Russell Ballard, “Like a Flame Unquenchable,” Liahona, Iulai 1999, 86)

Na faamalamalama mai e Elder D. Todd Christofferson o le Korama a Aposetolo e Toasefululua:

The Power of Covenants

In times of distress, let your covenants be paramount and let your obedience be exact.

O feagaiga paia e fausiaina tagata Kerisiano malolosi. Ou te uunaia outou taitoatasi ia agavaa mo, ma ia mauaina sauniga uma o le perisitua e te mafaia ona e faamaoni lea e tausi ia folafolaga na e osia e ala i feagaiga. I taimi o mafatiaga, ia avea au feagaiga ma mea e sili ona taua ma ia tonu foi ma atoatoa lou usiusitai. Ona mafai lea ona e ole atu i le faatuatua, aua lava nei masalosalo, e tusa ai ma mea e te manaomia, ona tali mai lea o le Atua. O le a Ia lagolagoina oe a o e galue ma vaavaai. I Lana lava taimi ma le ala, o le a Ia faaloaloa mai ai lona aao ia te oe ma faapea mai, “O A’u lenei.” (D. Todd Christofferson, “O Le Mana o Feagaiga,” Liahona, Me 2009, 22)

Matamata le vitiō “Tutū i Nofoaga Paia” (5:36), ma vaavaai mo mea na fesoasoani i le tamaitai talavou e tausia ai ana feagaiga ma manao i feagaiga o le malumalu i le lumanai.

Standing in Holy Places

A young woman reflects on the blessings of walking the covenant path as she makes her journey to the temple.

Gaoioiga Faaopoopo e Aoao Ai

Alema 53:9. “Faatuiesega … i totonu o i latou lava”

Tusi mea nei i luga o le laupapa: Korama a le Perisitua, Vasega a Tamaitai Talavou, Uarota po o Paranesi, ma Aiga. Ona fesili atu lea po o le a se mea e ono mafai ona fevaevaea’i ai nei vaega ma pe o a ni tulaga matautia e ono tulai mai.

Valaaulia tagata aoga e faitau le Alema 53:8–9. Fesoasoani ia i latou e faailoa mai se mataupu faavae e pei o lenei: Afai e fevaevaea’i tagata o le Ekalesia a le Alii, ona tatou tuu lea o i tatou lava i ni tulaga matautia. Uunaia tagata aoga e faasoa mai mea e mafai ona latou faia e taofia ai le fevaevaea’i i a latou lava vasega, korama, ma aiga.

Tausiaina o a tatou feagaiga o le papatisoga

I le agai atu i le amataga o le lesona, mafaufau e valaaulia tagata aoga e faitau le Mosaea 18:8–10; Moronae 4:3; 5:2. Talanoa ma lisi i luga o le laupapa ni folafolaga patino tatou te osia ma le Atua pe a papatisoina i tatou ona toe faafou lea pe a tatou tagofia le faamanatuga.

Ona valaaulia lea o tagata aoga e filifili se tasi o nei folafolaga ma mafaufau i ni faalavefau se lua e ono feagai ma se talavou i lo outou lotoifale a o latou taumafai e tausia lena folafolaga. Valaaulia tagata aoga e vaavaai i le lesona atoa pe mafai faapefea e le faataitaiga a le nuu o Amona ona fesoasoani i se talavou o loo i ai i se tasi o nā tulaga.