Alema 53–63

Vaaiga Aoao

Na tuuina mai e le nuu o Amona ia i tatou se faataitaiga mamana o le tausia o feagaiga e tusa lava pe a feagai ma taunuuga faigata. I le taimi o le taua tele, sa taitaia o latou atalii e Helamana i manumalo ia na faasaoina ai le tele o ola. Sa usiusitai nei fitafita talavou i “upu uma o poloaiga ma le sa’o atoatoa,” ma tuu atu lo “latou faalagolago i le Atua e le aunoa” (Alema 57:21, 27). Mulimuli ane na tuuaia sesē Paorana, o le faamasino sili o sa Nifaē, i le tuulafoaiina o autau i le taua ma sa tatau ona ia filifili pe faapefea ona tali atu.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Alema 53

Faamoemoega o le lesona: O le faamoemoega o lenei lesona o le fesoasoani lea e faateleina le naunautaiga o tagata aoga e tausia a latou feagaiga ma le Atua.

Sauniuniga a le tagata aoga: Valaaulia tagata aoga e sue le upu feagaiga i le O le Taiala i Tusitusiga Paia po o le Lolomifefiloi o le Tusi Paia ma ia saunia e faasoa mai pe aisea e taua ai le tausia o a tatou feagaiga ma le Atua.
Ata e faaali atu: O se atatusi e faapupula ai le ala o feagaiga; o se ata o le nuu o Amona o loo tanumia a latou auupega
Fautuaga faafaiaoga faavitiō: Mafaufau e valaaulia se tagata faamaoni o se uarota po o se paranesi i le lotoifale e auai i le vasega pe pue se vitiō puupuu e faasoa mai ai pe na faapefea ona faamanuiaina i latou e le Alii mo le tausia o a latou feagaiga ma Ia. Ia mautinoa ua maua se faatagaga mai lau taitai faamaopoopo po o le taitai o le polokalama ma taitai perisitua i le lotoifale a o le’i tuuina atu le valaaulia.

Alema 56

Faamoemoega o le lesona: O lenei lesona ua faamoemoe e fesoasoani ai i tagata aoga ia malamalama e faapea a o latou faatinoina ma le lototoa le faatuatua ia Iesu Keriso, o le a faamanuiaina i latou e le Alii i Lona mana.

Sauniuniga a le tagata aoga: Mafaufau e valaaulia tagata aoga e mafaufau i se talavou po o se vaega o le autalavou o ē na faaalia le faatuatua tele i le Alii e ui lava i luitau faigata.
Pepa e tufa atu: “O Le Tulaga na Feagai ma Fitafita Talavou e 2,000”
Fautuaga faafaiaoga faavitiō: Mafaufau e faaali atu le gaoioiga faafetaui mo le vasega. A iloa e se tagata aoga se tali sa’o, valaaulia i latou e faaaoga le vaega o le atatusi e faafesootai ai le mau faasino sa’o i le aotelega pe tusi a latou tali e faaaoga ai le vaega o talanoaga.

Alema 57

Faamoemoega o le lesona: O lenei lesona ua mamanuina e fesoasoani ai i tagata aoga e taumafai e usiusitai ma le atoatoa i poloaiga a le Atua.

Sauniuniga a le tagata aoga: Valaaulia au tagata aoga e mafaufau i faataitaiga o le usiusitai o le Faaola i le Tama Faalelagi ma mafaufau loloto i mea ua latou aoaoina mai i nā faataitaiga.
Fautuaga faafaiaoga faavitiō: Tuu atu i tagata aoga se taimi e faamaea ai ni gaoioiga se lua o gaoioiga e tolu ua faaigoaina A, E, ma le I. Tuu i latou i ni vaega toalaiti i potu vaevae, ma valaaulia tagata aoga taitasi e faasoa ma ā latou vaega se malamalamaaga mai se tasi o gaoioiga na latou filifilia. Ona faafefiloi lea o potu vaevae, ma valaaulia tagata aoga taitasi e faasoa ma le latou vaega fou se malamalamaaga mai le isi gaoioiga na latou filifilia. Toe aumai faatasi le vasega, ma valaaulia tagata aoga e faasoa mai se mea anoa na latou aoaoina mai se isi tagata o le vasega.

Alema 59–61

Faamoemoega o le lesona: O lenei lesona e mafai ona musuia ai tagata aoga ia avea atili e faapei o Iesu Keriso a o latou tali atu i mea sesē a isi faatasi ma le alofa faateleina ma le onosai.

Sauniuniga a le tagata aoga: Valaaulia tagata aoga e o mai saunia i le vasega e faasoa mai mea e faigata ai ona ola i aoaoga a le Faaola ia o loo maua i le 3 Nifae 11:29–30 ae pe aisea e aoga ai le ola ai i na aoaoga.
Fautuaga faafaiaoga faavitiō: Ina ia amata le lesona, mafaufau e faaali atu le saunoaga a Elder David A. Bednar o le Korama a Aposetolo e Toasefululua. Ona valaaulia lea o tagata aoga e faaaoga le vaega o talanoaga e tusi ai ni mafuaaga faaopoopo tatou te ono lagona ai le loto ua faatiga.

Atamai i Aoaoga Faavae Iloiloga 16

Faamoemoega o le lesona: O lenei lesona e mafai ona fesoasoani i tagata aoga e faaaoga upumoni mai fuaitau o le atamai i aoaoga faavae i le afa lona lua o le Tusi a Mamona i o latou olaga.

Sauniuniga a le tagata aoga: Valaaulia tagata aoga e o mai saunia e faasoa mai soo se faamanuiaga po o se mea aoga ua latou maitauina mai le taumafai ai e faaaoga tusitusiga paia i o latou olaga.
Vitiō: “Foiaina o Faafitauli o le Olaga i le Tusi a Mamona” (1:00)
Anotusi e faaali atu: “Atamai i Aoaoga Faavae o le Tusi a Mamona: Alema–Moronae”
Fautuaga faafaiaoga faavitiō: Tuu atu ia lava se taimi i tagata aoga e faasolosolo ai i laasaga A, E, ma le I e faaaoga ai fuaitau o le atamai i aoaoga faavae i le tulaga faataitai na latou filifilia. Valaaulia tagata aoga e faaaoga se aikona lima-matua pe ta i totonu le “saunia” i le talanoaga pe a ua latou saunia e faasoa mai o latou malamalamaaga i le vasega. O le a lagona e tagata aoga le sili atu ona mautinoa e faasoa atu pe afai e lava se taimi e tuuina atu ia i latou e saunia ai.