Helaman 5:14–52

“Ang Panganod nga Mangitngit Pagakuhaon”

Kon kita anaa sa usa ka ngitngit nga lawak, mahimo natong pasigaon ang suga. Unsay atong mabuhat kon kita anaa sa espirituhanong kangitngit? Sa dihang ang kangitngit mitabon sa usa ka grupo sa mga daotang Lamanite, sila gitudloan sa paghinulsol ug pagbaton og hugot nga pagtuo ni Jesukristo. Kini nga leksiyon makatabang kanimo nga mosalig kang Jesukristo aron sa pagwagtang sa mga pagbati sa kahadlok ug kangitngit ug pulihan kini sa Iyang kalipay, kalinaw, ug kahayag.

Dasiga ang mga estudyante sa pagpamalandong. Kon ang mga estudyante adunay panahon sa paghunahuna og maayo mahitungod sa ilang mga kinabuhi ug sa unsay ilang nakat-onan, ang Espiritu Santo makapadayag og personal, may kalabotan nga mga kamatuoran ngadto kanila. Dapita ang mga estudyante sa pagpamalandong kon sa unsang paagi sila nagdapit sa kahayag ug gahom ni Jesukristo diha sa ilang mga kinabuhi.

Pagpangandam sa estudyante: Dapita ang mga estudyante sa pagpamalandong sa mga paagi nga si Jesukristo sama sa kahayag (tan-awa sa Juan 8:12).

Mga Posibleng Kalihokan sa Pagkat-on

Kangitngit ug kahayag

Tabangi ang mga estudyante sa pagsugod sa paghunahuna mahitungod sa kahayag ug kangitngit. Mahimo nimong gamiton ang mga flashlight o mga cell phone aron ipakita kon sa unsang paagi ang pagbutang sa kahayag makawagtang sa kangitngit gikan sa usa ka kwarto. Mahimo nimong isulat diha sa pisara ang mga obserbasyon sa mga estudyante ug sulayi sa pagkonektar sa ilang mga ideya unya diha sa leksiyon inig makamatikod na sila og mga baroganan mahitungod kang Jesukristo.

Paghunahuna og panahon sa dihang ikaw anaa sa usa ka mangitngit nga dapit nga adunay gamay o walay kahayag. Nahinumdoman ba nimo kon unsa ang mahagiton mahitungod sa dili makakita og maayo?

• Gawas nga anaa kita sa usa ka ngitngit nga kwarto, unsa pa ang ubang mga paagi nga kita makasinati og kangitngit sa atong mga kinabuhi? Unsa ang pipila ka mga pagbati nga mahimo nimong ikonektar sa kangitngit?

Pinaagi sa leksiyon, ang mga estudyante kinahanglang makasabot nga dili tanang kangitngit maoy resulta sa sayop nga mga pagpili apan ang kangitngit mahimong matangtang pinaagi sa paggamit og hugot nga pagtuo diha kang Jesukristo.

Hunahunaa ang imong kinabuhi ug bisan unsang kangitngit nga tingali imong nasinati. Samtang magtuon ka karon, pangitaa kon unsay imong mahimo aron mapuno ang imong kinabuhi sa kahayag aron sa pagtabang sa pagwagtang sa kangitngit.

Pangalagad ni Nephi ug ni Lehi

Ang mga anak nga lalaki ni Helaman, si Nephi ug si Lehi, misangyaw sa ebanghelyo ni Jesukristo. Sila mitudlo sa daghan nga mga Nephite kinsa mingsupak ug miapil sa mga Lamanite. Kini nga mga Nephite mihinulsol ug misulay sa pag-ayo sa bisan unsa nga kadaot nga ilang nahimo. Si Nephi ug si Lehi misangyaw uban sa dako nga gahom, ug 8,000 ka mga Lamanite mipili nga maghinulsol ug magpabunyag (tan-awa sa Helaman 4:4; 5:14–19).

Basaha ang Helaman 5:20–22, mangita kon sa unsang paagi ang ilang kalamposan napakgang.

Sa higayon nga kita mag-atubang og mga pagsupak o makasinati og mga pagsulay, kita tingale mokonsiderar nga kini mga mangitngit nga panahon sa atong kinabuhi. Kita tingali makapangutana pa gani kon nganong gitugotan sa Dios nga mahitabo kining mga butanga. Bisan pa niana, kon atong hatagan ug igong pagtagad, atong mamatikdan nga ang Dios kanunayng naglihok sa atong kinabuhi ug gustong mopanalangin kanato.

Aron matabangan ang mga estudyante nga aktibo nga mag-apil sa pagkat-on, mahimo nimong bahinon ang klase sa mga paresan aron sa pagbasa sa mosunod nga mga bersikulo. Usa ka estudyante mahimong mangita og ebidensiya nga anaa ang Dios sa kinabuhi nila ni Nephi ug Lehi (tan-awa sa Helaman 5:23–26). Ang laing estudyante magbasa mahitungod sa Dios nga nagkab-ot ngadto sa mga Lamanite (tan-awa sa Helaman 5:28–33).

Basaha ang Helaman 5:23–33, mangita sa unsay gibuhat ug gisulti sa Dios. Kon ang audio sa Helaman 5 anaa, mahimo ka nga maminaw ug mosubay sa pagbasa. Siguroha ang paghunong ug pagbalik niini kon gikinahanglan.

• Unsa ang imong nakat-onan mahitungod sa Dios gikan niini nga mga bersikulo? Unsa ang imong mga gibati ngadto Kaniya tungod sa imong nakat-onan?

  Mahimo nimong dapiton ang mga estudyante sa paglista diha sa pisara kon unsay ilang nakaplagan. Hisgoti ang mga pamaagi nga ang Dios aktibong nagtabang ug nagpanalangin kanato.

• Sa unsang paagi ang pagdapit sa Dios diha sa bersikulo 29 ug 32 makatabang kanimo nga makita ang Iyang gugma alang sa tanan?

Mahimo nimong linyahan ang mga pulong diha sa Helaman 5:29, 32 nga naglakip sa pagdapit gikan sa Dios.

Kadtong anaa sa bilanggoan natabunan sa kangitngit. Sila wala mahibalo kon unsay buhaton, ug tungod sa kahadlok dili sila makalihok (tan-awa sa Helaman 5:34, 40).

Basaha ang Helaman 5:35–41 aron makita kon sa unsang paagi gitabangan sila sa usa ka tawo nga ginganlag Aminadab nga masabtan kon unsaon ang pagwagtang sa kangitngit.

• Unsa nga mga kamatuoran ang atong makat-onan gikan sa unsay giingon ni Aminadab diha sa bersikulo 41?

Usa ka baroganan nga atong makat-onan mao nga si Jesukristo makawagtang sa kangitngit gikan sa atong kinabuhi kon kita mogamit sa hugot nga pagtuo diha Kaniya ug maghinulsol.

Ang unsay giingon ni Aminadab sa bersikulo 41 angay nga hisgotan sa labi ka detalyado. Ang mga estudyante makabenepisyo sa paghisgot kon nganong si Aminadab miingon nga “kamo kinahanglan gayod nga maghinulsol” ug kon nganong iyang gisugo sila nga mag-ampo sa Dios hangtod nga sila nakabaton og hugot nga pagtuo kang Jesukristo.

Mahimo nimong tabangan ang mga estudyante nga itandi ang pagpasiga sa usa ka flashlight o pagpislit sa switch sa suga ngadto sa pagbansay sa hugot nga pagtuo kang Jesukristo ug paghinulsol.

• Sa unsang paagi sa imong hunahuna ang pagbaton og hugot nga pagtuo kang Jesukristo ug paghinulsol makatabang sa pagtangtang sa kangitngit?

Si Elder Robert D. Hales (1932-2017) sa Korum sa Napulog Duha ka Apostoles mipakigbahin og piho nga mga paagi nga kita makadapit sa kahayag sa Ginoo sa atong mga kinabuhi.

Ang kahayag [ni Jesukristo] mahimong usa ka panagang tali kaninyo ug sa kangitngit sa kaaway samtang magkinabuhi kamo nga takos niini. Gikinahanglan ninyo kana nga kahayag. Gikinahanglan nato kana nga kahayag. Tun-i og maayo ang mga kasulatan ug ang Alang sa Kalig-on sa mga Kabatan-onan [booklet] ug paminawa ang mga pagtulun-an sa inyong mga ginikanan ug mga lider. Dayon, pinaagi sa pagkamasulundon sa maalamon nga tambag, pagkat-on sa pag-angkon sa panalipod nga kahayag sa ebanghelyo isip imong kaugalingon.

Ikaw tingali maghunahuna, “Unsaon nako pagbuhat niana?” Adunay usa lamang ka paagi: kinahanglang makat-on ka sa pagmugna niana nga kahayag kada adlaw pinaagi sa pagtuo kang Jesukristo ug pagsunod sa Iyang mga sugo. (Robert D. Hales, “Out of Darkness into His Marvelous Light,” Liahona, Mayo 2002, 70)

• Unsa ang imong nahibaloan mahitungod kang Jesukristo nga nagtabang kanimo sa pagsabot nga Siya makapanalipod kanato gikan sa kangitngit o makapakuha niini gikan sa atong mga kinabuhi?

Mahimong dapiton ang mga estudyante sa pagkonsiderar sa titulo ni Jesukristo nga Kahayag sa Kalibotan ug kon sa unsang paagi kini nga titulo tingali makadugang sa ilang pagsabot. (Tan-awa sa Jesus Christ, Light of the World, Topical Guide; Doktrina ug mga Pakigsaad 88:6–13.)

Dayon, isulat diha sa pisara ang mosunod nga hugpong sa mga pulong.

• Mga panalangin gikan sa paggamit sa hugot nga pagtuo kang Jesukristo ug paghinulsol

Basaha ang Helaman 5:42–49 ug paghimo og lista sa mga panalangin nga nasinati sa mga tawo sa dihang sila mihinulsol ug migamit sa hugot nga pagtuo kang Jesukristo. Markahi ang mga panalangin nga paminaw nimo labing gikinahanglan sa mga tawo karon.

Mahimo nimong hangyoon ang mga estudyante sa pagsulod ngadto sa ginagmay nga mga grupo ug hisgotan ang mga panalangin nga ilang nailhan. Mahimo usab sila magtinabangay sa matag usa sa mga pag-aghat sa ubos.

Pagpili og usa ka panalangin nga paminaw nimo importante ug gamita kini sa mubo nga pagpasabot kon nganong imong dasigon ang usa ka tawo sa paggamit og hugot nga pagtuo kang Jesukristo.

Pagpili og usa ka panalangin nga imong gibati nga miabot kanimo tungod sa pagpakita og hugot nga pagtuo kang Jesukristo. Ipasabot sa daklit kon nganong makahuloganon kini diha kanimo.

Gikan sa unsay imong nakat-onan ug gibati karon, pamalandongi kon unsa kaha ang imong buhaton aron mosalig ni Jesukristo ug makadawat sa Iyang mga panalangin. Paghimo og usa ka pasalig ug ikonsiderar ang paghimo o pagpahiangay sa usa ka tumong aron sa pagtabang kanimo sa pagtuman niini.

Dasiga ang mga estudyante sa paglihok inubanan sa hugot nga pagtuo sumala sa unsay ilang nakat-onan karon. Pagpamatuod sa abilidad ug tinguha sa Ginoo sa pagpanalangin kanila pinaagi sa Iyang kahayag.

Komentaryo ug Background nga Impormasyon

Unsa kaha kon ang kangitngit nga akong gibati usa ka mental o emosyonal nga sakit?

Si Sister Reyna I. Aburto, kanhi sa Kinatibuk-ang Kapangulohan sa Relief Society, mitudlo:

Ang mga kalisod mahimong moabot usab sa atong kinabuhi, nga makapalimot nato sa kahayag sa Dios ug gani maoy hinungdan nga mangutana kita kon kana nga kahayag anaa pa ba alang kanato. Pipila niini nga mga kalisod mao ang depresyon, kabalaka, ug uban pa nga mga matang sa mental ug emosyonal nga pag-antos. Mahimo kining makausab sa atong paglantaw sa atong kaugalingon, sa uban ug bisan gani sa Dios. Makaapektar kini sa kababayen-an ug kalalakin-an sa tanang edad sa tanang dapit sa kalibotan. …

Kon ikaw kanunayng giliyokan sa “gabon sa kangitngit” [1 Nephi 8:23], dangop ngadto sa Langitnong Amahan. Walay bisan unsa sa imong nasinati ang makausab sa mahangtorong kamatuoran nga ikaw Iyang anak ug nga Siya nahigugma kanimo. Hinumdomi nga si Kristo mao ang imong Manluluwas ug Manunubos, ug ang Dios mao ang imong Amahan. Sila nakasabot. Hunahunaa nga Sila anaa duol nimo, naminaw ug nagtanyag og suporta. (Reyna I. Aburto, “Sa Dag-um ug Kahayag, Ginoo, Ubani Ako!,” Liahona, Nob. 2019, 58)

Si Elder Jeffrey R. Holland sa Korum sa Napulog Duha ka Apostoles mitambag:

Ayaw gayod pagduhaduha [sa gugma sa Dios alang kanimo], ug ayaw ipatig-a ang inyong kasingkasing. Tinguhaa sa matinud-anon ang nasulayan na nga mga buhat sa pagpahinungod nga makadala sa Espiritu sa Ginoo sa inyong kinabuhi. Tinguhaa ang pagtambag niadtong naghupot sa mga yawe alang sa inyong espirituhanong kaayohan. Pangayo og ibahandi ang mga panalangin sa priesthood. Moambit sa sakramento matag semana, ug mohupot gayod sa makapahingpit nga mga saad sa Pag-ula ni Jesukristo. Motuo sa mga milagro. Ako nakasaksi og daghan niini nga miabot dihang ang tanang indikasyon nag-ingon nga wala nay paglaom. Ang paglaom dili gayod mawala. Kon kadtong mga milagro dili dayon mahitabo o sa hingpit o dili gayod mahitabo, hinumdomi ang mismong ehemplo sa kalisod sa Manluluwas: kon ang mapait nga kopa dili mapasa, inom niini ug magmalig-on, nga magsalig sa malipayong mga adlaw nga moabot. (Jeffrey R. Holland, “Sama sa Usa ka Sudlanan nga Nabuak,” Liahona, Nob. 2013, 41)

Dugang nga mga Kalihokan sa Pagkat-on

Mga ehemplo sa kasulatan sa kahayag ug pagpanalipod sa Ginoo

Human mabasa ang mahitungod kang Nephi ug Lehi nga giliyokan sa kalayo ug nakaila nga “[kini ang] Dios” (Helaman 5:26), hunahunaa ang paggamit sa ubang mga ehemplo sa kasulatan sa kahayag ug panalipod sa Ginoo. Dapita ang mga estudyante sa paghimo og lista sa mga ehemplo diha sa kasulatan nga adunay pagkasusama sa Helaman 5. Mahimo nimong ipakita ang mga hulagway o mga pakisayran, ug dapita ang mga estudyante sa paggamit sa bisan unsang himan sa pagtuon sa kasulatan. Pipila ka mga ehemplo nga mahimong hisgotan ug itandi sa mga estudyante naglakip sa mosunod:

• Ang haligi nga kalayo tali sa mga anak sa Israel ug sa kasundalohan ni Paraon didto sa Pulang Dagat (tan-awa sa Exodo 14:24)

• Si Sadrach, Mesach, ug Abed-nego sa nagdilaab nga hudno (tan-awa sa Daniel 3:25–27)

• Si Abinadi gipanalipdan sa paghatod sa iyang mensahe ngadto ni Hari Noah (tan-awa sa Mosiah 13:1–5)

• Ang Tulo ka mga disipulo nga Nephite (tan-awa sa 3 Nephi 28:18–23)

Ang panalipod nga kahayag ni Jesukristo

Mahimo nimong dapiton ang mga estudyante sa pagbasa sa pamahayag ni Elder Hales diha sa leksiyon ug sa pagdrowing og usa ka paghulagway base sa unsay ilang nakat-onan. Kini nga kalihokan mahimong magsugod og usa ka panaghisgotan mahitungod sa mga paagi sa pagdapit sa panalipod nga kahayag sa Manluluwas ngadto sa ilang mga kinabuhi. Samtang mopakigbahin ang mga estudyante og mga ideya, pangutana og follow-up nga mga pangutana sama sa “Sa unsang paagi nakamatikod ka og dugang kahayag diha sa imong kinabuhi samtang nagbuhat ka sa sama ?”

Pagtandi sa Helaman 5 ngadto sa Joseph Smith—Kasaysayan 1

Mahimong makabenepisyo ang mga estudyante gikan sa pagtandi sa mga bahin sa Helaman 5 ngadto sa mga bahin sa kasinatian ni Joseph Smith isip usa ka tin-edyer nga nagpangita sa kamatuoran. Itandi ang panganod sa kangitngit nga nasinati sa mga tawo sa bilanggoan ngadto sa “kangitngit ug sa kalibog” nga nasinati ni Joseph Smith ug sa uban diha sa iyang panahon (Joseph Smith—Kasaysayan 1:13). Ikonsiderar ang pagtandi sa Helaman 5:28 ngadto sa Joseph Smith—Kasaysayan 1:15. Dayon tabangi ang mga estudyante nga makadiskobre kon sa unsang paagi sa parehong duha ka mga ehemplo, ang mga tawo nakabuntog sa kangitngit pinaagi sa pagtawag sa Dios (tan-awa sa Helaman 5:42; Joseph Smith–Kasaysayan 1:16).