Helaman 7–12

Kinatibuk-ang Pagpasabot

Ang propeta nga si Nephi, kinsa anak nga lalaki ni Helaman, nagpuyo sa panahon sa dako nga pagkadaotan. Sa dihang gipangutana siya sa daotang mga Nephite kon nganong mapintas kaayo siya manulti mahitungod kanila, maisogon siyang mipamatuod sa Manluluwas. Gipasidan-an niya ang iyang katawhan nga sila pagalaglagon kon sila dili maghinulsol. Human sa iyang mga panagna mahitungod sa pagpatay sa labaw nga maghuhukom, iyang gipamalandong ang tanan nga gipakita sa Ginoo kaniya. Samtang iyang gibuhat, aduna siyay talagsaong kasinatian diin ang Ginoo mipanalangin kaniya tungod sa iyang pagkamatinud-anon. Mihangyo siya sa Ginoo sa pagpadala og kagutom taliwala sa mga Nephite aron sila maghinulsol. Isip resulta, daghan sa mga Nephite ang mipaubos sa ilang mga kaugalingon, ug ang mga katawhan napanalanginan na usab og ulan. Bisan pa niini nga milagro, sa paglabay sa panahon kadaghanan sa mga tawo mitalikod na usab sa Ginoo ug nagpadayon sa ilang pagkadaotan.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Helaman 7–10

Katuyoan sa leksiyon: Kini nga leksiyon makatabang sa mga estudyante nga makasabot sa mahinungdanong tahas nga gihoptan sa mga propeta diha sa plano sa Langitnong Amahan.

• Pagpangandam sa estudyante: Dapita ang mga estudyante sa paghisgot ngadto sa usa ka higala o sakop sa pamilya kon sa unsang paagi ang buhi nga mga propeta nakaapekto sa ilang mga kinabuhi.

• Sugyot sa pagtudlo pinaagi sa videoconference: Aron maandam ang mga estudyante sa pagtuon ug pagdiskobre sa mga kamatuoran mahitungod sa propeta sa Ginoo, ikonsiderar ang paggamit sa whiteboard nga feature aron isulat ang ulohan nga Mga Kamatuoran mahitungod sa mga Propeta sa Ginoo. Dapita ang mga estudyante sa paglista og mga kamatuoran ubos niini nga ulohan sa tibuok leksiyon.

Helaman 8

Katuyoan sa leksiyon: Kini nga leksiyon makatabang sa mga estudyante nga makasabot nga ang mga propeta nagpamatuod kang Jesukristo, ug kini makatabang kanila nga mobati sa kamatuoran sa mga pagpamatuod sa mga propeta.

• Pagpangandam sa estudyante: Ikonsiderar ang pagdapit sa mga estudyante sa pagpangita og usa o labaw pa sa usa ka mga panag-ingnan sa mga propeta ug apostoles nga nagpamatuod kang Jesukristo diha sa usa ka bag-ohay lang nga kinatibuk-ang komperensiya.

• Sulod nga ipakita: Ang listahan sa mga propeta ug mga kasulatan alang sa opsiyon A

• Sugyot sa pagtudlo pinaagi sa videoconference: Alang sa mga estudyante kinsa mopili sa opsiyon A, ipakita ang listahan sa mga propeta ug mga pakisayran sa kasulatan gikan sa leksiyon. Alang sa mga estudyante kinsa mopili sa opsiyon B, ikonsiderar ang pagpakigbahin diha sa chat sa link sa “Espesyal nga mga Saksi ni Kristo” nga koleksiyon sa bidyo aron sila makakita sa pipila ka mga pagpamatuod sa mga propeta ug apostoles sa modernong panahon.

Helaman 10

Katuyoan sa leksiyon: Kini nga leksiyon makatabang sa mga estudyante nga makasabot sa mga kamatuoran gikan sa kasinatian ni Nephi nga modapit sa direksiyon ug gahom sa Ginoo ngadto sa ilang mga kinabuhi.

• Pagpangandam sa estudyante: Dapita ang mga estudyante sa pagbasa sa Helaman 10 ug sa pagpangita sa unsay ilang makat-onan gikan sa ehemplo ni Nephi nga makapanalangin sa ilang mga kinabuhi.

• Mga Handout: “Pagpamalandong ug ang Personal nga Pagpadayag,” “Pagtinguha sa Pagbuhat sa Kabubut-on sa Ginoo uban sa Pagkawalay Kakapoy,” ug “Ang Gahom sa Pagbugkos”

• Sugyot sa pagtudlo pinaagi sa videoconference: Alang sa mga kalihokan sa grupo, mahimo nimong ibutang ang mga estudyante sa mga breakout room sa mga grupo nga tag-tulo. Mahimo dayon ka nga mosulod sa matag breakout room aron sa pagtanyag og tabang kon gikinahanglan o sa pagpaniid lamang sa mga kalihokan sa mga estudyante.

Helaman 11–12

Katuyoan sa leksiyon: Kini nga leksiyon makatabang sa mga estudyante nga mobati og mas dakong tinguha sa pagdugang sa pagpaubos ngadto sa Dios.

• Pagpangandam sa estudyante: Ikonsiderar ang pagdapit sa mga estudyante sa pagbasa sa pakigpulong ni Presidente Ezra Taft Benson niadtong Abril 1989 sa kinatibuk-ang komperensiya nga giulohan og “Beware of Pride.” Kini nga pakigpulong makita diha sa Gospel Library o sa Ensign, Mayo 1989, 4–7.

• Sulod nga ipakita: Ang hulagway nga adunay mga numero; ang dayagram sa liyok sa garbo

• Sugyot sa pagtudlo pinaagi sa videoconference: Ikonsiderar ang pagpakita sa dayagram sa liyok sa garbo sa sinugdanan sa leksiyon aron makakopya ang mga estudyante niini ngadto sa ilang journal sa pagtuon aron sa pagkompleto sa kalihokan sa pagtuon. Sa laing paagi, mahimo kang maghatag og usa ka attachment sa hulagway nga maablihan sa mga estudyante sa ilang kompyuter ug mahimo nga iprinta alang sa paggamit sa panahon sa klase.

Rebyo 17 sa Doktrinal nga Kahanas

Katuyoan sa leksiyon: Kini nga leksiyon gituyo aron sa pagtabang sa mga estudyante sa pagsag-ulo og daghan nga mga pakisayran sa kasulatan ug mga mahinungdanon nga mga hugpong sa mga pulong sa kasulatan gikan sa kataposang 12 ka tudling sa doktrinal nga kahanas diha sa Basahon ni Mormon.

• Pagpangandam sa estudyante: Dapita ang mga estudyante sa paghunahuna sa mga butang diha sa ilang mga kinabuhi nga ilang nasag-ulo. Giunsa nila pagsag-ulo niining mga butanga, ug sa unsang paagi kini nakatabang kanila?

• Sulod nga ipakita: “Doktrinal nga Kahanas sa Basahon ni Mormon: Alma–Moroni”

• Mga materyal alang sa mga estudyante: Papel, lapis, ug mga gunting alang sa paghimo og mga memory card

• Sugyot sa pagtudlo pinaagi sa videoconference: Sa sinugdanan sa leksiyon, ikonsiderar ang pagtugot sa mga estudyante nga ipakigbahin ang ilang mga tubag gikan sa kalihokan sa pagpangandam sa mga estudyante.