Helaman 10

Ang Ginoo Nagpanalangin kang Nephi

Pagkahuman sa iyang mga panagna mahitungod sa pagpatay sa labaw nga maghuhukom, namalandong si Nephi sa tanan nga gipakita sa Ginoo ngadto kaniya, apan siya usab naluya tungod sa pagkadaotan sa mga katawhan. Sa iyang pagpauli, aduna siyay talagsaong kasinatian diin ang Ginoo mipanalangin kaniya tungod sa iyang pagkamatinud-anon sa pagbuhat sa Iyang kabubut-on. Kini nga leksiyon makatabang kanimo nga makasabot sa mga kamatuoran gikan sa kasinatian ni Nephi nga makadapit sa direksiyon ug gahom sa Ginoo ngadto sa imong kinabuhi.

Dapita ang estudyante nga mahimong responsable alang sa ilang kaugalingon nga pagkat-on. Samtang importante ang tahas sa magtutudlo, ang mga tigkat-on sa kataposan maoy responsable alang sa ilang kaugalingong edukasyon. Mas makakat-on ang mga estudyante kon magsiksik sila sa pulong sa Dios aron sa pagdiskobre og mga kamatuoran mahitungod kang Jesukristo ug sa Iyang ebanghelyo para sa ilang mga kaugalingon. Tabangi ang imong mga estudyante nga makakita sa kabililhon sa personal nga paghunahuna, pagpamalandong, ug interaksiyon sa klase.

Pagpangandam sa estudyante: Dapita ang mga estudyante sa pagbasa sa Helaman 10 ug sa pagpangita sa unsay ilang makat-onan gikan sa ehemplo ni Nephi nga makapanalangin sa ilang mga kinabuhi.

Mga Posibleng Kalihokan sa Pagkat-on

Pagkahimong kwalipikado

Ikonsiderar ang pagsugod sa klase pinaagi sa pagdapit og usa ka estudyante kinsa nakahibalo kon unsaon sa pagbuhat og usa ka piho nga kahanas, sama sa paghigot sa usa ka kurbata, aron sa pagpasabot ngadto sa laing estudyante kong unsaon kini sa pagbuhat. Pagkahuman sa usa ka mubo nga pagsulay, ang hanas nga estudyante mahimo dayong mopakita sa uban pang estudyante kon unsaon sa pagbuhat sa kahanas. Kon mopili ka sa pagbuhat niini, laktaw ngadto sa ikaduhang pangutana sa ubos.

• Makahunahuna ka ba og higayon diin ikaw nakakat-on og usa ka butang gikan sa panig-ingnan sa uban? Unsa kadto?

• Ngano nga ang pagkat-on pinaagi sa panig-ingnan mahimong labi ka epektibo?

Karon makabaton ka og mga kahigayonan sa pagkat-on og mga kamatuoran gikan sa panag-ingnan ni propeta Nephi. Tingali imong mahinumdoman nga si Nephi bakak nga giakusahan nga nalambigit sa pagpatay sa labaw nga maghuhukom sa mga Nephite (tan-awa sa Helaman 9:16–20). Pinaagi sa inspirasyon, gitudlo ni Nephi ang mamumuno ug siya gibuhian (tan-awa sa Helaman 9:20–38). Sa pagpauli ni Nephi, aduna siyay mahinungdanong kasinatian uban sa Ginoo nga narekord diha sa Helaman 10. Ang mosunod nga tulo ka mga kalihokan makatabang sa paggiya sa imong pagtuon sa kapitulo.

Ikonsiderar ang pag-apud-apod ngadto sa mga estudyante sa mosunod nga mga handout ug dapita sila sa pagkompleto sa mga kalihokan.

Mahimo nimong bahinon ang mga estudyante sa gagmay nga mga grupo aron sa pagkompleto sa usa sa mga kalihokan sa pagtuon. Seguroha ang pagtudlo og usa ka lider sa panaghisgotan alang sa matag grupo. Human ang mga estudyante adunay igong panahon sa pagkompleto sa unang kalihokan sa pagtuon, pagporma og bag-ong mga grupo ug ipakompleto ang laing kalihokan sa pagtuon. Kini nga proseso mahimong balikon hangtod ang mga estudyante makahuman sa tanang tulo ka mga kalihokan sa pagtuon.

Ang laing ideya mao ang paghatag sa mga estudyante og panahon sa pagtuon sa mga materyal gikan sa usa sa mga handouts nga magtinagsa ug sa pag-andam og usa ka mubo nga leksiyon mahitungod sa unsay ilang nakat-onan. Mahimo dayong hatagan ang mga estudyante og mga kahigayonan sa pagtudlo sa ilang leksiyon ngadto sa gamay nga grupo, o pipila ka mga boluntaryo ang mahimong motudlo sa ilang leksiyon ngadto sa klase.

Kalihokan sa Pagtuon 1: Pagpamalandong ug ang Personal nga Pagpadayag

Unsa ang imong nakat-onan mahitungod sa pagdawat og pagpadayag sa imong kinabuhi? Sa unang bahin sa Helaman 10, atong nakat-unan ang mahitungod sa kasinatian ni Nephi diin siya nakadawat og pagpadayag ug gahom gikan sa Dios. Ang panag-ingnan ni Nephi nagtudlo kanato kon sa unsa nga paagi kita makadugang sa atong abilidad sa pagdawat ug pag-ila sa pagpadayag gikan sa Ginoo.

Basaha sa Helaman 10:1–3, mangita kon unsay nakainghon nga si Nephi makadawat og pagpadayag gikan sa Ginoo.

• Unsay imong nakaplagan?

Hatagi og pagtagad ang pulong namalandongdiha sa bersikulo 2 ug 3. Mahimo nimong markahan kana nga pulong diha sa imong kasulatan.

Usa ka kamatuoran nga atong makat-onan gikan niini nga mga bersikulo mao nga ang pagpamalandong sa mga butang sa Ginoo mag-andam kanato sa pagdawat og pagpadayag.

• Unsaon nimo paghulagway ang pagpamalandong sa usa ka tawo nga dili sigurado kon unsa kini?

• Ngano kaha ang pagpamalandong makatabang kanato nga makadawat og pagpadayag?

Si Presidente M. Russell Ballard sa Korum sa Napulog Duha ka Apostoles mitudlo:

Importante kini nga mohilum ug mamati ug mosunod sa Espiritu. Daghan kaayo kita og mga kalinga nga mokuha sa atong atensiyon, dili sama sa bisan unsang panahon sa kasaysayan sa kalibotan.

Ang tanan nagkinahanglan og panahon sa pagpamalandong ug sa paghunahuna. Bisan ang Manluluwas sa kalibotan, sa panahon sa iyang mortal nga pangalagad, may panahon sa pagbuhat niini. (M. Russell Ballard, “Humilom Kamo, ug Ilhon Ninyo nga Ako Mao ang Dios” [Church Educational System nga debosyonal alang sa mga young adult, Mayo 4, 2014], broadcasts.ChurchofJesusChrist.org)

• Unsa ang pipila sa mga makabalda nga makapalisod sa pagpamalandong sa espirituwal nga mga butang?

• Unsa ang pipila ka “mga butang sa Ginoo” nga mahimo nimong gahinan og panahon sa pagpamalandong?

• Unsa nga mga kasinatian ang imong nasinati o imong nahibaloan ngaang pagpamalandong mosangpot ngadto sa pagdawat og pagpadayag?

Paghunahuna og usa ka tumong nga imong mahimo aron sa paggamit niini nga kamatuoran sa imong kinabuhi. Ikonsiderar ang pagrekord sa imong tumong diha sa imong journal sa pagtuon.

Kalihokan sa Pagtuon 2: Pagtinguha sa Pagbuhat sa Kabubut-on sa Ginoo uban sa Kawalay Kaluya

Paghunahuna sa panahon sa dihang ikaw gihangyo sa pagbuhat og butang nga daw lisod kaayo. Ang Ginoo mihatag ni propeta Nephi og malisod nga mga sugo sa dihang Siya mihangyo kaniya sa pagtawag sa daotan nga mga Nephite ngadto sa paghinulsol. Bisan og lisod kini, si Nephi naningkamot pag-ayo sa pagsunod sa kabubut-on sa Ginoo.

Basaha ang Helaman 10:4–5 ug pangitaa unsay gisulti sa Ginoo ngadto ni Nephi isip resulta sa iyang pagkamatinud-anon.

• Unsa ang pipila sa mga pulong o hugpong sa mga pulong nga mipatigbabaw diha kanimo niini nga mga bersikulo? Ngano man?

Usa ka kamatuoran nga atong makat-onan gikan niini nga mga bersikulo mao nga kon kita maningkamot sa pagbuhat sa kabubut-on sa Ginoo ug mag-alagad Kaniya uban sa kawalay kakapoy, ang Ginoo mopanalangin kanato sa daghang paagi.

• Unsa ang makapalisod niini sa pagtinguha sa pagbuhat sa kabubut-on sa Ginoo?

• Unsa ang imong mahinumdoman mahitungod sa Ginoo nga mohimo niini nga mas sayon sa pagsunod sa Iyang kabubut-on kay sa imong kaugalingon?

Mahimong makatabang ang pagdapit sa mga estudyante sa pagbasa sa Doktrina ug mga Pakigsaad 64:33 ug sa may kalabotan nga pagtulon-an nga gipakigbahin sa Ginoo mahitungod sa kawalay kaluya. Mahimong isulat sa mga estudyante kini nga pakisayran sunod sa Helaman 10:4–5 diha sa ilang mga kasulatan.

• Unsa ang pipila ka mga paagi nga si Jesukristo mialagad sa Langitnong Amahan sa walay kaluya?

• Sa unsa nga paagi kaha nimo maalagaran ang Langitnong Amahan ug si Jesukristo sa walay pagkaluya sa atong panahon?

Hunahunaa ang tumong nga imong mahimo sa pagtinguha sa kabubut-on sa Langitnong Amahan ug sa pag-alagad Kaniya uban sa kawalay kaluya. Ikonsiderar ang pagrekord sa imong tumong diha sa imong journal sa pagtuon.

Kalihokan sa Pagtuon 3: Ang Gahom sa pagselyo

Hunahunaa nga ang Ginoo mihatag kanimo og gahom sa paghimo sa bisan unsa nga imong pangayoon Kaniya. Ngadto ni propeta Nephi, ang Dios miingon nga Iyang ihatag ang bisan unsa nga gitinguha ni Nephi tungod kay siya “dili mangayo niana nga supak sa kabubut-on sa [Dios].” (Helaman 10:5).

Basaha ang Helaman 10:7, mangita og usa sa mga butang nga ang Ginoo mihatag ni Nephi og gahom sa pagbuhat.

Ang gahom nga gihulagway diha sa bersikulo 7 gitawag nga gahom sa pagselyo. Gikan niini nga bersikulo, atong makat-onan nga ang gahom sa pagsilyo magbugkos ug maghubad dinhi sa yuta ug didto sa langit. Mahimong makatabang ang pagkahibalo nga ang pagbugkos nagpasabot sa pagkonektar o pagdugtong ug ang paghubad [loose] nagpasabot sa pagtangtang o pagtunaw.

Ikonsiderar ang pagsulat sa mga bersikulo nga gilista sa mosunod nga parapo diha sa pisara ug dapita ang mga estudyante sa pagsulat niini nga mga cross-reference tapad sa Helaman 10:7 diha sa ilang mga kasulatan.

Ang gahom sa pagbugkos nga gihisgotan sa bersikulo 7 susama sa gahom sa pagbugkos nga gihuptan ni Elias (tan-awa sa 1 Hari 17:1), ni Pedro ug sa apostoles (tan-awa sa Mateo 16:15–19; 18:18), ug ni Joseph Smith (tan-awa sa Doktrina ug mga Pakigsaad 132:46). Ang mga yawe sa sama niini nga gahom gihuptan karon sa Presidente sa Simbahan ni Jesukristo sa mga Santos sa Ulahing mga Adlaw ug niadto kinsa siya midelegar niini. Gamit niini nga gahom, ang mga pamilya masilyohan sa kahangtoran pinaagi sa mga ordinansa sa templo.

• Ngano kaha sa imong hunahuna nga gusto sa Langitnong Amahan nga maghimo kita og mga pakigsaad nga magamit niining kinabuhia ug sa sunod?

• Sa unsa nga paagi ka napanalanginan pinaagi sa kahibalo nga ang mga pamilya maselyohan sa kahangtoran?

• Sa unsa nga paagi nga ang kahibalo nga ang mga pamilya mahimong magkahiusa sa kahangtoran makaapekto sa imong panghunahuna o mga pagpili karon?

Human makompleto sa mga estudyante ang mga kalihokan sa pagkat-on, ikonsiderar ang pagdapit og daghang mga estudyante sa pagpakigbahin og usa ka butang nga ilang gibati nga importante kaayo o makahuluganon gikan sa ilang mga pagtuon. Kon itugot sa panahon, makatabang usab kon basahon ang Helaman 10:11–19 aron makita kon unsa ang gibuhat ni Nephi human niining sagrado nga kasinatian uban sa Ginoo.

Ipamatuod ang mga kamatuoran nga gitun-an karon, ug dasiga ang mga estudyante sa pagbuhat sa bisan unsa nga espirituhanong mga impresyon nga ilang nabatonan.

Komentaryo ug Background nga Impormasyon

Unsaon nako nga mas masabtan ug magamit ang pagpamalandong?

Si Presidente Henry B. Eyring sa Unang Kapangulohan mipasabot:

Kon kita mamalandong, atong gidapit ang pagpadayag pinaagi sa Espiritu. Ang pagpamalandong, alang kanako, mao ang paghunahuna ug pag-ampo nga akong buhaton human sa mainampingon nga pagbasa ug pagtuon sa mga kasulatan. (Henry B. Eyring, “Pagserbisyo uban sa Espiritu,” Liahona, Nob. 2010, 60)

Si Elder David A. Bednar sa Korum sa Napulog Duha ka Apostoles mitudlo:

Ang pulong pamalandong nagpasabot sa pagkonsiderar, paghanduraw, pagpalandong, o paghunahuna. Ang pagpamalandong sa mga kasulatan, usa ka balaang paghanduraw sa mga kamatuoran, mga kasinatian, ug mga leksiyon nga anaa sa sumbanan nga mga kasulatan. Ang proseso sa pagpamalandong nagkinahanglan og panahon ug dili ikapugos, o dalidalion. …

Ang pagsulat sa unsay atong nakat-onan, gihunahuna, ug gibati samtang magtuon kita sa mga kasulatan maoy laing matang sa pagpamalandong ug usa ka gamhanang pagdapit sa Espiritu Santo alang sa padayon nga pagtudlo. (David A. Bednar, “Tungod kay Kita Nakakita Kanila,” Liahona, Abr. 2006, 20)

Unsaon nako pagbutang ang kabubut-on sa Ginoo labaw sa akong kaugalingon?

Si Elder Dale G. Renlund sa Korum sa Napulog Duha ka Apostoles mipasabot:

Kon hunahunaon nato ang kamaayo sa atong Langitnong Amahan ug ni Jesukristo, ang atong pagsalig Kanila molambo. Ang atong mga pag-ampo mausab kay mahibalo kita nga ang Dios mao ang atong Amahan ug kita Iyang mga anak. Wala kita magtinguha sa pag-usab sa Iyang kabubut-on apan sa pagpahaom sa atong kabubut-on sa Iya ug moseguro sa atong kaugalingong mga panalangin nga gusto Niya nga ihatag, apan mag-agad sa atong pagpangayo niini. Atong pangandoy ang pagka mas maaghop, pagka-mas putli, pagka-mas lig-on, pagka-mas Kristohanon. Kini nga mga kausaban mopasarang kanato og dugang nga langitnong mga panalangin. (Dale G. Renlund, “Hunahunaa ang Pagkamaayo ug Pagkahalangdon sa Dios,” Liahona, Mayo 2020, 43)

Unsa ang pipila ka modernong adlaw nga mga ehemplo sa kamatuoran nga atong gitun-an karon?

Si Elder D. Todd Christofferson sa Korum sa Napulog Duha ka Apostoles mitudlo bahin sa gugma ug tukma nga panahon sa Dios sa paghatag og pagpadayag.

Ang mosunod nga bidyo naghulagway sa bili sa gahom sa pagselyo nga anaa sa templo sa Ginoo.

Dugang nga mga Kalihokan sa Pagkat-on

Helaman 10:11–12. Dali nga Pagsanong sa Giya sa Ginoo

Hunahunaa ang paghatag ug gibug-aton sa panag-ingnan ni Nephi sa usa ka dali nga pagsanong ngadto sa direksiyon sa Ginoo. Ikonsiderar ang pagdapit sa mga estudyante sa pagbasa sa Helaman 10:11–12 ug sa pag-ila kon unsay gisugo sa Ginoo nga buhaton ni Nephi ug giunsa niya sa pagtubag. Ang mosunod nga mga pangutana tingali makatabang sa paghisgot niini nga mga bersikulo:

Kanus-a ka nakakita og usa ka tawo nga misanong dayon sa giya sa Ginoo?

Unsa ang pipila ka mga panag-ingnan sa mga paagi nga ang usa ka tin-edyer makatubag dayon sa giya sa Ginoo?

Helaman 10:2–3. Ang pagpamalandong nag-andam kanato alang sa Pagpadayag

Aron dugang nga mohatag og gibug-aton sa baroganan nga ang pagpamalandong nag-andam kanato alang sa pagpadayag, tingali aduna kay mga estudyante nga nakailasa sama nga sumbanan diha sa 1 Nephi 11:1; Doktrina ug mga Pakigsaad 76:19; ug Doktrina ug mga Pakigsaad 138:1–2, 11.