Rebyo 17 sa Doktrinal nga Kahanas

Isag-ulo ang mga Pakisayran ug ang Mahinungdanon nga mga Hugpong sa mga Pulong sa Kasulatan

Ang paghinumdom sa mga pakisayran sa kasulatan ug sa unsay gitudlo niini makapanalangin sa imong kinabuhi sa daghang mga paagi. Kini nga leksiyon gituyo aron sa pagtabang kanimo sa pagsag-ulo og daghan nga mga pakisayran sa kasulatan ug sa mahinungdanon nga mga hugpong sa mga pulong sa kasulatan gikan sa kataposang 12 ka tudling sa doktrinal nga kahanas diha sa Basahon ni Mormon.

Tabangi ang mga estudyante sa pagsag-ulo sa mahinungdanon nga mga hugpong sa mga pulong sa kasulatan.Kon ang mga estudyante makasag-ulo sa mga pakisayran sa kasulatan ug sa mahinungdanon nga mga hugpong sa mga pulong sa kasulatan, sila lagmit mahinumdom ug mogamit niini sa higayon nga mopakigbahin sa ebanghelyo. Paggamit og nagkalain-laing mga pamaagi sa pagsag-ulo, sama sa pagbalik-balik, yano nga mga dula, o mga kard sa paghinumdom [memory card], aron sa paghimo sa pagsag-ulo nga mas makalingaw.

Pagpangandam sa estudyante: Dapita ang mga estudyante sa paghunahuna sa mga butang diha sa ilang mga kinabuhi nga ilang nasag-ulo. Giunsa nila pagsag-ulo niining mga butanga, ug sa unsang paagi kini nakatabang kanila?

Mga Posibleng Kalihokan sa Pagkat-on

Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor o koordinitor sa area o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Pagsag-ulo

Ang mga mosunod makatabang sa mga estudyante nga magsugod dayon sa paghunahuna bahin sa pagsag-ulo sa mga kasulatan.

Sa laing paagi, ang mga estudyante mahimong mopakigbahin og usa ka butang nga ilang nasag-ulo (sama sa mga linya sa pelikula, mga liriko sa musika, mga adress, ug uban pa) ug mohisgot kon nganong ila kining gisag-ulo ug kon giunsa nila pagpabiling nahinumdom niini. Makatabang usab kini ang pagdapit og bag-ohay lang nga nakauli nga misyonaryo aron sa pagpakigbahin og mga kasulatan nga iyang nasag-ulo ug sa pagpamatuod sa kaimportante sa pagsag-ulo sa mga kasulatan.

Basaha ang mosunod nga pamahayag ni Elder Richard G. Scott (1928–2015) sa Korum sa Napulog Duha ka Apostoles mahitungod sa kamahinungdanon sa pagmemorya sa mga kasulatan:

Talagsaong gahom moabot gikan sa pagmemorya og mga kasulatan. Ang pagmemorya og kasulatan mao ang paghulma og bag-ong pakighigala. Sama kini sa pagdiskobre og bag-ong tawo nga makatabang sa panahon sa panginahanglan, makahatag og inspirasyon ug kahupayan, ug mahimong tinubdan sa kadasig sa gikinahanglan nga kausaban. (Richard G. Scott, “Ang Gahom sa Kasulatan,” Liahona, Nob. 2011, 6)

• Hain nga mga kasulatan ang imong namemorya? Nganong gisag-ulo man nimo kini?

Samtang moapil ka sa mosunod nga mga kalihokan sa pagsag-ulo, salig nga ang Ginoo makatabang kanimo sa pagsag-ulo niining mga importanteng pakisayran ug mahinungdanon nga mga hugpong sa mga pulong sa kasulatan.

Mga tudling sa doktrinal nga kahanas ug pagsag-ulo

Sa ubos mao ang lista sa kataposang 12 ka mga tudling sa doktrinal nga kahanas sa Basahon ni Mormon uban sa ilang mahinungdanon nga mga hugpong sa mga pulong sa kasulatan.

Doktrinal nga Kahanas sa Basahon ni Mormon: Alma–Moroni

Manwal sa Magtutudlo sa Basahon ni Mormon (2024)

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan Alma 7:11–13	Mahinungdanon nga Hugpong sa mga Pulong sa Kasulatan “Ug siya magpadayon, mag-antos sa mga sakit ug mga kasakit ug mga pagtintal sa matag matang.”
Pakisayran sa Kasulatan Alma 34:9–10	Mahinungdanon nga Hugpong sa mga Pulong sa Kasulatan “Kinahanglan gayod nga adunay pag-ula nga pagahimoon, … usa ka walay kinutoban ug walay kataposan nga sakripisyo.”
Pakisayran sa Kasulatan Alma 39:9	Mahinungdanon nga Hugpong sa mga Pulong sa Kasulatan “Ayaw na pagsunod sa mga tinguha nga daotan sa imong mga mata.”
Pakisayran sa Kasulatan Alma 41:10	Mahinungdanon nga Hugpong sa mga Pulong sa Kasulatan “Ang pagkadaotan dili mahitabo nga kalipay.”
Pakisayran sa Kasulatan Helaman 5:12	Mahinungdanon nga Hugpong sa mga Pulong sa Kasulatan “Diha sa lig-on nga sukaranan sa atong Manunubos … nga kamo kinahanglan gayod motukod sa inyong tukoranan.”
Pakisayran sa Kasulatan 3 Nephi 11:10–11	Mahinungdanon nga Hugpong sa mga Pulong sa Kasulatan “Ako mituman sa kabubut-on sa Amahan sa tanan nga mga butang gikan sa sinugdanan.”
Pakisayran sa Kasulatan 3 Nephi 12:48	Mahinungdanon nga Hugpong sa mga Pulong sa Kasulatan “Kamo mahimo nga hingpit sama nga Ako ingon, o ang inyong Amahan kinsa anaa sa langit hingpit.”
Pakisayran sa Kasulatan 3 Nephi 27:20	Mahinungdanon nga Hugpong sa mga Pulong sa Kasulatan “Duol ngari kanako ug magpabunyag … aron kamo mahimo nga pagasantoson pinaagi sa pagdawat sa Espiritu Santo.”
Pakisayran sa Kasulatan Ether 12:6	Mahinungdanon nga Hugpong sa mga Pulong sa Kasulatan “Kamo dili makadawat og saksi hangtod human sa pagsulay sa inyong hugot nga pagtuo.”
Pakisayran sa Kasulatan Ether 12:27	Mahinungdanon nga Hugpong sa mga Pulong sa Kasulatan “Ug kon ang mga tawo moduol ngari kanako, … niana Ako mohimo sa mahuyang nga mga butang nga mahimo nga malig-on ngadto kanila.”
Pakisayran sa Kasulatan Moroni 7:45–48	Mahinungdanon nga Hugpong sa mga Pulong sa Kasulatan “Ang gugma nga putli mao ang tiunay nga gugma ni Kristo.”
Pakisayran sa Kasulatan Moroni 10:4–5	Mahinungdanon nga Hugpong sa mga Pulong sa Kasulatan “Mangutana sa kinasingkasing, uban sa tinuod nga katuyoan nga may hugot nga pagtuo kang Kristo … [ug] pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang.”

© 2024 by Intellectual Reserve, Inc. All rights reserved.

Ang mga estudyante nga adunay access sa mga elektronik nga mga himan mahimong mogamit og app o program aron sa paghimo sa mga kard sa paghinumdom [memory cards] diha sa ilang mga device. Kay kon dili, pag-apod-apod og duha ka piraso nga papel ngadto sa matag estudyante alang niini nga kalihokan.

Kon ang mga estudyante adunay access sa mga kard sa paghinumdom [memory card], ikonsiderar ang paglaktaw ngadto sa mga kalihokan sa seksiyon nga, “Paggamit sa imong mga kard sa paghinumdom.”

Paghimo og usa ka hugpongsa kard sa paghinumdom [memory card] nga imong magamit sa tibuok tuig. Kon gikinahanglan, gamita ang mosunod nga mga instruksiyon aron matabangan ka sa paghimo sa imong mga kard sa paghinumdom [memory card]:

Pagmatngon nga dili mogahin og dako kaayo nga panahon aron sa paghimo og mga kard sa paghinumdom [memory card]. Seguroha nga ang mga estudyante adunay igong panahon sa paggamit sa ilang mga kard aron sa pagpraktis sa pagsag-ulo sa mga pakisayran sa kahanas sa kasulatan ug sa mahinungdanon nga mga hugpong sa mga pulong sa kasulatan.

Lakang 1: Paghimo og 12 ka mga kard

Gamit ang tibuok bahin sa usa ka pirasong papel, pagdrowing og linya sa tunga sa papel aron makahimo og duha ka kolum. Dayon pagdrowing og duha ka pinahigda nga linya tabok sa papel aron makamugna og tulo ka kahon nga managsama ang gidak-on sa matag kolum, maghatag kanimo og kinatibuk-ang unom ka kahon. Tan-awa ang mosunod nga hulagway para sa usa ka pananglitan kon unsa ang hitsura sa imong panid:

Baliha ang papel ug buhata ang susama niana nga bahin. Balika kini nga proseso sa lain nga piraso sa papel aron mahimo ang 12 ka mga kahon nga imong gikinahanglan.

Diha sa usa ka bahin matag papel nimo, pagsulat sa matag kahon og pakisayran sa kasulatan gikan sa tsart. Dugang sa pakisayran sa kasulatan, mahimo nimong ikonsiderar ang pagdrowing og usa ka yano nga hulagway niini nga bahin sa imong mga papel nga makatabang kanimo sa paghinumdom sa mahinungdanong hugpong sa mga pulong sa kasulatan. Samtang ang drowing kinahanglan makatabang kanimo sa paghinumdom sa mahinungdanon nga hugpong sa mga pulong sa kasulatan, kini kinahanglan usab nga magpakita sa husto nga pagtahod sa sagrado nga kinaiya sa tudling sa kasulatan.

Lakang 2: Isulat ang mga pakisayran sa kasulatan sa doktrinal nga kahanas sa usa ka bahin

Sa usa ka bahin sa imong duha ka papel, pagsulat og pakisayran sa kasulatan gikan sa tsart diha sa matag kahon. Agi og dugang sa pakisayran sa kasulatan, mahimo ka usab nga magdrowing og usa ka yano nga hulagway nga makatabang kanimo sa paghinumdom sa mahinungdanon nga hugpong sa mga pulong sa kasulatan.

Lakang 3: Isulat ang mahinungdanon nga hugpong sa mga pulong sa kasulatan sa pikas nga bahin

Baliha ang imong mga papel, ug isulat sa matag kahon ang mahinungdanon nga hugpong sa mga pulong sa kasulatan nga motakdo sa pakisayran sa kasulatan sa pikas nga bahin.

Lakang 4: Guntinga ang imong mga kard

Guntinga ang matag usa sa mga kahon nga imong gibuhat nga nahimong mga kard.

Paggamit sa imong mga kard sa paghinumdom [memory card]

Pagmamugnaon sa paggamit sa imong mga kard sa paghinumdom [memory card]. Pagpili og usa sa mosunod nga mga ideya, o paghimo og usa sa imong kaugalingon. Mahimo usab nimong pilion ang paggamit sa mga kapanguhaan nga anaa sa doktrinal nga kahanas nga app.

• Hatagig pasulit ang imong kaugalingon: Guniti ang mga kard sa paghinumdom aron ang imo lamang makita mao ang pakisayran o ang mahinungdanong hugpong sa mga pulong sa kasulatan. Sulayi pagsulti sa katugbang nga mahinungdanong hugpong sa mga pulong sa kasulatan o sa pakisayran. Balika kini sa makadaghang higayon sa matag pakisayran ug sa katugbang nga hugpong sa mga pulong.

• Pagpares nga kalihokan: Pakigpares uban sa usa ka tawo. Ipabutang sa usa ka tawo ang iyang mga kard nga nag-atubang paitaas ang pakisayran ug ang lain tawo nagbutang sa iyang mga kard nga nag-atubang paitaas ang mahinungdanong hugpong sa mga pulong sa kasulatan. Ipares ang mahinungdanong hugpong sa mga pulong sa kasulatan ngadto sa katugbang nga pakisayran pinaagi sa pagbutang sa kard sa mahinungdanong hugpong sa mga pulong sa kasulatan sa ibabaw sa pakisayran nga kard.

Mahimong bahinon ang mga estudyante ngadto sa tag-tinag-upat nga mga grupo. Dapita ang matag grupo sa paggamit og usa ka set sa mga kard sa paghinumdom [memory kard] ug sa pagbahin niini nga set ngadto sa mga miyembro sa grupo. Ipabutang sa mga estudyante ang tanan nga mga kard diha sa ilang mga lamesa nga ang mga pakisayran nag-atubang sa taas. Pagbasa og usa ka mahinungdanong hugpong sa mga pulong sa kasulatan ngadto sa klase. Ang estudyante sa matag grupo kinsa aduna sa kard sa napares nga pakisayran kinahanglang mohatag sa maong kard ngadto sa magtutudlo. Hagita ang matag grupo sa pagdala og eksakto nga kard ngadto sa magtutudlo sulod sa gitakda nga oras—pananglitan, lima ka segundo. Dasiga ang mga estudyante nga tabangan ang ubang mga miyembro sa ilang grupo. Mahimo usab nga dapiton ang mga estudyante sa pagbaylo og mga kard sa laing tawo sa ilang grupo aron matabangan sila nga makat-onan ang tanang mga pakisayran ug ang mahinungdanong mga hugpong sa mga pulong sa kasulatan.

Ang mga estudyante mahimo usab nga magtinabangay nga magpares o sa gagmay nga mga grupo aron makahimo og kaugalingon nga mga paagi sa paggamit sa ilang mga kard sa paghinumdom.

Kon mahuman na, tabangi ang mga estudyante sa paghisgot kon unsay ilang nakat-onan ug gibati gikan sa ilang pagtuon ug paggamit sa ilang mga kard sa paghinumdom . Ang mosunod nga mga pangutana makatabang niini. Mahimo ka usab mopakigbahin og personal nga mga kasinatian nga nakatabang kanimo nga makita ang bili sa usa o dugang pa sa mga tudling sa doktrinal nga kahanas nga gihisgotan niini nga leksiyon.

• Hain nga mga pakisayran ug mga mahinungdanon nga mga hugpong sa mga pulong sa kasulatan ang imong gibati nga labing makatabang kanimo nga masag-ulo? Ngano man?

• Unsa ang pipila ka mga kamatuoran nga gitudlo niini nga mga tudling mahitungod sa Manluluwas ug sa Iyang ebanghelyo?