Helaman 7–10

Ang Propeta sa Ginoo

Sa kalibotan nga puno sa nagkasumpaki nga mga tingog, asa kita modangop alang sa direksiyon ug kamatuoran? Usa ka paagi nga ang Ginoo nagtinguha sa paggiya ug pagtabang kanato sa mortalidad mao ang pagtawag og propeta. Kini nga leksiyon makatabang kanimo sa pagsabot sa mahinungdanong tahas nga gihuptan sa mga propeta diha sa plano sa Langitnong Amahan.

Higugmaa kadtong imong gitudloan. Paningkamot sa pagpakita og gugma ngadto sa imong mga estudyante. Ipakita nga sinsero ka diha sa ilang mga kinabuhi, paminaw pag-ayo sa ilang mga pangutana ug mga komento, iapil sila sa leksiyon, ug kumustaha sila kon makita nimo sila. Ipahayag ang imong pagsalig nga ang imong mga estudyante makakat-on ug makasunod sa ebanghelyo ni Jesukristo.

Pagpangandam sa estudyante: Dapita ang mga estudyante sa paghisgot ngadto sa usa ka higala o sakop sa pamilya kon sa unsang paagi ang buhi nga mga propeta nakaapekto sa ilang mga kinabuhi.

Mga Posibleng Kalihokan sa Pagkat-on

Nganong ang Dios nagtawag og mga propeta?

Sa pagsugod sa klase, ikonsiderar ang pagdapit sa mga estudyante sa pagpraktis sa ilang tubag sa mosunod nga sitwasyon. Mahimo kang modala sa papel isip higala kinsa dili miyembro. Tugoti ang pipila ka mga estudyante sa pagpakigbahin kon unsaon nila sa pagtubag. Siguroha nga nahibaloan sa mga estudyante nga kini nga senaryo hisgotan pag-usab sa kataposan sa klase.

Handurawa nga usa sa imong mga higala kinsa dili miyembro sa Simbahan nahingangha sa pagkahibalo nga nagtuo ka nga ang Ginoo nagtawag og mga propeta sa atong panahon. Ang imong higala nahibulong kon nganong gikinahanglan ang mga propeta alang sa atong panahon.

• Unsa ang pipila ka mga paagi nga imong matubag ang imong higala?

Hunahunaa ang imong mga pagbati mahitungod sa mga propeta sa Ginoo ug ang imong kaandam sa pagpaminaw ug pagsunod kanila. Samtang magtuon ka karong adlawa, makabaton ka og mga kahigayonan sa pag-ila sa importante nga mga kamatuoran mahitungod sa mga propeta.

Sa blangko nga pahina diha sa imong journal sa pagtuon, isulat ang mosunod nga ulohan: Mga Kamatuoran mahitungod sa mga Propeta sa Ginoo. Sa tibuok leksiyon, isulat ang mga kamatuoran nga imong nakat-onan bahin sa mga propeta ubos niini nga ulohan.

Mahimo usab nimo kining isulat nga ulohan diha sa pisara ug idugang ang mga panabot sa mga estudyante niini sa tibuok leksiyon.

Kadaghanan sa unod nga tun-an karong semanaha (Helaman 7–12) ug sa sunod nga semana (Helaman 13–16) magatutok sa mga propeta. Ikonsiderar ang pagtudlo sa mga estudyante sa paggahin og igong luna diha sa ilang mga journal sa pagtuon aron sila makadugang sa ilang mga lista sa sunod nga duha ka semana.

Ang propeta nga si Nephi

Karon kamo makakat-on mahitungod ni Nephi, ang anak nga lalaki ni Helaman. Human isalikway sa mga Nephite sa yuta sa amihanan nga bahin, si Nephi mibalik sa iyang panimalay sa Zarahemla. Ang mga tawo didto daotan usab kaayo. Nagminatay tungod sa ilang pagkadaotan, si Nephi miadto sa iyang tanaman nga tore ug nag-ampo ngadto sa Dios (tan-awa sa Helaman 7:1–11).

Basaha ang Helaman 7:12–22, mangita kon unsay gisulti ni Nephi human makaamgo nga ang mga tawo nagkatigom aron maminaw sa iyang mga pangamuyo.

• Unsa ang kamatuoran nga imong mahibaloan mahitungod sa mga propeta sa Ginoo base sa unsay gisulti ni Nephi niini nga mga bersikulo?

Usa sa kamatuoran nga tingali imong nahibaloan mao nga ang mga propeta sa Dios nagdapit sa mga tawo sa paghinulsol. Isulat kini nga kamatuoran diha sa listahan sa imong journal sa pagtuon.

• Unsa ang gitudlo niini kanimo mahitungod sa Dios nga Siya motawag og mga propeta sa pagdapit sa paghinulsol?

Daghang mga tawo ang nasuko sa mensahe ni Nephi. Aron matabangan ang mga tawo nga makasabot nga siya namulong sa kamatuoran, si Nephi milagrosong misulti kanila sa mga panghitabo nga nahitabo samtang siya nagsangyaw ngadto kanila.

Ikonsiderar ang pagdapit og estudyante aron basahon ang mosunod nga gipamubo sa Helaman 8:25–28; 9:1–36. Mahimo usab nga dapiton ang usa ka estudyante sa pagbasa niini nga mga bersikulo sa wala pa ang klase ug sa pag-andam sa pagpamubo niini nga istorya sa iyang kaugalingong mga pulong. Sa laing paagi, mahimo nimong ipakigbahin ang bidyo nga “The Murder of the Chief Judge [Ang Pagpatay sa Labaw nga Maghuhukom]” gikan sa time code 1:25 hangtod sa 4:01, anaa sa ChurchofJesusChrist.org.

Si Nephi unang misulti sa katawhan nga ang ilang labaw nga maghuhukom, si Seezoram, gipatay (tan-awa sa Helaman 8:27–28). Ang mga tawo mibati nga “si Nephi nakigsabot uban sa usa ka tawo sa pagpatay sa maghuhukom” (Helaman 9:16). Si Nephi dayon misulti sa mga tawo sa pagpangita ni Seantum, kinsa igsoon nga lalaki ni Seezoram, ug mangutana kaniya og piho nga mga pangutana. Gisultihan ni Nephi ang mga tawo kon unsaon gayod pagtubag ni Seantum (tan-awa sa Helaman 9:26–36). Kini misangpot sa pagkumpisal ni Seantum nga siya mao ang mamumuno ug nga si Nephi inosente (tan-awa sa Helaman 9:37).

Basaha ang Helaman 9:37–41, mangita kon unsay reaksiyon sa mga tawo human makasaksi niini nga panghitabo.

• Unsa ang kamatuoran nga imong nakat-onan gikan sa kasinatian ni Nephi nga imong madugang sa imong listahan?

Usa ka kamatuoran nga tingali imong nahibalon mao nga ang mga pulong sa mga propeta matuman.

• Ngano sa imong hunahuna nga importante man nga mahibaloan kini nga kamatuoran mahitungod sa mga propeta?

• Unsa ang pipila ka mga ehemplo sa mga pulong sa mga propeta ang natuman?

Ikonsiderar ang pagpakigbahin og personal nga ehemplo nga naghulagway kon sa unsang paagi ang mga pulong sa mga propeta natuman diha sa imong kinabuhi. Pananglitan, tingali ang gisaad nga panalangin miabot gikan sa pagsunod sa tambag sa usa ka propeta.

Dugang nga mga kamatuoran mahitungod sa mga propeta

Agi og dugang sa mga kamatuoran nga nahibaloan na, daghan pa nga mga kamatuoran mahitungod sa tahas ug katuyoan sa propeta sa Ginoo ang gihulagway ni Nephi ug sa iyang pakig-uban sa mga tawo. Padayon sa pagbansay sa kahanas sa pag-ila sa mga kamatuoran samtang ikaw nagtuon sa mosunod nga mga tudling sa kasulatan. Idugang ang imong mga nakaplagan ngadto sa imong listahan.

Ikonsiderar ang pagpakita sa mosunod nga mga pakisayran ug sa pag-assign sa mga estudyante sa pagtuon sa matag tudling nga magpares o sa gagmay nga mga grupo. Mahimo usab nga i-assign ang mga estudyante og nagkalainlaing mga tudling sa kasulatan aron tun-an ug dayon magtinudloay sa usag usa.

• Helaman 7:29: Ang pamahayag ni Nephi ngadto sa katawhan kinsa nagpundok human makadungog kaniya nga nag-ampo

• Helaman 8:1–4: Ang reaksiyon sa mga maghuhukom sa mga pulong ni Nephi

• Helaman 8:22–23: Ang tubag ni Nephi ngadto sa mga tawo kinsa mibiaybiay batok kaniya ug sa iyang mga pulong

• Helaman 10:5–7: Ang pagpakigsulti sa Ginoo uban ni Nephi human siya nakahuman sa pagtudlo sa mga tawo

• Unsa nga mga kamatuoran mahitungod sa mga propeta ang imong nakaplagan dinhi niini nga mga bersikulo?

Idugang ang mga tubag sa mga estudyante ngadto sa lista diha sa pisara. Mahimong mailhan nila ang mga kamatuoran sama sa mosunod.

• Ang mensahe sa propeta dili gikan sa iyang kaugalingon. Gikan kini sa Ginoo. (Helaman 7:29)

• Ang mga propeta dili ilado sa mga daotan. (Helaman 8:1–4)

• Ang mga propeta nagpamatuod ni Jesukristo. (Helaman 8:22–23)

• Ang Ginoo mihatag sa Iyang propeta og gahom sa pagsilyo. (Helaman 10:5–7)

Ang mga estudyante adunay mga kahiyonan sa pagkat-on og dugang mahitungod sa matag usa niining mga kamatuoran sa mosunod nga mga leksiyon. Ang unang duha ka kamatuoran nga gilista pagatun-an sa mas lawom pa gayod diha sa Helaman 13–16. Ang ikatulo ug ikaupat nga mga kamatuoran nga gilista pagatun-an sa mas lalom pa gayod diha sa mga leksiyon sa ulahi niining semanaha.

Ang kamahinungdanon sa mga buhi nga propeta

Ipakita ang mosunod nga mga instruksiyon, ug hatagi ang mga estudyante og igong oras aron makahimo og tubag sa senaryo gikan sa sinugdanan sa leksiyon.

Aron matabangan ang mga estudyante nga makahimo sa ilang mga tubag, mahimong makatabang ang paghangyo sa mga estudyante sa paghingalan sa pipila sa labing komon nga mga hagit nga giatubang sa mga tin-edyer karon. Ang ilang mga tubag mahimong ilista diha sa pisara tupad sa mga kamatuoran nga ilang nahibaloan mahitungod sa mga propeta. Mahimo dayong ipakigbahin sa mga estudyante kon sa unsang pamaagi ang pipila sa mga kamatuoran nga ilang nahibaloan karon makatabang sa mga hagit nga ilang gihunahuna.

Hunahunaa pagbalik ang senaryo gikan sa sayong bahin niini nga leksiyon mahitungod sa imong higala kinsa nahibulong kon nganong gikinahanglan ang mga propeta sa atong panahon.

Pagsulat og tubag sa imong higala nga nagpasabot kon nganong importante kini nga ang Ginoo motawag og mga propeta sa atong panahon. Ang imong tubag kinahanglan nga labing menos usa ka parapo ang gitas-on.

Ang mosunod nga mga pangutana makatabang kanimo sa imong tubag:

• Sa unsang paagi nga ang usa o labaw pa sa mga kamatuoran nga imong nailhan makatabang kanato sa mga hagit nga atong giatubang?

• Unsa nga mga kasinatian ang nakatabang kanimo pag-ila sa panalangin sa pagbaton ug buhi nga mga propeta dinhi sa yuta?

Dapita ang mga estudyante sa pagpakigbahin sa ilang mga tubag ngadto sa ilang pares. Ang mao gihapon nga mga boluntaryo kinsa midrama-drama sa sitwasyon sa pagsugod sa klase mahimo usab nga dapiton sa pagduol sa atubangan sa lawak ug sa pagbuhat og lain nga pagdrama-drama sa sitwasyon.

Ipamatuod ang mga kamatuoran nga imong nahisgotan ug dasiga ang mga estudyante sa pagbuhat sa bisan unsa nga espirituhanong mga impresyon nga ilang nabatonan atol sa leksiyon.

Komentaryo ug Background nga Impormasyon

Unsa kaha kon dili kita mouyon sa unsay gisulti sa usa ka propeta?

Si Presidente Harold B. Lee (1899–1973) mitudlo:

Mahimo nga kamo dili makauyon unsa ang moabot gikan sa awtoridad sa Simbahan. Mahimo nga kini mosupak sa inyong politikanhong mga panghunahuna. Mahimo nga kini supak sa inyong sosyal nga mga panghunahuna. Mahimo kining mosamok sa inyong sosyal nga kinabuhi. … Ang inyong kahilwasan [safety] ug ang amoa nag-depende kon kita mosunod ba o dili sa tawo nga gibutang sa Ginoo aron mangulo sa iyang simbahan. … Itutok nato ang atong mga mata sa Presidente sa Simbahan. (Harold B. Lee, sa Conference Report, Okt. 1970, 152–53.)

Si Presidente Henry B. Eyring sa Unang Kapangulohan mitudlo:

Usahay makadawat kita og tambag nga dili nato masabtan o ingon na daw dili magamit nato, bisan human sa atong mainampingong pag-ampo ug paghunahuna. Ayaw ibalewala ang tambag, apan hupti kini pag-ayo. Kon ang usa ka tawo nga imong gisaligan mihatag kanimo og daw balas lamang uban ang saad nga kini adunay bulawan, maalamon tingali nga gunitan nimo kini diha sa imong kamot sa makadiyot, ug oyugon sa hinay-hinay. Sa matag higayon nga akong gibuhat kana uban sa tambag gikan sa usa ka propeta, human sa usa ka panahon ang bulawan nga mga tipik nagsugod sa pagpakita ug mapasalamaton ako. (Henry B. Eyring, “Finding Safety in Counsel,” Ensign, Mayo 1997, 26)

Ngano nga ang mga propeta nagsangyaw sa mga kamatuoran nga usahay wala mauyoni sa kadaghanan?

Si Presidente Russell M. Nelson mitudlo:

Usahay kami gipasanginlan nga walay pagtagad samtang kami nagtudlo sa mga gikinahanglan sa Amahan alang sa kahimayaan didto sa celestial nga gingharian. Apan dili ba mas labaw pa namo ka dili maamumahon ang dili pagsulti sa kamatuoran––sa dili pagtudlo sa unsay gipadayag sa Dios?

Kini tungod kay kami nagpakabana og maayo sa tanang mga anak sa Dios nga among gisangyaw ang Iyang kamatuoran. Mahimong dili kami mosulti kanunay sa mga tawo kon unsay ilang gusto nga paminawon. Ang mga propeta panagsa ra nga mailado. Apan kami kanunay magtudlo sa kamatuoran! (Russell M. Nelson, “The Love and Laws of God” [debosyonal sa Brigham Young University, Sept. 17, 2019], speeches.byu.edu)

Dugang nga mga Kalihokan sa Pagkat-on

Napulog upat ka sukaranan sa pagsunod sa Propeta

Aron matabangan ang mga estudyante nga masabtan ang dugang nga mga kamatuoran mahitungod sa mga propeta, ikonsiderar ang pagpakita sa listahan sa ““Fourteen Fundamentals in Following the Prophet” nga gipaambit ni Presidente Ezra Taft Benzon (1899-1994). Mahimong hisgotan sa mga estudyante kon nganong ang mga baroganan nga ilang naila diha sa leksiyon ug gikan ni Presidente Benson importante nga mahibaloan ug mahinumdoman. Hain nga mga baroganan ang tingale nalisdan sa pipila ka tawo? Unsa kahay labing angayng hinumdoman sa kabatan-onan? Ngano man?

Helaman 7:17–19. Ang mga propeta moawhag sa mga tawo sa paghinulsol

Dapita ang mga estudyante sa pagbasa sa Helaman 7:16, mangita kon unsay mipatigbabaw diha kanila gikan sa mga pulong ni Nephi samtang iyang gihulagway ang tinguha ni Satanas alang sa mga katawhan. Ang mga estudyante makahimong mobuhat og duha ka kolum diha sa ilang journal sa pagtuon ug dayon mobasa sa Helaman 7:17–22, 26–28. Sa usa ka kolum, ang mga estudyante mahimong molista sa mga sala sa mga tawo. Sa lain nga kolum, mahimo nilang ilista ang mga sangpotanan nga moabot kon dili sila maghinulsol.

Ang mosunod nga mga pangutana makatabang kanimo sa paghisgot kung unsay nakaplagan sa mga estudyante: Unsay gitudlo niini kanimo mahitungod sa kaimportante sa pagsabot sa imbitasyon sa usa ka propeta nga maghinulsol? Sa unsang paagi nga ang pagsabot niini makatabang kanimo nga mas mapaduol ngadto sa Langitnong Amahan ug ni Jesukristo?

Ang mga pulong sa propeta matuman

Kon ang mga estudyante makabenepisyo gikan sa paggahin og dugang nga panahon sa pagsabot ug sa pagbati sa kamatuoran nga ang mga pulong sa mga propeta matuman, ikonsiderar ang pagdapit kanila sa pagbasa sa mga kasulatan nga naghulagway niini, sama sa Isaias 7:14; Doktrina ug mga Pakigsaad 1:37; ug Doktrina ug mga Pakigsaad 87:1–3. Ikonsiderar ang paghisgot niini nga mga pangutana: Unsa nga modernong mga ehemplo ang nagpakita niini nga kamatuoran? Sa unsang paagi nga ang pagkahibalo ug pagtuo niini nga kamatuoran makaapekto sa imong pagbati ngadto sa propeta? Sa unsang paagi kini makapausab sa imong relasyon sa Langitnong Amahan ug ni Jesukristo?