“Helaman 13–16: Pagsabot sa mga Propeta sa Ginoo,” Manwal sa Magtutudlo sa Basahon ni Mormon (2024)
“Helaman 13–16,” Manwal sa Magtutudlo sa Basahon ni Mormon
Helaman 13–16
Pagsabot sa mga Propeta sa Ginoo
Unsa ang imong gibati dihang nakadungog ka og mga tawo nga nagpahayag og mga kabalaka o pagsaway mahitungod sa mga propeta? Samtang si Samuel ang Lamanite nagtindog ibabaw sa paril ug nagtawag sa mga katawhan sa paghinulsol, sila adunay nagkalain-laing mga reaksiyon sa iyang mga gipamulong. Ang mga tawo nakasinati og susama nga mga reaksiyon sa mga propeta sa atong panahon. Kini nga leksiyon makatabang kanimo nga makasabot sa tahas sa mga propeta ug kon unsaon nila sa pagtabang kanato.
Tabangi ang mga estudyante sa pagtubag sa mga pangutana base sa gibarogang pagtuo. Samtang ikonsiderar sa mga estudyante ang ilang kaugalingong mga pangutana ug ang mga pangutana sa uban mahitungod sa doktrina ug mga pagtuo sa Simbahan, dapita sila sa pagpaningkamot alang sa impluwensiya sa Espiritu. Dasiga ang mga estudyante sa paghinumdom sa unsay nahibaloan na nila daan ug sa pagsiksik sa mga kasulatan alang sa dugang nga panabot. Hatagi sila og panahon sa pagbansay unsay ilang isulti ngadto sa usa ka tawo nga adunay lahi nga mga panglantaw.
Pagpangandam sa estudyante: Dapita ang mga estudyante nga motambong nga andam mopakigbahin kon giunsa nila pagkahibalo nga ang Ginoo nagauban sa Iyang karaang mga propeta ug karon nagauban sa Iyang modernong mga propeta.
Mga Posibleng Kalihokan sa Pagkat-on
Pagsalig sa mga Propeta sa Ginoo
Aron maandam ang mga estudyante sa paghunahuna mahitungod sa mga propeta, ikonsiderar ang pagdrowing sa mosunod nga tsart diha sa pisara ug kolektaha ang ilang mga tubag isip usa ka klase o pagdapit sa mga estudyante sa pagdrowing niini diha sa ilang mga journal sa pagtuon ug sa pagkompleto niini sa tinagsa o sa gagmay nga mga grupo.
Sa palibot sa porma [figure] nga nagrepresentar sa matag grupo, ilista ang pipila ka mga rason kon nganong ang mga tawo motuo ug mosunod sa mga propeta o dili motuo ug gani mosaway pa kanila.
Kon ang mga estudyante naghimo sa kalihokan diha sa gagmay nga mga grupo o sa tinagsa, dapita sila sa pagpakigbahin sa ilang mga hunahuna.
Paggahin og kadiyot sa pagpamalandong sa unsay imong nakat-onan ug nahibaloan nang daan mahitungod sa mga propeta nga makatabang nimo ug sa uban nga motuo nga sila gitawag sa Dios. Pananglitan, tingali nakahimo ka og lista sa mga kamatuoran mahitungod sa mga propeta samtang nagtuon ka mahitungod kang Nephi sa Helaman 7–10.
Sa Helaman 13, ang Ginoo mipadala og dugang nga propeta, si Samuel ang Lamanite. Kini nga leksiyon usa ka kinatibuk-ang pagpasabot sa iyang mga pagtulun-an (tan-awa sa Helaman 13–16). Samtang magtuon ka, makadugang ka sa imong listahan sa mga kamatuoran mahitungod sa mga propeta. Pangita og mga panabot nga makatabang sa usa ka tawo kinsa naglisod sa pagtuo.
Base sa panginahanglan sa imong mga estudyante ug sa mga aghat sa Espiritu, desisyoni kon unsaon pagbuhat ang mosunod nga mga kalihokan. Mahimo ka magpunting sa usa o sa duha isip usa ka klase ug ipamubo ang uban. Mahimo nimong bahinon ang mga estudyante ngadto sa mga grupo, ipabuhat kanila ang usa sa tulo, ug ipareport ngadto sa nahabilin sa klase. Mahimo nimong ibutang ang matag kalihokan sa usa ka piraso nga papel diha sa nagkalainlaing mga lokasyon palibot sa lawak ug hangyoa ang mga estudyante nga molibot sa matag lokasyon ug tun-an ang tanang tulo ka mga kalihokan.
Kalihokan A: Si Samuel nagsangyaw ngadto sa mga Nephite
Basaha ang Helaman 13:1–7; 14:9, ug pangitaa kon unsay nakapadani kanimo bahin kang Samuel.
-
Sa panig-ingnan ni Samuel, unsay imong nakat-onan mahitungod sa mga propeta? (Ikonsiderar ang pagdugang sa bisan unsang kamatuoran nga imong nakit-an diha sa imong lista.)
Usa sa mga kamatuoran nga tingali imong naila mao nga ang mensahe sa propeta dili iyang kaugalingon; kini gikan sa Ginoo. Ikonsiderar ang pagmarka sa mga pulong diha sa Helaman 13:5, 7; 14:9 nga nagsuporta niini nga kamatuoran. Mahimo usab nimong basahon ang Helaman 7:29 ug Doktrina ug mga Pakigsaad 1:38; 21:4–5 isip cross-reference ug ikonektar kini sa mga bersikulo diha sa Helaman 13.
-
Sa unsang paagi nga ang pagsabot niini nga kamatuoran makaapekto sa paagi nga kita mamati sa mga propeta?
-
Sa unsang paagi kini makatabang kon kita mobati nga natintal sa pagduhaduha o pagsaway kanila?
Ikonsiderar ang paghatag og pipila ka mga kopya sa labing bag-o nga edisyon sa kinatibuk-ang komperensiya sa Liahona alang sa mga estudyante sa pagkompleto sa mosunod nga kalihokan.
Paggahin og pipila ka minuto sa pagribyo sa usa ka bahin sa usa ka bag-o nga kinatibuk-ang pakigpulong sa komperensiya gikan sa propeta. Hunahunaa ang Ginoo ug ang Iyang mga pagpakabana alang kanimo. Sulayi nga basahon ang pakigpulong ingon nga kini usa ka mensahe gikan sa Ginoo. Pag-andam og usa sa mosunod:
-
Pangita og usa ka piho nga hugpong sa mga pulong o pagtulun-an nga imong gituohan nga gidasig sa Ginoo. Ipakigbahin kon ngano.
-
Ihulagway kon unsay imong mahimo aron makadawat og personal nga pagsaksi nga ang mensahe nga gikan sa propeta gikan sa Ginoo.
Kalihokan B: Ang reaksiyon sa mga Nephite ngadto sa mga propeta
Basaha ang Helaman 13:24–29; 14:10, mangita sa kinaiya sa mga Nephite ngadto sa mga propeta.
-
Unsa nga mga kamatuoran ang imong matino gikan niining mga bersikulo bahin sa mga propeta?
Tingali nakaila ka og usa ka kamatuoran nga susama sa mosunod: Ang mga propeta sa Ginoo dili inila sa mga daotan. Mahimo nimong irekord kini nga kamatuoran duol niini nga mga bersikulo.
-
Sa unsa nga mga paagi nga imong nakita kini nga kamatuoran sa atong panahon?
-
Sa unsang paagi kadtong nagsaway ug nakigbatok sa mga propeta mahimong “walay kaalam ug buta nga [nangulo]”? (Helaman 13:29).
-
Kon dili kita moduol sa Manluluwas aron maghinulsol ug molambo, sa unsang paagi kini nahisama sa pagpili sa “kangitngit kay sa kahayag”? (Helaman 13:29).
Si Presidente Spencer W. Kimball (1895–1985) mitudlo:
Ang mga propeta … dili mahimong mousab sa mensahe sa Ginoo aron lamang nga ang mga tawo mobati og kahayahay. Buotan ra sila kaayo aron modaogdaog. Mapasalamaton kaayo ako nga ang mga propeta wala magtinguha nga mainila. (Spencer W. Kimball, “Listen to the Prophets,” Ensign, Mayo 1978, 77)
Hunahunaa nga ang usa ka tawo nagtuo nga siya kinahanglan nga “[mobuhat sa] bisan unsa nga gipangandoy sa [iyang] kasingkasing” (Helaman 13:27). Isip resulta, nasuko sila sa dihang gidapit sila sa mga propeta nga maghinulsol. Base sa unsay imong nakat-onan, pag-andam og tubag niini nga kabalaka o pagsaway.
Ikonsiderar ang pagdapit sa mga estudyante sa pagpakigbahin og usa ka bahin sa ilang tubag ngadto sa klase. Dayon pangutana kon kinsa ang makadugang niana nga tubag. Ipadayon hangtod nga ang klase nagtuo nga nakatabang sila sa kabalaka [concern].
Kalihokan C: Ang Ginoo miluwas kang Samuel
Ikonsiderar ang pagpakita sa hulagway ni Samuel ang Lamanite nga namulong gikan sa paril, nga anaa sa sinugdanan sa leksiyon.
Tan-awa pag-ayo ang hulagway gikan sa sinugdanan sa leksiyon. Kini nagpakita kon unsa ang nahitabo sa kataposang pakigpulong ni Samuel.
Basaha ang Helaman 16:1–8, mangita ug magmarka sa ebidensiya sa kamatuoran nga ang gahom sa Dios anaa sa Iyang mga propeta. (Hunahunaa ang pagdugang niini nga kamatuoran ngadto sa imong lista.)
-
Unsa nga ebidensiya ang imong nakita nga ang Dios nagauban ni Samuel?
Bisan og dili tanan nga mga propeta gipanalipdan niini nga paagi, ang Dios nanalipod sa Iyang mga propeta hangtod nga sila makahuman sa ilang buhat (tan-awa sa Mosiah 13:1–4; Doktrina ug mga Pakigsaad 122:9).
Kon buhaton kini nga kalihokan isip usa ka klase, ikonsiderar ang pagpakita sa mosunod nga mga hulagway. Kon gikinahanglan, ipasabot sa daklit ang may kalabotan nga mga istorya.
Pagpili og usa ka propeta gikan sa mga kasulatan o sa kasaysayan sa Simbahan. Paglista og ebidensiya nga ang Dios nagauban niana nga propeta. Ikonsiderar ang pagdirekta ngadto sa mosunod nga mga panig-ingnan ni Noe, Moises, Pedro, ug Joseph Smith.
(tan-awa ang Genesis 7:7, 10–13, 17, 23.)
(tan-awa ang Exodo 14:21–30.)
(tan-awa ang Buhat 12:4–11.)
(tan-awa sa Joseph Smith—Kasaysayan 1:15–25)
Karon paglista og ebidensiya nga ang Dios anaa usab sa Iyang mga modernong propeta. Ang mga ehemplo mahimong maglakip kon sa unsang paagi ang mga pagtulun-an o mga imbitasyon sa modernong mga propeta nakatabang kanato sa paghatag ug giya sa mga kalisdanan sa atong panahon.
Kon gikinahanglan, ikonsiderar ang pagpakigbahin sa usa o sa daghan pa sa mosunod nga mga ehemplo:
-
Ang pamahayag sa pamilya migawas sa wala pa ang kadaghan nakakita sa panginahanglan.
-
Gipatuman ni Presidente Russell M. Nelson ang kurikulum nga Dali, Sunod Kanako , nga nagpaila sa nakasentro sa panimalay, nga gisuportahan sa Simbahan alang sa pagtuon sa mga kasulatan, kaniadtong Oktubre 2018, sa wala pa ang pandemya sa COVID-19 nga nagpugos sa kadaghanan nga mosimba diha sa panimalay sa taas nga panahon.
-
Ngano kahang makatabang man ang paghinumdom niining mga ebidensiya?
Sama sa mga katawhan ni Nephi, kita adunay gahom sa pagpili kon dawaton ba nato ang mga pagtulun-an sa propeta o mosanong pinaagi sa pagsaway ug sa kasuko. Sa imong journal sa pagtuon, irekord unsa ang imong nakat-onan mahitungod sa mga propeta ug unsa ang imong gibati mahitungod kanila. Samtang magpadayon ka sa pagtuon unsay gitudlo ni Samuel ang Lamanite niining semanaha, mainampoong magtinguha nga makakat-on ug magamit ang iyang dinasig nga mga pagtulun-an.
Pagpamatuod mahitungod sa Ginoo ug sa Iyang mga propeta. Ikonsiderar ang pagdapit sa andam nga mga estudyante nga mopakigbahin sa ilang mga pagpamatuod.