Rebyo 18 sa Doktrinal nga Kahanas

Sabta ang Doktrina

Kristo nagtudlo sa mga Nephite

Ang usa ka katuyoan sa doktrinal nga kahanas mao ang pagtabang kanimo nga mas masabtan ang mga pagtulun-an sa Manluluwas. Kini nga leksiyon maghatag kanimo og oportunidad sa pagpalawom sa imong pagsabot sa mga kamatuoran nga gitudlo sa nagkalain-laing mga tudling sa doktrinal nga kahanas sa Basahon ni Mormon.

Pagtabang sa mga estudyante nga makat-on sa pagkonektar sa mga tudling sa kasulatan.Ang pag-cross-reference o pagkonektar sa mga kasulatan makatabang sa mga estudyante nga mas masabtan ang doktrina ug mga baroganan sa ebanghelyo ug aron makita kon sa unsang paagi kini gitudlo sa nagkalainlaing mga basahon sa kasulatan. Tabangi ang mga estudyante nga makakat-on sa paggamit sa mga cross-reference nga gihatag sa mga footnote ug uban pang mga tabang sa pagtuon. Dasiga sila sa paghimo og ilang kaugalingong pagsumpay gamit ang kinatibuk-ang mga pakigpulong sa komperensiya, mga manwal sa Simbahan ug mga magasin, ug uban pang kasaligang mga tinubdan.

Pagpangandam sa estudyante: Dapita ang mga estudyante sa mainampoong pagpili og tudling sa doktrinal nga kahanas sa Basahon ni Mormon nga makapanalangin sa ilang kinabuhi samtang sila magtuon niini.

Mga Posibleng Kalihokan sa Pagkat-on

Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor o koordinitor sa area o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Kinsa man ka?

Hunahunaa nga ang usa ka tawo nga bag-o lang nimong nahimamat gusto nga masayod pa mahitungod kanimo. Kon mohangyo siya sa matag usa sa mosunod nga mga tawo nga magsulat og usa ka kapahayag [sentence] nga naghulagway sa usa ka butang nga positibo bahin kanimo, tan-aw nimo, unsa ang isulat sa matag tawo?

Aron matabangan ang mga estudyante nga mas makaila sa usag usa ug madugangan ang panaghiusa sa klase, dapita ang mga estudyante nga magsulat ug magpasa og mga kapahayag [sentence] nga sa ilang hunahuna gamiton sa mosunud nga mga tawo aron sa paghulagway kanila. Sultihi sila nga ang ilang mga papel mahimong mabasa og kusog. Basaha ang pipila ka mga papel sa klase, mohunong pagkahuman sa matag usa aron tan-awon kon ang mga estudyante nakaila ba kon si kinsa sa ilang mga klasmeyt ang gihulagway.

1. Imong suod nga higala

2. Imong ginikanan o tigbantay

3. Imong bishop o presidente sa branch

• Sa unsang paagi nga ang pagpakigsulti sa nagkalain-laing mga tawo kinsa nakaila kanimo makatabang sa usa ka tawo aron mas makasabot kanimo?

Sa susamang paagi, ang pagtuon ug pagtandi sa mga kamatuoran nga anaa sa daghang mga tudling sa doktrinal nga kahanas mahimong makatabang kanimo nga mas hingpit nga makasabot sa Manluluwas ug sa Iyang doktrina kaysa pagsalig lamang sa bisan unsang usa ka tudling.

Pagsabot sa mga tudling sa kasulatan

Ang mga estudyante mahimong mokompleto sa mosunod nga kalihokan diha sa papel sa mga grupo nga tinagutlo o diha sa pisara isip usa ka klase.

Pagdrowing og usa ka dako nga trayanggolo, ug sulati ang tulo ka mga talinis niini sa mosunod nga tulo ka mga pakisayran sa kasulatan. Dapita ang mga estudyante sa pagsulat diha sa trayanggulo sa mga kamatuoran nga gidugang sa matag tudling sa ilang panabot. Dayon hisgoti kon sa unsang paagi kining tanang tulo ka tudling makatabang sa pagtudlo sa proseso sa pag-angkon ug pagpamatuod.

Basaha ang tudling sa doktrinal nga kahanas sa Moroni 10:4–5, ug irekord ang imong nakat-onan gikan niini.

Dayon basaha ang 2 Nephi 28:30 ug Ether 12:6. Irekord kon unsa ang nadugang sa matag usa diha sa imong panabot sa Moroni 10:4–5. (Mahimo nimong ikonsiderar ang pag-cross-reference o pagkonektar niini nga mga tudling sa usag usa.)

Pagsabot sa mga hilisgotan sa ebanghelyo

Si Jesukristo gikan sa Basahon ni Mormon nga bidyo

Ang paggamit sa daghang mga tudling sa kasulatan mahimong mapuslanon kon gusto nimong mahibaloan ang mahitungod sa usa ka partikular nga hilisgotan. Sama pananglit, gusto nimong makat-on pa og dugang ang mahitungod ni Jesukristo. Gikan sa mosunod nga tsart, pagpili og labing menos tulo ka mga tudling sa doktrinal nga kahanas nga nagtudlo mahitungod ni Jesukristo. Itandi ang imong nakat-onan mahitungod Kaniya gikan sa matag tudling.

Ikonsiderar ang pagpakita sa mosunod nga tsart.

Doktrinal nga Kahanas sa Basahon ni Mormon: Alma–Moroni

Manwal sa Magtutudlo sa Basahon ni Mormon (2024)

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan Alma 7:11–13	Mahinungdanon nga Hugpong sa mga Pulong sa Kasulatan “Ug siya magpadayon, mag-antos sa mga sakit ug mga kasakit ug mga pagtintal sa matag matang.”
Pakisayran sa Kasulatan Alma 34:9–10	Mahinungdanon nga Hugpong sa mga Pulong sa Kasulatan “Kinahanglan gayod nga adunay pag-ula nga pagahimoon, … usa ka walay kinutoban ug walay kataposan nga sakripisyo.”
Pakisayran sa Kasulatan Alma 39:9	Mahinungdanon nga Hugpong sa mga Pulong sa Kasulatan “Ayaw na pagsunod sa mga tinguha nga daotan sa imong mga mata.”
Pakisayran sa Kasulatan Alma 41:10	Mahinungdanon nga Hugpong sa mga Pulong sa Kasulatan “Ang pagkadaotan dili mahitabo nga kalipay.”
Pakisayran sa Kasulatan Helaman 5:12	Mahinungdanon nga Hugpong sa mga Pulong sa Kasulatan “Diha sa lig-on nga sukaranan sa atong Manunubos … nga kamo kinahanglan gayod motukod sa inyong tukoranan.”
Pakisayran sa Kasulatan 3 Nephi 11:10–11	Mahinungdanon nga Hugpong sa mga Pulong sa Kasulatan “Ako mituman sa kabubut-on sa Amahan sa tanan nga mga butang gikan sa sinugdanan.”
Pakisayran sa Kasulatan 3 Nephi 12:48	Mahinungdanon nga Hugpong sa mga Pulong sa Kasulatan “Kamo mahimo nga hingpit sama nga Ako ingon, o ang inyong Amahan kinsa anaa sa langit hingpit.”
Pakisayran sa Kasulatan 3 Nephi 27:20	Mahinungdanon nga Hugpong sa mga Pulong sa Kasulatan “Duol ngari kanako ug magpabunyag … aron kamo mahimo nga pagasantoson pinaagi sa pagdawat sa Espiritu Santo.”
Pakisayran sa Kasulatan Ether 12:6	Mahinungdanon nga Hugpong sa mga Pulong sa Kasulatan “Kamo dili makadawat og saksi hangtod human sa pagsulay sa inyong hugot nga pagtuo.”
Pakisayran sa Kasulatan Ether 12:27	Mahinungdanon nga Hugpong sa mga Pulong sa Kasulatan “Ug kon ang mga tawo moduol ngari kanako, … niana Ako mohimo sa mahuyang nga mga butang nga mahimo nga malig-on ngadto kanila.”
Pakisayran sa Kasulatan Moroni 7:45–48	Mahinungdanon nga Hugpong sa mga Pulong sa Kasulatan “Ang gugma nga putli mao ang tiunay nga gugma ni Kristo.”
Pakisayran sa Kasulatan Moroni 10:4–5	Mahinungdanon nga Hugpong sa mga Pulong sa Kasulatan “Mangutana sa kinasingkasing, uban sa tinuod nga katuyoan nga may hugot nga pagtuo kang Kristo … [ug] pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang.”

© 2024 by Intellectual Reserve, Inc. All rights reserved.

• Sa unsang paagi nga ang matag tudling nga imong gipili makatabang kanimo nga mas masabtan ang Manluluwas?

Ikonsiderar ang pagpakita sa hulagway ni Jesukristo diha sa pisara ug dapita ang mga estudyante sa pagsulat libot sa hulagway sa pipila sa mga pakisayran nga ilang gipili ug sa mga kamatuoran nga ilang nakaplagan.

Imong pagpili

Ang Langitnong Amahan nahigugma kanimo ug nasayod kon unsa ang imong gikinahanglan sa imong kinabuhi, karon ug sa umaabot. Ikonsiderar ang paghangyo Kaniya diha sa pag-ampo sa pagtabang kanimo sa pagpili og usa ka tudling o hilisgotan gikan sa tsart sa ibabaw aron tun-an. Gamita ang mga kahanas sa pagkonektar ug pagtuon sa hilisgotan nga imong gipraktis karon aron mas makakat-on pa bahin sa tudling o hilisgotan nga imong gipili. Mahimo nimong gamiton ang mosunod nga mga lakang aron magiyahan ka:

Kon mopili ka sa pagkompleto sa mosunod nga kalihokan isip usa ka klase, dapita ang klase sa pagpili og dungan kon hain nga tudling o hilisgotan sa ebanghelyo ang gusto nilang mas makat-onan pa.

Dayon dapita ang mga estudyante sa pagtinabangay diha sa ginagmayng mga grupo nga mangita og mas daghan pang may kalabotan nga mga tudling sa doktrinal nga kahanas kutob sa ilang mahimo sulod sa gitagana nga oras.

Sa kataposan, dapita ang mga estudyante sa pagpasabot giunsa niining nadugang nga mga tudling nga ilang napalgan pagpataas sa ilang panabot sa napili nga tudling o hilisgotan.

1. Pangitaa ang kompleto nga lista sa mga tudling sa doktrinal nga kahanas ug sa mahinungdanong hugpong sa mga pulong sa kasulatan nga anaa sa kataposan sa Mahinungdanon nga Dokumento sa Doktrinal nga Kahanas (2023).

2. Pilia ug basaha ang labing menos duha ka mga tudling sa doktrinal nga kahanas sa Basahon ni Mormon nga may kalabotan sa tudling o hilisgotan nga imong gipili nga tun-an. Isulat kon sa unsang paagi ang matag tudling nagdugang sa imong panabot sa tudling o hilisgotan nga imong gipili.

3. Pagpili ug pagbasa og bisan duha ka dugang nga mga tudling sa doktrinal nga kahanas gikan sa ubang mga kurso sa kasulatan nga magdugang sa imong pagsabot sa tudling sa Basahon ni Mormon o sa hilisgotan nga imong gipili. Isulat kon sa unsang paagi ang matag tudling nagdugang sa imong pagsabot sa tudling sa Basahon ni Mormon o sa hilisgotan nga imong gipili.

Pamalandongi kon sa unsang paagi mahimong makatabang kanimo ang makanunayon nga paggamit sa imong gipraktis karon diha sa imong pagtuon sa kasulatan diha sa panimalay.

Kon ang mga estudyante nakakompleto sa naunang kalihokan sa tinagsa, dapita sila sa pagpakigbahin ngadto sa mga estudyante nga nakapalibot kanila sa tudling sa Basahon ni Mormon o sa hilisgotan nga ilang gipili ug kon unsa ang ilang nakat-onan gikan sa matag tudling nga ilang nakaplagan.

Kon itugot sa panahon, ikonsiderar ang pagsubli niini nga kalihokan, magsugod sa laing tudling o hilisgotan.