3 Nephi 1–7

Kinatibuk-ang Pagpasabot

Ang mga matuohon nga Nephite nagbantay sa mga timailhan nga gipanagna ni Samuel ang Lamanite nga moabot (tan-awa sa Helaman 14), apan ang dili matuohon naghulga nga patyon sila kon ang mga timailhan dili mopakita. Ang propeta nga si Nephi nangamuyo sa Dios, ug nianang gabhiona ang panagna natuman. Sa ulahi, ang mga tulisan ni Gadianton misulay sa paglaglag sa mga Nephite. Hinuon, ang mga Nephite “andam sa pagsugat kanila … diha sa kalig-on sa Ginoo” (3 Nephi 4:10). Ang mga Nephite mibalik ngadto sa ilang mga panimalay ug misugod sa pagtukod pag-usab sa ilang mga kinabuhi. Pinaagi sa garbo ug pagkabahinbahin, si Satanas migiya sa katawhan sa pagrebelde batok sa Dios. Ang mga sangpotanan grabe kaayo nga ang gobyerno nahugno, ug ang mga tawo nabahin ngadto sa mga tribo.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

3 Nephi 1

Katuyoan sa leksiyon: Kini nga leksiyon gituyo aron sa pagtabang sa mga estudyante nga mobati og mas dakong pagsalig nga ang Ginoo motuman sa tanang mga pulong nga Iyang gipamulong pinaagi sa Iyang mga propeta.

• Pagpangandam sa estudyante: Ang mga estudyante mahimong mag-andam og ehemplo nga ipakigbahin kon sa unsang paagi o kon nganong ang pagbaton og hugot nga pagtuo kang Jesukristo makapalig-on sa usa ka tawo nga anaa sa walay kaseguroan o makapabalaka nga mga panahon.

• Sugyot sa pagtudlo pinaagi sa videoconference: Ikonsiderar ang pagpakita og usa ka listahan sa mga sitwasyon nga mahimong hinungdan sa mga tawo nga mobati og kawalay kasegurohan o kahadlok. Kini makatabang sa mga estudyante sa pagpamalandong kon sa unsang paagi sila makabaton og hugot nga pagtuo diha ni Jesukristo samtang sila motubag sa maong mga sitwasyon

3 Nephi 2–5

Katuyoan sa leksiyon Kini nga leksiyon makatabang sa mga estudyante nga makadawat sa kalig-on sa Ginoo pinaagi sa pagka-andam diha sa espirituhanon ug sa temporal nga paagi.

• Pagpangandam sa estudyante: Dapita ang mga estudyante sa paghisgot ngadto sa mga sakop sa pamilya o ngadto sa mga lider sa Simbahan sa mga panalangin nga nagagikan sa pagkaandam sa temporal o sa espirituhanon nga paagi.

• Mga bidyo: “Mga Kapanguhaan sa Temporal nga Pagpangandam” (3:09)

• Sugyot sa pagtudlo pinaagi sa videoconference: Kon gidapit ang mga estudyante sa paglista sa mga pagpangandam sa Nephite ug dayon sa paglista sa modernong mga pagkapareha, ikonsiderar ang paggamit sa whiteboard feature aron tugotan sila sa pagpakigbahin sa ilang mga tubag.

3 Nephi 6–7

Katuyoan sa leksiyon: Kini nga leksiyon makatabang sa mga estudyante nga mas makasabot sa epekto sa garbo ug kon unsaon pagbuntog sa garbo pinaagi sa pagsunod sa Manluluwas.

• Pagpangandam sa estudyante: Dapita ang mga estudyante nga mag-ampo ug mangayo sa Langitnong Amahan nga tabangan sila nga maila ang espirituhanong mga pag-aghat samtang sila nagtuon sa ilang mga kasulatan.

• Leksiyon nga gigamitan og butang: Mga lugas sa mais [popcorn kernels], pipila ka mais nga nahimong popcorn [popped popcorn], ug usa ka panaksan sa tubig

• Sugyot sa pagtudlo pinaagi sa videoconference: Alang sa senaryo bahin kang Jim, tingali gustohon nimong bahinon ang mga estudyante ngadto sa mga breakout room nga adunay duha o tulo aron hisgotan ang mga pangutana. Seguroha nga mahatagan sila og klaro nga mga instruksiyon daan, lakip na ang kadugayon sa oras nga sila aduna alang sa ilang panaghisgotan.

Sukda ang Imong Nakat-onan 7

Katuyoan sa leksiyon: Kini nga leksiyon makatabang sa mga estudyante sa paghinumdom ug sa pagtimbang-timbang kon sa unsang paagi ang ilang mga kasinatian sa Alma 53–3 Nephi 7 nakatabang kanila sa paglambo sa espirituhanong paagi.

• Pagpangandam sa estudyante: Dapita ang mga estudyante sa pagribyo sa unsay ilang nakat-onan sa bag-ohay lang nga mga semana ug sa pagtambong sa klase nga andam sa pagpakigbahin og usa ka paagi nga mahimo nilang mahuman ang mosunod nga pamahayag: “Usa ka leksiyon gikan sa Alma 53–3 Nephi 7 nga sa akong hunahuna importante nga akong hinumduman mao ang … tungod kay …”

• Mga hulagway: Nephi nag-ampo diha sa tore; Samuel ang Lamanite diha sa paril

• Sulod nga ipakita: Usa ka dayagram sa liyok sa garbo; mga drowing kang Lehonti diha sa bukid, usa ka lungsod nga giliyokan og paril, ug usa ka balay nga nagtungtong sa usa ka pundasyon

• Sugyot sa pagtudlo pinaagi sa videoconference: Ikonsiderar ang pagbutang sa mga estudyante diha sa mga breakout room aron ipasabot ang tahas sa mga propeta. Mahimong gamiton sa mga estudyante ang chat feature aron ipakigbahin kon unsay ilang nahimo aron matukod ang ilang espirituhanong pundasyon diha kang Jesukristo.

Rebyo 19 sa Doktrinal nga Kahanas

Katuyoan sa leksiyon: Kini nga leksiyon makatabang sa mga estudyante nga magamit ang mga kamatuoran sa mga tudling sa doktrinal nga kahanas gikan sa ikaduhang bahin sa Basahon ni Mormon.

• Pagpangandam sa estudyante: Ikonsiderar ang pagdapit sa mga estudyante sa pagpili og usa o duha ka mga tudling sa doktrinal nga kahanas ug sa pagpaningkamot sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan.

• Handouts: “Pagbaton og Kadasig sa Espirituhanong Paglambo pinaagi sa Doktrinal nga Kahanas”; “Doktrinal nga Kahanas sa Basahon ni Mormon: Alma–Moroni”

• Bidyo: Ang Gahom sa Kadasig sa Espirituhanong Paglambo (17:17; tan-awa gikan sa time code 5:11 hangtod sa 5:55)

• Sugyot sa pagtudlo pinaagi sa videoconference: Ikonsiderar ang paggamit sa whiteboard function aron idrowing ang hulagway gikan sa handout nga “Pagbaton og Kadasig sa Espirituhanong Paglambo pinaagi sa Doktrinal nga Kahanas.” Dapita ang mga estudyante sa pagpili og tudling sa doktrinal nga kahanas nga nagsuporta sa usa sa tulo ka aspeto sa pagbaton og kadasig sa espirituhanong paglambo. Dasiga ang mga estudyante sa pagpakigbahin kon sa unsang paagi ang ilang napili nga tudling nakaimpluwensiya kanila.