3 Nephi 6–7

Ang Garbo Modala ngadto sa Pagkabahinbahin ug Kalaglagan

Namatikdan ba nimo sukad nga bisan human sa katingalahang mga kasinatian uban sa Dios, ang pipila ka mga tawo sa kataposan mibiya Kaniya? Human mapanalipdan sa Dios ang mga Nephite gikan sa mga tulisan ni Gadianton, sila mibalik ngadto sa ilang mga panimalay ug misugod sa pagtukod pag-usab sa ilang mga kinabuhi. Pinaagi sa garbo ug pagkabahinbahin, si Satanas migiya sa katawhan sa pagrebelde batok sa Dios. Ang mga sangpotanan grabe kaayo nga ang gobyerno nahugno, ug ang mga tawo nabahin ngadto sa mga tribo. Kini nga leksiyon makatabang kanimo nga mas makasabot sa epekto sa garbo ug kon unsaon kini pagbuntog pinaagi sa pagsunod sa Manluluwas.

Pagtabang sa mga tigkat-on nga masabtan ang konteksto ug ang sulod.Ang pagsabot sa konteksto ug sa sulod sa mga kasulatan nag-andam sa mga estudyante sa pag-ila sa mga dinasig nga mga mensahe sa mga tagsulat. Ang konteksto ug ang sulod nagklaro ug naghulagway sa doktrina ug mga baroganan nga narekord diha sa mga kasinatian. Maalamong tinoa kon unsa ang gidaghanon sa konteksto ug sulod nga hatagan og gibug-aton aron matabangan ang mga estudyante nga mas masabtan ang mga kamatuoran nga gitudlo sa mga kasulatan.

Pagpangandam sa estudyante: Dapita ang mga estudyante nga mag-ampo ug mangayo sa Langitnong Amahan nga tabangan sila nga maila ang espirituhanong mga pag-aghat samtang sila nagtuon sa ilang mga kasulatan.

Mga Posibleng Kalihokan sa Pagkat-on

Usa ka paagi sa pagsugod sa klase mao ang pagdala og pipila ka mga lugas sa mais [corn kernels], pipila ka mais nga nahimo nang popcorn [popped popcorn] (walay butter, tungod kay ang butter naghatag og babag batok sa tubig), ug usa ka panaksan nga tubig. Dapita ang mga estudyante sa pagtagna kon unsay mahitabo sa higayon nga imong ibutang ang lugas [kernel] ug ang mais nga nahimo nang popcorn ngadto sa tubig. Ihulog ang lugas [kernel] ug ang popcorn sa tubig (ang lugas [kernel] magpabilin nga walay kausaban samtang ang popcorn magsugod sa pagkatunaw). Sultihi ang mga estudyante nga ang tubig nagrepresentar sa kadaotan, ug ang lugas [kernel] o popcorn mahimong magrepresentar sa matag usa kanato. Samtang nagtuon sila, mahimo silang mangita og mga pagtulun-an nga may kalabotan ngadto sa butang nga gigamit sa leksiyon ug ngadto sa ilang mga kaugalingon. Ikonsiderar ang paghatag sa matag estudyante og lugas [kernel] aron tan-awon samtang sila nagtuon.

Dapita ang mga estudyante sa pagpasabot sa ilang mga tubag sa mosunod nga mga pangutana:

• Posible ba ang usa ka tawo nga mahimong:

• Adunahan ug mapainubsanon?

• Kabos ug mapahitas-on?

• Edukado ug mapainubsanon?

• Dili edukado ug mapahitas-on?

Hunahunaa kon unsa ang hinungdan sa pipila ka mga tawo nga magmapasigarbohon sa atong panahon. Sa unsang paagi nga ang pagkamapahitas-on makaapekto kanimo, sa uban, ug sa katilingban? Samtang magtuon ka, pamalandongi kon sa unsang paagi kini nga leksiyon mahimong magamit sa imong kinabuhi ug mga kahimtang.

Ang padayong pagtintal ni Satanas

Human mapildi si Giddianhi ug ang mga tulisan ni Gadianton sa tabang sa Ginoo, ang mga Nephite “mitapos sa tanan niadto nga dautan, ug tinago, ug salawayon nga mga kalihokan” (3 Nephi 5:6). Mibalik sila sa ilang mga panimalay ug misugod sa pagtukod pag-usab sa ilang mga kinabuhi. Apan si Satanas padayong naningkamot sa paglimbong sa mga tawo sa pagsunod kaniya. Sa mubong panahon, ang mga Nephite nausab. Sa 3 Nephi 6–7, si Mormon mitabang kanato nga makasabot kon unsa ang gibuhat sa mga katawhan nga sa kataposan maoy nakaingon nga daghan kanila ang mamatay sa mga kalaglagan nga nahauna sa pag-abot sa Manluluwas diha sa Amerika (tan-awa sa 3 Nephi 8). Kini nga mga pagtulun-an usab nagpasabot kon nganong ang uban andam alang sa pagpakita ni Kristo sa templo diha sa yuta sa Bountiful (tan-awa sa 3 Nephi 11).

Ang mosunod nga tsart makatabang sa mga estudyante nga makakita sa kausaban sa mga Nephite sa mubo nga panahon. Usa ka alternatibo nga paagi sa pagkompleto sa tsart mahimong ang mga estudyante magdrowing og usa ka yano nga hulagway nga nagpakita sa kahimtang sa mga tawo sa matag hugpong sa mga bersikulo.

Paghimo og tsart sama sa mosunod. Basaha ang mga tudling ug isulat ang unsay imong nahibaloan mahitungod sa kahimtang sa mga tawo.

Ang ika-26 nga tuig (3 Nephi 6:4–9)	Ang ika-29 nga tuig (3 Nephi 6:10–18)
Ang ika-26 nga tuig (3 Nephi 6:4–9)	Ang ika-29 nga tuig (3 Nephi 6:10–18)

• Unsa ang hinungdan sa kausaban sa ingon ka mubo nga panahon?

• Unsa nga mga kamatuoran ang atong makat-onan gikan niini nga mga ehemplo?

Usa ka kamatuoran nga tingali imong naila mao nga kon kita mapahitas-on, kita naghatag kang Satanas og mas dakong gahom sa pagtintal kanato ug pagdala kanato ngadto sa pagpakasala.

Hunahunaa kon unsay buot ipasabot sa pagkamapahitas-on. Pangita og mga panabot diha sa mosunod nga pamahayag ni Presidente Ezra Taft Benson (1899–1994).

Ang klarong ebidensiya nga anaa ang garbo mao ang pagdumot—pagdumot sa Dios ug sa atong isigkatawo. Ang pagdumot nagpasabot sa “kalagot, pagkamasupakon, o matang sa pagsukol.” Kini ang gahom diin si Satanas buot nga modumala kanato. (Ezra Taft Benson, “Beware of Pride,” Ensign, Mayo 1989, 4)

• Ngano sa imong hunahuna nga ang pagkamapahitas-on makapahimo kang Satanas nga adunay mas dakong impluwensiya kanato?

• Unsay nakalahi niini gikan sa kon sa unsang paagi ang Langitnong Amahan ug si Jesukristo nagdasig kanato?

Mga epekto sa garbo kaniadto ug karon

Tungod sa garbo sa mga tawo, ang matag bahin sa katilingban nagsugod nga maapektohan. Basaha ang 3 Nephi 6:20–30 o 7:1–14, mangita sa mga ehemplo kon sa unsang paagi ang garbo nakaapekto sa mga indibidwal ug sa katilingban.

Ikonsiderar ang pagpabasa sa katunga sa klase sa 3 Nephi 6:20–30 ug ang laing katunga mobasa sa 3 Nephi 7:1–14 diha sa gagmay nga mga grupo. O dapita ang mga estudyante sa pagpili og usa sa mga tudling, basahon kini, ug mag-andam sa pagreport kon unsay ilang nakit-an.

Dapita ang mga estudyante sa paglista sa mga tubag diha sa pisara sa sunod nga pangutana. Ang mga estudyante mahimong makakaplag og mga butang sama sa pagkabahinbahin, tinago nga mga buhat nga daotan, paglaraw batok sa matarong, ug pagkasuko batok niana nga maayo.

• Unsa nga mga pananglitan sa mga epekto sa garbo ang imong nakita niini nga mga bersikulo?

• Sa unsa nga mga paagi si Satanas naggamit sa garbo sa paggiya sa mga tawo ngadto sa pagpakasala sa atong panahon?

Pagbuntog sa garbo

Hunahunaa kon sa unsang paagi ang imong garbo o ang garbo sa uban nakaapektar kanimo ug kon sa unsang paagi ikaw makabuntog sa garbo ug sa mga epekto niini.

Bisan og ang garbo maoy hinungdan sa dakong kalaglagan, ang uban namati sa mga pulong sa propeta ug nagpadayon sa pagsunod sa Manluluwas.

Basaha ang 3 Nephi 7:15–26, mangita sa unsay gitudlo ni Nephi sa mga tawo ug sa unsang paagi kini nakaapekto kanila. Mahimong makatabang ang pagmarka sa matag higayon nga ang Manluluwas gihisgotan.

Ang mga estudyante mahimong mosulat sa mga tubag sa mosunod nga pangutana diha sa pisara. Samtang gisulat nila ang ilang mga tubag, mahimo nilang markahan [cross-out] ang mga epekto sa garbo nga mahimong mabuntog sa mga tubag nga ilang gilista.

Mahimong makakaplag usab ang mga estudyante og mga tudling sa kasulatan sa doktrinal nga kahanas nga naghulagway og dugang nga mga paagi aron sa pagbuntog sa garbo.

• Unsa nga mga panig-ingnan ang imong nakita niini nga mga bersikulo kon sa unsang paagi ang Manluluwas ug ang Iyang ebanghelyo nakatabang sa pipila ka mga tawo nga mabuntog ang garbo ug kasal-anan?

Ang mosunod nga senaryo ug mga pangutana gitumong sa paghatag og kahigayonan sa mga estudyante sa pagpakita nga sila nasayod sa nagkalainlaing mga paagi nga ang garbo makaapekto kanila, apan usab kon sa unsang paagi ang pagsunod kang Jesukristo makatabang kanila sa pagbuntog sa garbo. Mahimo nimong pilion nga ipahiangay ang senaryo sa mga paagi nga mahimo kini nga labing makahuluganon alang sa mga estudyante.

Kini si Jim. Wala pa siya masayod niini, apan adunay siyay problema sa garbo.

• Unsa nga ebidensiya ang imong gilaoman nga makita diha sa kinabuhi ni Jim nga siya adunay problema sa garbo?

Mahimong mahunahunaan sa mga estudyante ang mga butang nga may kalabotan sa 3 Nephi 6–7. Sama pananglit, iyang giklasipikar ang mga tawo ngadto sa mga grupo sa iyang hunahuna—maayo nga mga grupo ug dili maayo nga mga grupo. Nagbuhat usab siya og pipila ka mga butang nga iyang nahibaloan nga sayop ug gisekreto lang kini. Nasuko siya sa mga tawo nga nagdasig kaniya sa pagbag-o. Kanunay niyang gisaway ang iyang mga ginikanan ug ang iyang bishop tungod sa mga butang nga ilang gihangyo nga buhaton niya.

Human makaamgo sa iyang problema ug nahibaloan nga daghan sa labing dako niya nga mga kasagmuyo sa iyang kinabuhi ang resulta sa iyang garbo, gusto niya og mga tubag kon unsaon sa pagwagtang sa garbo.

• Unsang mga solusyon ang imong isugyot aron sa pagtabang kang Jim nga mabuntog ang garbo?

Ikonsiderar ang pagdapit sa mga estudyante sa pagduol ngadto sa usa ka tawo nga ilang nailhan aron sa pagpangutana mahitungod sa iyang mga sugyot kon unsaon sa pagbuntog ang garbo. Ipakigbahin ang imong pagpamatuod sa gahom sa Manluluwas sa pagtabang kanato sa pagbuntog sa garbo ug pagkadaotan.

Komentaryo ug Background nga Impormasyon

Sa unsang paagi nato makita ang garbo ug ang pagkabahinbahin sa atong panahon?

Si Elder Quentin L. Cook sa Korum sa Napulog Duha ka Apostoles mipasabot:

Sa atong panahon, ang direksyon sa kasulatan alang sa panaghiusa gibaliwala pag-ayo, ug alang sa daghang mga tawo ang gipahimug-atan mao ang kinaiya sa tribo o grupo,nga sa kasagaran gibase sa kahimtang, gender, kaliwat, ug bahandi. Sa daghang mga nasod, kon dili kadaghanan, ang mga tawo grabe nga nagkabahin-bahin kon unsaon sa pagpuyo. Sa Simbahan sa Ginoo, ang bugtong kultura nga atong sundon ug itudlo mao ang kultura sa ebanghelyo ni Jesukristo. Ang panaghiusa nga atong gitinguha mao ang paghiusa uban sa Manluluwas ug sa Iyang mga pagtulun-an. …

… Ang Basahon ni Mormon miklaro nga kinahanglan wala nay mga -ites, mga tribo, o mga klase. Kinahanglang kitang magkahiusa ug mag-angay-angay atubangan sa Dios. (Quentin L. Cook, “Pagpangandam sa Pagsugat sa Dios,” Liahona, Mayo 2018, 116)

Unsa ang pipila ka timailhan sa garbo?

Si Elder Gary E. Stevenson sa Korum sa Napulog Duha ka Apostoles mipahayag:

Kon mapagarbohon, hilig nato ang pagpasidungog sa atong mga kaugalingon kay sa ihatag kini ngadto sa uban, lakip ang Ginoo. Ang garbo sa kasagaran makigkompetensiya; kini may purohan sa pagpaningkamot aron makaangkon og mas daghan pa ug maghunahuna nga mas maayo pa kita kay sa uban. Ang garbo sa kasagaran moresulta sa mga pagbati nga kasuko ug kasilag; makahimo kini sa usa ka tawo sa pagbaton og kasuko o sa pagpugong sa pagpasaylo. (Elder Gary E. Stevenson, “Espiritwal nga Eklipse,” Liahona, Nob. 2017, 47)

Sa unsang paagi ang mga panghitabo sa Basahon ni Mormon may kalabotan sa atong panahon?

Si Presidente Ezra Taft Benson (1899–1994) mitandi sa mga panghitabo sa Basahon ni Mormon sa atong panahon pinaagi sa pag-ingon:

Sa Basahon ni Mormon kita makakita og sumbanan sa pagpangandam sa Ikaduhang Pag-anhi. Usa ka dakong bahin sa basahon nagtumong sa pipila ka mga dekada sa wala pa ang pagbisita ni Kristo sa Amerika. Pinaagi sa mabinantayon nga pagtuon niana nga panahon, kita makatino nganong ang uban gipanglaglag sa grabe nga paghukom sa wala pa ang Iyang pag-abot ug unsa ang nakapahimo sa uban nga mobarog sa templo didto sa yuta sa Bountiful ug mihikap sa mga samad sa Iyang mga kamot ug tiil. (Ezra Taft Benson, “Ang Basahon ni Mormon—Sukaranang Bato sa Atong Tinuohan,” Liahona, Okt. 2011, 56)

Dugang nga mga Kalihokan sa Pagkat-on

Ang paghinumdom sa Langitnong Amahan ug ni Jesukristo makatabang sa pagbuntog sa garbo

Sa dihang ang mga Nephite nahimong daotan, ang mga tawo nadasig gikan sa langit sa pagpamatuod sa Katubsanan ug Pagkabanhaw sa Manluluwas (tan-awa sa 3 Nephi 6:20). Ikonsiderar ang pagdapit sa mga estudyante sa paghunahuna mahitungod sa unsay nahimo sa Manluluwas alang kanila ug sa unsa nga paagi kana nagdugang sa ilang pagkamapasalamaton ug pagkamapainubsanon. Mahimo silang magtino og mga paagi diinmas kanunay nilang mahinumdoman ang Pagtubos ug Pagkabanhaw sa Manluluwas atol sa ilang adlaw.

Pagtagad sa uban sama sa pagtagad sa Manluluwas kanila

Sa kataposan sa leksiyon, ang mga estudyante mahimong dapiton sa paghimo og plano aron malikayan ang garbo. Aron matabangan sila nga makab-ot kini, mahimo silang dapiton sa paghimo og listahan sa mga tawo nga gikauban nila kada adlaw ug sa pagpamalandong kon giunsa nila sila pagtratar. Mahimong gradohan sa mga estudyante kon giunsa nila pagtagad ang matag tawo gamit ang sukdanan gikan sa usa (dili maayo) ngadto sa lima (sama sa pagtagad sa Manluluwas kanila). Mahimo dayon silang magbuhat og personal nga plano nga gibase niadtong kinsa paminaw nila mas maayong trataron pa nila og tarong.

Ang ehemplo ni Kristo sa pagkamapainubsanon

Si Jesukristo, ang maayong ehemplo alang kanatong tanan, kanunayng nagpili sa pagkamapainubsanon kay sa garbo. Dapita ang mga estudyante sa paglista ug pipila ka panig-ingnan gikan sa Iyang kinabuhi diin mahimo unta Siyang magmapahitas-on apan nagpakita hinuon sa Iyang hingpit nga pagkamapainubsanon. Mga pananglitan naglakip sa Iyang pakighimamat kang Satanas diha sa Mateo 4:1–11 ug sa milagro didto sa Linaw sa Betsata sa Juan 5:1–9, 19. Mahimong makatabang ang pagribyo sa pipila ka mga bidyo sa Bibliya aron sa pagpangita og mga ehemplo.