3 Nephi 1

“Ang mga Panagna sa mga Propeta Misugod Na sa Pagkatuman”

Sama sa unsa kaha ang maghulat ug ang makakita sa bituon nga nagpahibalo sa pagkatawo ni Jesukristo? Ang mga matuohon nga Nephite nagbantay sa mga timailhan nga gipanagna ni Samuel ang Lamanite nga moabot (tan-awa sa Helaman 14), apan ang dili matuohon naghulga nga patyon sila kon ang mga timailhan dili mopakita. Kini nga leksiyon gituyo aron sa pagtabang kanimo nga mobati og mas dakong pagsalig nga ang Ginoo motuman sa tanang mga pulong nga Iyang gipamulong pinaagi sa Iyang mga propeta.

Pagpamatuod mahitungod ni Jesukristo.Ang mga estudyante mapalig-on kon imong ipakigbahin ang imong pagsaksi kang Jesukristo. Pangita og mga oportunidad sa pagpakigbahin ngadto sa mga estudyante sa imong mga pagbati mahitungod sa Manluluwas ug kon nganong naningkamot ka sa pagsunod Kaniya.

Pagpangandam sa estudyante: Ang mga estudyante mahimong mag-andam og ehemplo nga ipakigbahin kon sa unsang paagi o kon nganong ang pagbaton og hugot nga pagtuo kang Jesukristo makapalig-on sa usa ka tawo nga anaa sa walay kaseguroan o makapabalaka nga mga panahon.

Mga Posibleng Kalihokan sa Pagkat-on

Gipalig-on sa hugot nga pagtuo

Ang mosunod nga pangutana gituyo aron sa pagtabang sa mga estudyante sa pagsukod sa ilang mga kaugalingon. Kinahanglan nga dili laoman ang mga estudyante nga mopakigbahin sa ilang mga tubag.

• Sa sukod nga usa ngadto sa lima, nga ang lima mao ang labing lig-on, unsaon nimo sa pag-grado ang imong lebel sa pagtuo o pagsalig nga ang Dios nagtuman sa mga pulong sa Iyang mga propeta? Ngano man?

Sa diha nga si Samuel ang Lamanite miabot taliwala sa mga Nephite, siya nanagna nga “lima pa ka tuig ang moabot, ug tan-awa, unya moabot ang Anak sa Dios” (Helaman 14:2). Ang mga propeta nanagna mahitungod sa pag-abot ni Jesukristo sulod sa liboan ka mga tuig, ug ang gipaabot nga panahon sa Iyang pagkatawo miabot na. Ang basahon sa 3 Nephi nagsugod sa kataposan niadtong lima ka tuig.

• Kon usa ka niadtong mituo kang Samuel, unsa sa imong hunahuna ang imong bation niining panahona?

Samtang magtuon ka, pangitaa ang mga pagkaparehas tali sa mga kahimtang diha sa 3 Nephi 1 ug sa mga kahimtang sa atong panahon. Mahimo nimong markahan ang makahuloganon nga mga pulong ug mga hugpong sa mga pulong nga makapalig-on sa imong pagsalig diha sa Dios ug sa mga pulong sa Iyang mga propeta.

Ang mga matuohon nga Nephite

Sa sinugdanan sa 3 Nephi 1, atong mahibaloan nga si Nephi, ang anak nga lalaki ni Helaman, mibiya gikan sa yuta ug nga ang iyang anak nga lalaki nga si Nephi karon mao ang propeta taliwala sa mga Nephite.

Basaha ang 3 Nephi 1:4–9, mangita sa mga hagit nga giatubang sa mga matuohon nga Nephite niining panahona.

• Unsa sa imong hunahuna ang nakapahimo sa pipila nga “makanunayon [nga] nagbantay” (bersikulo 8) bisan pa sa hulga sa kamatayon?

Ikonsiderar ang pagdapit sa mga estudyante sa pagbasa ug sa paghisgot sa mosunod nga mga pangutana diha sa gagmay nga mga grupo. Ang usa ka estudyante gikan sa matag grupo mahimo dayon nga mosulat diha sa pisara sa tubag sa ilang grupo ngadto sa kataposang pangutana.

Basaha ang 3 Nephi 1:10–14 aron mahibalo kon unsay sunod nga nahitabo.

• Unsa sa imong hunahuna ang gibati ni Nephi sa dihang nakadungog siya sa tingog sa Ginoo?

• Unsa sa imong hunahuna ang gusto sa Ginoo nga masabtan ni Nephi ug sa mga tawo?

• Unsa nga mga kamatuoran ang imong mailhan gikan niining mga bersikulo?

Ang mga pulong sa mga propeta matuman

Taliwala sa daghang mga kamatuoran nga makita niini nga mga bersikulo, atong mahibaloan nga ang Ginoo motuman sa tanan nga mga pulong nga Iyang gisulti pinaagi sa Iyang mga propeta. Mahimo nimong markahan kini nga kamatuoran diha sa bersikulo 13.

Dugang nga mga kamatuoran nga mahimong mailhan sa mga estudyante gikan niini nga mga bersikulo naglakip nga ang Ginoo maminaw sa atong mga pag-ampo alang sa uban o si Jesukristo mianhi sa kalibotan aron sa pagbuhat sa kabubut-on sa Amahan.

Ikonsiderar ang pagdapit sa mga estudyante sa pagbasa sa mosunod nga mga bersikulo nga managpares.

Basaha ang 3 Nephi 1:15–22, mangita kon sa unsang paagi ang mga tawo mitubag sa dihang ang panagna natuman.

Mahimo nimong hisgotan ang mosunod nga mga pangutana (o uban pa nga imong mahunahunaan) aron matabangan ang mga estudyante nga ikonektar ang mga kasulatan sa ilang kaugalingong mga kinabuhi.

• Ngano sa imong hunahuna nga managlahi kaayo ang tubag sa mga tawo?

• Sa unsang paagi napalig-on ang mga matuohon sa panahon niini nga kasinatian?

• Sa unsang mga paagi kini nga kasinatian makadugang sa imong pagsalig sa plano sa Ginoo alang sa imong kinabuhi?

Ang imong kasinatian

Sama sa mga Nephite diha sa 3 Nephi 1, kita nagpuyo sa mga panahon nga daw puno sa kawalay kaseguroan mahitungod sa umaabot. Unsaon nato pagbaton ug pagsalig sa Ginoo ug sa Iyang mga pulong nga gihatag pinaagi sa Iyang mga propeta?

Si Elder David A. Bednar sa Korum sa Napulog Duha ka Apostoles mitudlo:

Ang kamatinud-anon dili kabuang o panatisismo. Hinoon, kini mao ang pagbutang sa atong pagsalig diha ni Jesukristo isip atong Manluluwas, sa Iyang ngalan, ug sa Iyang mga saad. Samtang kita “mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo” [2 Nephi 31:20], kita mapanalanginan uban sa usa ka mahangtoron nga panglantaw nga molungtad lapas sa atong limitado nga mortal nga kapasidad. Makahimo kita nga “magpundok, ug mobarog diha sa balaan nga mga dapit” [Doktrina ug mga Pakigsaad 101:22] ug “dili mobalhin, hangtod ang adlaw sa Ginoo moabot” [Doktrina ug mga Pakigsaad 87:8]. (David A. Bednar, “Kita Mosulay Kanila Dinhi,” Liahona, Nob. 2020, 11)

Hatagi ang mga estudyante og igong panahon sa pagpamalandong sa mosunod. Kon gikinahanglan, ipakigbahin ang pipila sa nalista nga mga sitwasyon. Mahimong makatabang alang sa mga estudyante ang pagrekord sa ilang mga hunahuna diha sa ilang mga journal sa pagtuon. Pagmabinantayon ug sayri nga ang ubang mga estudyante mahimong mobati nga emosyonal samtang ilang gikonsiderar ang ilang personal nga mga hagit. Sunda ang mga pag-aghat sa Espiritu samtang nagtinguha ka sa pagtudlo kanila ngadto sa Manluluwas.

Hunahunaa kon nganong maglisod ka tali sa pagbaton og hugot nga pagtuo sa Dios ug sa pagbati ug kawalay kasegurohan o kahadlok bahin sa imong kinabuhi. Kini nga mga rason personal sa matag indibidwal apan mahimong maglakip sa mosunod:

• Gibiaybiay o gisaway tungod sa imong mga pagtuo kang Jesukristo

• Adunay problema sa relasyon sa pamilya, naglakip sa mga ginikanan nga nagbulag pinaagi sa diborsiyo

• Nagsinati og kabalaka o depresyon

• Nabalaka mahitungod sa mga minahal nga nagsinati og pagkaibog sa sama nga sekso [same-sex attraction]

• Nag-antos sa pagka-adik o nakigbisog sa pagbuntog sa makadaot nga mga batasan [habit]

• Nahadlok nga ang mga panalangin sa ebanghelyo dili makab-ot

• Gibati nga dili takos o dili mapasaylo

Sa Juan 16:33si Jesuskristo miingon, “Sa kalibotan aduna kamoy kagul-anan: apan sumalig kamo; gidaug ko na ang kalibotan.”

• Unsa ang gipadayag sa mga propeta mahitungod kang Jesukristo nga makadasig kanimo sa padayong pagbaton og hugot nga pagtuo nganha Kaniya? (Mahimo nimong basahon ang Alma 7:11–13; Ether 12:27; Isaias 25:8–9.) Sa imong hunahuna sa unsang paagi Siya makatabang kanimo sa imong mga kahimtang?

• Kanus-a nga ang pagsalig sa Ginoo o sa mga pulong sa iyang mga propeta nagpalig-on kanimo o sa usa ka tawo nga imong nailhan sa panahon sa kawalay kasegurohan o kahadlok? Sa unsang paagi ang paghinumdom niini nga kasinatian makatabang kanimo nga maila ang Iyang tabang sa imong kinabuhi?

Sama sa giaghat sa Espiritu, mahimo nimong hangyoon ang mga estudyante sa pagpakigbahin kon unsay mipatigbabaw kanila karon. Ikonsiderar ang pagpakigbahin sa imong pagpamatuod kang Jesukristo ug sa imong pagsalig sa propetikanhong mga pulong ug mga panagna mahitungod Kaniya.

Mahimo nimong irekord ang imong mga pagbati mahitungod sa imong nakat-onan karong adlawa. Mahimo nimong ilakip ang mga buhat nga gibati nimo nga giaghat ka sa paghimo o kon sa unsa ka nga paagi nalig-on pinaagi sa pagsabot nga ang Dios nagtuman sa mga pulong nga Iyang gipamulong pinaagi sa Iyang mga propeta.

Komentaryo ug Background nga Impormasyon

Unsay akong mahimo aron magpabiling lig-on kon ang akong mga gituohan bahin kang Jesukristo gihagit?

Si Bishop Richard C. Edgley, kanhi Unang magtatambag sa Presiding Bishopric, mitudlo:

Tungod sa mga panagbingkil ug mga hagit nga atong giatubang sa kalibotan karon, gusto ko nga mosugyot og usa ka pagpili—usa ka pagpili sa kalinaw ug panalipod ug usa ka pagpili nga angay alang sa tanan. Kana nga pagpili mao ang hugot nga pagtuo. … Pilia ang hugot nga pagtuo kay sa pagduhaduha, pilia ang hugot nga pagtuo kay sa kahadlok, pilia ang hugot nga pagtuo kay sa wala maila ug sa wala makita, ug pilia ang hugot nga pagtuo kay sa pagka-negatibo. …

Kon ang pangatarongan, hinungdan,, o personal nga salabotan magkasumpaki sa sagrado nga mga pagtulun-an ug doktrina, o nagkasumpaki nga mga mensahe moataki sa inyong mga tinuohan … , pilia nga dili isalikway ang binhi sa imong kasingkasing tungod sa pagkawalay pagtuo [tan-awa sa Alma 32:28]. Hinumdomi,nga kita dili makadawat og saksi hangtod human sa pagsulay sa atong hugot nga pagtuo (tan-awa sa Ether 12:6). (Richard C. Edgley,“Hugot nga Pagtuo-ang Pagpili Inyo,” Liahona, Nob. 2010, 31, 32–33)

3 Nephi 1:14. Sa unsang paagi mahimo ni Jesukristo ang kabubut-on sa Amahan ug sa Anak?

Si Elder Bruce R. McConkie [1915–85] sa Korum sa Napulog Duha ka Apostoles mitudlo:

Klaro nga si [Jesukristo] mao ang Anak tungod sa unod, nagpasabot nga siya natawo sa kalibotan sama sa ubang mga mortal. Siya adunay usa ka lawas nga gipanamkon ug giatiman sa tagoangkan sa usa ka mortal nga babaye. Mas lisod ang paghanduraw kon sa unsang paagi siya nahimong Amahan tungod sa iyang kaugalingon. Kini mahimo lamang nga ipasabot nga siya [ang Manluluwas] mao ang Amahan tungod kay siya adunay gahom sa Amahan; nga ang iyang kabubut-on gilamoy diha sa kabubut-on sa Amahan; nga siya makahimo sa tanan nga mga butang tungod sa iyang kabilin gikan niana nga Halangdon nga Binuhat. …

Si Kristo mao ang Dios ug siya mianhi aron sa pagtubos sa iyang mga katawhan. Siya ang Anak tungod kay siya natawo sa pagka-mortal. Siya mao ang Amahan tungod kay siya nakapanunod gikan sa iyang Amahan sa tanan nga gahom sa pagkagamhanan, ug unsa ang iyang gisulti ug unsa ang iyang gibuhat mahimo, ug mao ang mga pulong ug mga buhat kaniya kansang ngalan iyang gidala. (Bruce R. McConkie, The Promised Messiah: The First Coming of Christ [1978], 371-73)

3 Nephi 1:22. Sa unsang paagi ako makalikay nga mahulog sa mga bakak nga gipakaylap ni Satanas karon?

Si Presidente Dieter F. Uchtdorf, kanhi sa Unang Kapangulohan, mitudlo:

Si Satanas, ang atong kaaway, gusto nga mapakyas kita. Mipakatap siya og mga bakak isip kabahin sa iyang paningkamot sa pagguba sa atong pagtuo. Malinglahon siyang nagsugyot nga ang tawong maduhaduhaon, ang dili matuohon, ang negatibo og hunahuna maoy mga sopistikado ug makinaadmanon, samtang kadtong dunay pagtuo sa Dios ug sa Iyang mga milagro mga ignorante, buta, o nabutaan ang hunahuna [brainwashed]. I-awhag ni Satanas nga popular ang pagduda sa espirituhanong mga gasa ug sa mga pagtulun-an sa tinuod nga mga propeta.

Hinaot nga makatabang ko sa tanan nga makasabot niining yano nga kamatuoran: kita mituo sa Dios tungod sa mga butang nga atong nahibaloan sa atong kasingkasing ug hunahuna, dili tungod sa mga butang nga wala nato mahibaloi. Ang atong espirituhanong mga kasinatian usahay sagrado kaayo nga ipasabot gamit ang kalibotanonng sinultihan, apan wala kana magpasabot nga dili kini tinuod. (Dieter F. Uchtdorf, “Ayaw Kahadlok, Sumalig Ka Lamang,” Liahona, Nob. 2015, 78)

Dugang nga mga Kalihokan sa Pagkat-on

3 Nephi 1:22-26. Kon mag-atubang kita sa mga bakak ni Satanas, makapili kita nga motuo ni Jesukristo ug makabig

Mahimo nimong tabangan ang mga estudyante nga makakita sa kalabotan tali sa mga hitabo sa 3 Nephi 1 ug sa atong mga kinabuhi karon sa wala pa ang Ikaduhang Pag-anhi ni Jesukristo. Dapita ang mga estudyante sa paghunahuna mahitungod kon unsa nga mga hagit sa hugot nga pagtuo ang ilang giatubang ug sa unsa nga paagi ang mga batan-on motubag. Basaha ang 3 Nephi 1:22–26, mangita kon giunsa pagtubag sa mga matuohon nga mga Nephite. Ang mga estudyante mahimong makaila sa baroganan nga susama niini: kon kita nag-atubang sa mga bakak ni Satanas, makapili kita nga motuo ni Jesukristo ug makabig.

Mahimo nimong hisgotan ang mga pangutana nga susama sa mosunod:

• Unsa ang pipila sa mga bakak ni Satanas nga giatubang sa mga kabatan-onan karon?

• Sa unsang paagi ang imong hugot nga pagtuo diha ni Jesukristo nakatabang kanimo sa paglikay o pagsalikway sa mga bakak ni Satanas?

• Sa unsang paagi ang pagpili nga motuo ug mosunod ni Jesukristo nakatabang kanimo nga mahimong mas makabig?

Salig sa mga pulong sa mga propeta sa ulahing mga adlaw

Atol sa “Imong kasinatian” nga bahin sa leksiyon, mahimo nimong dapiton ang mga estudyante sa pagtuon sa bag-ohay lang nga mga pulong sa mga propeta ug apostoles. Mahimo nimong ipakigbahin ang usa ka mubo nga senaryo mahitungod sa usa ka tin-edyer kansang mga pagtuo sa Langitnong Amahan ug ni Jesukristo gibugalbugalan o gibiaybiay sa ilang mga kaedad ug pangutana sa mosunod nga mga pangutana.

• Sa unsang paagi ka nasuportahan ug napalig-on sa pagkahibalo nga ang Ginoo nagtuman sa mga pulong nga Iyang gipamulong pinaagi sa Iyang mga propeta?

• Unsa ang bag-ohay lang nga mga pulong gikan sa mga propeta ang labing makahuloganon samtang naningkamot ka sa pagpuyo sa imong mga gituohan diha sa mahagiton nga mga panahon?