3 Nephi 2–5

“Andam … diha sa Kalig-on sa Ginoo”

Minerva Teichert (1888-1976), Ang Tubag ni Lachoneus, 1949-1951, lana sa lino nga gilakip sa masonite, 36 x 48 ka pulgada. Brigham Young University Museum of Art.

Sama nga nag-atubang kita og mga hagit sa padulong nga pagbalik sa Manluluwas, ang mga Nephite nag-atubang og mga hagit sa katuigan sa wala pa Siya moabot ngadto kanila. Ang mga tulisan ni Gadianton nanghulga sa paglaglag sa mga Nephite. Hinuon, ang mga Nephite “andam sa pagsugat kanila … diha sa kalig-on sa Ginoo” (3 Nephi 4:10). Sama sa mga Nephite, mabuntog nato ang mga hagit pinaagi sa pagkaandam. Kini nga leksiyon makatabang kanimo nga makadawat sa kalig-on sa Ginoo pinaagi sa pagkaandam diha sa espirituhanon ug sa temporal nga paagi.

Pagdapit sa mga estudyante nga molihok sa epektibo nga matarong nga binuhatan. Samtang magtuon ang mga estudyante sa kasulatan, tabangi sila nga makaila sa mga sangpotanan sa mga pagpili ug mga binuhatan nga natala sa mga asoy. Awhaga ang mga estudyante sa pagkonektar niini nga mga leksiyon diha sa ilang kaugalingong mga kinabuhi ug sa pagtino kon unsaon nila nga magmatinud-anong mosunod sa Manluluwas.

Pagpangandam sa estudyante: Dapita ang mga estudyante sa paghisgot ngadto sa mga sakop sa pamilya o ngadto sa mga lider sa Simbahan sa mga panalangin nga nagagikan sa pagkaandam sa temporal o sa espirituhanon nga paagi.

Mga Posibleng Kalihokan sa Pagkat-on

Pangandam

Ang katuyoan niini nga kalihokan mao ang pagtabang sa mga estudyante nga makita ang kamahinungdanon sa pagkaandam. Tabangi ang mga estudyante sa paghunahuna sa mga kahimtang nga kinahanglan nilang pangandaman. Ikonsiderar ang pagpakigbahin mahitungod sa usa ka panahon sa dihang ikaw gipanalanginan tungod sa pagkaandam o sa dihang naglisod ka tungod kay ikaw dili andam.

Hunahunaa ang usa ka higayon sa imong kinabuhi sa dihang gibati nimo nga andam ka o dili ka andam.

• Unsa kadto nga sitwasyon, ug nganong gibati nimo nga andam ka o dili ka andam?

• Kon gibati nimo nga dili ka andam, unsay imong nahimo aron sa mas maandam alang sa umaabot?

• Unsay imong nahimo aron espirituhanong maandam sa mga hagit nga imong giatubang o mahimo nimong atubangon sa umaabot?

Samtang magtuon ka sa 3 Nephi 2–5, tinguhaa ang giya sa Espiritu aron mahibalo kon unsay imong mahimo aron maandam ang imong kaugalingon sa temporal ug espirituhanon nga paagi alang sa umaabot.

Pagpangandam ni Lachoneus

Si propeta Samuel mitagna nga dunay gabii nga walay kangitngit isip ilhanan sa pagkatawo ni Jesukristo. Sa diha nga kini nga panagna natuman (tan-awa sa 3 Nephi 1:15–19), “ang labaw nga bahin sa mga katawhan mituo, ug nakabig ngadto sa Ginoo” (3 Nephi 1:22). Apan human sa pipila ka tuig, ang uban misugod sa dili pagtuo.

Alang sa mosunod nga kalihokan, mahimo nimong bahinon ang klase sa katunga o sa mga managpares. Katunga sa mga estudyante mahimong mobasa sa usa sa mosunod nga mga tudling ug ireport kon unsa ang ilang nakit-an ngadto sa klase o ngadto sa ilang kapares.

Basaha ang 3 Nephi 1:27–30 ug 3 Nephi 2:1–3, mangita og mga rason nga ang uban nga mga tawo nahisalaag gikan sa Ginoo.

• Unsa nga mga leksiyon ang atong makat-onan gikan niini nga mga bersikulo nga makatabang kanato nga magpabilin nga matinud-anon sa Ginoo sa atong panahon?

Ang mga tulisan ni Gadianton nagkadaghan ug nakig-away batok sa mga Nephite. Isip tubag, “ang mga Lamanite kinsa nakabig ngadto sa Ginoo nakighiusa sa ilang mga kaigsoonan, ang mga Nephite” (3 Nephi 2:12). Si Giddianhi, ang lider sa mga tulisan ni Gadianton, misulat ngadto ni Lachoneus, ang labaw nga maghuhukom sa mga Nephite. Diha niini, siya mihulga sa paglaglag sa mga Nephite kon sila dili mosurender (tan-awa sa 3 Nephi 3:1–10).

Basaha ang 3 Nephi 3:11–12, mangita kon giunsa pagtubag ni Lachoneus.

• Unsa nga ebidensiya ang imong nakita sa hugot nga pagtuo ni Lachoneus diha sa Ginoo?

Isulat ang Mga Pagpangandam sa mga Nephite diha sa pisara. Ikonsiderar ang paghatag sa mosunod nga mga tudling ngadto sa nagkalainlaing mga miyembro sa klase o sa mga grupo. Dapita ang mga estudyante nga ilista diha sa pisara kon unsay gihimo sa mga tawo aron maandam sa temporal ug espirituhanon nga paagi.

• 3 Nephi 3:13–16

• 3 Nephi 3:17–21

• 3 Nephi 3:22–26

• 3 Nephi 4:3–4

Aron matabangan ang mga estudyante nga makaila sa temporal nga mga pagpangandam, mahimo nimong hisgotan kon giunsa sa mga Nephite pagtukod og mga kuta, pagbutang og mga guwardiya, ug pagkolekta og mga suplay ug pagkaon. Alang sa espirituwal nga pagpangandam, mahimo nimong hisgotan kon sa unsang paagi sila naghinulsol ug nag-ampo alang sa kaluwasan.

• Hain sa mga pagpangandam sa imong hunahuna ang labing nakatabang pag-ayo? Ngano man?

• Sa unsang paagi sa imong hunahuna kini nga mga pagpangandam nakatabang kanila sa pagsalig sa Ginoo?

Basaha ang 3 Nephi 4:7–12, mangita kon sa unsang paagi napanalanginan ang mga Nephite tungod sa ilang espirituhanon ug temporal nga mga pagpangandam.

• Unsa nga mga baroganan ang atong makat-onan gikan niini nga asoy? (Tan-awa sa 3 Nephi 4:10.)

Usa sa mga baroganan nga makat-onan nato gikan niini nga asoy mao ang kon kita mag-andam sa atong kaugalingon sa espirituwal ug temporal nga paagi, ang Ginoo mopalig-on kanato sa pagbuntog o paglahutay sa mga hagit.

Mga pagpangandam sa atong panahon

Isulat ang Modernong Pagkapareha diha sa pisara, ug tabangi ang mga estudyante sa paghimo og listahan sa mga pagpangandam nga atong mahimo sa atong panahon. Kini mahimong mga pagpangandam nga susama sa mga Nephite o uban pang mga pagpangandam nga gitambag sa mga propeta nga atong himoon. Hisgotan ang piho nga mga hagit nga atong giatubang karon ug kon sa unsang paagi kini nga mga pagpangandam makatabang kanato nga maandam diha sa kalig-on sa Ginoo. Aron matabangan ang mga estudyante nga makahunahuna og mga ideya, ikonsiderar ang pagpakita sa bidyo nga “Mga Kapanguhaan sa Temporal nga Pagpangandam” (3:09), nga anaa sa ChurchofJesusChrist.org.

• Pagpili og usa o subra pa sa usa ka mga pagpangandam gikan sa imong lista. Sa unsang paagi kini makatabang nato sa pagbuntog sa piho nga mga hagit nga atong giatubang sa atong panahon karon?

• Sa unsang mga paagi sa imong hunahuna nga ang atong pagpangandam nagtugot sa Ginoo sa paglig-on kanato?

Ang mga tulisan ni Gadianton nagtukod og usa ka pagsulong nga napakyas tungod kay ang mga Nephite adunay balaan nga tabang sa ilang pagpangandam. Sa kataposan, ang mga tulisan ni Gadianton miatras. Sila gibabagan sa kasundalohan sa mga Nephite ug mitugyan sa ilang mga kaugalingon ingon nga mga binilanggo o gipamatay (tan-awa sa 3 Nephi 4:16–27).

Basaha ang 3 Nephi 4:30–33; 5:1–4, mangita kon sa unsang paagi mitubag ang mga katawhan sa ilahang pagkalig-on pinaagi sa Ginoo.

• Sa unsang paagi ang ilang tubag nagpakita sa ilang hugot nga pagtuo sa Dios?

Mahimo nimong ipakita ang mosunod nga pagdapit sa pagpamalandong ingon man ang pamahayag ni Presidente Nelson alang sa mga estudyante sa paghunahuna ug sa pagpamalandong.

Pamalandongi ang usa ka panahon sa dihang ikaw mibati sa kalig-on sa Ginoo pinaagi sa pagpangandam sa temporal ug espirituhanon nga paagi.

Si Presidente Russell M. Nelson mipamatuod sa mga panalangin sa pagkaandam:

Ang kaaway dili gayod mohunong sa pag-ataki. Busa, kita dili gayod mohunong sa pagpangandam! Kon kita mas mobarog pinaagi sa kinaugalingon nga paningkamot—sa temporal, emosyonal, ug espiritwal—mas makaandam kita sa pagsanta sa walay hunong nga mga pang-ataki ni Satanas. …

Ako wala moingon nga ang umaabot nga mga adlaw sayon, apan ako mosaad kaninyo nga ang umaabot mahimayaon alang niadtong kinsa nakaandam ug kinsa nagpadayon sa pagpangandam nga mahimong mga instrumento sa mga kamot sa Ginoo. (Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 75-76)

Kon gikinahanglan, ipakigbahin ang mga ehemplo kon unsa ang gikinahanglan nga pangandaman sa mga estudyante—pananglitan, misyonaryo nga pagserbisyo, mga oportunidad sa edukasyon, panarbaho [career], natural nga mga katalagman, o pag-anhi sa Manluluwas.

Paghunahuna og hagit, kahimtang, o panghitabo nga kinahanglan nimong pangandaman. Hunahunaa kon paminaw nimo unsa ka kaandam karon. Tinguhaa ang giya sa Espiritu samtang ikaw motubag niining mga pangutana.

• Unsa ang piho nga mga buhat nga mahimo nimong himoon aron sa pagpangandam?

• Sa unsang paagi nimo maapil ang Ginoo sa imong mga pagpangandam?

Pagpamatuod sa mga panalangin nga moabot gikan sa pagkaandam. Dasiga ang mga estudyante nga maghisgot ngadto sa ilang mga pamilya kabahin sa mga hagit nga mahimo nilang atubangon ug kon unsaon sa pagpangandam sa temporal ug espirituhanon nga paagi.

Komentaryo ug Background nga Impormasyon

Unsaon man nato nga makapangandam?

Si Presidente Russell M. Nelson mitudlo:

Kita gisaaran nga “kon [kita] andam dili [kita] mahadlok” [Doktrina ug mga Pakigsaad 38:30]. Kini nga kaseguroan adunay dagkong implikasyon karon. Ang Ginoo namahayag nga bisan sa dili ordinaryo nga mga hagit, kadtong kinsa motukod sa ilang mga pundasyon diha kang Jesukristo, ug nakat-on unsaon sa paggamit sa Iyang gahom, dili kinahanglan nga magpadala sa talagsaon nga mga kabalaka niining panahona. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 94)

Si Presidente Dallin H. Oaks sa Unang Kapangulohan mipahayag:

Kinahanglan kitang mohimo og temporal ug espirituhanong pagpangandam alang sa mga panghitabo nga gitagna sa panahon sa Ikaduhang Pag-anhi. Ug ang pagpangandam nga posibleng makalimtan mao kadtong dili kaayo makita ug mas lisod—ang espirituhanon. (Dallin H. Oaks, “Pagpangandam alang sa Ikaduhang Pag-anhi,” Liahona, May 2004, 9)

Si Elder David A. Bednar sa Korum sa Napulog Duha ka Apostoles mipasabot:

Ang atong mga paningkamot sa pagpangandam alang sa mga kasinatian nga mosulay sa mortalidad kinahanglang magsunod sa ehemplo sa Manluluwas nga sa inanay nga paagi “mitubo sa lawas ug sa kinaadman ug gikahimut-an siya sa Dios ug sa mga tawo”[Lucas 2:52]—usa ka hiniusang pagbalanse sa intelektwal, pisikal, espiritwal, ug sosyal nga kaandam. (David A. Bednar, “Kita Mosulay Kanila Dinhi,” Liahona, Nob. 2020, 9)

Si Elder Quentin L. Cook sa Korum sa Napulog Duha ka Apostoles mitudlo:

Ang mga bagyo ug tintasyon niining kinabuhia sagad dili mahibaloan. Apan nahibalo kita niini: nga moabot kini! Aron mabuntog nato ang mga hagit ug tintasyon nga dili kalikayan nga masagubang natong tanan, magkinahanglan kini og matarong nga pagpangandam ug paggamit sa balaang proteksiyon nga giandam. Kinahanglang determinado kita nga mahimong takos sa templo bisan sa unsang pagsulay nga moabot kanato. Kon kita andam, kita dili mahadlok. (Quentin L. Cook, “Sama sa Barko ug Sama sa Bristol: Pagpakatakos sa Templo—sa Maayo ug sa Lisod nga mga Panahon,” Liahona, Nob. 2015, 39)

3 Nephi 2:15. Unsa ang buot ipasabot nga “ang ilang tunglo gikuha gikan kanila”?

Sa panahon ni Nephi ang tunglo sa mga Lamanite mao nga sila “[gi]pahimulag gikan sa atubangan [sa Ginoo] … tungod sa ilang kadaotan” (2 Nephi 5:20–21). Ang tunglo molungtad lamang kon ang mga tawo daotan. Sa dihang ang mga Lamanite sa kaulahian mihangop sa ebanghelyo ni Jesukristo, “ang tunglo sa Dios wala na mosunod kanila” (Alma 23:18). Sa 3 Nephi 2, ang tunglo gikuha gikan sa mga Lamanite kinsa nakabig ngadto sa Ginoo (tan-awa sa 3 Nephi 2:12, 15).

Dugang nga mga Kalihokan sa Pagkat-on

Ang ehemplo sa Manluluwas sa pagpangandam

Ang mga estudyante mahimong makabenepisyo sa pagkakita sa ehemplo sa Manluluwas sa pagpangandam. Mahimo nilang basahon ang Lucas 2:52 ug ang pamahayag ni Elder David A Bednar diha sa seksiyon nga “Komentaryo ug Background nga Impormasyon”. Hisgoti ang mga paagi nga ang mga estudyante mahimong maandam niining dapita. Mahimo usab nimong dapiton ang mga estudyante sa pag-tan-aw diha sa mga Tumong sa mga Kabataan ug mga Kabatan-onan sa personal nga kalamboan nga ilang gitakda.

3 Nephi 2:1–3. Hinumdomi ang espirituhanong mga kasinatian

Ikonsiderar ang paghisgot sa kamahinungdanon sa paghinumdom sa atong espirituhanong mga kasinatian. Human mabasa ang 3 Nephi 2:1–3, mahimo nimong hisgotan kon unsay mahitabo kon malimtan nato ang espirituhanong mga kasinatian nga atong naangkon. Dayon dapita ang mga estudyante sa pagpakigbahin kon unsay ilang gihimo aron sa paghinumdom ug pagbag-o sa ilang pagsaksi sa espirituwal nga mga kamatuoran. Mahimo usab nila nga irekord ang nangaging espirituwal nga mga kasinatian diha sa ilang journal sa pagtuon.

Alang sa ubang impormasyon mahitungod niini nga hilisgotan, tan-awa ang mosunod:

• Henry B. Eyring, “O Hinumdumi, Hinumdumi,” Liahona, Nob. 2007, 66–69

• Ronald A. Rasband, “Kay Tingali Lamang Mahakalimot Ka,” Liahona, Nob. 2016, 113–115

• Neil L. Andersen, “Mga Espirituhanong Panumduman nga Angay Hinumdoman,” Liahona, Mayo 2020, 18–22

3 Nephi 3:2–12. Gitintal ni Giddianhi si Lachoneus

Kini nga kalihokan makatabang sa mga estudyante nga makakita kon sa unsang paagi si Satanas ug ang iyang mga sumusunod kasagarang mogamit og pag-ulog-ulog, bakak nga mga saad, ug pagpanghadlok aron sa pagpahisalaag sa katawhan. Basaha ang 3 Nephi 3:2–10, mangita sa mga pulong nga naghulagway sa mga taktika nga gigamit ni Giddianhi sa pagsulay sa pagpahuyang sa hugot nga pagtuo ni Lachoneus ug sa pagpahisalaag kaniya. Hisgoti kon sa unsang paagi ang susama nga mga taktika gigamit batok sa mga batan-on karon. Dayon basaha ang 3 Nephi 3:11–12, mangita kon giunsa pagtubag ni Lachoneus. Hisgoti kon sa unsang paagi ang matarong nga mga lalaki ug mga babaye dili angayng mahadlok sa daotan o motugyan sa ilang mga panghulga.

3 Nephi 5:23–26. Ang pagpundok sa Israel

Mahimong ipakigsama sa mga estudyante ang pagpundok sa mga Nephite diha sa 3 Nephi 3–4 ngadto sa pagpundok sa Israel. Basaha ang 3 Nephi 5:23–26 ug hisgoti ang pagpundok sa Israel. Tabangi ang mga estudyante nga makakita nga ang Israel napundok samtang ang mga katawhan miabot sa “[pagkasayod] sa ilang Manunubos, kinsa mao si Jesukristo,” (3 Nephi 5:26).

Tan-awa usab sa Russell M Nelson ug Wendy Nelson, “Paglaom sa Israel” (tibuok kalibotan nga debosyonal sa kabatan-onan, Hunyo 3, 2018), dugang ngadto sa New Era ug sa Ensign, ChurchofJesusChrist.org. Mahimong makatabang ang pagtan-aw sa bidyo sa sibya gikan sa time code 29:50 hangtod sa 33:36 ug 38:18 hangtod sa 45:09.