1 Ug karon nahitabo nga sa ikanapulo ug unom nga tuig gikan sa pag-anhi ni Kristo, si Lachoneus ang gobernador sa yuta, nakadawat og usa ka sulat gikan sa pangulo ug gobernador niining pundok sa mga tulisan; ug kini ang mga pulong nga gisulat, nga nag-ingon:

2 Lachoneus, labing talahoron ug labaw nga gobernador sa yuta, tan-awa, misulat ako kanimo niining sulat, ug mohatag kanimo og hilabihan ka dako nga pagdayeg tungod sa imong kalig-on, ug usab sa kalig-on sa imong katawhan, sa pagpanalipod nianang inyong gituohan nga inyong katungod ug kalingkawasan; oo, ikaw nagbarog nga dili matarog, ingon og ikaw gibuligan pinaagi sa kamot sa usa ka dios, sa pagpanalipod sa inyong kalingkawasan, ug sa inyong kabtangan, ug sa inyong nasod, ug nianang gitawag ninyo og ingon niana.

3 Ug kini ingon og makaluluoy alang kanako, labaw nga talahorong Lachoneus, nga ikaw hilabihan ka walay kaalam ug mahambogon nga nagtuo nga ikaw makabarog batok sa daghang tawo nga maisog nga ania sa akong kamandoan, nga niining higayona nagbarog dala ang ilang mga hinagiban, ug naghulat uban sa dakong kaikag alang sa mando—Sulong ngadto sa mga Nephita ug laglaga sila.

4 Ug ako, nga nasayod sa ilang dili mapugngan nga kaisog, kay nasulayan na sila sa natad sa panggubatan, ug nasayod sa ilang walay kataposan nga pagdumot kaninyo tungod sa daghang kasaypanan nga inyong nahimo kanila, busa kon sila mosulong kaninyo sila moduaw kaninyo sa hingpit nga kalaglagan.

5 Busa misulat ako niini nga sulat, nagselyo niini pinaagi sa akong kaugalingong kamot, nagpakabana sa imong kaayohan, tungod sa imong kalig-on nianang imong gituohan nga matarong, ug sa imong halangdon nga espiritu sa natad sa panggubatan.

6 Busa misulat ako kanimo, nagtinguha nga inyong itugyan niini nga akong katawhan, ang inyong mga siyudad, ang inyong mga yuta, ug ang inyong mga katigayonan, kay sa sila ang moduaw kaninyo dala ang espada ug ang kalaglagan moabot kaninyo.

7 O sa laing pagkasulti, itugyan ang inyong kaugalingon ngari kanamo ug makighiusa kanamo ug makigsinati sa among tinago nga mga buhat, ug mahimong among kaigsoonan nga kamo mahimong sama kanamo—dili among mga ulipon, apan among kaigsoonan ug mga kauban sa tanan namong katigayonan.

8 Ug tan-awa, ako manumpa kanimo, kon kamo mobuhat niini, uban sa panumpa, kamo dili pagalaglagon; apan kon kamo dili mobuhat niini, ako manumpa kanimo og usa ka panumpa, nga sa sunod nga bulan ako momando nga ang akong kasundalohan mosulong kaninyo, ug dili sila mopugong sa ilang mga kamot ug walay pasayloon, apan mopatay kaninyo, ug motugot nga ang espada motigbas kaninyo gani hangtod nga kamo mangamatay.

9 Ug tan-awa, ako si Giddianhi; ako ang gobernador niini nga tinago nga kapunongan ni Gadianton; diin nga kapunongan ug mga buhat niana akong nasayran nga maayo; ug kini sukad pa sa karaan nga panahon ug gipasa kini ngari kanamo.

10 Ug misulat ako kanimo niini nga sulat, Lachoneus, ug manghinaot ko nga inyong itugyan ang inyong mga yuta ug ang inyong mga kabtangan, nga walay dugo nga moagas, nga mabawi niining akong katawhan ang ilang mga katungod ug pagdumala, kinsa mibiya kaninyo tungod sa inyong pagkadaotan sa pagtangtang gikan kanila sa ilang katungod sa pagdumala, ug gawas kon ikaw mobuhat niini, ako mopanimalos sa ilang mga kasaypanan. Ako si Giddianhi.

11 Ug karon nahitabo nga sa pagkadawat ni Lachoneus niining sulat natingala siya sa hilabihan, tungod sa kaisog ni Giddianhi sa pag-angkon sa katigayonan sa yuta sa mga Nephita, ug usab sa pagpanghulga sa katawhan ug sa pagpanimalos sa kasaypanan niadtong wala mabuhati og kasaypanan, gawas lamang sa nahimo nila nga kasaypanan sa ilang kaugalingon pinaagi sa pagtipon ngadto sa mga daotan ug salawayon nga mga tulisan.

12 Karon tan-awa, kini si Lachoneus, ang gobernador, usa ka makiangayon nga tawo, ug dili malisang sa mga gipangayo ug mga panghulga sa usa ka tulisan; busa wala siya mopatalinghog sa sulat ni Giddianhi, ang gobernador sa mga tulisan, apan misugo siya nga ang iyang katawhan mangamuyo sa Ginoo alang sa kalig-on batok sa panahon nga ang mga tulisan mosulong kanila.

13 Oo, mipadala siya og usa ka pahibalo taliwala sa tanang katawhan, nga pundokon nila ang ilang kababayen-an, ug ilang mga anak, ilang mga pundok sa gagmayng kahayopan ug ilang mga pundok sa dagkong kahayopan, ug tanan nga ilang mga katigayonan, gawas lamang sa ilang yuta, ngadto sa usa ka dapit.

14 Ug misugo siya nga ang mga kuta pagatukoron libot kanila, ug ang kalig-on niana kinahanglan nga hilabihan gayod kaayo. Ug misugo siya nga ang kasundalohan, sa mga Nephita ug sa mga Lamanita, o tanan kanila nga giihap lakip sa mga Nephita, ibutang isip mga magbalantay sa palibot aron sa pagtan-aw kanila, ug sa pagbantay kanila gikan sa mga tulisan adlaw ug gabii.

15 Oo, miingon siya kanila: Ingon nga ang Ginoo buhi, gawas kon kamo maghinulsol sa tanan ninyong hiwi nga mga binuhatan, ug mangamuyo ngadto sa Ginoo, kamo dili gayod maluwas gikan sa mga kamot sa mga tulisan ni Gadianton.

16 Ug hilabihan ka mahinungdanon ug kahibulongan ang mga pulong ug mga panagna ni Lachoneus nga kini nakamugna og kahadlok sa tanang katawhan; ug nanglimbasog sila kutob sa ilang mahimo sa pagbuhat sumala sa mga pulong ni Lachoneus.

17 Ug nahitabo nga si Lachoneus mitudlo og labaw nga mga kapitan sa tanang kasundalohan sa mga Nephita, aron sa pagmando kanila sa panahon nga ang mga tulisan mosulong gikan sa kamingawan batok kanila.

18 Karon ang labing labaw sa tanan nga mga kapitan ug ang bantogan nga tigmando sa tanan nga kasundalohan sa mga Nephita natudlo, ug ang iyang ngalan mao si Gidgiddoni.

19 Karon nabatasan na sa tanang Nephita nga motudlo og ilang labaw nga mga kapitan, (gawas lamang sa mga panahon sa ilang pagkadaotan) nga usa ka tawo nga adunay espiritu sa pagpadayag ug usab sa pagpanagna; busa, kini si Gidgiddoni usa ka halangdon nga propeta taliwala kanila, ingon man usab mao ang labaw nga maghuhukom.

20 Karon ang katawhan miingon ni Gidgiddoni: Pag-ampo sa Ginoo, ug manungas kita sa mga bukid ug ngadto sa mga kamingawan, aron atong masulong ang mga tulisan ug laglagon sila sa ilang mga yuta.

21 Apan si Gidgiddoni miingon kanila: Ang Ginoo nagdili; kay kon kita mosulong kanila ang Ginoo motugyan kanato sa ilang mga kamot; busa mangandam kita sa atong kaugalingon dinhi sa tunga-tunga sa atong mga yuta, ug atong pundokon ang atong kasundalohan, ug dili kita mosulong kanila, apan maghulat hangtod nga sila mosulong kanato; busa ingon nga ang Ginoo buhi, kon kita mobuhat niini siya motugyan kanila sa atong mga kamot.

22 Ug nahitabo sa ikanapulo ug pito nga tuig, sa kaulahiang bahin sa tuig, ang pagpahibalo ni Lachoneus miabot sa ibabaw sa tibuok yuta, ug nangandam sila sa ilang mga kabayo, ug sa ilang mga karwahe, ug sa ilang mga baka, ug sa tanan nga ilang mga pundok sa gagmayng kahayopan, ug sa ilang mga pundok sa dagkong kahayopan, ug sa ilang mga lugas, ug sa tanan nga ilang mga katigayonan, ug nagmartsa sa mga tinaglibo ug sa tignapulo ka kaliboan, hangtod nga miabot sila sa dapit nga gitakda nga sila kinahanglang magpundok, aron sa pagpanalipod sa ilang kaugalingon batok sa ilang mga kaaway.

23 Ug ang yuta nga gitakda mao ang yuta sa Zarahemla, ug ang yuta nga anaa sa tunga-tunga sa yuta sa Zarahemla ug sa yuta sa Bountiful, oo, ngadto sa utlanan diin anaa sa tunga-tunga sa yuta sa Bountiful ug sa yuta sa Desolation.

24 Ug dihay hilabihan ka daghan nga liboan nga katawhan kinsa gitawag og mga Nephita, nga nagpundok niini nga yuta. Karon si Lachoneus misugo nga magpundok sila ngadto sa yuta sa habagatang bahin, tungod sa mabangis nga tunglo nga anaa sa yuta sa amihanang bahin.

25 Ug gilig-on nila ang ilang kaugalingon batok sa ilang mga kaaway; ug mipuyo sila sa usa ka yuta, ug diha sa usa ka pundok, ug nahadlok sila sa mga pulong nga gipamulong ni Lachoneus, nga niana gihinulsolan nila ang tanan nilang mga sala; ug mihalad sila sa ilang mga pag-ampo ngadto sa Ginoo nga ilang Dios, nga siya moluwas kanila sa higayon nga ang ilang mga kaaway mosulong kanila aron makig-away.

26 Ug hilabihan ang ilang ka masulub-on tungod sa ilang mga kaaway. Ug si Gidgiddoni misugo nga maghimo sila og mga hinagiban sa gubat sa matag matang, ug kinahanglang lig-on kini uban sa kalasag, ug uban sa mga taming, ug uban sa mga panagang, subay sa paagi sa iyang panudlo.