3 Nifae 12–16

Vaaiga Aoao

A o aoao atu i tagata i le laueleele o Nuumau, sa folafola atu e Iesu le tele o faamanuiaga e mafai ona tatou maua ma auala e mafai ona tatou avea atili ai e faapei o Ia i se lauga e pei o Lana Lauga i luga o le Mauga. Ona Ia fesoasoani lea i tagata ia malamalama i Lona alofa ma Lona manao e faapotopoto mai fanau uma a le Atua.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

3 Nifae 12:1–16

Faamoemoega o le lesona: O lenei lesona e mafai ona fesoasoani i tagata aoga e saunia ai ia maua faamanuiaga na fetalai i ai le Faaola a o latou taumafai e mulimuli i Lana fautuaga.

• Sauniuniga a le tagata aoga: Ina ia fesoasoani e saunia loto o tagata aoga e suesue i le lauga a le Faaola i le 3 Nifae, lea e talitutusa lava ma Lana Lauga i luga o le Mauga, mafaufau e valaaulia i latou e mafaufau loloto i le saunoaga lenei mai ia Peresitene Iosefa Filitia Samita (1876–1972). Na ia saunoa e faapea, o le Lauga i luga o le Mauga o “le [lauga] sili lea na folafolaina, e tusa ai ma lo tatou iloa” (Aoaoga a Peresitene o le Ekalesia: Iosefa Filitia Samita [2013], 234).

• Anotusi e faaali atu: O se ata faigofie o se kava faafoliga o se mekasini e aofia ai se ulutala e pei o le Worldly Success Magazine; o se ata faigofie o le faavaa o le mekasini o le Liahona

• Fautuaga faafaiaoga faavitiō: Afai e suesue e tagata aoga lauga o le konafesi mai taitai o le Ekalesia, e mafai ona e faatagaina i latou e faasoa mai a latou lau e faasino mai ai vaega patino o lauga sa taua ia i latou.

3 Nifae 12:17–48

Faamoemoega o le lesona: O lenei lesona e tatau ona fesoasoani i tagata aoga ia malamalama i o latou gafatia e atoatoa ai e pei o lo tatou Tama oi le Lagi ma Iesu Keriso.

• Sauniuniga a le tagata aoga: Valaaulia tagata aoga e suesue le parakalafa muamua i lalo o le faamatalaga mo le “Atoatoa” i le Taiala i Tusitusiga Paia ma o mai saunia e faasoa mai mea na latou maua e sili ona anoa e uiga i lenei faauigaga ma pe aisea.

• Ata e faaali atu: Ata o se fatu, o se tamai taifau, ma se pepe

• Anomea mo tagata aoga: Fasipepa laiti mo tagata aoga e tusitusi ai i luga

• Fautuaga faafaiaoga faavitiō: Ina ia amata le lesona, e faaopoopo atu i le faaali atu o ata o le fatu, tamai taifau, ma le pepe, e mafai ona e faaali atu ata o se laau ua matua, se taifau ua matua, ma Iesu po o le Tama Faalelagi. A uma ona faaali ata muamua e tolu, e mafai ona e fesoasoani i tagata aoga e vaai faalemafaufau i o latou gafatia e ala i le faaali atu o ata faaopoopo.

Atamai i Aoaoga Faavae: 3 Nifae 12:48

Faamoemoega o le lesona: O lenei lesona e mafai ona fesoasoani i tagata aoga e tauloto ai le mau faasino ma le fuaitau autu o le mau mo le 3 Nifae 12:48, faamatala le aoaoga faavae o loo aoaoina i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.

• Sauniuniga a le tagata aoga: Valaaulia tagata aoga e tauloto le 3 Nifae 12:48 ao lei o mai i le vasega. Atonu e te valaaulia i latou e faataitai le taulotoina o le mau mai le manatua i isi tagata o le vasega i le taimi e tau atu i le vasega, pe faafesagai, pe ala i sāvali tusitusia, po o se isi auala.

• Anomea mo tagata aoga: Afa pepa

• Fautuaga faafaiaoga faavitiō: Mo le vaega o le lesona “Faamatala ma tauloto” e mafai ona e saunia se pepa o faamatalaga faatasi ma fasifuaitau o mau e tusia i tulimanu eseese e pei ona faamatalaina i le lesona. Ona faaali atu lea o le lau [o lau komepiuta] ma fai i tagata aoga e pa’i i fasifuaitau i le faasologa. Tapē le fasifuaitau e tasi i le taimi, ma valaaulia tagata aoga e toe fai mai le faagasologa o le pa’i atu i le lau [o le komepiuta] ma fai upu seia leai se mea i luga o le pepa o faamatalaga. E mafai foi ona e saunia ni pepa o faamatalaga faatasi ma fasifuaitau o mau e tusia i tulimanu eseese ma faaali auaua’i atu pepa o faamatalaga, e tuu atu ai i tagata aoga se avanoa e sue ai le faasologa o upu ma toe fai le fuaitau autu.

3 Nifae 13–14

Faamoemoega o le lesona: O le faamoemoega o lenei lesona o le fesoasoani lea i tagata aoga e faailoa mataupu faavae mai aoaoga a le Faaola ma vaai i lo latou taua i o latou olaga i aso nei.

• Sauniuniga a le tagata aoga: Mafaufau e valaaulia tagata aoga e vaavaai mo ma o mai saunia i le vasega e faasoa mai ni faamatalaga o le mafuaaga-ma-le-aafiaga latou te maua i a latou suesuega faaletagata lava ia o tusitusiga paia. E mafai ona ta’ua nei mea e faaaoga ai upu afai ma le ona, pe o le faamatala foi e le fuaitau po o ā filifiliga e taitai atu ai i ā taunuuga.

• Fautuaga faafaiaoga faavitiō: A uma ua lava se taimi e faaaoga ai e tagata aoga ia aoaoga a le Faaola e fai ai ni faamatalaga o le mafuaaga-ma-le-aafiaga, valaaulia i latou e tuu i luga a latou faamatalaga i le talanoaga. O lenei mea o le a mafai ai e tagata aoga ona vaai i faamatalaga uma a o latou talanoaina auala o loo talafeagai ai pea aoaoga a le Faaola i aso nei.

3 Nifae 15–16

Faamoemoega o le lesona: O lenei lesona e tatau ona fesoasoani i tagata aoga ia lagonaina le finagalo o le Faaola e faapotopoto i latou ma tagata uma ia te Ia.

• Sauniuniga a le tagata aoga: Valaaulia tagata aoga e mafaufau loloto pe o le a faapefea ona latou taliina le fesili lenei: “O le a se faamaoniga ua e vaaia e finagalo le Faaola e faapotopoto mai tagata uma ia te Ia?”

• Ata: O faatusa e lua o Keriso (o se tasi o Ia o se leoleo mamoe); o se ata o se lafu mamoe

• Anotusi e faaali atu: Fuaitau i le Ioane 10 ma le 3 Nifae 15, 16 ma fesili e o faatasi ai

• Fautuaga faafaiaoga faavitiō: I le amataga o le lesona, mafaufau e tuu atu i tagata aoga ni nai minute e su’e ai ata e sili ona latou fiafia i ai o le Faaola o se leoleo mamoe. Tuu atu i tagata aoga e faasoa mai lau [o a latou komepiuta] ao latou faamatalaina mea latou te fiafia ai e uiga i le ata na latou filifilia ma mea o loo aoao ai i latou e uiga ia Keriso.