3 Nifae 12:1–16

“Amuia outou”

E finagalo le Tama Faalelagi ma Iesu Keriso e faamanuia i tatou. E mafai ona tatou mautinoa a tatou mulimuli i a La’ua fautuaga, o le a tatou maua o La’ua faamanuiaga e tusa ai ma la La’ua taimi ma i la La’ua lava ala. A o aoao atu i sa Nifaē, sa folafola atu e Iesu le tele o faamanuiaga e mafai ona tatou maua. O lenei lesona e mafai ona fesoasoani ia te oe e saunia ai ia maua faamanuiaga na fetalai ai le Faaola a o e taumafai e mulimuli i Ana fautuaga.

O le taulai atu i le Tama Faalelagi ma Iesu Keriso i le avea ai ma punāvai o o tatou faamanuiaga. Pe a suesue tusitusiga paia ma talanoaina faamanuiaga folafolaina, ia faamamafa atu o le Tama Faalelagi ma Iesu Keriso o punāvai ia o na faamanuiaga.

Sauniuniga a le tagata aoga: Ina ia fesoasoani e saunia loto o tagata aoga e suesue le lauga a le Faaola i le 3 Nifae, lea e talitutusa lava ma Lana Lauga i luga o le Mauga, mafaufau e valaaulia i latou e mafaufau loloto i lenei saunoaga mai ia Peresitene Iosefa Filitia Samita (1876–1972). Na saunoa o ia e faapea, o le Lauga i luga o le Mauga o “se lauga sili na folafolaina, e tusa ai ma lo tatou iloa” (Aoaoga a Peresitene o le Ekalesia: Iosefa Filitia Samita [2013], 234).

Gaoioiga e Ono Mafai Ona Aoao Ai

Amuia

Ina ia fesoasoani i tagata aoga e mafaufau i le uiga moni o le faamanuiaina, mafaufau e tusi se ata faigofie o se faavaa o se mekasini i luga o le laupapa. Faaigoa le mekasini o se mea e pei o le Mekasini o le Manuia Faalelalolagi ma tusi ai e fai ma autu o le tusiga faaalia o le lomiga le “O Tagata e Toalima Ua Sili ona Faamanuiaina o le Tausaga.”

Valaaulia tagata aoga e o mai i le laupapa ma tusi ni nai faamanuiaga i luga o le faavaa latou te faamoemoe o le a taulai i ai le tusiga.

Tusi i le isi itu o le laupapa se faavaa o se mekasini e tutusa ma le [muamua] ma le tusiga faaalia lava e tasi, ae o le taimi lenei o le igoa o le mekasini o le Liahona. Valaaulia tagata aoga e tusi ni nai faamanuiaga latou te faamoemoe o le a taulai i ai le tusiga o le mekasini a le Ekalesia.

• O a faamanuiaga patino e te faamoemoe o le a taulai i ai le tusiga o se tulaga manaomia mo le filifilia o tagata?

Vaai faalemafaufau la i se tusiga o le mekasini o le Liahona e faapena foi lona autu.

• O a ni faamanuiaga patino e te faamoemoe e talanoa i ai le tusiga e uiga i faamanuiaga silisili e mafai ona maua e se tagata?

• Aisea e te manatu ua aoao ai i tatou e le Faaola ma Lana Ekalesia ia tuu le faataua aupito maualuga i faamanuiaga eseese nai lo [faamanuiaga] o loo sailia e le toatele o le lalolagi?

I le 3 Nifae 12–14, na aoao atu ai e Iesu Keriso ia sa Nifaē se lauga e talitutusa lava ma Lana Lauga i luga o le Mauga i le Feagaiga Fou. Na saunoa Peresitene Iosefa Filitia Samita (1876–1972) o le Lauga i luga o le Mauga o “se [lauga] sili na folafolaina, e tusa ai ma lo tatou iloa” (Aoaoga a Peresitene o le Ekalesia: Iosefa Filitia Samita [2013],234).

O le asō, a o e suesue i le vaega o le lauga a le Faaola ua ta’ua o Faaamuia, o le a e maua le avanoa e aoao ai i auala e finagalo le Tama Faalelagi ma Iesu Keriso e faamanuia ai oe. Sa ta’ua e Peresitene Harold B. Lee (1899–1973) ia Faaamuia a le Faaola “o le faavae mo se olaga atoatoa” ma faamalamalama mai e faapea, “i lana Lauga i luga o le Mauga na tuuina mai ai e le Matai ia i tatou sina faaaliga o ona lava uiga, lea sa atoatoa, … ma o le faia o lea mea ua tuuina mai ai ia i tatou se mamanu mo o tatou lava olaga” (Decisions for Successful Living [1973], 56–57). A o e suesue, mafaufau loloto pe aisea e matuā taua tele ai faamanuiaga ua ofoina mai e Keriso i lenei lauga nai lo soo se faamanuiaga ua ofoina mai e le lalolagi.

O Faaamuia i le atu Amerika

Faitau le 3 Nifae 12:1–12 ma faailoga le upu “amuia” ma soo se faamanuiaga e te maua o loo otooto mai e le Faaola i nei fuaiupu. Ia mātau o le upu “amuia” i nei fuaiupu o lona uiga o le matuai faamanuiaina lava po o le alofagia faalelagi.

Mafaufau e valaaulia tagata aoga e faitau pe faafia ona latou vaai i le upu “amuia” ma faasoa mai faamanuiaga na latou maua.

• Mafaufau i faamanuiaga uma na otooto mai e le Faaola i nei fuaiupu, o le a se mea o ta’u mai e lenei mea ia te oe e uiga ia te Ia ma Lona Tama?

O se upumoni e tasi e mafai ona tatou aoao mai i lenei fuaitau o le, e fiafia le Tama Faalelagi ma Iesu e faamanuia i tatou a o tatou taumafai e mulimuli i a La’ua fautuaga.

Faitau le 3 Nifae 12:1–2 ma mafaufau e faailoga mea ua poloaiina i tatou e le Faaola e fai pe afai tatou te sailia faamanuiaga e ofo mai e Ia ma Lona Tama ia i tatou.

Mafaufau e valaaulia tagata aoga e tali i fesili nei ia latou api faamaumau mo suesuega a o lei valaauliaina ni volenitia e faasoa mai a latou tali i le vasega. E mafai foi e tagata aoga ona faasoa atu a latou tali i se paga po o i ni vaega toalaiti.

• Aisea e te manatu e faamanuia ai e le Atua i latou o e “uai atu i upu a [le] toasefululua o e ua filifilia [e Ia]”? (3 Nifae 12:1).

• Ua faapefea ona faamanuiaina oe e le Atua po o isi e te iloa ona o le uai atu i upu a perofeta ma aposetolo?

Afai e lava le taimi, valaaulia tagata aoga e sue lauga o le konafesi aoao talu ai nei mai uso o le Au Peresitene Sili po o le Korama a Aposetolo e Toasefululua ma faasoa mai ni auala latou te manatu ua faamanuiaina ai i tatou ona o le ua’i atu i aoaoga patino latou te maua.

Sailia o faamanuiaga

A o lei faitauina e tagata aoga ia fuaiupu nei, mafaufau e tusi ni koluma se lua i luga o le laupapa faatasi ai ma faamanuiaga mai fuaiupu o loo lisi atu i le tasi koluma ma faatinoga po o tulaga e taitai atu ai i na faamanuiaga o loo lisiina i soo se faasologa i le isi koluma. Valaaulia tagata aoga e taumafai e faafetaui ia faamanuiaga ma a latou lava faatinoga po o tulaga. Ona mafai lea ona latou faaaoga le 3 Nifae 12:3–12 e siaki ai a latou tali.

Toe faitau le 3 Nifae 12:3–12 , o le taimi lenei, ma vaavaai po o a tulaga na fesootai i ai le Faaola i faamanuiaga taitasi. Mafaufau e faailoga ese nei tulaga mai le auala na e faailogaina ai faamanuiaga, e pei o le faaaogaina o lanu eseese pe li’o nai lo le valivali.

Mo se isi manatu mo le aoaoina atu o Faaamuia, tagai i le gaoioiga “Siata o Faaamuia” o loo maua i le “Gaoioiga Faaopoopo e Aoao ai” o lenei lesona.

Filifili se faamanuiaga se tasi mai nei fuaiupu e te manao e maua. Mātau le faatinoga po o le tulaga e taitai atu ai i lena faamanuiaga. Suesue lena faatinoga po o le tulaga e ala i le faaaogaina o punaoa o loo maua, e pei o le Taiala i Tusitusiga Paia, o le polokalama o le Gospel Library, Topical Guide, po o vaefaamatalaga.

Mafaufau e valaaulia tagata aoga e feoai solo i le potu, sue isi sa suesue i fuaitau ese, ma faasoa mai a latou tali i fesili nei.

• O le a se mea na e aoaoina e uiga i mea e manaomia mai ia i latou o e mananao i le faamanuiaga sa e suesueina?

• Na faapefea ona faaalia e le Faaola lena faatinoga po o le tulaga? E mafai faapefea ona fesoasoani Lana faataitaiga e te malamalama lelei ai i auala e mafai ona e sailia ai lena faamanuiaga?

Manatua ona e alofa le Tama Faalelagi ia i tatou, o le a Ia faamanuiaina i tatou e tusa ai ma Lana taimi ma i Lana ala. (Tagai i le Mataupu Faavae ma Feagaiga 88:64.)

Afai e te lagona e mafai ona faaaoga e au tagata aoga se faamalosiauga faaopoopo e faalagolago ai i le Alii ma Lana taimi, e mafai foi ona e faasoa atu le saunoaga mai ia Peresitene Dallin H. Oaks i le vaega “Faamatalaga ma Faamatalaga o Talaaga”.

O lea la ua e faailoaina se faamanuiaga e te manao i ai ma suesue i le auala e valaaulia ai i lou olaga, fai se fuafuaga mo le auala e mafai ona e sailia ai lena faamanuiaga. E mafai ona fesoasoani atu ia fesili nei:

• O a ni mea patino e mafai ona e faia e saili ai lena faamanuiaga?

• O le a le taimi e te fuafua ai e amata?

• O a ni mea faalavefau e mafai ona faalavelave mai ai, ma e mafai faapefea ona e faatoilaloina?

Atonu e fesoasoani le faasoa atu se auala ua e vaaia ai soo se tasi o nei faamanuiaga i lou olaga ma lau molimau i le manao o le Faaola e faamanuia i tatou.

Manatu ma Talaaga o Faamatalaga

Aisea e lē oo mai ai faamanuiaga a le Atua i taimi uma i le ala tatou te faamoemoe i ai?

Sa aoao mai Peresitene Dallin H. Oaks o le Au Peresitene Sili:

O le faatuatua o lona uiga o le faalagolago—faalagolago i le finagalo o le Atua, faalagolago i Lana ala o le faia o mea, ma faalagolago i Lana taimi faatulagaina. …

E moni, e lē mafai ona tatou maua le faatuatua moni i le Alii e aunoa foi ma le i ai o le faalagolago atoa i le finagalo o le Alii ma i le taimi a le Alii. (Dallin H. Oaks, “Timing,” Ensign, Oct. 2003, 12)

O le a se mea e mafai ona fesoasoani ou te malamalama lelei ai i Faaamuia?

O Faaamuia

Mau Faasino	Uiga Auaumama
Mau Faasino 3 Nifae 12:3	Uiga Auaumama Loto maualalo. O le lotomaualalo o le “iloa ma le agaga faafetai lo tatou faalagolago atu i le Alii—o le malamalama lea [o loo i se tagata] le manaomia pea lava pea o Lana fesoasoani. Lotomaulalo o se faailoaga lea o taleni ma tomai [a se tagata] o meaalofa mai le Atua” (True to the Faith: A Gospel Reference [2004], 86).
Mau Faasino 3 Nifae 12:4	Uiga Auaumama Faanoanoa. O le lagona ma le faaalia o le faanoanoa i se mea. E mafai e se tagata ona faanoanoa i luitau o le olaga e oo i ai i latou atoa ma isi. E faanoanoa foi se tagata ona o le faanoanoaga ona o agasala.
Mau Faasino 3 Nifae 12:5	Uiga Auaumama Agamalu. O le “Mata’u i le Atua, amiotonu, loto maualalo, faigofie ona a’oa’oina, ma onosa’i i mafatiaga” (Taiala i Tusitusiga Paia, “Agamalu,” scriptures.ChurchofJesusChrist.org).
Mau Faasino 3 Nifae 12:6	Uiga Auaumama O le fia ‘ai ma fia inu i le amiotonu. O le i ai o le naunautaiga tele ia iloa ma faia le finagalo o le Atua.
Mau Faasino 3 Nifae 12:7	Uiga Auaumama Alofa mutimutivale. O le “agaalofa, fa’aaloalo, faamagalo atu, agavaivai, ma onosai, tusa lava pe o e iloa ia faaletonu o isi tagata” (Faamaoni i le Faatuatua, 103).
Mau Faasino 3 Nifae 12:8	Uiga Auaumama Loto mama. O le faitaulia ma i latou o e “alolofa i le Alii, o e saili e mulimuli ia te Ia ma tausi Ana poloaiga, o e e taumafai e ola i olaga mama ma tumau faamaoni e oo i le iuga. O e loto mama o i latou o e pulea o latou mafaufauga e tausisia le saoloto o i latou lava mai faiga ma amioga le mama” (Sheldon F. Child, “O Afioga a Iesu: Ola Mama,” Liahona, Ian. 2003, 44).
Mau Faasino 3 Nifae 12:9	Uiga Auaumama Faatupu filemu. “Ina ia fesoasoani i tagata ia maua auala e laugatasia ai, pe a vaai isi i eseesega” (Henry B. Eyring, “Aoaoina i le Perisitua,” Liahona, Me 2011, 63).
Mau Faasino 3 Nifae 12:10–12	Uiga Auaumama Sauaina ona o le suafa o Keriso. O le naunau e usitai ma puipui ia Iesu Keriso ma Ana aoaoga, tusa lava pe amusia pe agaleagaina ai se tagata mo le faia o lena mea.

Gaoioiga Faaopoopo e Aoao Ai

“Amuia e faatupuina le filemu”

Ina ia fesoasoani i tagata aoga ia malamalama lelei i le uiga o le avea ma sē e faatupuina le filemu, mafaufau e tuu atu ia i latou le lima minute e suesue ai le lauga “Mulimuli ia Iesu: Avea ma e Faatupuina le Filemu“ saunia e Elder Neil L. Andersen o le Korama Aposetolo e Toasefululua. Ona valaaulia lea o i latou e faasoa mai se mea ua latou aoaoina i le avea ai ma ē e faatupuina le filemu.

Siata o Faaamuia

Tuu atu i tagata aoga taitasi se kopi o le siata o Faaamuia o loo maua i le vaega o “Faamatalaga ma Faamatalaga o Talaaga” o le lesona lenei. Vaevae tagata aoga i ni vaega toalaiti ma tofi atu ia i latou se Faaamuia se tasi pe lua o loo lisiina i luga o le siata. Valaaulia tagata aoga e saunia se aoaoga puupuu e uiga ia latou Faaamuia na tofi atu i ai. O a latou aoaoga e mafai ona aofia ai a latou fuaiupu atofaina, faamatalaga mai le siata, ma isi malamalamaaga latou te maua a o latou suesue ma mafaufau loloto i a latou Beatitude ua tofia i ai. E mafai foi e tagata aoga ona faasoa mai ni faataitaiga mai le soifuaga o le Faaola o le tulaga po o uiga o loo faamatala mai i a latou fuaiupu.

“Ia faapea ona susulu atu lo outou malamalama”

Faaali atu ata o le masima, o se aai, ma se moligao ua mumū. Fesili i tagata aoga po o le a le mea e fai e nei mea taitasi i tagata o le Ekalesia. Valaaulia tagata aoga e faitau le 3 Nifae 12:13–16 e sue ai se tali.

Fai atu i tagata aoga fesili nei: O lē fea o nei talafaatusa e sili ona anoa mo oe? O anafea na fesoasoani ai ia te oe le vaaia o galuega lelei a se tasi e te alofa ai pe manao ai ia iloa atili lou Tama oi le Lagi?

Ina ia fesoasoani i tagata aoga ia malamalama atoatoa po o le a le malamalama e tatau ona latou faasusulu atu, valaaulia i latou e fefaasinoa’i mau i le fuaiupu e 16 ma le 3 Nifae 18:24 ma faasoa mai mea e faaopoopo e lena fuaiupu i lo latou malamalamaaga i lo tatou malamalama.