3 Nifae 12:17–48

“Ou Te Manao Ia Outou Atoatoa”

Na aoao mai Iesu Keriso e tatau ona tatou “atoatoa” e pei ona atoatoa o Ia ma lo tatou Tama Faalelagi (3 Nifae 12:48). E ui o lenei poloaiga e mafai ona pei e lofituina, o loo ofoina mai ai ni malamalamaaga anoa i le natura o lo tatou Tama Faalelagi ma Iesu Keriso. O loo aoao mai ai foi i tatou e mafai ona tatou avea e faapei o i La’ua. O lenei lesona ua fuafuaina e fesoasoani ia te oe e malamalama ai i lou gafatia e avea ai ma tagata atoatoa e pei o lo tatou Tama oi le Lagi ma Iesu Keriso.

Faaalia o le alofa ma faamoemoega maualuluga. Pe a alolofa moni faiaoga i a latou tagata aoga, o le a latou popole tele i lo latou alualu i luma ma le manuia e faamalieina ai i na o sina taumafaiga itiiti. Ia faamalosiau ma le alofa au tagata aoga ia ausia o latou gafatia o ni tagata aoao ma ni soo o Iesu Keriso.

Sauniuniga a le tagata aoga: Valaaulia tagata aoga e suesue le parakalafa muamua i lalo o le faamatalaga mo le “Atoatoa” i le Taiala i Tusitusiga Paia ma o mai saunia e faasoa mai mea na latou maua e sili ona anoa e uiga i lenei faauigaga ma pe aisea.

Gaoioiga e Ono Mafai Ona Aoao Ai

Manatua: E ui o lenei lesona o loo talanoaina ai ni nai vaega o le tulafono maualuga na aoao mai e Iesu i fuaiupu 17–47, o le faamoemoega autu o lenei lesona o le fesoasoani lea i tagata aoga ia malamalama i upumoni o loo aoao mai i le fuaitau o le atamai i aoaoga faavae 3 Nifae 12:48. Afai e sili ona lelei mo au tagata aoga le faaalu o le telē o le taimi e suesue ai vaega o le tulafono maualuga atu, ia lagona le saoloto e faaalu ni aso se lua e suesue ai anomea o i lenei lesona ma sui ai se lesona i le lumanai.

O loo i ai ni manatu i le vaega “Gaoioiga Faaopoopo e Aoao ai” e mafai ona fesoasoani e aoao atu ai isi vaega o le tulafono maualuga atu.

Lou gafatia

Faaali atu ata nei po o isi o loo faaalia ai se mea e lei atoatoa ona atiina ae.

• O le a se mea e mafai ona avea ai nei mea taitasi pe a atiina ae atoatoa i latou?

• O a mea latou te manaomia ina ia ausia ai o latou gafatia?

• O le a le gafatia o tamaiti taitoatasi i le fuafuaga a le Tama Faalelagi?

• E faapefea e le malamalama i lou gafatia paia ona aafia ai au faaiuga? E faapefea ona aafia ai ou lagona e uiga ia te oe lava?

A o e suesue i le lesona o le asō, mafaufau pe o le a le telē o lou tuputupu ae ma le aoaoina i le gasologa o lou olaga ma mea o loo e mafaia ona avea ai pea oe faatasi ma le fesoasoani a le Atua.

O le valaaulia a le Faaola ia ausia ou gafatia

I le 3 Nifae 12:17–47, na faasoa atu ai e Iesu ni nai faataitaiga mai le tulafono a Mose i tagata o le Tusi a Mamona. Sa Ia mulimuli i faataitaiga taitasi faatasi ma se faamalamalamaga o se tulafono maualuga atu po o se valaaulia ia ola i se tulaga maualuga atu o le amiotonu, lea e mafai ona fesoasoani ia i tatou e malamalama lelei ai i mea e finagalo ai o Ia ma lo tatou Tama Faalelagi ia avea ai i tatou.

Mo tagata aoga e vaai i faataitaiga o le tulafono maualuga na aoao mai e Iesu, e mafai ona e vaevaeina le vasega i ni vaega se tolu ma tofi atu i vaega taitasi se tasi o poloka mau nei e faitau: 3 Nifae 12:21–22, 27–29, ma le 38–42, ma vaavaai mo auala ua valaaulia ai i tatou e le Faaola ia alualu i luma agai atu i o tatou gafatia. Valaaulia tagata aoga e faasoa mai pe o faapefea ona valaaulia i tatou e le Faaola i nei fuaiupu ia ola i se tulaga maualuga atu o le amiotonu. E mafai ona e fesoasoani i tamaiti aoga e mafaufau i faataitaiga o auala e usitaia ai nei tulafono i o tatou aso.

• O a ni auala e mafai ai e nei aoaoga ona fesoasoani ia i tatou ia avea atili e faapei o le Tama Faalelagi ma Iesu Keriso?

Faitau le 3 Nifae 12:48, ma vaavaai mo le gafatia atoatoa ua silafia e Iesu Keriso o loo i totonu o i tatou taitoatasi.

O le 3 Nifae 12:48 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala tulaga ese ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

O loo aoao mai lenei fuaiupu e faapea, e finagalo Iesu Keriso ia tatou atoatoa e pei o Ia ma lo tatou Tama oi le Lagi.

Mafaufau e tuu atu i tagata aoga e tusi ni tali i le fesili muamua o loo i lalo i luga o ni fasipepa ona ao mai lea o fasipepa. E mafai ona e faitauina nisi o a latou fesili po o atugaluga i le faaiuga o le lesona ma tuu atu i tagata aoga e tali mai i mea sa latou aoaoina.

• O a ni fesili po o ni atugaluga e te manatu e ono i ai i tagata e uiga i lenei aoaoga? Aisea?

• O le a se mea e tuuina atu ia te oe le faamoemoe po o le mautinoa e faapea, e mafai ona [e] avea faapei o le Tama Faalelagi ma Iesu Keriso?

• E mafai faapefea ona fesootai lenei upumoni i ata mai le amataga o le lesona?

O le alofa atoatoa o le Tama Faalelagi ma Iesu Keriso

O le avea ia atoatoa o le avea lea e faapei o le Tama Faalelagi ma Iesu Keriso. O le tulafono maualuga atu na aoao mai e Iesu i lenei mataupu e mafai ona fesoasoani tatou te malamalama ai i uiga ma uiga auaumamā o le Tama Faalelagi ma Iesu Keriso. A o tatou malamalama lelei i [ituaiga Tagata] e i ai i Laua, e mafai ona tatou taumafai ia avea e faapei o i Laua ma maua le faamoemoe o le a La fesoasoani mai ma le onosai ia i tatou a o tatou taumafai e alualu i luma.

Faitau le 3 Nifae 12:43–45 ma le saunoaga lenei a Elder Jeffrey R. Holland o le Korama a Aposetolo e Toasefululua, ma vaavaai mo mea o loo latou aoao mai e uiga i le alofa o le Tama Faalelagi ma Iesu Keriso.

Ou te faafetai i le iloa e ui lava i o’u vaivaiga, o le mea e sili ai e atoatoa le Atua—mo se faataitaiga, o le mea e sili ai e mafai ona alofa o Ia i Ona fili, auā e masani lava, ona o le “tagata natura” o i totonu o i tatou, e avea ai i tatou i nisi taimi o lena fili. Ou te faafetai tele lava ona e mafai e le Atua ona faamanuia i latou o e faatiga ia te Ia auā, e aunoa ma le manao pe faamoemoe e faia o lea, tatou te faatiga uma ia te Ia i nisi o taimi. (Jeffrey R. Holland, “Ia Atoatoa Ona Lelei o La Outou Amio—I Le Iuga,” Liahona, Nov. 2017, 41)

• Aisea e faalaeiau ai le iloa e alolofa le Tama Faalelagi ma Iesu Keriso i o Laua fili ma faamanuia i latou e faatiga ia i Laua?

• E mafai faapefea e lo Laua alolofa, fesoasoani, ma le onosai ona avatu ai ia te oe le faamoemoe e i ai se aso e ausia ai le atoatoa?

O le atoatoa o se faagasologa lea e na o Iesu Keriso lava e mafai ai

O se mea masani le mafaufau pe mafai ona atoatoa. Afai e tatau ona tatou ausia e i tatou lava le atoatoa, pe afai foi e tatau ona ausia i le āluga o ō tatou olaga faaletino, o le a lē mafai lea.

Faitau le Mataupu Faavae ma Feagaiga 76:69–70 ma le Moronae 10:32–33, ma vaavaai mo mea e mafai ai ona tatou atoatoa. Mafaufau e fefaasinoa’i nei fuaitau ma le 3 Nifae 12:48.

• O le a le mea e mafai ai e i latou uma o e i’u lava ina atoatoa ona faia lena mea?

Afai e faigata i tagata aoga ona tali le fesili ua mavae atu, ia mautinoa e faamalamalama atu e na o Iesu Keriso lava e mafai ai ona tatou atoatoa. E lē mafai pe a aunoa ma Ia. A o tatou salamo i aso taitasi, ma saili e lē aunoa ia tuputupu a’e faaleagaga, ona faaatoatoaina ai lea o i tatou ia Keriso.

Faitau le Mataupu Faavae ma Feagaiga 93:11–13 ma vaavaai mo mea ua faaopoopo mai e na fuaiupu i lo tatou malamalama i le atoatoa o Iesu Keriso.

• Aisea e taua ai le malamalama e faapea e oo lava i le atoatoa o Iesu Keriso sa o se faagasologa?

Sa aoao mai e Peresitene Russell M. Nelson le mea lenei e uiga i le faauigaga ma le faagasologa o le atoatoa:

Faamolemole ia mātau o le upu [atoatoa] e le o faaātaāta mai ai le “saoloto mai mea sese.” …

“Tatou te lē manaomia ona faanoanoa pe afai o a tatou taumafaiga faatauanau agai atu i le atoatoa, ua foliga mai nei e matuā [faigata] ma e lē muta. O loo faatalitali le atoatoaga. E mafai ona oo mai i le atoatoa pe a maea le Toetu ma e na o le Alii lava e mafai ai. O loo faatalitali mai mo i latou uma o e alolofa ia te ia ma tausia ana poloaiga. (Russell M. Nelson, “Perfection Pending,” Ensign, Nov. 1995, 86, 88)

• O le a se mea ua faaopoopo e lenei faamatalaga i lou malamalama e uiga i le atoatoa?

O le vaega mulimuli o le lesona e tuu atu ai i tagata aoga se avanoa e faasoa mai ai lo latou malamalama e uiga i o tatou gafatia ia atoatoa e pei o le Atua.

O se tasi o auala e faia ai lenei mea o le faitau lea o nisi o fesili ma atugaluga na tusia e tagata aoga i le amataga o le lesona. Tuu atu i tagata aoga e faasoa mai ni mea ua latou aoaoina e mafai ona faaaoga i fesili po o atugaluga taitasi.

Vaai faalemafaufau e faapea, ua talosagaina oe e tuuina atu se mafaufauga faaleagaga e lua i le tolu minute i le gaoioiga e sosoo ai a le tou autalavou. E fai atu ou taitai ia te oe e faasoa mai ou manatu pe aisea e tatau ai ona aumaia e le aoaoga o loo i le 3 Nifae 12:48 ia i tatou le faamoemoe. Tusi i lalo ou manatu. Ia aofia ai tali i fesili nei:

• O le a le uiga o le ia atoatoa? O le a le uiga o le lē atoatoa?

• E faapefea e mea ua e iloa e uiga i le Tama Faalelagi ma Iesu Keriso ona tuuina atu ia te oe le faamoemoe ia avea e faapei o i La’ua?

Mafaufau e faasoa atu lau molimau i le faasinomaga o tagata aoga taitoatasi o se atalii po o se afafine o le Atua ma le gafatia o loo ia i latou e avea ai faapei o lo tatou Tama Faalelagi ma Iesu Keriso i le āluga o taimi ma faatasi ma le La fesoasoani.

Manatu ma Talaaga o Faamatalaga

Ae faapefea pe afai ou te lagona e lē mafai ona ou ola e tusa ai ma faamoemoega o le Faaola?

Sa aoao mai Peresitene Dieter F. Uchtdorf, a o avea ma uso o le Au Peresitene Sili:

Come, Join with Us

Regardless of your circumstances, your personal history, or the strength of your testimony, there is room for you in this Church.

Atonu e fai mai nisi, “Ou te manatu e lē mafai ona ou ola i o outou tulaga faatonuina.”

E anoanoai isi mafuaaga e oo mai! Ua mamanuina le Ekalesia e faafailele tagata lē atoatoa, o ē o loo tauivi, ma ē ua vaivai. Ua faatumulia i tagata ua mananao ma o latou loto atoa e tausi ia poloaiga, e tusa lava pe latou te le’i malamalama lelei i ai. (Dieter F. Uchtdorf, “Sau, Auai Faatasi ma i Matou,” Liahona, Nov. 2013, 23)

Na fautua mai Elder Jeffrey R. Holland o le Korama a Aposetolo e Toasefululua:

“Sau i le tagata o e i ai,” o loo fetalai mai ai se Tama alofa ia i tatou taitoatasi, ae ua Ia faaopoopo mai, “Aua ne’i e fuafua e te tumau ai lava i le tagata o e i ai.” Tatou te ataata ma manatua o loo naunau lava le Atua ia faia i tatou ia sili atu i lo tagata na tatou mafaufau e mafai ona avea ai i tatou. (Jeffrey R. Holland, “O Pese e Usuina ma Lē Usuina,” Liahona, Me 2017, 51)

Sa aoao mai le Perofeta o Iosefa Samita (1805–1844):

Pe a e a’e i se apefai, e tatau ona e amata atu i le pito i lalo, ma alu a’e i luga mai lea sitepu i lea sitepu, seia e taunuu i le tumutumu; ma e faapena i mataupu faavae o le Talalelei—e tatau ona e amata i le muamua, ma alu atu ai seia e aoao i mataupu faavae uma o le faaeaga. Ae o le a umi se taimi pe a maea ona e ulu atu i le veli ona faatoā e aoaoina lea o ia mea. E lē faapea o le a malamalama uma i ai i le lalolagi lenei; o le a avea ma galuega tele lo tatou aoao i lo tatou faaolataga ma le faaeaga e oo lava i tala atu o le tuugamau. (Aoaoga a Peresitene o le Ekalesia: Iosefa Samita [2007], 268)

O le a le fiaatoatoa ma e mafai faapefea ona ou tali atu i ai?

Na aoao mai Elder Gerrit W. Gong o le Korama o Aposetolo e Toasefululua:

O le upu atoatoa … o nisi taimi e lē malamalama ai faapea o lona uiga o le lē faia lava o se mea sesē. Atonu o oe po o se tasi e te iloa o loo taumafai malosi ina ia atoatoa i lenei auala. Ona o lena atoatoa e masani lava e foliga mai e lē mafai ona ausia, e oo lava ia tatou taumafaiga e sili ona lelei e mafai ona tuua ai i tatou i le popole, lotovaivai, po o le lelavā. Tatou te taumafai e aunoa ma se faamanuiaina e pulea o tatou tulaga ma tagata o siomia ai i tatou. Tatou te popole i vaivaiga ma mea sesē. O le mea moni, o le tele lava o lo tatou taumafai, o le mamao foi lea o lo tatou lagonaina o le tulaga atoatoa o loo tatou sailia. …

O se malamalama sesē i le uiga o le ia atoatoa e mafai ona i’u i le fiaatoatoa—o se uiga faaalia po o se amioga e avea ai se manao matagofie ina ia lelei ma faaliliuina i se faamoemoega lē talafeagai ina ia atoatoa nei. O le fiaatoatoa o nisi taimi e oo mai i le lagona faapea ua na o i latou e atoatoa e tatau i ai le alofaina po o le faapea tatou te lē agavaa mo le fiafia seiloga ua tatou atoatoa. (Gerrit W. Gong, “Faaatoatoaina ia Keriso,” Liahona, Iulai 2014, 14–15, 17)

Maimoa le vitiō “Perfectionism: Will IEver Be Good Enough?” (4:33).

Perfectionism: Will I Ever Be Good Enough?

Do you sometimes feel like you’re not good enough for God or anyone else? Chances are you’ve had a bout with perfectionism. Whether you know it or not, God’s Grace reaches everyone—including perfectionists.

Gaoioiga Faaopoopo e Aoao Ai

O le atoatoa o se faagasologa

O le iloaina o le a tatou lē ausia le atoatoa atoa i lenei olaga e mafai ona fesoasoani i tagata aoga e aloese ai mai lagona o le leai o se faamoemoe. E mafai ona e tuu atu i tagata aoga e faatusatusa le Mataio 5:48 ma le 3 Nifae 12:48 e iloa ai pe na ese faapefea aoaoga a Iesu i tagata Iutaia i Isaraelu anamua mai le mea na Ia fetalai atu ai ia sa Nifaē. Mafaufau e fesili po o a mea na aoaoina e tagata aoga mai le mea moni e faapea, e le’i faaaofia ai e Iesu o Ia lava o se faataitaiga o le atoatoa seia oo ina ua mavae Lona maliu ma ua toetu mai.

Faamaoni ma le amiosa’o

E mafai ona e fesili atu i tagata aoga e uiga i mea e fai mai e tagata pe a latou mananao e faamamafa atu o se mea o loo latou fai mai ai e moni. I taimi o le Feagaiga Tuai, o le faia o se tautoga i le suafa o le Alii o se ala lea mo tagata e faaalia ai lo latou naunauta’iga atoatoa e tausi se folafolaga. E mafai e tagata aoga ona faitau le 3 Nifae 12:33–37 ma vaavaai mo se tulafono maualuga atu na aoao mai e Iesu i le ala e faaalia ai lou faamaoni ma le amiosa’o. Ina ia avea atili e faapei o le Tama Faalelagi ma Iesu Keriso, na aoao mai ai le Faaola e faapea, o le “ioe” e tatau ona faauigaina o le “ioe” ma le “leai” e tatau ona faauigaina o le “leai” e aunoa ma se manaomia ona tauto i se tautoga e faamaonia ai lo tatou faamaoni.

Aisea e taua ai ia te oe le iloa e tumu le Tama Faalelagi ma Iesu Keriso i le amiosa’o ma le tonu?

O le faapalepale o le Atua

O se tasi o auala e faapupula ai le atoatoa o le Tama Faalelagi ma Iesu Keriso o le valaaulia lea o tagata aoga e faitau le 3 Nifae 12:38–42, ma vaavaai pe na faapefea ona aoao mai le Faaola e tatau ona tatou tali atu pe a fai mai ni mea leaga ia i tatou. Fesili atu i tagata aoga po o a ni uiga latou te vaaia i le Tama Faalelagi ma Iesu Keriso i nei fuaiupu latou te faafetai ai ma pe mafai faapefea ona tatou avea atili e faapei o i La’ua i lenei ala.