3 Nifae 20–26

Vaaiga Aoao

I le taimi o le galuega a le Faaola i sa Nifaē, sa Ia tautino atu ai o le a manatua e le Tama Faalelagi Lana feagaiga e faapotopoto Isaraelu ua faataapeapeina, ma sa Ia faaalia mai faailoga e fesoasoani ia i tatou e iloa ai le taimi na amata ai le faapotopotoina i aso e gata ai. Sa ia faamamafa mai le taua o le faasaoina ma le suesueina o tusitusiga paia ma upu a perofeta. Sa ia faaaogaina upu a Malaki e aoao ai sa Nifaē e uiga i le tulafono o le sefuluai ma faamanuiaga o le ola ai i lenei poloaiga. Sa ia sii mai foi se savali sa Ia muai faasoa atu ia Malaki lea na aofia ai le toe foi mai o Elia ma lana matafaioi taua i le galuega faalemalumalu ma talafaasolopito o aiga.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

3 Nifae 20–22

Faamoemoega o le lesona: O lenei lesona e mafai ona fesoasoani i tagata aoga ina ia auai i le faapotopotoina o Isaraelu.

• Sauniuniga a le tagata aoga: Valaaulia tagata aoga e mafaufau i le taimi o a latou faitauga o tusitusiga paia i aso taitasi i auala na fesoasoani ai le Tusi a Mamona ia i latou e latalata atili atu ai ia Iesu Keriso.

• Aitema: O se vaega o fasilaau po o ni fasilaau tuitui nifo; o se fasi laau mafiafia ma se fao po o se isi fasi uamea

• Fautuaga faafaiaoga faavitio: Mafaufau e faaali atu le gaoioiga faafetaui ma tuu atu i tagata aoga se taimi e faitau ai fuaiupu. Ona valaaulia lea o tagata aoga e feauauai e faaaoga le matapule o le atatusi e faafetaui ai seti taitasi o fuaiupu i lona faamatalaga. Pe valaaulia tagata aoga e tusi tali sao e faaaoga ai le matapule o le talanoaga.

3 Nifae 23

Faamoemoega o le lesona: O lenei lesona ua faamoemoe e fesoasoani i tagata aoga e suesue ma le filigā atili i afioga a le Alii.

• Sauniuniga a le tagata aoga: Valaaulia tagata aoga e faaalu se taimi e suesue ai tusitusiga paia a o lei faia lenei lesona, ia gauai faapitoa atu i mea latou te faia ia atili anoa ai a latou suesuega. Uunaia i latou e iloilo le taua ma le tulaga lelei o a latou suesuega ma le aafiaga o loo maua pe le o maua ia latou suesuega i o latou olaga.

• Aitema: O mea faitino eseese e nanā i totonu o le potu atoa

• Ata: O se ata o le Faaola o loo fesili atu ia Nifae mo talafaamaumau

• Fautuaga faafaiaoga faavitio: Ina ia amata le lesona, mafaufau e faaali atu se lisi puupuu o mea e tatau ona sailia e tagata aoga i lo latou potu po o le fale. Atonu e aofia ai se telefoni, tusi, ata, ipu, aluga, seevae, po o nisi mea e ono mafai ona latou faaaogaina. Tuu atu i tagata aoga se taimi faatulagaina (mo se faataitaiga, tasi le minute), ma fai atu ia i latou e sue le tele o mea latou te mafaia. Ona fai atu lea o fesili o loo lisi atu i le amataga o le lesona, amata i le “O le a le uiga o le saili?”

3 Nifae 24

Faamoemoega o le lesona: O lenei lesona ua faamoemoe e fesoasoani i tagata aoga ia lagonaina se mana’o e totogi le sefuluai.

• Sauniuniga a le tagata aoga: Valaaulia tagata aoga e faitau le 3 Nifae 24:8–10 ma mafaufau e uiga i aafiaga na latou maua pe na maua foi e isi, i le tulafono a le Alii o le sefuluai.

• Anomea mo tagata aoga: Kopi o le vaega “Lesona Numera 1—Faamanuiaga Taua ae Maaleale” i le savali a David A. Bednar, “O Pupuni o le Lagi,” Ensign po o le Liahona, Nov. 2013, 17–18

• Fautuaga faafaiaoga faavitio: Mafaufau e faaali atu ata faataitai o loo lisi atu i le amataga o le lesona a o e fesili atu po o le fea e lagona e tagata aoga e sili ona talafeagai ia i latou ma pe aisea foi. Ona valaaulia lea o tagata aoga e faaaoga le talanoaga e faasoa mai ai fesili po o atugaluga atonu o ia i latou e uiga i le sefuluai.

3 Nifae 25

Faamoemoega o le lesona: O lenei lesona ua faamoemoe e fesoasoani i tagata aoga e auai i galuega o talafaasolopito o aiga ma le malumalu.

• Sauniuniga a le tagata aoga: Valaaulia tagata aoga e sauni e faasoa mai e uiga i se tagata ua latou aoao e uiga i ai i o latou talafaasolopito o aiga, o soifua pe ua maliu. Atonu e aoga mo tagata aoga le talanoa i se matua po o se matua o matua pe faaaoga le polokalama o le FamilySearch.

• Pepa e tufa atu: O se siata o le faasologa o le gafa o augatupulaga e fa

• Vitio: “O Faamanuiaga Folafolaina o le Talafaasolopito o Aiga 2” (4:04)

• Fautuaga faafaiaoga faavitio: Nai lo le tufatufaina atu o le siata o le faasologa o le gafa o augatupulaga e fa o se pepa e tufa atu, mafaufau e faaali atu (le vitio) mo tagata aoga ina ia kopiina. A uma ona maua e tagata aoga se avanoa e faasoa mai ai e uiga i se tasi i le talafaasolopito o o latou aiga, mafaufau e valaaulia se tagata aoga se toatasi e alu i le FamilySearch.org, faasoa mai lana lau [o le komepiuta], ma faaali mai ana augatupulaga e fa.

Iloiloga 21 o le Atamai i Aoaoga Faavae

Faamoemoega o le lesona: O lenei lesona o le a tuuina atu ai i tagata aoga se avanoa e faaloloto atili ai lo latou malamalama ma faamatala atu upumoni e uiga i se tasi pe sili atu o fuaitau o le atamai i aoaoga faavae mai le Tusi a Mamona.

• Sauniuniga a le tagata aoga: Valaaulia tagata aoga e o mai saunia e faasoa mai se lisi o mea latou te faia ia malamalama atili ai i mau i a latou suesuega.

• Fautuaga faafaiaoga faavitio: Mafaufau e faafesootai ni nai tagata aooga a o lei amataina le vasega ma fai atu ia i latou e sauni e faasoa mai se taleni pe talanoa e uiga i se vaega e tele so latou malamalama e i ai. Fai atu ia i latou e faamatala mai pe na faapefea ona latou maua lo latou malamalama ma tomai. Fesili po o le a se mea e mafai ona latou faia e faaauau ai ona alualu i luma i na vaega. Amata le vasega i le valaaulia o i latou e faasoa mai.