3 Nifae 25

Galuega o le Malumalu ma Talafaasolopito o Aiga

Pe na e faamatala atu ea i se tasi le mafuaaga e ala ai ona i ai a tatou malumalu pe faia galuega o talafaasolopito o aiga? O le a se taua o galuega o talafaasolopito o aiga ma le malumalu ia te oe? A o aoao atu ia sa Nifaē, sa sii mai e Iesu se savali sa Ia muai faasoa atu ia Malaki lea na aofia ai le toe foi mai o Elia ma lana matafaioi taua i le galuega o malumalu ma talafaasolopito o aiga. O lenei lesona ua faamoemoe e fesoasoani ia te oe e auai i galuega o talafaasolopito o aiga ma malumalu.

Fesoasoani i tagata aoga ia faia ni faatinoga lelei amiotonu. O le fausiaina o le faatuatua ma le avea e pei o Keriso e le tupu i se vasega puupuu se tasi. Ao e valaaulia i latou o loo e aoaoina e faatino ia aoaoga faavae moni, o loo e fesoasoani ia i latou e faasafua atu lo latou aafiaga faaleaoaoga i o latou aiga ma olaga o aso uma (tagai i le Mataupu Faavae ma Feagaiga 43:8–10).

Sauniuniga a le tagata aoga: Valaaulia tagata aoga e sauni e faasoa mai e uiga i se tagata o soifua pe ua maliu ua latou aoao e uiga i ai i o latou talafaasolopito o aiga. Atonu e aoga mo tagata aoga le talanoa i se matua po o se matua o matua pe faaaoga le polokalama o le FamilySearch.

Gaoioiga e Mafai Ona Aoao Ai

Ou tuaa

Mafaufau e tufa atu kopi o le siata lenei i tagata aoga taitasi ma valaaulia i latou e faatumu le tele o faamatalaga latou te mafaia.

Mafaufau i mea ua e iloa ma lagonaina e uiga i olaga o e pele ia te oe, o a ni mea e te fia iloa, ma pe na faapefea ona aafia ai lou olaga.

• Aisea e taua ai lo tatou saili ia iloa atili e uiga i o tatou tuaa?

  Fuafua pe sili ona lelei mo tagata aoga le faasoa mai o a latou tali i mea nei, fai se iloiloga e le faailoaina, pe na o le iloilo le leoa mo i latou lava.

• I luga o se fua o le 1–10 (1 = e le fiafia i ai, 10 = matuai fiafia lava), o le a lou naunau i le iloaina o ou tuaa? I le auai i galuega o malumalu ma talafaasolopito o aiga? Aisea?

A o e suesue, vaavaai mo ni malamalamaaga e ono fesoasoani e faaosofia ai oe e auai atili i lenei galuega.

“Ae lei oo mai le aso tele ma le matautia o le Alii”

I le faaaogaina o ata ma upu faafaatusa na tusia e le perofeta o le Feagaiga Tuai o Malaki, sa aoao atu ai e Iesu tagata i le atu Amerika e uiga i Lona Afio Mai Faalua i le lalolagi ma valoia ai le galuega o malumalu ma talafaasolopito o aiga.

Faitau le 3 Nifae 25:1–2, ma vaavaai mo mea na aoao mai e le Faaola o le a tupu pe a toe afio mai o Ia i le lalolagi. O uiga ma faauigaga nei o faatusa e ono aoga.

Mafaufau e faaali atu mea nei:

• Tagutugutu o saito: O tagutugutu o laau toto e totoe i se fanua pe a uma le seleselega o le a susunuina e se faifaatoaga

• Aa: Tuaa

• Lala: Fanau

• Faamalologa i Ona apaau: Mana faamalolo ma le puipuiga o le Alii ma Lana Togiola

• Tamai povi i le lotoa: O le a taulimaina lelei Isaraelu ma saunia mea e pei o ni manu i totonu o se lotoa

• E faapefea ona e faamatalaina le mea o le a tupu i Lona Afio Mai Faalua e tusa ai ma nei fuaiupu? O le a le mea o le a tupu i e amioleaga?

  Afai e manaomia, faamalamalama atu e faapea, i le Afio Mai Faalua o Iesu Keriso, o le a oo ai e amioleaga i le faatafunaga ma o le a vavae ese mai i tuaa ma fanau (tagai i le 3 Nifae 25:1).

• O a ni mea e te aoao mai i nei faailoga e uiga i le Faaola ma Ana faamanuiaga mo i latou o e mulimuli ia te Ia?

Faitau le 3 Nifae 25:5–6 ma mafaufau e faailoga mea o le a faia e le Faaola e fesoasoani ai i aiga o le lalolagi a o lei oo i Lona Afio Mai Faalua. O se tasi o uiga o le upu “liliu” o le fusia, po o le faamaufaailoga (tagai i le Aoaoga a Peresitene o le Ekalesia: Iosefa Samita [2007], 472). O vaefaamatalaga i au tusitusiga paia e mafai foi ona fesoasoani e te malamalama atili ai i nei fuaiupu.

Atonu e te manao e ta’u atu o lenei valoaga o loo ta’ua soo i tusitusiga faavae taitasi. E mafai ona e valaaulia le vasega e vaai pe mafai ona latou saili taitasi nei vaega e fa pe faasoa atu ia i latou fuaiupu nei: Malaki 4:5–6; Luka 1:17; Mataupu Faavae ma Feagaiga 110:15–16; Iosefa Samita—Talafaasolopito 1:38–39.

Mafaufau e fesili atu i tagata aoga po o le a se mea ua latou iloa e uiga ia Elia ma ki sa ia umia. E faavae i tali a tagata aoga, faasoa atu parakalafa nei (po o vaega e manaomia).

O Elia, o se perofeta anamua, na umia ki o le mana o faamauga. O le mana o faamauga e faia ia taulia ai i le lagi sauniga na faia i le pule o le perisitua i luga o le fogaeleele (Taiala i Tusitusiga Paia, “Faamau, Faamaufaailogaina,” scriptures.ChurchofJesusChrist.org).

Faitau le Mataupu Faavae ma Feagaiga 110:13–16 e vaai ai po o le a le mea na tupu i le Malumalu o Katelani i le 1836 e aofia ai Elia, Iosefa Samita, ma Oliva Kaotui.

Ona o le mana o faamauga ua toefuataiina mai, ua mafai ai ona tatou faia galuega faalemalumalu mo i tatou lava ma o tatou tuaa ua maliliu.

• O le a se mea ua e aoaoina mai le 3 Nifae 25 ma le Mataupu Faavae ma Feagaiga 110?

  O nisi o upumoni e ono faailoa mai e tagata aoga e aofia ai mea nei: E ala mai i le perofeta o Elia, na toefuatai mai ai e Iesu Keriso ki o faamauga mo galuega o le malumalu ma talafaasolopito o aiga. A o tatou auai i galuega o malumalu ma talafaasolopito o aiga, ua tatou saunia i tatou lava ma o tatou aiga mo le Afio Mai Faalua o le Faaola.

• O a nisi o auala patino e mafai ai e le autalavou ona auai i galuega o malumalu ma talafaasolopito o aiga?

• E mafai faapefea e le auai i galuega o malumalu ma talafaasolopito o aiga ona fesoasoani i se tasi e saunia ai mo le Afio Mai Faalua o le Faaola?

E taua le iloa e le gata na toefuatai mai e le Faaola ki o faamauga, ae ua na o Lana Togiola lava e mafai ai e i tatou ma i latou i o tatou aiga ona togiolaina, faamamaina, ma maua sauniga ma faamanuiaga e faavavau e aofia ai le sauniga o le faamauga.

Mafaufau loloto pe aisea e taua ai galuega o malumalu ma talafaasolopito o aiga i lou olaga. A o e mafaufau loloto, atonu e te manao e matamata le vitio “O Faamanuiaga Folafolaina o le Talafaasolopito o Aiga 2” (4:04), o loo maua i le ChurchofJesusChrist.org.

Mafaufau e valaaulia tagata a’oga e talanoa i paga po o ni vaega toalaiti fesili nei a o lei faasoa mai a latou tali i le vasega.

• O a ni aafiaga na outou maua i galuega o malumalu ma talafaasolopito o aiga?

• O a faamanuiaga ua e matauina i lou olaga o se taunuuga (o na galuega)?

Auai i galuega o le malumalu ma talafaasolopito o aiga

Ina ia fesoasoani ia te oe e auai i galuega o malumalu ma talafaasolopito o aiga, fai se tasi pe lua o mea nei. E mafai foi ona e mafaufau e fai se isi mea e faatatau i galuega o malumalu ma talafaasolopito o aiga e te lagona le taialaina o oe e fai e le Agaga.

O vaega o i lalo ua faamoemoe e fatu ai se avanoa mo tagata aoga e auai ai i le galuega o malumalu ma talafaasolopito o aiga i le vasega. E mafai ona e taulai atu i se gaoioiga se tasi o se vasega pe faataga tagata aoga e filifili se gaoioiga ma galulue taitoatasi ai. Afai e aoga, ma faatasi ai ma le faamaoniga a lou taitai perisitua, mafaufau e valaaulia lau faufautua o talafaasolopito o aiga o le uarota po o le siteki i lau vasega e fesoasoani atu.

• I le faaaogaina o lau faitotoa o le ChurchofJesusChrist.org saini e alu i totonu i le FamilySearch.org. Saili punaoa e aoao ai e uiga i se tasi o ou tuaa. Mafaufau e amata i le “E faapefea ona e manao e amata?”

• Tesi, valaau, pe faatulaga se taimi e talanoa ai i matua, matua matutua, po o isi tagata o le aiga e aoao atili ai e uiga i o latou olaga, talaaga, po o taimi na liua ai i le talalelei. Mafaufau e fai se faamaumauga o mea ua e aoaoina.

• Auai i le faatinoga o le faavasegaga o igoa. Mo se fesoasoani ia malamalama po o le a lenei mea ma le auala e amata ai, mafaufau e matamata muamua le vitio “FamilySearch Indexing—How it Works” (1:48), o loo maua i le FamilySearch.org.

• Saili igoa o tuaa ua maliliu e manaomia ona faia galuega o sauniga i le malumalu i luga o le polokalama o le FamilySearch po o le FamilySearch.org. Mafaufau e amata i le “E faapefea ona e manao e amata?”

A uma se taimi na maua e tagata aoga e maua ai ni aafiaga i le vasega i le galuega o malumalu ma talafaasolopito o aiga, mafaufau e valaaulia i latou e faasoa mai o latou aafiaga. O fesili nei e mafai ona fesoasoani ia te oe e faaiu ai le lesona.

• O le a se mea e te lagona e finagalo le Alii e te faia e faaauau ai ona auai i galuega o malumalu ma talafaasolopito o aiga? O le a le eseesega e mafai e lenei mea ona faia i lou olaga?

A o e saili e faaauau pea ona auai i talafaasolopito o aiga ma galuega o le malumalu, ia manatua le saunoaga lenei mai ia Peresitene Russell M. Nelson:

Soo se taimi e te faia ai soo se mea e fesoasoani ai i soo se tasi—i soo se itu o le veli—ia laa agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani lea e faapotopoto Isaraelu. (Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], ChurchofJesusChrist.org)

Molimau atu pe valaaulia tagata aoga e molimau atu i le taua o le galuega o le malumalu ma talafaasolopito o aiga.

Manatu ma Talaaga o Faamatalaga

O a nisi o faamanuiaga o le auai i galuega o malumalu ma talafaasolopito o aiga?

Na aoao mai Sister Wendy W. Nelson:

O lea, afai e te manao i sina olioli teisi atu i lou olaga, se faauigaga sili teisi atu, fesootaiga o le loto-i-le-loto, taulai atili atu, malosi, uunaiga, tele atu o le tele o mea matagofie, faaavanoa se taimi e fesoasoani ai ia i latou i le isi itu ia osia feagaiga ma le Atua. O le a tafe mai le mana o le Atua i lou olaga ao e faia. (Wendy W. Nelson, “… My Soul Delighteth in the Covenants of the Lord” [saunoaga na tuuina atu i le Brigham Young University Women’s Conference, Ape. 30, 2015])

Na faasoa mai Elder Dale G. Renlund o le Korama a Aposetolo e Toasefululua:

O le a e maua e le gata i le puipuiga mai faaosoosoga ma maagao o le lalolagi, ae o le a e maua foi le mana patino—le mana e suia ai, mana e salamo ai, mana e aoao ai, mana e faapaiaina ai, ma le mana e liliu atu ai loto o tagata o lou aiga i le tasi ma le isi, ma faamalolo ai mea e manaomia le faamalologa. (Dale G. Renlund, “Family History and Temple Blessings,” Ensign, Fep. 2017, 31)

Gaoioiga Faaopoopo e Aoao Ai

O se isi filifiliga mo le amataga o le lesona

Mafaufau e faaali atu se ata o se lala ma se laau po o le aumaia i totonu o se tamai lala ma tatai atu mafaufau o tagata aoga i se laau i fafo. Valaaulia tagata aoga e mafaufau i le tele o mea e tutusa ai ma eseesega latou te mafaia i le va o le lala ma le laau. Valaaulia i latou e mafaufau pe faapefea ona faatusatusa nei mea ia i tatou ma o tatou aiga. Faamalamalama atu e faapea, i tusitusiga paia, e masani ona faaaoga e le Alii le upu valiata o se laau e i ai a’a ma lala e aoao atu ai e uiga i le aiga. O a’a e pei o lo tatou aiga ua muamua atu ia i tatou ma o lala e pei lava o i tatou ma a tatou fanau o e e o mai mai ia i tatou. Valaaulia tagata aoga e mafaufau i mea e mafai ona latou faia e faataga ai le Faaola e faamalosia ma faasaoina a’a, ogalaau, ma lala o le gafa o lou aiga a o latou suesueina le 3 Nifae 25.

3 Nifae 26. A o tatou talitonu ma faatino mea ua faaali mai e le Atua, ua tatou saunia i tatou lava e maua faaaliga sili atu.

I le 3 Nifae 26, na faamalamalama mai ai e Iesu Keriso ia tusitusiga paia, ma sa aoao atu e Mamona mea e tatau ona fai ina ia maua ai mea sili atu ua faaalia mai e le Faaola. E mafai e tagata aoga ona faitau le 3 Nifae 26:6–8 ma vaavaai pe fia aoaoga a Iesu o tusifaamaumauina i le Tusi a Mamona ma le 3 Nifae 26:9–11 ma vaavaai pe aisea na le aofia ai Ana aoaoga uma. Folafola atu i tagata aoga e faapea, a latou suesueina ma le faamaoni ma faaaoga mataupu faavae o loo i totonu o le Tusi a Mamona, o le a latou mauaina le malamalama faateleina o le talalelei. Mafaufau i fesili e pei o lenei: “O le a se mea o e faia i lou olaga o ta’u mai ai lou talitonuga i le Tusi a Mamona?” “E faapefea i le faitauina o le Tusi a Mamona ma le manatu tonu i ai ona taitai atu ai oe e maua se faaaliga mo oe lava?”