3 Nifae 20–22

“O Le a Ou Faapotopotoina Faatasi Lo’u Nuu”

E mafai ona e mafaufau i se taimi i lou olaga na aoga ai le faatasi ai ma isi tagata? Aisea e te manatu na faatonuina soo ai e le Alii Lona nuu e faapotopoto faaletino ma faaleagaga? I le taimi o le galuega a le Faaola i sa Nifaē, sa Ia tautino atu ai o le a manatua e le Tama Faalelagi Lana feagaiga e faapotopoto Isaraelu ua faataapeapeina. Sa Ia faaalia mai faailoga e fesoasoani ia i tatou ia iloa le taimi na amata ai le faapotopotoina i aso e gata ai. O lenei lesona e mafai ona fesoasoani ia te oe e auai i le faapotopotoina o Isaraelu.

Fesoasoani i tagata aoga ia lagona le faatauaina. Vaavaai mo ni auala lelei e faailoa atu ai saofaga a tagata aoga. Faailoa atu le agaga faafetai pe a auai tagata aoga i le faagasologa o le aoaoina, ma fesoasoani i tagata aoga uma ia lagona le saogalemu a o latou faasoa mai o latou manatu ma lagona.

Sauniuniga a le tagata aoga: Valaaulia tagata aoga e mafaufau i le taimi o a latou faitauga o tusitusiga paia i aso taitasi o auala na fesoasoani ai le Tusi a Mamona ia i latou e latalata atili atu ai ia Iesu Keriso.

Gaoioiga e Mafai Ona Aoao Ai

O le faapotopotoina

Ina ia amata, uu i luga se lala laau e tasi, fasilaau popsicle, po o se fasilaau tuitui nifo. Faatonu tagata aoga e fai mea nei:

Faaalu sina taimi e mafaufau ai i ni tulaga na e lagona ai, po o i latou e te iloa, le tuuatoatasi, le saogalemu, po o le pei e le fetaui lou i ai.

Faaopoopo le lala laau e tasi, fasilaau popsicle, po o se fasilaau tuitui nifo i se vaega itiiti o le ituaiga aitema lava e tasi.

• E mafai faapefea e le avea ma se tasi o se vaega ona fesoasoani i nei atugaluga?

  Mafaufau e faataitai pe mafai faapefea ona faigofie ona gauia se fasilaau se tasi po o se fasilaau tuitui nifo, ae e sili atu ona faigata ona gagau pe a tuufaatasi.

  Ina ia faapupula le isi fesili, faaopoopo se fasi laau mafiafia, se fao lapoa, po o se poloka uamea i le vaega.

• O a ni tulaga lelei i le i ai i se vaega faatasi ma le Alii ma i latou o e mulimuli ia te Ia?

  Mafaufau e faaali atu faamatalaga nei ma tuu atu i tagata aoga ni nai minute filemu e mafaufau loloto ai ma iloilo e le tagata lava ia.

Mafaufau loloto i fuaitau nei: Fua po o le a le lelei o le faatatau o nei faamatalaga ia te oe, e faaaoga ai le “tele lava,” “o nisi taimi,” po o le “seāseā.”

• Ou te lagona e i ai so’u sootaga ma le Alii ma Na te puipuia, togiola, ma alofa ia te a’u.

• Ou te iloa auala e valaaulia ai au e le Alii e sau ia te Ia ma maua nei faamanuiaga.

• Ou te saili e fesoasoani i isi ia faapotopoto i le Alii ma lagona le saogalemu ma le auai.

A o e suesue i lenei lesona, mafaufau i auala e saili ai le Alii e faapotopoto saogalemu oe ma isi ia te Ia ma Lana Ekalesia. Mafaufau loloto pe mafai faapefea ona e fesoasoani i le Alii i Lana galuega paia o le faapotopotoina.

“O le a ou faapotopoto”

I le aso lona lua o le asiasiga a le Faaola i le atu Amerika, ina ua uma ona tatalo le Faaola ma faamanuia tagata, sa Ia tuuina atu faavavega le faamanatuga ia i latou. Ona Ia valoia lea o Lona nuu o le feagaiga i aso e gata ai. Ina ia malamalama i Ana valoaga, e taua le manatua o mea nei:

• Sa folafola atu muamua e le Alii ia Aperaamo ma e e tupuga mai ia te ia, e aofia ai Iakopo (na igoa foi ia Isaraelu), o le a latou maua faamanuiaga uma o le talalelei ma le perisitua (tagai i le Aperaamo 2:6–11).

• O e na tupuga mai ia Isaraelu, e aofia ai sa Nifaē, sa faataapeapeina i le lalolagi atoa. Sa folafola mai e le Alii e toe faapotopoto mai i latou ia maua faamanuiaga o le talalelei.

• Soo se tasi e auai i le Ekalesia e le o ni e tupuga moni mai ia Isaraelu ua vaetamaina i Isaraelu ma e mafai ona mauaina faamanuiaga uma lava e tasi.

Faitau le 3 Nifae 20:11–13, 18, 22, vaavaai mo mea na folafola mai e le Alii o le a Ia faia. Atonu e fesoasoani le iloa o mea nei:

• O fusisaito (3 Nifae 20:18) o ni fusi o saito ua seleseleina.

• I aso e gata ai, o le a faaumatia ai e le Alii i Lona faamasinotonu e amioleaga o e o le a le salamo (tagai i le 3 Nifae 20:15–17, 19–20), ma o le a faapotopoto le Au Paia i se nofoaga e taua o le Ierusalema Fou i le atu Amerika (tagai i le Mataupu Faavae o le Faatuatua 1:10).

• O le a se mea na e mauaina?

Faalogo ma le toto’a i tagata aoga. A o latou faasoa mai, valaaulia i latou e faasino mai soo se fasifuaitau po o upumoni e tumatila ia i latou.

O se upumoni e tasi e mafai ona tatou aoao mai nei fuaiupu e faapea, o le a faataunuu e le Atua Lana feagaiga e faapotopoto le aiga o Isaraelu i aso e gata ai.

Mafaufau ma le agaga tatalo pe mafai faapefea ona e fesoasoani i au tagata aoga ia iloa taumafaiga a le Alii e faapotopoto i latou. Mafaufau e faaali atu le ata mai le amataga o le lesona, ma fai atu fesili e pei o nei:

• O a nisi o auala o loo aumaia ai i tatou e le Alii “i le malamalama o le Alii … o le ua togiolaina [i tatou]”? (3 Nifae 20:13).

• E ui o valoaga e uiga i le Ierusalema Fou o le a faataunuuina i le Meleniuma, e faapefea e i latou o e mulimuli i le Faaola ona maua “mana o le lagi … i [lo latou] lotolotoi” i le taimi nei? (3 Nifae 20:22). O a ni auala e mafai ai ona tatou maua le Alii “i le lotolotoi o” i tatou? (3 Nifae 20:22).

• E mafai faapefea e nei faamanuiaga ona fesoasoani ia i tatou i o tatou olaga (e aofia ai pe a tatou lagonaina le tuuatoatasi, le saogalemu, po o le le fetaui le auai ai)?

Faailoga o le faapotopotoina i aso e gata ai

Na folafola mai e le Alii faailoga i o tatou aso e ta’u mai ai ua amata ona Ia faapotopotoina Lona nuu.

Mafaufau e faaali atu pe tuuina atu i tagata aoga se kopi o le gaoioiga faafetaui. Valaaulia tagata aoga e galulue i ni paga po o ni vaega toalaiti e fai ai le suega puupuu. O tali 1-i, 2-e, 3-a.

3 Nifae 20:25–27	“O se galuega tele ma le ofoofogia,” po o le Toefuataiga o le Ekalesia a Keriso e ala mai i Lana auauna o Iosefa Samita, o se faailoga lea o le faapotopotoina.
3 Nifae 21:1–2, 7	O le oo mai o le Tusi a Mamona, “o nei mea [na tautino mai e le Alii],” o se faailoga lea o loo faapotopotoina e le Alii le aiga o Isaraelu.
3 Nifae 21:9-11	E ala mai ia i latou o e na osia feagaiga ma le Alii, “o le a faamanuiaina ai aiga uma o le lalolagi.”

• Aisea e te manatu ai e finagalo le Alii ia tatou iloa faailoga o Lana faapotopotoina?

O faapefea mai lou faapotopotoina?

• Na faapefea ona fesoasoani se tasi o mea nei ia te oe e faapotopoto ai i le Alii ma olioli i faamanuiaga ua Ia ofoina mai?

  • Tagata o le Ekalesia o e tausia a latou feagaiga

  • O Le Tusi a Mamona

  • O Le Ekalesia

Valaaulia tagata aoga e faasoa mai o latou manatu ma aafiaga. Mafaufau e faasoa atu foi ou manatu ma aafiaga.

“O le a manuia ai aiga uma o le lalolagi”

I le avea ai ma tagata o le feagaiga o le Ekalesia, o lo tatou tiutetauave le fesoasoani atu ia “manuia aiga uma o le lalolagi” e ala i le talalelei a Iesu Keriso (3 Nifae 20:27). O gaoioiga nei e mafai ona fesoasoani ia te oe e mafaufau loloto ai pe faapefea ona fesoasoani i le Alii i Lana faapotopotoina.

1. Faitau mo ni nai minute i le Tusi a Mamona, ma vaavaai mo fuaiupu po o fasifuaitau e fesoasoani e te sau ai i le Alii, lagona Lona alofa, ma maua faamanuiaga ua Ia ofoina mai. Tusi ia mau po o fasifuaitau autu i lau api faamaumau mo suesuega. Mafaufau i ni auala e mafai ona e faasoa atu ai nei fuaiupu i isi.

2. Saunia mea e mafai ona e fai atu pe tusitusi e faasoa atu ai le Tusi a Mamona i se tasi. Ia aofia ai ou lagona e uiga i le tusi ma pe faapefea ona e manatu e mafai ona fesoasoani ia i latou e latalata atili atu ai i le Faaola.

3. Saunia mea e mafai ona e fai atu e valaaulia ai se tasi e auai i le lotu po o se gaoioiga a le ekalesia faatasi ma oe. Ia aofia ai ou mafaufauga i le auala e mafai ona fesoasoani ai ia i latou, aemaise lava pe mafai faapefea ona fesoasoani ia i latou e latalata atili atu ai i le Alii.

A o e suesue i lenei vaiaso, filifili ma le agaga tatalo se auala se tasi e mafai ona e fesoasoani ai e faapotopoto Isaraelu. O isi manatu o le a tuuina atu i lesona i le lumanai. Saili le taitaiga a le Alii ia iloa po o fea atonu e sili ona lelei mo oe e fai.

Manatu ma Talaaga o Faamatalaga

E mafai faapefea ona ou fesoasoani i le Alii i le faapotopotoina o Isaraelu?

Na aoao mai Peresitene Russell M. Nelson:

O lo tatou tiutetauave o le fesoasoani e faataunuu le feagaiga Faa-Aperaamo. O i tatou o le fanau na muai faauuina ma saunia e faamanuia ai tagata uma o le lalolagi. O le pogai lena ua aofia ai le galuega faafaifeautalai i tiute o le perisitua. Ina ua mavae ni tausaga e 4,000 pe ā o le nofo faatalitali ma sauniuniga, o le taimi atofaina lenei e tatau ona avatu ai le talalelei i tagata uma o le lalolagi. O le taimi lenei o le faapotopotoina lea na folafolaina mo Isaraelu. Ma ua tatou maua le avanoa e auai ai! Pe le o se mea matagofie ea lena? O loo faamoemoe mai le Alii ia i tatou ma i latou e auauna atu ma le agavaa o ni faifeautalai i lenei taimi maoae o le faapotopotoina o Isaraelu. (Russell M. Nelson, “Feagaiga,” Liahona, Nov. 2011, 88)

Mo nisi malamalamaaga faaopoopo, mafaufau e faitau pe matamata i le saunoaga “Avea ma se Faifeautalai” saunia e Elder David A. Bednar o le Korama a Aposetolo e Toasefululua (po o leLiahona, Nov. 2005, 44–47).

O le a le matafaioi a le Tusi a Mamona i le faapotopotoina o Isaraelu?

Na aoao mai Peresitene Russell M. Nelson:

O le Tusi a Mamona e totonugalemu i lenei galuega. O loo folafola mai ai le aoaoga faavae o le faapotopotoina mai. E mafua ai ona aoao tagata e uiga ia Iesu Keriso, e talitonu i Lana talalelei, ma auai i Lana Ekalesia. O le mea moni, afai e leai se Tusi a Mamona, o le a le tupu le faapotopotoina folafolaina o Isaraelu. (Russell M. Nelson, “O le Faapotopotoina o Isaraelu ua Faataapeapeina,” Liahona, Nov. 2006, 80)

Pe manaomia ona tatou faapotopoto i le laueleele lava e tasi o se vaega o le faapotopotoina? (3 Nifae 20:29–33)

Na aoao mai Peresitene Spencer W. Kimball (1895–1985):

O le faapotopotoina o Isaraelu e aofia ai le auai i le ekalesia moni, ma lo latou o mai i se malamalama i le Atua moni. … O le mea lea, o soo se tagata lava, e na te taliaina le talalelei toefuataiina, ma ua saili nei e tapuai i le Alii i lana lava gagana, ma faatasi ma le Au Paia i le atunuu o loo ia nofo ai, ua usitaia le tulafono o le faapotopotoina o Isaraelu, ma ua avea ma suli e mauaina faamanuiaga uma ua folafolaina mo le Au Paia i nei aso mulimuli. O Aoaoga a Spencer W. Kimball, ed. Edward L. Kimball [1982], 439.

Gaoioiga Faaopoopo e Aoao Ai

3 Nifae 22:2. Auai i Le Ekalesia a Iesu Keriso o le Au Paia o Aso e Gata Ai

Afai e mafai ona manuia tagata aoga mai le aoao atili e uiga i le ala e faamanuiaina ai i tatou e le Faaola e ala i lo tatou avea ai ma tagata o le Ekalesia, mafaufau e tusi se faleie i luga o le laupapa ma faitau faatasi ma tagata aoga le 3 Nifae 22:2 . Talanoaina vaega lelei o se faleie pe a moe i le vao, ma fai atu fesili e pei o nei:

• Na faapefea ona tuuina atu e le Faaola ma Lana Ekalesia ia te oe le mafanafana, saogalemu, ma le auai?

• Aisea e finagalo ai le Alii ia faateleina ma faamalosia le “faleie” i aso e gata ai?

• E mafai faapefea ona tatou valaaulia isi e saili se malutaga i le Ekalesia a le Faaola?

Afai e maua, mafaufau e usu le “O le Ekalesia a Iesu Keriso” faatasi ma tagata aoga (Tusipese a Tamaiti, 48).

3 Nifae 22:7–10. O le “agalelei tumau-faavavau” o le Alii

Afai e aoga mo tagata aoga le talanoaina o taimi e teena ai e tagata le talalelei, fai atu ia i latou e faasoa mai pe aisea e ono liliuese ai tagata. Faitau le 3 Nifae 22:7-10, ma vaavaai mo mea na folafola mai e le Alii i Ona tagata. Mafaufau e fai atu fesili e pei o fesili o i lalo:

• O a ni mea ua e aoaoina e uiga i le Alii mai nei fuaiupu?

• O a ni auala ua e vaaia ai le “alofa mutimutivale” ma le “agalelei tumau-faavavau” o le Alii? (3 Nifae 22:8).

• E mafai faapefea e nei fuaiupu ona faaosofia oe po o se tasi e te alofa i ai e talia pe toe foi atu i le Alii?