3 Նեփի 27, Մաս 2

Սրբագործվել Հիսուս Քրիստոսի միջոցով

Երբևէ ցանկացե՞լ եք հոգևոր առումով ավելի մաքուր լինել։ Երբ Հիսուս Քրիստոսն Ամերիկա աշխարհամասում ուսուցանում էր իր աշակերտներին, Նա բացատրեց Իր ավետարանի հետևորդներին հասանելի կարևոր օրհնություններ, այդ թվում՝ Սուրբ Հոգու միջոցով սրբագործումը։ Այս դասը կարող է օգնել ձեզ հասկանալ՝ ինչպես ստանալ Փրկչի սրբագործող զորությունը, երբ ջանքեր եք գործադրում Նրա ավետարանով ապրելու համար։

Օգնեք ուսանողներին պատկանելության զգացում ունենալ։ Սեմինարիան պետք է լինի մի միջավայր, որում ուսանողներն ապահով են զգում, սատարվում են, և որտեղ նրանց ներդրումներն արժևորված են։ Ուսանողների հետ շփվելիս ցուցաբերեք ձեր սերն ու հոգածությունը նրանց հանդեպ։ Դասարանի անդամներին խրախուսեք լսել միմյանց և արժևորել իրենց դասընկերների տեսակետները։

Ուսանողի նախապատրաստում․ առաջարկեք ուսանողներին Սուրբ գրքերի ուղեցույցում կարդալ «Սուրբ Հոգի» հոդվածի առաջին երեք պարբերությունները (scriptures.ChurchofJesusChrist.org)։ Առաջարկեք նրանց պատրաստվել՝ կիսվելու, թե ըստ իրենց Սուրբ Հոգին ինչպես կարող է օգնել իրենց սրբագործվել կամ ավելի նմանվել Փրկչին։

Հնարավոր ուսումնական վարժություններ

Անմաքուր

Կիսվեք հետևյալ պատմությամբ, որպեսզի օգնեք ուսանողներին պատրաստվել ուսումնասիրելու սեփական մեղքերից մաքրագործվելու իրենց կարիքը։

Յոթանասունից երեց Ալեն Դ. Հեյնին կիսվել է իր մանկության պատմությամբ։

Հիշենք, թե ում ենք ապավինել

Երբ ես ինը տարեկան էի, իմ ալեհեր, 1,5 մ հասակ ունեցող տատիկը, այցելեց մեզ մի քանի շաբաթով։ Մի օր, մինչ նա այնտեղ էր, ես և իմ երկու ավագ եղբայրները որոշեցինք փոս փորել այգում, որը գտնվում էր մեր տան դիմացի փողոցից այն կողմ։ Չգիտեմ, թե ինչու մենք արեցինք դա․ տղաները, երբեմն, փոսեր են փորում։ Մենք մի քիչ փոշոտվեցինք, սակայն դա չէր կարող լուրջ խնդիր առաջ բերել։ Մեր հարևանությամբ ապրող տղաները տեսան, թե որքան զվարճալի էր փոս փորելը և սկսեցին օգնել։ Ապա մենք բոլորս էլ ավելի ու ավելի փոշոտվեցինք։ Հողաշերտը կարծր էր, ուստի մենք բերեցինք այգու ջրի խողովակը և մի քիչ ջուր լցրեցինք փոսի մեջ, որպեսզի հողը փափկեր։ Մենք մի քիչ ցեխոտվեցինք, սակայն փոսը գնալով խորացավ։

Մեր խմբից մեկը որոշեց, որ պետք է մեր փոսը դարձնենք լողավազան, ուստի մենք լցրեցինք այն ջրով։ Լինելով ամենակրտսերը և ցանկանալով փորձել փոսի մեծությունը, ինձ համոզեցին ներս ցատկել ու փորձել այն։ Այժմ ես իրոք ցեխոտ էի։ Սկզբում ես չէի պլանավորել ծածկվել ցեխով, սակայն վերջում ես հայտնվեցի այդ իրավիճակում։

Երբ սկսեց ցրտել, ես անցա փողոցը՝ փորձելով տուն մտնել։ Տատիկս տեսավ ինձ մուտքի դռան մոտ և արգելեց ինձ տուն մտնել։ Նա ասաց, որ եթե ինձ ներս թողներ, ես կցեխոտեի տունը, իսկ նա նոր էր այն մաքրել։ Ուստի, ես արեցի այն, ինչ կաներ յուրաքանչյուր իննամյա տղա տվյալ իրավիճակում և վազեցի դեպի տան հետևի դուռը, սակայն նա ավելի արագաշարժ գտնվեց, քան ես կարծում էի։ Ես զայրացա, ոտքս հարվածեցի գետնին և պահանջեցի, որ ներս մտնեմ, սակայն դուռը փակ մնաց։

Ես թաց էի, ցեխոտ, մրսում էի և, ըստ իմ մանկական պատկերացման կարող էի մեռնել իմ տան ետևի բակում։ Ի վերջո, ես հարցրի նրան, թե ինչ պետք է անեի, որ տուն մտնեի։ Հենց այդ պահին տատիկս ինձ վրա պահեց ջրի խողովակը։ Այդ պահն ինձ հավերժություն թվաց, որից հետո տատիկս գտավ, որ ես մաքուր էի և թույլ տվեց, որ տուն մտնեմ։ Տանը տաք էր և ես կարողացա չոր, մաքուր հագուստներ հագնել։ (Ալլեն Դ. Հեյնի, «Հիշենք, թե ում ենք ապավինել», Լիահոնա, նոյեմբեր 2015, 121):

• Հոգևոր ի՞նչ համեմատություններ կարող եք անել երեց Հեյնիի պատմության և մեր կյանքի միջև։

3 Նեփի 27 գլխում Փրկիչն Իր ավետարանը քննարկում էր Իր նեփիացի աշակերտների հետ, որի ընթացքում ուսուցանում էր մեղքի հետևանքների մասին և ինչպես կարող ենք հաղթահարել դրանք ու հոգևոր առումով մաքրվել։

Կարդացեք 3 Նեփի 27․19 հատվածը և փնտրեք Փրկչի ուսմունքները։

• Այս հատվածն ի՞նչ է ուսուցանում ձեզ այն մասին, որ ունեք Հիսուս Քրիստոսի և Նրա Քավության կարիքը։

Կիսվելով հետևյալ պարբերությամբ՝ կարող եք օգնել ուսանողներին հասկանալ, որ նրանք անձնապես ունեն Փրկչի մաքրագործող զորության կարիքը։

Հիսուս Քրիստոսը կարող է մաքրագործել ձեզ մեղքի հետևանքից և օգնել սրբանալ։ Մտածեք մեղքից մաքրագործվելու անհրաժեշտության մասին և ինչպիսին կարող է լինել կամ ինչ զգացողություն է հոգևոր առումով մաքուր լինելը։ Այսօր ուսումնասիրելու ընթացքում փնտրեք ուսմունքներ, որոնք կարող են օգնել ձեզ ավելի լավ հասկանալ, թե ինչպես կարող եք օգտվել ձեր կյանքում Փրկչի սրբագործող զորությունից։

Հիսուս Քրիստոսը նկարագրում է, թե ինչպես կարող ենք սրբագործվել Սուրբ Հոգու միջոցով։

3 Նեփի 27․20–22 հատվածներում Փրկիչն ուսուցանել է, թե ինչ կարող ենք անել Նրա սրբագործող զորությունն ստանալու և հավերժական կյանքին արժանանալու համար։ Որպեսզի օգնեք ուսումնասիրել այս հատվածները, պատճենեք հետևյալ աղյուսակը ձեր օրագրում։

Կարող եք այս աղյուսակն արտանկարել նաև գրատախտակին, որպեսզի ուսանողները կարողանան ուսումնասիրությունից հետո դասարանով լրացնել այն։

Պատվիրաններ	Օրհնություններ

Կարդացեք 3 Նեփի 27․20–22 հատվածները և լրացրեք աղյուսակը ձեր գտածի հիման վրա։

3 Նեփի 27․20 հատվածը վարդապետության սերտման հատված է: Վարդապետության սերտման հատվածները նշեք տարբերակիչ ձևով, որպեսզի հեշտ գտնեք դրանք: Հաջորդ դասին դուք հնարավորություն կունենաք որևէ հարցի կամ իրավիճակի համար կիրառել այս հատվածում ուսուցանված վարդապետությունը:

• Ինչպե՞ս կամփոփեիք հատված 20-ում որպես ճշմարտություն ներկայացված Փրկչի ուսմունքները։

Ճշմարտություններից մեկը, որ կարող ենք սովորել, այն է, որ եթե ապաշխարենք և դառնանք դեպի Հիսուս Քրիստոսը, կարող ենք Սուրբ Հոգին ստանալով սրբագործվել և վերջին օրը անբիծ կանգնել Նրա առաջ։

Սրբագործվել նշանակում է լինել «Հիսուս Քրիստոսի Քավության միջոցով մեղքից ազատված, անարատ, մաքուր և սուրբ» (Սուրբ գրքերի ուղեցույց, «Սրբագործում» scriptures.ChurchofJesusChrist.org)։

• Ապաշխարությունն ու մկրտությունն ինչպե՞ս կարող են օգնել մեզ սրբագործվել Հիսուս Քրիստոսի միջոցով։

• Ինչպե՞ս կպատասխանեիք այն մարդուն, որը ցանկանում է իմանալ, թե այդ պատվիրաններն ինչպես են կիրառվում իր համար՝ մկրտության արարողությունը ստանալուց հետո։

Անհրաժեշտության դեպքում օգնեք ուսանողներին հասկանալ, որ մենք ամեն օր ապաշխարելու հնարավորություն ունենք, քանի որ կատարյալ չենք։ Մկրտվելուց հետո մենք պետք է նաև շարունակաբար ձգտենք պահել մեր մկրտության ուխտերը։ Արժանիորեն հաղորդություն ընդունելը մեզ հնարավորություն է տալիս ամեն շաբաթ նորացնել այդ ուխտերը։ Այս բոլոր գործողություններն օգնում են մեզ հոգևոր առումով ավելի մաքուր լինել։

«Բացատրական և պատմական տեղեկություններ» բաժնում բերված նախագահներ Ռասսել Մ. Նելսոնի և Բոյդ Ք. Փաքերի խոսքերը կարելի է օգտագործել այս հասկացություններն ուսուցանելու համար։

Սրբագործվել Սուրբ Հոգու միջոցով

Հատված 20-ում Հիսուս Քրիստոսի խոսքերն ուսուցանում են, որ Նա օգնում է մեզ սրբագործվել Սուրբ Հոգին ստանալու միջոցով։

Առաջին նախագահությունից նախագահ Հենրի Բ. Այրինգն ուսուցանել է Փրկչի Քավության և Սուրբ Հոգու սրբագործող ազդեցության միջև կապը։

Եթե դուք զգացել եք Սուրբ Հոգու ազդեցությունը այսօր, ապա կարող եք ընդունել դա որպես վկայություն, որ Քավությունը գործում է ձեր կյանքում: Այդ իսկ պատճառով և այլ ուրիշ պատճառներից ելնելով դուք լավ կանեք, եթե լինեք այնպիսի վայրերում և այնպիսի խնդիրների առջև կանգնեք, որոնք հրավիրում են Սուրբ Հոգու հուշումները: Սուրբ Հոգու ազդեցությունը զգալը գործում է երկու ուղղությամբ. Սուրբ Հոգին բնակվում է միայն մաքուր տաճարում, և Սուրբ Հոգին ստանալը մաքրում է մեզ Հիսուս Քրիստոսի Քավության միջոցով: (Հենրի Բ. Այրինգ, «Հոգու պարգևները դժվարին ժամանակներում», Ensign, June 2007, 23)

• Ինչպե՞ս եք զգացել Հոգու մաքրող ազդեցությունը ձեր կյանքում։

  Նախորդ հարցի քննարկման համար կարող եք կիսվել օրինակներով, թե ինչպես է Սուրբ Հոգին օգնել ձեզ մեծացնել ձեր հոգևոր մաքրությունը։ Այդպիսի օրինակներ կարող են լինել այն եղանակները, որոնցով Սուրբ Հոգին մեծացրել է Հիսուս Քրիստոսին հետևելու ձեր ցանկությունը կամ հուշումները, որոնք Սուրբ Հոգին տվել է ձեզ Փրկչից հեռացնող արարքներից խուսափելու համար։

• Ի՞նչ մի քանի եղանակներով կարող ենք հրավիրել Սուրբ Հոգու շարունակական ընկերակցությունը, որպեսզի կարողանանք կանոնավոր կերպով օրհնվել սրբագործող ազդեցությամբ։

Կիրառեք Փրկչի ուսմունքները ձեր կյանքում

Այսօր ուսումնասիրած ճշմարտությունները պարզ են, բայց կարևոր, որոնց պետք է կանոնավոր կերպով հետևել՝ Աստծո ներկայությանն անժանիորեն վերադառնալու համար։ Մտածեք, թե ձեր կյանքում ինչպես կկիրառեք այն, ինչ սովորել և զգացել եք։ Կարող եք ընտրել հետևյալ տարբերակներից մեկը կամ մի քանիսը կամ այդ ուսմունքները կիրառելու այլ եղանակ ընտրել։

Ցուցադրեք հետևյալ տարբերակները և ուսանողներին բավարար ժամանակ տվեք, որպեսզի մտածեն և գուցե իրենց օրագրերում գործողությունների ծրագիր գրեն։ Ավարտելուց հետո վկայեք այս դասին քննարկած ճշմարտությունների մասին։

1. Ավելի կշռադատված մտածեք ամեն օր ապաշխարելու մասին և որոշեք ավելի լիարժեքորեն հետևել Փրկչին։

2. Հաղորդության արարողությունում ձեր մասնակցությունը կիրակի օրվա ձեր երկրպագության ավելի իմաստալից մասը դարձրեք։

3. Մտածեք, թե որ մեղքը կամ շեղումն է սահմանափակում ձեր ընկերակցությունը Սուրբ Հոգու հետ։ Կատարեք անհրաժեշտ գործողություններ՝ այդ մեղքը կամ շեղումը ձեր կյանքից հեռացնելու համար։

4. Սկսեք անել մի բան, որը թույլ կտա ձեզ ավելի մեծ չափով օգտվել Սուրբ Հոգու ընկերակցությունից։

Բացատրական և պատմական տեղեկություններ

Ինչպե՞ս կարող է ամենօրյա ապաշխարությունն օգնել ինձ զգալ Փրկչի սրբագործող զորությունը։

Նախագահ Ռասսել Մ. Նելսոնն ուսուցանել է․

Ոչինչ ավելի ազատագրական, ավելի ազնվացնող կամ ավելի կարևոր չէ մեր անհատական առաջընթացի համար, քան կանոնավոր, ամենօրյա կենտրոնացումն ապաշխարության վրա: Ապաշխարությունը մեկ իրադարձություն չէ, այն գործընթաց է։ Այն երջանկության և խաղաղ մտքի բանալին է։ Զուգորդվելով հավատքի հետ՝ ապաշխարությունը հնարավորություն է տալիս օգտվել Հիսուս Քրիստոսի Քավության զորությունից։ …

… Տերը մեր հավերժական առաջընթացի այս ժամանակահատվածում մեզնից կատարելություն չի ակնկալում։ Բայց նա ակնկալում է, որ մենք ավելի մաքուր լինենք: Ամենօրյա ապաշխարությունը մաքրության ուղին է, իսկ մաքրությունը ուժ է բերում է: (Ռասսել Մ․ Նելսոն, «Մենք կարող ենք ավելի լավ գործել և ավելի լավը լինել», Լիահոնա, մայիս 2019 թ․, 67, 68)։

Ինչպե՞ս կարող եմ մկրտվելուց հետո մաքրվել իմ մեղքերից։

Տասներկու Առաքյալների Քվորումի նախագահ Բոյդ Ք. Փաքերն (1924–2015) ուսուցանել է.

Washed Clean

Ընդհանուր առմամբ մենք հասկանում ենք, որ մկրտության արարողությունը լվանում է մեր մեղքերը՝ պայմանավորված ապաշխարությամբ։ Ոմանց հետաքրքրում է, թե արդյոք իրենք չափազանց վաղ են մկրտվել։ Եթե միայն կարողանային հիմա մկրտվել ու մաքուր մեկնարկ ունենալ։ Բայց դա անհրաժեշտ չէ՛։ Հաղորդության արարողության միջոցով դուք նորացնում եք մկրտության ուխտերը։ Երբ բավարարեք ապաշխարության բոլոր պայմանները, որքան էլ դժվար լինեն, դուք կարող եք ներվել, և ձեր օրինազանցություններն այլևս չեն մտահոգի ձեզ (Բոյդ Ք. Փաքեր, «Մաքրված», Ensign, մայիս 1997 թ․, 10)։

Ինչպե՞ս է Սուրբ Հոգին օգնում մեզ զգալ Փրկչի սրբագործող զորությունը։

Յոթանասունից երեց Քևին Ռ. Դանքընը բացատրել է․

Սուրբ Հոգին կարևոր դեր է կատարում՝ օգնելով մեզ հաղթահարել մեղքը և փոխարինել այն արդարակեցության սիրով ու Աստծո պատվիրանները պահելու ունակությամբ։

Ես շատերի կյանքում եմ ականատես եղել Հոգու սրբագործող զորությանը։ Ես տեսել եմ, թե ինչպես է վատ մարդը լավը դառնում, իսկ լավը՝ մեծ, քանի որ նրանք իրենց սրտերը ենթարկում են Հոգու մաքրագործող ազդեցությանը։ Սուրբ Հոգին սրբագործող է (Քևին Ռ. Դանքըն, «Սուրբ Հոգու սրբազան դերերը», Ensign, հոկտեմբեր 2014 թ․, 65)։

Որպեսզի ուսանողներն ավելի լավ հասկանան, թե ինչպես է Փրկիչը մաքրում մեզ Սուրբ Հոգու միջոցով, կարող եք դիտել «Դեմ առ դեմ նախագահ Այրինգի և երեց Հոլլանդի հետ» տեսանյութի 1:03:17–1:09:16 հատվածը ChurchofJesusChrist.org կայքում։

Face to Face with President Eyring and Elder Holland

Տեսահոլովակ

3 Նեփի 27 գլխում ներկայացված Փրկչի ուսմունքներից մի քանիսը տեսնելու համար դիտեք «Հիսուս Քրիստոսը հայտարարում է Իր Եկեղեցու անունը և Իր վարդապետությունը» տեսանյութի 3:26–8:03 հատվածը։

Jesus Christ Declares the Name of His Church and His Doctrine | 3 Nephi 27

Օժանդակ ուսումնական վարժություններ

Դասը սկսելու այլընտրանքային եղանակ

Նախքան 3 Նեփի 27․19 հատվածը կարդալը կարող եք առաջարկել ուսանողներին պատկերացնել, որ իրենք մի կարևոր միջոցառման են մասնակցում, օրինակ՝ հարցազրույցի կամ հանդիպման, որի համար պետք է գեղեցիկ հագուկապ ունենան։ Հետո առաջարկեք նրանց պատկերացնել, թե ինչ կզգային, եթե նախքան միջոցառման սկսվելը որևէ բան թափեին իրենց հագուստի վրա ու աղտոտեին այն։ Հետո կարող եք խնդրել ուսանողներին մտածել, թե ինչերի պատճառով մեր հոգիները կարող են անմաքուր լինել, և ինչ կարող ենք զգալ, երբ Աստծո առաջ հոգևոր առումով անմաքուր վիճակում կանգնենք։

3 Նեփի 27.27: «Ինչպիսի՞ մարդ եք դուք պարտավոր լինել»

3 Նեփի 27․23–33 հատվածներում Փրկիչը ցուցումներ է տվել Իր տասներկու աշակերտներին և ուսուցանել է նրանց իրենց պատասխանատվությունների, այդ թվում՝ մարդկանց դատավորներ լինելու իրենց դերի մասին։ Առաջարկեք ուսանողներին կարդալ 3 Նեփի 27․27 հատվածը և փնտրել, թե ինչ ճշմարտություն կարող են սովորել Փրկչի՝ Իր աշակերտներին տված պատվիրանից, որը կարող է կիրառվել իրենց կյանքում։ Ճշմարտություններից մեկը, որն ուսանողները կարող են բացահայտել, այն է, որ Տերը պատվիրում է Իր աշակերտներին դառնալ այնպիսին, ինչպիսին Ինքն է։

Ուսանողները կարող են ուսումնասիրել Փրկչի կյանքի այն իրադարձությունները, որոնք ցուցադրում են Նրա կատարյալ օրինակն ու փնտրել, թե Փրկչի որ հատկանիշներն են ցանկանում ընդօրինակել։ Նրանք կարող են Փրկչի հատկանիշներից մեկն ավելի լիարժեքորեն զարգացնելու ծրագիր կազմել, որպեսզի կարողանան ավելի նմանվել Նրան։