3 Նեփի 28

Ցանկանալ ուրիշներին բերել դեպի Հիսուս Քրիստոսը

Ամենամեծ ցանկություններից մեկը, որ կարող ենք ունենալ մեր կյանքում, այն է, որ օգնենք այլ մարդկանց ստանալ Հիսուս Քրիստոսի և Նրա Քավությամբ առաջարկվող օրհնությունները (տե՛ս Վարդապետություն և Ուխտեր 15․6)։ Նեփիացի աշակերտներից երեքը յուրահատուկ ձևով ցուցադրեցին սա, երբ ցանկացան մնալ երկրի վրա և հոգիները բերել Հիսուս Քրիստոսի մոտ մինչև Նրա Երկրորդ Գալուստը։ Այս դասի նպատակն է օգնել ձեզ ուրիշներին դեպի Հիսուս Քրիստոսը բերելու ավելի մեծ ցանկություն ունենալ։

Օգնել ուսանողներին սովորել ապավինել Հիսուս Քրիստոսին: Երբ ուսանողները ձգտում են հետևել Հիսուս Քրիստոսին, կարող են վստահ չլինել, որ իրենց պարտավորությունները կամ հանձնարարությունները կատարելու ունակություններ ունեն։ Հիշեցրեք ուսանողներին, որ երբ իրենք հավատքով գործեն, կամրապնդվեն Տիրոջ միջոցով։ Խրախուսեք նրանց ուղղորդում և քաջություն փնտրել՝ աղոթքով դիմելով Երկնային Հորը։

Ուսանողի նախապատրաստում․ առաջարկեք ուսանողներին մտածել ավետարանով կիսվելու իրենց փորձառությունների և այն մասին, թե ինչն է օգնել իրենց ցանկանալ անել այն, ինչ արել են։

Հնարավոր ուսումնական վարժություններ

Ի՞նչ եք ցանկանում

Կարող եք առաջարկել ուսանողներին խորհել հետևյալ հարցերի շուրջ։

• Ինչպե՞ս կարձագանքեիք, եթե Հիսուսը հայտնվեր ձեզ և հարցներ. «Ի՞նչ ես փափագում ինձանից»։

• Ինչու ընտրեցիք այն, ինչ արեցիք։

Կարող եք մի քանի ուսանողի առաջարկել, ըստ ցանկության, կիսվել իրենց պատասխաններով։

Երբ Փրկիչը ծառայություն էր նեփիացիների մեջ, Նա այս հարցը տվեց Իր աշակերտներին (տե՛ս 3 Նեփի 28․1)։

Կարդացեք 3 Նեփի 28․2–6 հատվածները և փնտրեք, թե նեփիացի աշակերտներն ինչպես էին պատասխանել Փրկչի հարցին։

• Ի՞նչ գտաք:

Հատված 6-ում Փրկիչը նշում է, որ նեփիացի աշակերտներից երեքը ցանկանում էին նույն բանը, ինչ ցանկացել էր Հովհաննես Սիրելին։ Կարդացեք Վարդապետություն և Ուխտեր 7․1–3 հատվածները՝ փնտրելով Հովհաննեսի ցանկությունը։

• Ըստ ձեզ՝ այս երեք աշակերտներն ինչո՞ւ ցանկացան մնալ երկրի վրա։

Մտածեք մարդկանց դեպի Հիսուս Քրիստոսը բերելու ձեր ցանկության մասին։ Դա անելու համար ձեզ կօգնի հետևյալ ինքնագնահատումը։

Կարող եք ցուցադրել հետևյալ վարժությունը և առաջարկել ուսանողներին լռությամբ ինքնագնահատում կատարել։ Ուսանողներին մի առաջարկեք իրենց պատասխաններով կիսվել դասարանի հետ։

Հետևյալ պնդումներից յուրաքանչյուրին պատասխանեք այս պատասխաններից մեկով․ «պարբերաբար», «երբեմն» կամ «հազվադեպ»։

1. Ես փնտրում եմ հնարավորություններ՝ պատմելու մարդկանց Քրիստոսի մասին։

2. Ես աղոթում եմ, որպեսզի մարդկանց Քրիստոսի մասին պատմելու հնարավորություններ գտնեմ։

3. Ես ցանկություն ունեմ՝ օգնելու ուրիշներին հետևելու Հիսուս Քրիստոսին։

Մեծացրեք ձեր ցանկությունը՝ օգնելու ուրիշներին գալ դեպի Քրիստոսը

Բացի այն, որ ուսանողներին կհանձնարարեք հետևյալ նկարը նկարել իրենց օրագրերում, կարող եք այն նաև գրատախտակին նկարել։

Ձեր օրագրի էջի կենտրոնում նկարեք մի փոքր մարդուկ, որն այն պատանին է, ով ուրիշների հետ ավետարանով կիսվելու ցանկություն չունի։ Մարդուկին շրջապատող դատարկ հատվածում գրեք պատճառներից մի քանիսը, թե այս մարդուկն ինչու կարող է չցանկանալ ավետարանով կիսվել։ Տեղ թողեք այսօրվա ուսումնասիրությունից սովորած ճշմարտությունները գրելու համար։

Շարունակելով ուսումնասիրությունը՝ փնտրեք ուսմունքներ, որոնք կարող են օգնել ինչ-որ մեկին ավետարանով կիսվելու ավելի մեծ ցանկություն զգալ։

Կարդացեք 3 Նեփի 28․7–10 հատվածները և փնտրեք, թե ինչ էր խոստացել Տերը նեփիացի աշակերտներին, որոնք ցանկացել էին հոգիները դեպի Իրեն բերելու համար երկրի վրա մնալ։

• Ի՞նչ օրհնություն տվեց նրանց Հիսուսը հատվածներ 7–8-ում, որպեսզի նրանք կարողանան կատարել իրենց ցանկությունները։

• Ի՞նչ խոստացավ Փրկիչն Իր աշակերտներին, որը նրանք ստանալու էին հատվածներ 9–10-ում իրենց արդար ցանկությունների շնորհիվ։

Մեր տնտեսության համար Տերը օրհնություններ խոստացավ նրանց, ովքեր ձգտում էին հոգիներ բերել դեպի Նա։ Կարդացեք Վարդապետություն և Ուխտեր 18․15–16 հատվածները և փնտրեք, թե ինչ օրհնություններ կարող ենք ունենալ՝ հոգիներ Հիսուս Քրիստոսին բերելու շնորհիվ։

• Ի՞նչ ճշմարտություն կարող ենք սովորել այս հատվածներից այն մասին, թե ինչպես կարող ենք օրհնվել, երբ ձգտենք հոգիներ բերել Հիսուս Քրիստոսի մոտ։

Ճշմարտություններից մեկը, որ կարող ենք սովորել այս հատվածներից, այն է, որ երբ ջանանք հոգիներ բերել Հիսուս Քրիստոսի մոտ, կարող ենք ուրախություն զգալ։ Կարող եք այս ճշմարտությունը գրել ձեր նկարած նկարի վրա։

• Ըստ ձեզ՝ ինչո՞ւ է հոգիները դեպի Հիսուս Քրիստոսին բերելը ուրախության աղբյուր։

• Այս ճշմարտությունը հասկանալն ինչպե՞ս կարող է օգնել մարդուն ավետարանով կիսվելու ավելի մեծ ցանկություն զգալ։

Փնտրեք այլ սուրբ գրություններ կամ Եկեղեցու ղեկավարների այլ ելույթներ, որոնք կարող են օգնել մեծացնել ավետարանով կիսվելու մեր ցանկությունը։ Կարող եք օգտագործել ուսումնասիրության գործիքները, օրինակ՝ Ավետարանական թեմաները կամ Սուրբ գրքերի ուղեցույցը, որպեսզի որոնեք, օրինակ, նման թեմաներ՝ «Միսիոներական աշխատանք» կամ կարող եք ուսումնասիրել հետևյալ հատվածներից մի քանիսը կամ բոլորը։ Ձեր օրագրի նկարին ավելացրեք ձեր գտած ճշմարտությունները։

Ցուցադրեք հետևյալ հատվածները։ Ուսանողներին ժամանակ տվեք ինքնուրույն ուսումնասիրելու այս կամ այլ հատվածներ կամ Եկեղեցու ղեկավարների իրենց գտած ելույթները։

• 2 Նեփի 2․8

• Վարդապետություն և Ուխտեր 33․8–10

• Վարդապետություն և Ուխտեր 84․88

• Վարդապետություն և Ուխտեր 123․12–14

Ուսանողներին առաջարկեք կիսվել իրենց ուսումնասիրությունից սովորածով։ Հետևյալ հարցը տալուց բացի կարող եք առաջարկել նրանց գրատախտակի նկարի շուրջը գրել իրենց բացահայտած ճշմարտությունները։

• Ի՞նչ ուսմունքներ եք գտել, որոնք կարող են օգնել մարդուն ավետարանով կիսվելու ավելի մեծ ցանկություն զգալ։ Ըստ ձեզ՝ այդ ուսմունքներն ինչո՞ւ կարող են օգնել։

• Ի՞նչ փորձառություններ են օգնել ձեզ տեսնել այն օրհնությունները, որոնք կարելի է ստանալ ավետարանով կիսվելիս։

Կարող եք դիտել «Your Day for a Mission» (3:31) կամ «By Small and Simple Things: Sharing the Gospel» (3:19) տեսանյութերը՝ տեսնելու օրինակներ, թե ինչպես են մարդիկ օրհնվում միսիոներական աշխատանքի միջոցով։ Այս տեսանյութերը կարելի է գտնել ChurchofJesusChrist.org։

Your Day for a Mission

By Small and Simple Things: Sharing the Gospel

Մտածեք, թե ինչ սովորեցիք կամ զգացիք այսօր, որը կարող է ազդած լինել ձեր ցանկության վրա՝ օգնելու ուրիշներին գալ դեպի Քրիստոսը։ Օրագրերում գրի առեք ձեր ունեցած բոլոր մտքերը կամ հոգևոր տպավորությունները և ձեր տպավորությունների հիման վրա գործելու ծրագիր կազմեք։

Կարող եք վկայել, որ մենք կարող ենք ամրապդվել և զգալ Աստծո սերը, երբ գործենք այն ցանկության համաձայն, որ օգնենք ուրիշներին գալ դեպի Հիսուս Քրիստոսը։

Բացատրական և պատմական տեղեկություններ

Ինչո՞ւ է ուրիշներին դեպի Քրիստոսը բերելու հարցում օգնելու մեր ցանկությունն այդքան կարևոր այսօր։

Նախագահ Ռասսել Մ. Նելսոնն ուսուցանել է․

Հիսուս Քրիստոսի ավետարանը երբևէ ավելի անհրաժեշտ չի եղել, քան այսօր։ Վեճերը խախտում են այն ամենը, ինչը Փրկիչը պաշտպանել և ուսուցանել է: Ես սիրում եմ Տեր Հիսուս Քրիստոսին և վկայում եմ, որ Նրա ավետարանը խաղաղության միակ մնայուն լուծումն է:

Նրա ավետարանը միակ պատասխանն է, երբ աշխարհում շատերը նվաղած են վախից։ … Մենք սուրբ պարտականություն ունենք կիսվելու Հիսուս Քրիստոսի զորությամբ ու խաղաղությամբ բոլոր նրանց հետ, ովքեր կլսեն և թույլ կտան, որ Աստված տնօրինի իրենց կյանքում։ …

… Աշխարհում տիրող հոգևոր խավարը Հիսուս Քրիստոսի լույսի կարիքն ավելի է մեծացնում։ Յուրաքանչյուր ոք արժանի է իմանալու Հիսուս Քրիստոսի վերականգնված ավետարանի մասին: Յուրաքանչյուր ոք արժանի է իմանալու, թե որտեղ կարող է գտնել այն հույսը և խաղաղությունը, որը «[վեր է] ամեն հասկացողությունից» [Փիլիպպեցիս 4․7] (Ռասսել Մ․ Նելսոն, «Քարոզել խաղաղության Ավետարանը», Լիահոնա, մայիս 2022 թ․, 6, 7)։

Ուրիշները կարո՞ղ են ուրախություն զգալ, երբ ես կիսվեմ ավետարանով։

Յոթանասունից երեց Մարկուս Բ. Նաշն ուսուցանել է․

Բարձր պահեք ձեր լույսը

Երբ մարդը սովորում է կյանքի փառահեղ նպատակը, հասկանում է, որ Քրիստոսը ներում և սատարում է Իր հետևորդներին, իսկ հետո մտնելով մկրտության ջրերը, հետևում է Քրիստոսին, կյանքը փոխվում է դեպի լավը, նույնիսկ, երբ կյանքի արտաքին հանգամանքները չեն փոխվում դեպի լավը։

Մի պայծառ երջանիկ քույր, որին ես հանդիպեցի Նիգերիայի Օնիցա քաղաքում, ինձ ասաց, որ այն պահից, երբ նա սովորեց ավետարանը և մկրտվեց (այժմ կօգտագործեմ նրա խոսքերը). «Ամեն ինչ լավ է ինձ համար։ Ես երջանիկ եմ: Ես երկնքում եմ»։ Ավետարանով կիսվելը ուրախություն և հույս է առաջացնում ինչպես տվողի, այնպես էլ ստացողի հոգում: Իսկապե՛ս, «որքան մեծ կլինի ձեր ուրախությունը», [Վարդապետություն և Ուխտեր 18․15], երբ կիսվեք ավետարանով։ Ավետարանով կիսվելը ավելացնում է գոյություն ունեցող ուրախությունը և ավելացնում է գոյություն ունեցող հույսը (Մարկուս Բ. Նաշ, «Բարձր պահեք ձեր լույսը», Լիահոնա, նոյ. 2021 թ․, 71)։

Ի՞նչ տարբերություն կա փոխակերպման, կերպարանափոխման և հարության միջև։

Նեփիացի երեք աշակերտները նախ կերպարանափոխվեցին, որպեսզի կարողանան «տեսնել Աստծո բաները» (3 Նեփի 28․13–15), ապա փոխակերպվեցին, որպեսզի կարողանան մնալ երկրի վրա մինչև Երկրորդ Գալուստը (3 Նեփի 28․37–40)։

Հետևյալ սահմանումները կարող են օգնել հստակեցնել փոխակերպման, կերպարանափոխման և հարության միջև տարբերությունները։

• Փոխակերպված էակներ։ «Մարդիկ, որոնք փոփոխության են ենթարկվում, որպեսզի ցավ չզգան կամ մահ չտանեն, մինչև հարություն առնեն դեպի անմահություն» (Սուրբ գրքերի ուղեցույց, «Փոխակերպված էակներ», scriptures.ChurchofJesusChrist.org)։

• Կերպարանափոխում։ «Այն մարդկանց վիճակը, որոնք ժամանակավորապես վերափոխվում են արտաքինով և էությամբ, այսինքն՝ բարձրացվում են հոգևոր ավելի բարձր աստիճանի, որպեսզի կարողանան դիմանալ երկնային էակների ներկայությանն ու փառքին» (Սուրբ գրքերի ուղեցույց, «Կերպարանափոխում», scriptures.ChurchofJesusChrist.org)։

• Հարություն: «Հոգևոր մարմնի և մսից ու ոսկորից կազմված ֆիզիկական մարմնի վերամիավորումը մահից հետո։ Հարությունից հետո հոգին և մարմինը այլևս երբեք չեն բաժանվում, իսկ մարդը դառնում է անմահ» (Սուրբ գրքերի ուղեցույց, «Հարություն», scriptures.ChurchofJesusChrist.org)։

Օժանդակ ուսումնական վարժություններ

Հավանական մտահոգություններ միսիա ծառայելու վերաբերյալ

Որպես մարդուկի վարժության այլընտրանք՝ կարող եք առաջարկել ուսանողներին դիտել կամ կարդալ նախագահ Ռասսել Մ. Նելսոնի հետևյալ խոսքերը։ Առաջարկեք ուսանողներին պատկերացնել, որ այս խոսքերը լսած ընկերը մտահոգություններ ունի միսիա ծառայելու վերաբերյալ։ Ուսանողները կարող են մտածել, թե այդ մտահոգությունները ինչի վերաբերյալ կարող են լինել։ Նրանք կարող են գտնել սուրբ գրություններ կամ Եկեղեցու ղեկավարների ելույթներ, որոնք կարող են օգնել այդ մարդուն հաղթահարել իր մտահոգությունները և միսիա ծառայելու ավելի մեծ ցանկություն ունենալ։

Քարոզենք խաղաղության ավետարանը

Այլ մանրամասներ նեփիացի երեք աշակերտների մասին

Կարող եք առաջարկել ուսանողներին կարդալ 3 Նեփի 28․18–23 հատվածները և փնտրել, թե Տերն ինչպես օրհնեց նեփիացի երեք աշակերտներին, որպեսզի նրանք կարողանան իրականացնել իրենց արդար ցանկությունները։ Ուսանողները կարող են կարդալ նաև 3 Նեփի 28․25–32 հատվածները և փնտրել, թե այդ աշակերտների ծառայությունից մարդիկ ինչ օգուտ ստացան կամ մինչ օրս դեռ ստանում են։ Կարող եք առաջարկել ուսանողներին դասընկերոջ հետ քննարկել նեփիացի այդ երեք աշակերտների ծառայության մասին սովորած որևէ բան։

3 Նեփի 29։ Վերջին օրերի մարգարեությունները

Եթե ցանկանում եք դասարանում ժամանակ հատկացնել 3 Նեփի 29 գլխի ուսումնասիրության համար, կարող եք օգտագործել հետևյալ աղյուսակը։ Ուսանողները կարող են ձախ կողմի բառերը համապատասխանեցնել աջ կողմի դրանց սահմանումների հետ։ Հետո կարող են կարդալ 3 Նեփի 29 գլուխը և փնտրել, թե ըստ Մորմոնի մարգարեության ինչ էր տեղի ունենալու վերջին օրերին։ Առաջարկեք ուսանողներին քննարկել, թե այդ բաներն ինչպես են տեղի ունեցել մեր օրերում։

1. Հեթանոսներ	ա) երկու իմաստ՝ 1) Հին Կտակարանի մարգարե Հակոբի (Իսրայել) հետնորդները, որոնց հետ Տերն ուխտեր էր կապել և 2) Հիսուս Քրիստոսին իրական հավատացողները, որոնք ուխտեր են կապել Աստծո հետ
2. Իսրայելի տուն	բ) խոստում հավատարիմներին, որը ներառում էր ավետարանի օրհնությունները, քաhանայության իշխանությունը, հավերժական ընտանիքները և ժառանգության երկիրը
3. Արհամարհանքով մերժում	գ) խորը տխրություն և ափսոսանք
4. Քամահրանք	դ) անտեսել կամ մերժել քամահրանքով
5. Տիրոջ ուխտը Իսրայելի հետ	ե) արտահայտել անհարգալից վերաբերմունք կամ անհավանություն
6. Վիշտ	զ) երկու իմաստ՝ 1) իսրայելական կամ հրեական ծագում չունեցող մարդիկ և 2) առանց ավետարանի մարդիկ

(պատասխաններ՝ 1–զ, 2–ա, 3–դ, 4–ե, 5–բ, 6–գ)