Մորմոն 3–6

Նեփիացի ազգի անկումը

Նեփիացիների վերջին ճակատամարտը

Երբևէ անհանգստացե՞լ եք ձեզ սիրելի որևէ մեկի համար։ Խոսելով իր շուրջը հավաքված մարդկանց հետ՝ Մորմոնն ասում էր․ «Ես առաջնորդել էի նրանց … և սիրել էի նրանց … իմ ողջ սրտով» (Մորմոն 3․12)։ Բայց Մորմոնն անհանգստանում ու վշտանում էր իր ժողովրդի համար, երբ նրանք, հրաժարվելով Աստծո օգնությանը դիմել, գնում էին կործանման։ Այս դասը կարող է օգնել ձեզ զգալ Երկնային Հորը և Փրկչին դառնալու կարևորությունը ձեր կյանքում։

Տրամադրեք Սուրբ գրքի կարևոր պատմությունների ընդհանուր ցանկը։ Ուսանողները կարող են սուրբ գրությունների համատեքստը և բովանդակությունն ավելի լավ հասկանալ, երբ ընդհանուր պատկերը տեսնեն։ Նշեք որևէ առանձին պատմության կարևոր մարդկանց, իրադարձությունները և մարգարեական ուսմունքները։ Խրախուսեք ուսանողներին մտածել, թե այդ տարրերն ինչ ազդեցություն ունեն Տիրոջ ավետարանի հասկացողության վրա։

Ուսանողի նախապատրաստում․ ուսանողներին առաջարկեք, որպեսզի փորձեն հիշել, թե երբ է Աստված դժվարությունների միջոցով օգնել իրենց, քանի որ Նրա օգնությունն են խնդրել։

Հնարավոր ուսումնական վարժություններ

Ի՞նչ կանեիք դուք

Յոթանասունից երեց Սպենսեր Ջ. Քոնդին պատմել է Մյուրեյ անունով մի մարդու պատմությունը, որը մեքենայով գիշերով անցնելով կամրջի վրայով՝ տեսել է, թե ինչպես է հանդիպակաց ավտոմեքենան հանկարծ անհետացել։ Նրա դիմաց կամրջի մի մեծ հատված էր փլվել։ Մյուրեյն արգելակում է և ճիշտ պահին կանգնեցնում է իր ավտոմեքենան։

• Եթե լինեիք Մյուրեյի իրավիճակում, ավտոմեքենան կանգնեցնելուց հետո առաջինը ի՞նչ կանեիք։

Կարդացեք հետևյալ պատմությունը և իմացեք, թե ինչ որոշեց անել Մյուրեյը։ Կարող եք դիտել «Մարգարեները զգուշացնում են», տեսանյութի 0:00–0:58 հատվածը (հասանելի է ChurchofJesusChrist.org կայքում)։

Երեց Սպենսեր Ջ. Քոնդի

Մյուրեյը … սկսեց եկող մեքենաներին զգուշացնել դիմացի աղետի մասին։ Երբ նա խելահեղորեն թափահարում էր թևերը, մի մեքենա, սարսափեցնելով նրան, «պտտվեց նրա շուրջը և ընկավ անդունդը» (Ստեֆեն Ջոնսոն, «Անդունդի եզրին» Reader’s Digest, նոյ. 1977 թ․, էջ 128)։ Երկրորդ մեքենան հազիվ ժամանակին կանգնեց, բայց երրորդը դանդաղեցնելու ոչ մի նշան ցույց չէր տալիս և կամրջի եզրին բախվեց Լինգի մեքենային։

Հանկարծ երևաց մարդկանցով լի մի ավտոբուս, որը շարժվում էր դեպի Մյուրեյը՝ անտեսելով նրա թևերի թափահարումը: (Սպենսեր Ջ. Քոնդի, «Սրտի հզոր փոփոխություն», Ensign, նոյ. 1993 թ․, 17)։

• Եթե դուք լինեիք Մյուրեյի իրավիճակում, ի՞նչ կզգայիք, երբ մարդիկ անտեսեին ձեզ։ Արդյո՞ք կդադարեցնեիք նրանց փրկելու փորձերը։ Ինչո՞ւ այո, կամ ինչո՞ւ ոչ։

Մոտավորապես այնպես, ինչպես Մյուրեյ Լինգը, Մորմոնը տեսնում էր, որ իր ժողովուրդը գնում է դեպի կործանում։ Որպես նեփիացի զորքերի առաջնորդ և որպես Աստծո մարգարե՝ Մորմոնն արեց հնարավոր ամեն ինչ՝ նրանց նախազգուշացնելու, պաշտպանելու և իրենց Փրկչի մասին ուսուցանելու համար։ Ցավոք, ժողովրդի մեծ մասն անտեսեց կամ մերժեց Մորմոնի ջանքերը։

Մորմոնի ժողովրդին սպասվող վտանգը

Իր կանխատեսությամբ Աստված նեփիացիներին հարյուրավոր տարիներ նախազգուշացնում էր, թե ինչ տեղի կունենա, եթե շարունակեն ապստամբել Իր դեմ։

Մեկ օրինակ տեսնելու համար կարդացեք Հելաման 13․8–10 հատվածները և փնտրեք այն մարգարեությունը, որն Աստված արել էր Սամուել Լամանացու միջոցով՝ Մորմոնի ծննդից ավելի քան 300 տարի առաջ։ Կարդալիս նկատեք, թե մարգարեությունը երբ է իրականանալու (Մորմոնի ժամանակաշրջանում իրականանալիք Աստծո կանխատեսումների և նախազգուշացումների այլ օրինակներ տե՛ս 1 Նեփի 12․6, 11–19 և 3 Նեփի 27․30–32 հատվածներում)։

• Ըստ ձեզ՝ Աստված ինչո՞ւ էր այս մասին այդքան վաղ հայտնում։

Ուսանողներին առաջարկեք կարդալ ստորև ներկայացվող հատվածները և մտածել, թե Մորմոնն ինչու էր այդքան ջանասիրաբար փորձում օգնել իր ժողովրդին, եթե գիտեր նրանց կործանման մարգարեությունները։ Այնուհետև առաջարկեք նրանց իրենց գաղափարներով կիսվել դասընկերոջ հետ։ Ուսանողները կարող են այսպիսի պատասխան տալ, որ Մորմոնը ցանկանում էր հնարավորինս շատ մարդու փրկել, թեև գիտեր, որ նեփիացի ազգը կործանվելու է։

• Մորմոն 3․1–3, 12

• Մորոնի 9․3–5, 18–22 (Մորոնին կիսվեց իր հոր՝ Մորմոնի գրած նամակով)

• Ի՞նչ նմանություններ եք տեսնում Մորմոնի և Փրկչի ջանքերի ու ցանկությունների միջև։

Դիմելով Աստծուն

Կարող եք հետևյալ անավարտ նախադասությունը գրել գրատախտակին և առաջարկել ուսանողներին գալ գրատախտակի մոտ ու բաց թողնված մասերում լրացնել դեռահասներին հանդիպող ընդհանուր դժվարությունները։

• «Շատ դեռահասներ այսօր դժվարանում են հարցում»։

Մորմոնը կիսվել է պատճառներից մեկով, թե ինչու էին նեփիացիները այդքան բարդ և դժվարություններով լի ժամանակներ ապրում։ Կարդացեք Մորմոն 5․2 հատվածը և փնտրեք, թե ինչ ՉԱՐԵՑԻՆ նեփիացիները, երբ դժվարության մեջ էին։

• Ինչպե՞ս կարող է այն, ինչով Մորմոնը կիսվել է հատված 2-ում, այսօր կիրառվել շատ մարդկանց համար։

Գրատախտակի նախադասությունն ավարտեք այնպես, որ այն հետևյալ շարադրանքն ունենա․

• «Շատ դեռահասներ առանց Աստծու օգնությանը դիմելու այսօր դժվարանում են հարցում»։

Օգնեք ուսանողներին հասկանալ, որ Աստված ոչ միշտ է հեռացնելու մեզ դժվարություն պատճառող բաները, բայց Նա կօգնի մեզ անցնել դրանց միջով, եթե դիմենք Նրան։ Կամավորներին հրավիրեք կիսվելու, թե գրատախտակին գրված դժվարություններից մեկի համար երբ են դիմել Աստծո օգնությանը, և ինչպես է Աստված օգնել իրենց հաղթահարել այն։ Ուսանողներին զգուշացրեք դասարանի հետ չկիսվել խիստ անձնական բաներով։

Ուսանողներին առաջարկեք խորհել, թե ինչ դժվարություններ ունեն իրենց կյանքում, որոնց համար չեն խնդրել Աստծո օգնությունը։ Խրախուսեք ուսանողներին դրանցից մեկի համար դիմել Նրա օգնությանը և ուշադրություն դարձնել, թե ինչ փոփոխություն է դա բերում ժամանակի ընթացքում։

Նեփիացիների կործանումը

Կարող եք ցուցադրել այս նկարը և առաջարկել որևէ ուսանողի կիսվել, թե ինչ է այն պատկերում։ Անհրաժեշտության դեպքում օգտագործեք հետևյալ պարբերության նյութը։

Մորմոնը հրաժեշտ է տալիս երբեմնի մեծ ազգին, նկարը՝ ըստ Առնոլդ Ֆրայբերգի

Նեփիացիների զորքին տասնամյակներ շարունակ սիրելուց, ուսուցանելուց և առաջնորդելուց հետո Մորմոնը լամանացիների հետ ընթացող վերջին ճակատամարտում ծանր վիրավորվում է։ Բլրի գագաթից նա դիտում էր, թե ինչ էր մնացել նեփիացի ազգից։ Կոտորածից փրկվել էր ընդամենը 24 նեփիացի զինվոր, այդ թվում՝ Մորմոնը և նրա որդի Մորոնին (տե՛ս Մորմոն 6․9–15)։

Մորմոն 6 գլխում Մորմոնն արձանագրում է «[իր] ժողովրդի վերջին պայքարը» (Մորմոն 6․6)։ Կարդացեք Մորմոն 6․7, 10–15 հատվածները և փնտրեք, թե ինչ տեղի ունեցավ նեփիացիների հետ այս վերջին ճակատամարտում։

Կարող եք հանձնարարել ուսանողներին հաշվել, թե քանի նեփիացի էր հավաքվել ճակատամարտի սկզբում, և քանիսը մնացին ճակատամարտից հետո։ Նրանք գուցե նկատեն, որ 23 նեփիացի հրամանատար կար, որոնցից յուրաքանչյուրը 10 000 զինվոր ուներ, այսինքն՝ ընդհանուր 230 000 նեփիացի։ Ընդամենը 24 նեփիացի կենդանի մնաց այս վերջին ճակատամարտում։

Պատկերացրեք, որ Մորմոնի դերում եք և սգում եք ձեր սիրած մարդկանց կորուստը, սակայն գիտեք, որ դեռ կարող եք ապագայի սերունդների համար մի կարճ ուղերձ թողնել։ Ի՞նչ կցանկանայիք, որ մարդիկ իմանան վերջին օրերում։

Կարդացեք Մորմոն 5․10–11, 16–18, 6․16–20 հատվածները և գտեք այն ուղերձներից մի քանիսը, որոնք Մորմոնը ոգեշնչված փորագրել է մեզ համար։ Կարող եք նշել այն արտահայտությունները, որոնք լսելու կարիքը ձեր կարծիքով մարդիկ մեր օրերում ամենաշատն ունեն։

Կարող եք առաջարկել ուսանողներին իրենց գտած արտահայտություններով կիսվել որևէ դասընկերոջ հետ։ Երբ ուսանողները բացահայտեն ճշմարտությունները, կարող եք դրանք գրել գրատախտակին։ Դասի մնացած մասն անդրադառնալու է հետևյալ ճշմարտությանը։ Գուցե ցանկություն ունենաք ուսանողների բացահայտած մեկ այլ ճշմարտություն դիտարկել։

Ահա մեկ ճշմարտություն, որ Մորմոնն ուսուցանել է․ Հիսուս Քրիստոսը կանգնած է գրկաբաց, որպեսզի ընդունի նրանց, ովքեր որոշել են ապաշխարել և գալ դեպի Իրեն (տե՛ս Մորմոն 6․17)։

Կարող եք մի պահ փակել աչքերը և պատկերացնել, որ Հիսուսը, գրկաբաց կանգնած, նայում է ձեզ։ Ձեր օրագրում գրի առեք ձեր մտքերը, զգացումները և տպավորություններն այն մասին, թե ձեր կյանքում ինչ է նշանակում այն, որ Հիսուսը գրկաբաց կանգնած է ձեզ ընդունելու համար։

Եթե ստորև ներկայացվող հարցը քննարկեք դասարանով, խրախուսեք ուսանողներին զգույշ լինել և չկիսվել խիստ անձնական բաներով։

• Մորմոնի ուսմունքներից որո՞նց կարիքն ամենաշատն ունեք ձեր կյանքում։ Ինչո՞ւ։

• Ի՞նչ էր ցանկանում Մորմոնը, որ հասկանաք Երկնային Հոր և Հիսուս Քրիստոսի մասին։

• Ըստ ձեզ՝ ինչպիսի՞ն կլիներ մեր աշխարհը, եթե ավելի շատ մարդիկ հավատային Մորմոնի գրածին։

Բացատրական և պատմական տեղեկություններ

Ի՞նչ է նշանակում «գրկվել [ամուր ընկղմվել] Հիսուսի բազուկներում» (Մորմոն 5․11)։

Յոթանասունից երեց Քենտ Ֆ. Ռիչարդսն ասել է․

Երեց Քենթ Ֆ. Ռիչարդս

Բոլոր նրանք, ովքեր կգան, կարող են «գրկվել Հիսուսի բազուկներում» [Մորմոն 5․11]։ Բոլոր հոգիները կարող են բժշկվել Նրա զորությամբ: Ամեն ցավ կարող է հանգստանալ: Նրանում մենք կարող ենք «հանգիստ գտնել [մեր] հոգիներին» [Մատթեոս 11․29]։ Մեր մահկանացու հանգամանքները, հնարավոր է, անմիջապես չփոխվեն, բայց մեր ցավը, անհանգստությունը, տառապանքը և վախը կարող են անհետանալ Նրա խաղաղության և բժշկող բալասանի մեջ: (Քենտ Ֆ. Ռիչարդս, «Քավությունը վերացնում է ամբողջ ցավը», Լիահոնա, մայիս 2011 թ․, 16)։

Մորմոն 6․17։ Ի՞նչ կարող եք սովորել այն պատկերից, որ Հիսուսը կանգնած է «գրկաբաց ձեզ ընդունելու համար»։

Տասներկու Առաքյալների Քվորումից երեց Նիլ Լ․ Անդերսենը կիսվել է․

Երեց Նիլ Լ. Անդերսեն

Իմ եղբայրնե՛ր և քույրե՛ր, խոստանում եմ ձեզ, որ Տեր Հիսուս Քրիստոսի հանդեպ հավատքի ավելացումը ձեզ ուժ ու ավելի մեծ հույս կհաղորդի: Մեր հոգիների բժիշկը Իր ժամանակին և Իր ձևով կբժշկի ձեր՝ արդարներիդ վերքերը: Ոչ մի անարդարություն, ոչ մի հալածանք, ոչ մի փորձություն, ոչ մի կսկիծ, ոչ մի ցավ, ոչ մի տառապանք, ոչ մի վերք՝ որքան խորը, որքան էլ ցավոտ լինի, ոչ մեկը դուրս չի մնա մխիթարությունից, խաղաղությունից և տևական հույսից Նրա, ում բաց ձեռքերն ու խոցված ձեռքերը կընդունեն մեզ Իր ներկայության մեջ: (Նիլ Լ․ Անդերսեն, «Խոցվածը», Լիահոնա, նոյեմբեր 2018 թ., 86)։

Տասներկու Առաքյալների Քվորումից երեց Նիլ Ա. Մաքսվելը (1926–2004) բացատրել է, որ ինքը՝ Հիսուսն է դռան պահապանը, և «այնտեղ նա չի պահում ոչ մի ծառա» (2 Նեփի 9․41)։ … Հոգուս համոզվածությամբ ձեզ կպատմեմ, թե իմ կարծիքով որն է գլխավոր պատճառը, որ նա «գրկաբաց» սպասում է ձեզ, ինչպես գրված է Մորմոնի Գրքի մեկ այլ սուրբ գրության մեջ (Մորմոն 6․17)։ Ա՛յդ է պատճառը, որ նա այնտեղ է։ … Այդ պատկերը չափազանց զորեղ է ուշադրություն չդարձնելու համար։ … Նա գրկաբաց սպասում է մեզ, քանի որ նրա սերը մեր հանդեպ կատարյալ է (Նիլ Ա․ Մաքսվել, «Եվս մի քանի օր» [ուղերձ Եկեղեցու կրթական համակարգի կրոնի ուսուցիչներին, 10-ը սեպտեմբերի, 1982 թ․, կետադրությունը համապատասխանեցված է ժամանակակից կետադրությանը], 9–10)։

Օժանդակ ուսումնական վարժություններ

Մորմոն 5.11: «Գրկվել Հիսուսի բազուկներում»

Եթե ուսանողների համար օգտակար լինի մեզ Իր գիրկն առնելու Փրկչի ցանկությունն ավելի խորությամբ ուսումնասիրելը, կարող եք ցուցադրել Նրա որևէ նկար, որտեղ Նա գրկել է ինչ-որ մեկին, օրինակ՝ հետևյալ նկարը․

Քրիստոսը գրկել է երեխային

Հետո ուսանողներին առաջարկեք Մորմոն 5․11 և Մորմոն 6․17 հատվածներում որոնել արտահայտություններ, որոնք կօգնեն նկարագրել պատկերը։ Ուսանողներին առաջարկեք կիսվել, թե իրենց կարծիքով ինչ են նշանակում իրենց գտած արտահայտությունները (եթե օգտակար լինի, կարող եք կիսվել «Բացատրական և պատմական տեղեկություններ» բաժնում ներկայացված երեց Ռիչարդսի, երեց Անդերսենի կամ երեց Մաքսվելի խոսքերով)։

Տեսանյութի տարբերակ

Եթե ուսանողների համար օգտակար կլինի պատկերավոր տեսնելը, թե ինչպես են Մորմոնը և Մորոնին սգում նեփիացիների կործանումը, կարող եք ցուցադրել «Օ՜, արդարներ» տեսանյութը (5:21)։