“Molomona 9:7–27: ʻKo e ʻOtua ʻo e Ngaahi Maná,’” Tohi ʻa Molomoná – Tohi Lēsoni ʻa e Faiakó (2024)

“Molomona 9:7–27,” Tohi ʻa Molomoná – Tohi Lēsoni ʻa e Faiakó

Molomona 9:7–27

“Ko e ʻOtua ʻo e Ngaahi Maná”

Ko hono fakamoʻui ʻe Kalaisi ha tangata kui

Ko e taimi ʻe niʻihi ʻi heʻetau laukonga fekauʻaki mo e ngaahi mana ʻi he folofolá, mahalo te tau fifili pe ko e hā ʻoku ʻikai ke tau maʻu ai ha ngaahi mana tatau ʻi hotau kuonga ní. Naʻe ʻiloʻi ʻe Molonai ʻe ʻi ai ha kakai te nau fehuʻia ‘a e meʻa ko ʻení ʻi he ngaahi ʻaho fakaʻosí. ʻE lava ke tokoni ʻa e lēsoni ko ʻení ke mahino kiate koe ʻa e founga ʻe lava ke ʻomi ai ʻe he tui ki he ʻOtuá ha faingamālie ke Ne fakahoko ha ngaahi mana ʻi hoʻo moʻuí.

Langaki ʻa e tui kia Sīsū Kalaisí. ʻE lava ke tokoni ʻa hono ako ʻo e folofolá ke ʻiloʻi ai ʻe he kau akó ʻa Sīsū Kalaisi. Poupouʻi ke nau ʻunuʻunu ke ofi ange ki he Fakamoʻuí ʻaki ʻenau tokanga taha ki he ngaahi tefitoʻi moʻoni fakauluí pea mo ngāueʻi ʻa e tui kiate Iá ʻi heʻenau akó.

Teuteu ʻa e tokotaha akó: Fakaafeʻi ʻa e kau akó ke nau lau pe fanongo ki he lea ʻa ʻEletā Lānolo A. Lasipeni ko e “Vakai! Ko e ʻOtua Au ʻo e Ngaahi Maná” pea fakakaukau ki he meʻa ʻoku nau akó pe ko e hā haʻanau ngaahi fehuʻi fekauʻaki mo e ngaahi maná. ʻOku maʻu ʻa e lea ko ʻení ʻi he ChurchofJesusChrist.org.

Ngaahi ʻEkitivitī Ako ʻOku Ala Fakahokó

Ko ha ʻOtua ʻo e ngaahi maná

Ke tokoni ke aleaʻi ʻe he kau akó ʻa e founga ʻoku hokohoko atu ai ke fakahoko ʻe he ʻOtuá ʻa e ngaahi maná ʻi he lotolotonga ʻo ʻEne fānaú he ʻaho ní, fakakaukau ke vahevahe ha aʻusia pe tūkunga. Te ke lava ʻo kole ki he kau akó ke nau fakakaukau ki he ʻuhinga ʻoku pehē ai ʻe ha kakai ʻe niʻihi ʻoku tupukoso pē ʻa e ngaahi maná.

Te tau lava ʻo fakakaukau ki ha ngaahi meʻa lahi ʻi heʻetau moʻuí ko ha ngaahi mana ia. Ka neongo ia, mahalo ʻe pehē ʻe ha niʻihi naʻe tupukoso pē ia. Fakakaukau ki ha ngaahi sīpinga ʻe niʻihi ʻo e ngaahi mana ʻe ala maʻuhala ʻe ha niʻihi ko ha tupukoso pē iá.

ʻOkú ke pehē ko e hā e meʻa ʻokú ne ʻai ʻa e kakaí ke nau maʻuhala ko e ngaahi maná ko ha tupukoso pē iá?
Ko e hā ka mahuʻinga ai ki ha taha ke tui ʻoku fakahoko ʻe he ʻOtuá ha ngaahi mana ʻi heʻetau moʻuí he ʻahó ni?

Fakakaukau ki hoʻo tui ʻe lava ke fakahoko ʻe he ʻOtuá ha ngaahi maná. Ko e hā hono lahi hoʻo tui ki he ngaahi mana ʻi he folofolá, ʻi he moʻui ʻa e niʻihi kehé, pea ʻi hoʻo moʻuí?

ʻOku fakamoʻoni ʻa Molonai ki he ngaahi mana ʻa e ʻOtuá

Naʻe tohi ʻe Molonai, ʻa ia naʻá ne mamata mai ki hotau kuongá, ha pōpoaki ki he niʻihi ʻoku nau fakaʻikaiʻi ʻoku kei lava pē ke hoko ʻa e ngaahi maná.

Lau ʻa e Molomona 9:7–11, ʻo kumi ʻa e meʻa naʻe akoʻi ʻe Molonai fekauʻaki mo e ʻOtuá.

Ko e hā ha meʻa ʻoku mahuʻinga kiate koe mei he ngaahi veesi ko ʻení?
Ko e hā ha ngaahi moʻoni te ke lava ʻo ʻiloʻi?

Fakakaukau ke hiki ʻa e ongo foʻi moʻoni ko ʻení ʻi he palakipoé.

Ko ha foʻi moʻoni ʻe ua naʻe akoʻi ʻe Molonai ʻoku tatau ʻa e ʻOtuá ʻi he ʻaneafí, ʻaho ní, pea taʻengata pea ko e ʻOtuá ko ha ʻOtua Ia ʻo e ngaahi maná.

ʻE tākiekina fēfē ʻe he mahino kiate kitautolu ʻa e ongo foʻi moʻoni ko ʻení ʻa ʻetau tui ki he ʻOtuá?

Faʻu ha ʻekitivitī te ke lava ai ʻo tokoniʻi ʻa e kau akó ke nau fakakaukau lahi ange ki he ngaahi akonaki ʻa Molonai ʻi he vahe ko ʻení. Ko e founga ʻe taha ko hano ʻai ʻa e kau akó ke nau faʻu ha kiʻi tohi tufa ʻoku fakamatalaʻi fakanounou mo ʻomi ai ha ngaahi sīpinga ʻo e ngaahi akonaki ʻa Molonaí. ʻE lava ke ngāue fakafoʻituitui pe ‘i ha kulupu tokosiʻi ʻa e kau akó. ʻOange ha pepa, naunau ki he faitohí, pea mo e fakahinohino ʻoku fiemaʻú. Mahalo te ke lava ʻo ʻoange ha ʻū fakatātā ʻo hono fakahoko ʻe he Fakamoʻuí ha ngaahi maná ke nau kosikosi pea fakapipiki ia ke fakaʻaongaʻi ko ha takafi ki he kiʻi tohi tufá. ʻE lava foki ke fakahoko ʻe he kau akó ha fakaʻaliʻali fakaʻilekitulōnika pe ko ha faʻahinga founga pē te nau fili ki ai.

Fakakaukauloto ʻokú ke lava ʻo tokoni kia Molonai ke vahevahe ʻene pōpoakí ʻaki haʻo teuteuʻi ha fakaʻaliʻali ʻoku fakamatalaʻi ai ʻa e ongo foʻi moʻoni ko ʻení.

Faʻu ha kiʻi tohitufa ʻaki haʻo pelu ua ha laʻipepa ke ʻi ai ha takafi muʻa, ko ha konga ʻe ua ʻi loto, mo ha takafi mui. Ke tokoni ki hono fokotuʻutuʻu hoʻo kiʻi tohi tufá, fakakaukau ke fakahingoa ʻa e konga takitaha pea ʻai ha laʻitā pe fakatātā ʻi he takafi muʻá.

Konga ʻuluakí (takafi muʻá): “Ko e ʻOtuá ko ha ʻOtua ʻo e ngaahi mana.”
Konga uá: “Ngaahi sīpinga ʻo e ngaahi maná.”
Konga tolú: “Ngaahi mana ʻoku hoko he ʻaho ní.”
Konga fā: “Founga ke fakaafeʻi ai ʻa e ʻOtuá ke fakahoko ha ngaahi maná.”

Lolotonga ʻa e lēsoní, tānaki atu ʻa e ngaahi fakakaukau, ngaahi ongo, ngaahi ueʻi fakalaumālie, mo e ngaahi ʻilo ʻokú ke maʻu lolotonga hoʻo akó.

Ngaahi sīpinga ʻo e maná

Lau ʻa e Molomona 9:11–18, ʻo kumi ʻa e ngaahi mana naʻe fiemaʻu ʻe Molonai ke tau fakatokangaʻí. Lisi ʻi he peesi hono ua ʻo hoʻo kiʻi tohi tufá ʻa e meʻa naʻá ke ʻiló.

Hili hoʻo ʻilo ha ngaahi mana naʻe lau ki ai ʻa Molonaí, lisi ha ngaahi mana kehe mei he folofolá te ke lava ʻo fakakaukau ki ai.

Ko e hā ha meʻa ʻoku tokoni atu ai ʻa e ngaahi mana ko ʻení ke mahino kiate koe fekauʻaki mo e Tamai Hēvaní mo Sīsū Kalaisí?

Ngaahi mana ʻoku hoko he ʻaho ní

Lau ʻa e Molomona 9:19, ʻo kumi ʻa e meʻa ʻoku akoʻi ʻe Molonai fekauʻaki mo e ngaahi mana he ʻaho ní.

Naʻe akonaki ʻa ʻEletā Lānolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e founga te tau lava ai ʻo fakatokangaʻi ʻa e ngaahi maná ʻi hotau kuongá.

ʻOku lahi ha ngaahi mana, ngaahi fakaʻilonga mo ha ngaahi meʻa fakaofo ʻi he lotolotonga ʻo e kau muimui ʻo Sīsū Kalaisí ʻi he kuonga ko ʻení, ʻi hoʻomou moʻuí mo ʻeku moʻuí. Ko e maná ko ha ngaahi ngāue mo hano fakahaaʻi fakalangi ia ʻo e mālohi taʻefakangatangata ʻo e ʻOtuá pea mo hano fakamoʻoniʻi ʻokú Ne, “tatau ʻi he ʻaneafí, ʻaho ní pea taʻengata.” …

Kuo fakamoʻoniʻi ʻe hamou tokolahi ʻa e ngaahi maná, ʻo lahi ange ia he meʻa ʻoku mou fakatokangaʻí. Mahalo te nau ngali siʻisiʻi ʻi hono fakafehoanaki ki hono fokotuʻu ʻe Sīsū ʻa e pekiá. ʻOku ʻikai mahuʻinga ia pe ko e hā e tuʻunga fakaofo ʻo e maná, ka ko ʻene haʻu ko ia mei he ʻOtuá. (Ronald A. Rasband, “Vakai! Ko e ʻOtua Au ʻo e Ngaahi Maná,” Liahona, Mē 2021, 109–10)

Ko e hā ha meʻa ʻe ala tokoni ai ʻa e fakamatala ko ʻení ke mahino kiate kitautolu fekauʻaki mo e ngaahi maná?
Ko e hā ha ngaahi mana lalahi mo iiki ʻoku ʻomi mei he ʻOtuá he ʻahó ni?

ʻI he peesi hono tolu ʻo hoʻo tohitufá ʻoku fakahingoa ko e “Ngaahi mana ʻoku hoko he ʻaho ní,” hiki ai ʻa e ngaahi mana kuó ke mātā tonu pe kuo mātā ʻe ha niʻihi ʻokú ke ʻiloʻi.

2:3

Founga ke fakaafeʻi ai ʻa e ʻOtuá ke fakahoko ha ngaahi maná

Fakakaukau ki ha ngaahi mana ʻokú ke ongoʻi ʻoku fuʻu fiemaʻu pe fakaʻamua lahi taha ʻi he ʻahó ni.

Lau ʻa e Molomona 9:20–28, ʻo kumi ʻa e meʻa ʻoku kole mai ʻe he ʻOtuá ke tau faí kae lava ke Ne tāpuekina kitautolu ʻaki ha ngaahi maná.

Te tau lava fēfē ʻo fakaafeʻi ʻa e ʻOtuá ke ne fakahoko ha ngaahi mana ʻi heʻetau moʻuí?

Lau ʻa e lea ko ʻeni ʻa Palesiteni Lāsolo M. Nalesoní pe mamata ʻi he foʻi vitiō “Ko e Mālohi ʻo e Ivi Fakalaumālié,” mei he taimi 13:30 ki he 14:05, ʻoku maʻu ʻi ha ChurchofJesusChrist.org.

17:18

ʻE tāpuekina koe ʻe he ʻEikí ʻaki ʻa e ngaahi mana ʻokú ke fie maʻú kapau ʻokú ke tui kiate Ia, “ʻo ʻikai fakataʻetaʻetui ʻi ha meʻa ʻe taha.” Fai ʻa e ngāue fakalaumālié ke maʻu ai ʻa e ngaahi maná. Kole ʻi he faʻa lotu ki he ʻOtuá ke tokoniʻi koe ke ke fakaʻaongaʻi ʻa e faʻahinga tui ko iá. ʻOku ou palōmesi atu te ke lava ʻo aʻusia ʻiate koe pē hono hanga ʻe Sīsū Kalaisi ʻo “foaki ʻa e mālohi ki he vaivaí; pea kiate kinautolu ʻoku ʻikai haʻanau mālohí ʻokú ne [fakalahi] ʻa e mālohí.” (Russell M. Nelson, “Ko e Mālohi ʻo e Ivi Fakalaumālié,” Liahona, Mē 2022, 100)

Ko e hā ha meʻa ʻoku mahuʻinga kiate koe mei he lea ʻa Palesiteni Nalesoní?
Ko e hā ha ngāue fakalaumālie ʻe ala fiemaʻu ke tau fai ke fekumi ai ki ha ngaahi maná?

Fakakaukau ke fakaafeʻi ‘a e kau akó ke nau vahevahe ʻenau fanga kiʻi tohi tufá mo e niʻihi kehe ʻi he kalasí. ʻE lava ke nau tānaki atu ki ai ha faʻahinga meʻa pē ʻoku nau ako mei honau toʻú. Hili iá te mou lava leva ʻo aleaʻi ʻa e ngaahi fehuʻi ko ʻení.

Ko e hā ha meʻa naʻá ke ako mo ongoʻi fekauʻaki mo e ʻOtuá ʻi hoʻo ako ʻa e Molomona 9?
Ko e hā ha meʻa te ke fai ke fakaafeʻi ai ʻEne ngaahi maná ki hoʻo moʻuí?

Fakamatala Fakamahinó mo e Puipuituʻá

Fēfē kapau te u lotua ha mana pea hangē ʻoku ʻikai pē teitei hoko iá?

Naʻe pehē ʻe ʻEletā Lainolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:

14:37

ʻOku ʻi ai ha ngaahi taimi ʻoku tau ʻamanaki ai ki ha mana ke fakamoʻui hatau ʻofaʻanga, ke fakafoki ha ngāue hala, pe ke fakamolū e loto ʻo ha tokotaha faingataʻaʻia pe mamahi. ʻI heʻetau vakai ki he ngaahi meʻá ʻi ha mata fakamatelié, ʻoku tau fiemaʻu ai e ʻEikí ke alanima mai, ke fakaleleiʻi ʻa ia kuo maumaú. ʻI heʻetau maʻu ʻa e tuí, ʻe hoko mai ʻa e maná, neongo he ʻikai hoko ia ʻi he taimi ʻa kitautolú pe ʻi he founga ʻoku tau loto ki aí. ʻOku ʻuhinga nai ia ʻoku ʻikai ke tau faivelenga pe ʻikai taau mo ʻEne tokoní? ʻIkai. ʻOku ʻofeina kitautolu ʻe he ʻEikí. (Ronald A. Rasband, “Vakai! Ko e ʻOtua Au ʻo e Ngaahi Maná,” Liahona, Mē 2021, 111)

Ko e hā ha ngaahi mana ʻoku fakahoko ʻe he Fakamoʻuí he ʻahó ni naʻe ʻikai ke u fakakaukau ki ai?

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Ko hono faitoʻo ʻo e sinó pe maluʻi ʻo e ngaahi temipalé ko ha ngaahi mana ia, ka ko e mana maʻongoʻonga angé ko ha fuʻu liliu lahi ʻo e loto ʻo ha foha pe ʻofefine ʻo e ʻOtuá (vakai Mōsaia 5:2). ʻOku maʻongoʻonga mo mahuʻinga ange ha liliu ʻo e lotó, kau ai ʻa e ngaahi tōʻonga fakakaukau foʻoú, ngaahi meʻa ʻoku fakamuʻomuʻá, mo e ngaahi holí, ʻi ha toe faʻahinga mana ʻoku kaunga ki he sinó. (Dallin H. Oaks, “Miracles,” Ensign, June 2001, 17)

Naʻe fakamoʻoni ʻa ʻEletā Tōnolo L. Holositolomu ʻo e Kau Fitungofulú ʻo pehē:

ʻOku ou fakamoʻoni he ʻahó ni ki he ngaahi meʻa maná. Ko ha mana ʻete hoko ko e fānau ʻa e ʻOtuá. Ko ha mana ʻete maʻu ha sino ʻi Hono ʻīmisí mo Hono tataú. Ko ha mana ʻa e meʻaʻofa mai ʻo e Fakamoʻuí. Ko ha mana ʻa e Fakalelei ʻa Sīsū Kalaisí. Ko ha mana ʻa e malava ke maʻu ʻa e moʻui taʻengatá. …

Neongo pe ko e hā hotau matakalí, neongo pe ko e fē hotau fonuá, neongo pe ko e hā ha meʻa ne tau fai, ka ʻo kapau te tau fakatomala, pea tatau ai pē pe ko e hā kuo fai maí—ʻoku ʻatā ke tau maʻu kotoa pē ʻa e ngaahi mana ko ʻení. (Donald L. Hallstrom, “Kuo Ngata Koā ʻa e ʻAho ʻo e Ngaahi Maná?” Liahona, Nōvema 2017, 90)

Ngaahi ʻEkitivitī Fakalahi ki he Akó

Ko e ngaahi mana ʻa e Fakamoʻuí

ʻI hono aleaʻi ʻo e ngaahi mana mei he kuohilí, fakakaukau ke mamata ʻi ha foʻi vitiō ʻoku fakahaaʻi ai ha ngaahi mana mei he moʻui ʻa e Fakamoʻuí. Ko e fili ʻe taha ko hono fakaʻaongaʻi ʻa e ngaahi konga ʻo e “Ko Hono Maʻu ʻa e Tui kia Kalaisí” mei he taimi 7:40 ki he 10:47.

30:3

Hiki ʻa e ngaahi maná

Mahalo te ke lava ʻo fakaafeʻi ʻa e kau akó ke nau kamataʻi ha “Tohinoa ʻo e Maná.” Poupouʻi ke nau fakakaukauloto ki he meʻa kuo fai ʻe he ʻOtuá maʻanautolu ʻi he ʻaho takitaha pea hiki ia ʻi heʻenau tohinoá. Hangē ko ʻení, mamata ʻi he vitiō, “ʻOiauē, Manatu, Manatu” (1:27) pe vakai ki he ngaahi konga ʻo e lea ʻa Palesiteni Henelī B. ʻAealingi, “ʻOiauē, Manatu, Manatu” (Liahona, Nōvema 2007, 66–69).

2:3