Molomona 8:1–26

Ko ha Lekooti ʻoku Fuʻu Mahuʻinga ʻAupito

Ko e hā ha meʻa te ke fai kapau naʻe tuku atu kiate koe ha meʻa ʻoku mahuʻinga tatau mo e ʻū lauʻi peleti koulá? ʻI he taimi naʻe maʻu ai ʻe Molonai ʻa e ʻū lauʻi peletí, naʻá ne fai ʻa e meʻa kotoa naʻá ne lavá ke maluʻi ia. Naʻe faifai peá ne tanu ia ʻi he kelekelé, ʻo falala naʻe “fufuuʻi hake ki he ʻEikí (peesi talamuʻaki ʻo e Tohi ʻa Molomoná), ke ʻomi ia ʻi ha ʻaho “ʻe he toʻukupu ʻo e ʻEikí” (Molomona 8:26). ʻE lava ke tokoniʻi koe ʻe he lēsoni ko ʻení ke ke ongoʻi ʻa hono mahuʻinga ʻo e Tohi ʻa Molomoná ʻi hoʻo moʻuí.

Fokotuʻu ha ʻātakai ako ʻoku longomoʻuí. Fakakaukau ke fakaʻaongaʻi ha ngaahi tuʻuʻanga fakaako kehekehe ko ha founga lelei ia ke vahevahe ai ʻa e ngaahi kanotohi ʻoku lalahí pea fakaʻatā ʻa e kau akó ke nau fatongia ʻaki ʻenau akó. ʻI heʻenau filifili mo vilo mei he ngaahi tuʻuʻanga fakaakó, tokanga ki he kau ako te nau ala fiemaʻu ha tokoni fakafoʻituituí.

Teuteu ʻa e tokotaha akó: Fakaafeʻi ʻa e kau akó ke nau fakalaulauloto ki he founga ʻoku fakahaaʻi ai ʻe heʻenau ngaahi feinga kimuí ni ke ako ʻa e Tohi ʻa Molomoná ʻa e founga ʻoku nau mahuʻingaʻia ai ʻi he Tohi ʻa Molomoná.

Ngaahi ʻEkitivitī Ako ʻOku Ala Fakahokó

Ko ha meʻaʻofa mahuʻinga

Fakakaukauloto naʻe meʻaʻofa atu ʻe ha taha ha kato ʻoku fonu ʻi he taiamoní mo e maka koloá.

• Ko e hā haʻo tali? ʻE tāpuekina fēfē ʻe he meʻaʻofa ko ʻení hoʻo moʻuí?

Naʻe ʻave ʻe Palesiteni Lāsolo M. Nalesoni ha tatau ʻo e Tohi ʻa Molomoná ki ha tuʻi fakaematakali ʻi ʻAfilika pea fakamatalaʻi ʻa e founga ʻoku hoko ai [ʻa e tohí] ko ha toe fakamoʻoni ʻe taha ʻo Sīsū Kalaisi. Naʻe tali ange ʻe he tuʻí:

“Naʻá ke mei lava pē ʻo ʻomai haʻaku taiamoni pe makakoloa, ka ʻoku ʻikai ha meʻa ʻe mahuʻinga ange kiate au ka ko e ʻilo lahi ange ki he ʻEiki ko Sīsū Kalaisí.” (Russell M. Nelson, “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Liahona, Nōvema 2017, 60–61)

• Ko e hā nai ha ngaahi ʻuhinga naʻe ongoʻi pehē ai ʻa e tuʻí?

Tuku ha taimi ki he kau akó ke nau sivisiviʻi ai ʻenau ngaahi ongo fekauʻaki mo e Tohi ʻa Molomoná. Te ke lava ʻo fakaʻaliʻali ʻa e fakamatala ko ʻeni meia Palesiteni Nalesoní ke tokoni ke nau fakalaulauloto ki ai.

Fakakaukau ki he founga te ke tali ai ʻa e ngaahi fehuʻi ko ʻeni naʻe vahevahe ʻe Palesiteni Nalesoní:

Siʻoku kāinga, ʻoku mahuʻinga fēfē kiate koe ʻa e Tohi ʻa Molomoná? Kapau ʻe foaki atu kiate koe ha taiamoni, makakoloa pe Tohi ʻa Molomoná, ko e fē meʻa te ke filí? Ko hono moʻoní, ko e fē ʻoku mahuʻinga ange kiate koé? (Russell M. Nelson, “Ko e Tohi ʻa Molomoná: Naʻe Mei Fēfē Nai Hoʻo Moʻuí Ka Ne ‘Ikai Ia?,” Liahona, Nōv. 2017, 61)

ʻI hoʻo ako ʻa e Molomona 8, fakalaulauloto ki hoʻo fakamoʻoni fakataautaha ki he Tohi ʻa Molomoná. Kumi ha ngaahi ʻuhinga ʻoku mahuʻinga taha ai ʻa e fakamoʻoni ʻo Sīsū Kalaisi ʻi he Tohi ʻa Molomoná pea mo e founga ʻe lava ke ne tāpuekina ai hoʻo moʻuí.

Ko hono ʻilo ʻa e mahuʻinga ʻo e Tohi ʻa Molomoná

ʻOku ʻi he ʻekitivitī ko ʻení ha konga ʻe fā ke tokoni ki he kau akó ke nau ʻiloʻi pe toe fakapapauʻi ʻa e mahuʻinga ʻo e Tohi ʻa Molomoná. Te ke lava ʻo fokotuʻu ha tuʻuʻanga maʻá e konga takitaha, pea ʻe lava ke vilo fakafoʻituitui pe fakakulupu iiki ʻa e kau akó ʻi he ngaahi tuʻuʻangá.

ʻI hoʻo tohinoa akó, tā ai ha foʻi hala ʻo ha mape ki ha makakoloa. Ko e foʻi toti takitaha ʻi he mapé ko ha feituʻu ia ke lekooti ai ʻa e meʻa ʻokú ke ako lolotonga hoʻo ako ʻa e Molomona 8. Fakakau ai ʻa e ngaahi ʻilo fekauʻaki mo e mahuʻinga ʻo e Tohi ʻa Molomoná mei he ngaahi vahe takitaha ko ʻení. Ko e meʻa kotoa pē ʻokú ke akó te ne ʻomi koe ke ke ofi ange ki he X ʻi he mape ʻo e makakoloá. Ko e X ʻa e feituʻu te ke lava ʻo lekooti ai ʻa e ʻuhinga ʻo e Tohi ʻa Molomoná kiate koé.

Konga 1. Ko ha koloa fufū

Hili ʻa e tō-tau ʻa Molomoná (vakai, Molomona 8:3), naʻe tauhi pea naʻe lahi ange ʻa e tohi ʻa Molonai ʻi he lekooti naʻe fai ʻe heʻene tamaí ʻi he ʻū lauʻi peleti koulá.

Lau ʻa e Molomona 8:1–5 mo e peesi talamuʻaki ʻo e Tohi ʻa Molomoná, ʻo kumi ʻa e ʻuhinga naʻe tohi mo fakatolonga ai ʻa e Tohi ʻa Molomoná.

• Ko e hā ha meʻa te tau lava ʻo ako fekauʻaki mo e taumuʻa ʻo e Tohi ʻa Molomoná?

Hiki hoʻo talí ʻi he tafaʻaki ʻo e ngaahi foʻi toti ʻi he mapé.

Ko ha foʻi moʻoni ʻe taha te tau lava ʻo akó naʻe fakatolonga mai ʻa e Tohi ʻa Molomoná maʻa hotau kuongá ke fakalotoa kitautolu ko Sīsū ʻa e Kalaisí.

• Kuo tākiekina fēfē nai ʻe he Tohi ʻa Molomoná ʻa hoʻo loto-holi ke muimui kia Sīsū Kalaisí?

Konga 2. Ko e mahuʻinga ʻo e lekōtí

Ke tokoni ki he kau akó ke nau fakakaukauloto mo fakakaukau ki he ʻū lauʻi peleti koulá, fakakaukau ke fakaʻaongaʻi ʻa e fakamatala mei he Ngaahi Tefito ʻi he Hisitōlia ʻo e Siasí, “ʻŪ Lauʻi Peleti Koulá,” history.ChurchofJesusChrist.org.

Fakakaukau ki he meʻa ʻokú ke ʻilo fekauʻaki mo e ʻū lauʻi peleti koulá pea ʻokú ke pehē ʻoku fiha hono mahuʻingá. Lau ʻa e meʻa naʻe aʻusia ʻe Siosefa Sāmitá ʻi he taimi naʻá ne fuofua maʻu ai ʻa e ʻū lauʻi peleti koulá meia Molonaí.

Hili hono ʻomi ʻe Siosefa ʻa e ʻū lauʻi peleti koulá ki ʻapí, naʻe feinga ʻa e kau kumi koloá ʻi ha ngaahi uike lahi ke kaihaʻasi ia. Ke maluʻi e lekōtí, naʻe pau ke ne fūfuuʻi holo ʻa e ʻū lauʻi peletí ʻi ha ngaahi feituʻu kehekehe, pea fufuuʻi ʻi he lalo tofunangá, lalo falengāue ʻene tamaí pea mo e loto kēlení. Naʻe ʻikai teitei lava ke ne matavalea. (Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, vol 1, Ko e Fuka ʻo e Moʻoní, 1815–1846 [2018], 45)

• Ko e hā ha meʻa ʻoku hā makehe kiate koe ʻi he fakamatala ko ʻení?

Lau ʻa e Molomona 8:14, ʻo kumi ʻa e meʻa naʻe lea ʻaki ʻe Molonai fekauʻaki mo e ʻū lauʻi peletí.

• ʻOkú ke pehē ko e hā e ʻuhinga ʻa Molonaí ʻi heʻene pehē “ʻoku ʻikai hano ʻaonga” ʻo e ʻū lauʻi peletí ka “ko e lekooti ʻoku ʻi aí ʻoku fuʻu mahuʻinga ʻaupito”? Ko e hā ha meʻa te tau lava ʻo ako mei hení?

Hiki hoʻo talí ʻi he tafaʻaki ʻo e ngaahi foʻi toti ʻi he mapé.

Ko ha foʻi moʻoni ʻe taha te tau lava ʻo akó ko e lekooti ʻo e Tohi ʻa Molomoná ʻoku fuʻu mahuʻinga ʻaupito.

Hiki ha ngaahi veesi, akonaki, pe ngaahi talanoa mei he Tohi ʻa Molomoná ʻokú ke ongoʻi ʻoku fuʻu mahuʻinga ʻaupito. Fakamatalaʻi ʻa e ʻuhinga ʻoku mahuʻinga ai ʻeni kiate koe pe ko e niʻihi kehé.

Konga 3. Ko ha meʻaʻofa mei he ʻOtuá

Fakakaukau ki he meʻa ʻokú ke ʻilo fekauʻaki mo Siosefa Sāmitá ʻi heʻene kei talavoú. Te ke lava nai ʻo fakakaukau ki ha ngaahi ʻuhinga naʻe fili ai ʻe he ʻOtuá ʻa Siosefa Sāmita ke ne liliu ʻa e Tohi ʻa Molomoná?

Lau ʻa e Molomona 8:15–16, 26, ʻo kumi ʻa e meʻa naʻe akoʻi ʻe Molonai fekauʻaki mo Siosefa Sāmitá pea mo e Tohi ʻa Molomoná.

• Ko e hā ha ngaahi moʻoni te tau lava ʻo ako fekauʻaki mo e founga naʻe ʻomi ai ʻa e Tohi ʻa Molomoná ke ʻilolahiá?

Hiki hoʻo talí ʻi he tafaʻaki ʻo e ngaahi foʻi toti ʻi he mapé.

Ko ha foʻi moʻoni ʻe taha te tau lava ʻo akó naʻe foaki ʻe he ʻOtuá kia Siosefa Sāmita ʻa e mālohi ke ʻomi ʻa e Tohi ʻa Molomoná.

Hiki ha meʻa ʻe taha pe ua ʻokú ke ʻilo fekauʻaki mo hono liliu ʻe Siosefa Sāmita ʻa e Tohi ʻa Molomoná. (Vakai, Ngaahi Tefito ʻi he Hisitōlia ʻo e Siasí, “Liliu ʻo e Tohi ʻa Molomoná,” history.ChurchofJesusChrist.org pe Gospel Topics, “Book of Mormon Translation,” history.ChurchofJesusChrist.org.)

Konga 4. Ko e meʻa ʻoku ou mahuʻingaʻia ai ʻi he Tohi ʻa Molomoná

Makatuʻunga ʻi hoʻo ako ʻa e Tohi ʻa Molomoná ʻi ʻapí, ʻi he lotú, pea ʻi he seminelí, hiki ʻa e meʻa ʻokú ke mahuʻingaʻia taha ai ʻi he Tohi ʻa Molomoná. ʻE ala tokoni ʻa e ngaahi fehuʻi ko ʻení.

Hiki ʻa e tali ki ha taha ʻo e ngaahi fehuʻi ko ʻení ʻi he tafaʻaki ʻo e X ʻi hoʻo mapé:

• Ko e hā e ʻuhinga ʻokú ke houngaʻia ai ʻi hono fakatolonga mai ʻa e Tohi ʻa Molomoná?

• Ko e hā ha meʻa kuó ke ako fekauʻaki mo e kau palōfita naʻe ui ʻe he ʻEikí ke ʻomi ʻa e Tohi ʻa Molomoná kiate kitautolú?

• Ko e hā ha meʻa te ke fai ke fakahaaʻi ki he ʻEikí ʻa e lahi hoʻo mahuʻingaʻia ʻi he Tohi ʻa Molomoná?

Hili hono hiki ʻe he kau akó ʻenau talí, fakakaukau ke fakaafeʻi ke nau fakakaukau ki ha taha te nau lava ʻo ʻoange ki ai ha tatau ʻo e Tohi ʻa Molomoná pe ko ha fehokotakiʻanga ke download ia. Te ke lava ʻo poupouʻi kinautolu ke fakakau atu ʻenau fakamoʻoní ʻi he taimi te nau vahevahe ai ʻa e tohí. Fakakaukau ke vahevahe hoʻo fakamoʻoni ki he Tohi ʻa Molomoná.

Fakamatala Fakamahinó mo e Puipuituʻá

Ko e hā ʻa e meʻa ʻoku mahuʻinga fekauʻaki mo e Tohi ʻa Molomoná?

Naʻe ʻomi ʻe Palesiteni Lāsolo M. Nalesoni ha ngaahi sīpinga lahi. Ke maʻu ha tali ʻoku fakaikiiki angé, vakai ki heʻene leá kakato.

ʻOku ʻomi ʻe he Tohi ʻa Molomoná ʻa e mahino kakato mo taupotu taha ki he Fakalelei ʻa Sīsū Kalaisí, he ʻikai ke toe maʻu ia mei ha feituʻu kehe. ʻOkú ne akoʻi moʻoni e ʻuhinga ʻo e fanauʻi foʻoú. ʻOku tau ʻilo mei he Tohi ʻa Molomoná ʻa hono tānaki ʻo ʻIsileli ne fakamoveteveteʻí. ʻOku tau ʻilo e ʻuhinga ʻo ʻetau ʻi he māmaní. Ko e ngaahi moʻoni ko ʻení mo ha ngaahi moʻoni kehe, ʻoku akoʻi lelei mo mālohi ia ʻi he Tohi ʻa Molomoná, ʻo mahulu ange ʻi ha toe tohi kehe. ʻOku tau maʻu e mālohi kakato ʻo e ongoongolelei ʻo Sīsū Kalaisí ʻi he Tohi ʻa Molomoná. Piliote ai.

ʻOku fakatou fakamaʻalaʻala ʻe he Tohi ʻa Molomoná ʻa e ngaahi akonaki ʻa e ʻEikí mo fakahaaʻi e ngaahi founga ʻa e filí. ʻOku akoʻi ʻe he Tohi ʻa Molomoná ʻa e tokāteline moʻoní ke kapusi ʻaki e ngaahi talatupuʻa hala fakalotú—hangē ko e meʻa hala lahi fau ko ia ko hono papitaiso ʻo e fānau valevalé. ʻOku ʻomi ʻe he Tohi ʻa Molomoná ha taumuʻa ki he moʻuí ʻaki hono fakaʻaiʻai kitautolu ke tau fakalaulauloto ki he ivi malava ʻo e moʻui taʻengatá mo e “fiefia ʻoku ʻikai hano ngataʻangá” [Mōsaia 2:41; vakai foki, ʻAlamā 28:12]. ʻOku fakahalaki lahi ʻe he Tohi ʻa Molomoná ʻa e foʻi maʻuhala ko ia ʻoku lava ke maʻu ha fiefia ʻi he faiangahalá, pea ko e meʻa pē ʻoku fiemaʻu ke foki ai ki he ʻao ʻo e ʻOtuá, ko ha failelei fakafoʻituitui [ʻoku fiemaʻu foki mo e ngaahi ouau mo e ngaahi fuakava toputapu makehé]. ʻOkú ne fakaʻauha ʻo taʻengata e foʻi maʻu hala naʻe ngata pē ʻa e maʻu fakahaá he Tohi Tapú pea kuo ʻikai toe fakaava mai ʻa e langí. (Russell M. Nelson, “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Liahona, Nōvema 2017, 62)

Ngaahi ʻEkitivitī Fakalahi ki he Akó

Molomona 8:1–5. Fēfē kapau naʻe ʻikai lavameʻa ʻa Molonai?

Ke tokoni ke mahino ki he kau akó ʻa e mahuʻinga ʻo e tokoni ʻa Molonai ke fakatolonga ʻa e ʻū lauʻi peleti koulá, fakakaukau ke huluʻi ʻa e vitiō “Tukufakaholo ʻo e Ngaahi Folofolá” mei he taimi 0:00 ki he 2:27 mo e 19:40 ki he 20:46. Aleaʻi ʻa e meʻa naʻe mei hokó kapau naʻe ʻikai lavameʻa ʻa Molonai pea mo e founga ʻoku tau monūʻia ai koeʻuhí ko ʻene lavameʻá.

Molomona 8:14–15. Ko e mahuʻinga totonu ʻo e ʻū lauʻi peleti koulá

Ke tokoni ke mahino ki he kau akó ʻa e founga naʻe fiemaʻu ai ke mateuteu ʻa Siosefa Sāmita ke ne ʻomi ʻa e Tohi ʻa Molomoná “ʻaki ʻa e mata ʻoku hanga taha pē ki hono fakalāngilangiʻi [ʻo e ʻOtuá]” (Molomona 8:15), vahevahe ha ngaahi konga mei he peesi 27–28 ʻo e Kau Māʻoniʻoní, vol. 1, Ko e Fuka ʻo e Moʻoní.

Molomona 8:22–26. Fakamoʻoni ʻoku tauhi ʻe he ʻOtuá ʻa e ngaahi fuakavá

Fakaafeʻi ʻa e kau akó ke hiki ha kakai naʻe ʻi ai haʻanau kaunga ki hono ʻomi ʻa e Tohi ʻa Molomoná kiate kitautolú. ʻE lava ke lau ʻe he kau akó ʻa e meʻa naʻe lea ʻaki ʻe Molonai ʻi he Molomona 8:22–26 fekauʻaki mo e niʻihi naʻe muʻomuʻa ʻiate iá pea naʻa nau maʻu ha holi lahi ke tāpuekina ʻa e ngaahi toʻu tangata ʻi he kahaʻú (vakai foki, ʻĪnosi 1:15–18). Tokoniʻi ʻa e kau akó ke nau ʻilo ko e Tohi ʻa Molomoná ko ha fakamoʻoni ia ʻoku fakahoko mo tauhi ʻe he ʻEikí ʻa e ngaahi fuakavá.

Mahalo ʻe ʻaonga ki he kau akó hano faʻu ha lisi ʻo ha ngaahi fuakava kehe kuo fai ʻe he ʻEikí ʻa ia ʻoku tau ʻiloʻi te Ne fakakakato.