Molomona 7–9

Vakai Fakalūkufuá

Naʻe aofangatuku ʻe Molomona ʻene ngaahi tohí ʻaki haʻane akonaki fekauʻaki mo Sīsū Kalaisi pea mo e fiefia taʻengata ʻoku fakatatali mai kiate kinautolu ʻoku muimui kiate Iá. Hili ʻene pekiá, naʻe maʻu ʻe hono foha ko Molonaí ʻa e ʻū lauʻi peletí pea naʻá ne fai ʻa e meʻa kotoa naʻá ne lavá ke maluʻi ia. Naʻe faifai peá ne tanu ia ʻi he kelekelé, ʻo falala naʻe “fufuuʻi hake ki he ʻEikí (peesi talamuʻaki ʻo e Tohi ʻa Molomoná), ke ʻomi ia ʻi ha ʻaho “ʻe he toʻukupu ʻo e ʻEikí” (Molomona 8:26). Naʻe fakahā ʻe he ʻEikí ʻa hotau kuongá kia Molonai, pea naʻe fakamatalaʻi ʻe Molonai ʻa e ngaahi angahala mo e ngaahi ʻulungaanga ʻe angamaheni ʻi he ngaahi ʻaho fakaʻosí. Naʻá Ne fakaafeʻi mai ke tau “tafoki ki he ʻEikí” (Molomona 9:6) pea fai mo ha faleʻi kehe ke tokoniʻi kitautolu ke tau muimui ʻia Sīsū Kalaisi.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

Molomona 7

Taumuʻa ʻo e lēsoní: ʻE lava ke tokoni atu ʻa e lēsoni ko ʻení ki he kau akó ke nau muimui kia Sīsū Kalaisi pea teuteu ke nofo mo e ʻOtuá ʻi he fiefia taʻengata.

• Teuteu ʻa e tokotaha akó: Te ke lava ʻo fakaafeʻi ʻa e kau akó ke nau omi mateuteu ke vahevahe ki he kalasí ʻa e meʻa ʻoku nau fiefia aí. ʻE lava foki ke talanoa ʻa e kau akó ki ha mēmipa ʻo e fāmilí fekauʻaki mo e meʻa ʻoku fiefia ai ʻa e mēmipa ko iá.

• Meʻa ke fakaʻaliʻalí: Ko e tali-fehuʻi fekauʻaki mo Molomoná; ko e sivi fakataautaha ʻi he fakaʻosinga ʻo e lēsoní

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ʻa e fakamatala taʻekakato “Te u lava ʻo nofo mo e ʻOtuá ʻi he fiefia taʻengata ʻi heʻeku …” pea fakaafeʻi ʻa e kau akó ke nau fakaʻosi ʻa e fakamatalá ʻi he polokalama fetalanoaʻakí ʻo fakaʻaongaʻi ʻa e meʻa ʻoku nau maʻu ʻi he Molomona 7:8–10.

Molomona 8:1–26

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ongoʻi ʻe he kau akó ʻa hono mahuʻinga ʻo e Tohi ʻa Molomoná ʻi heʻenau moʻuí.

• Teuteu ʻa e tokotaha akó: Fakaafeʻi ʻa e kau akó ke nau fakalaulauloto ki he founga ʻoku fakahaaʻi ai ʻe heʻenau ngaahi feinga kimuí ni ke ako ʻa e Tohi ʻa Molomoná ʻa e founga ʻoku nau mahuʻingaʻia ai ʻi he Tohi ʻa Molomoná.

• ʻŪ naunaú: Ko ha mape ki he makakoloa; fakahinohino ki he ngaahi tuʻuʻangá ke tokoni ke mahino ki he kau akó ʻa hono mahuʻinga ʻo e Tohi ʻa Molomoná

• Fokotuʻu ki hono akoʻi ʻi he konifelenisi vitioó: ʻI he taimi ʻoku ako ai ʻa e kau akó ke ʻiloʻi ʻa e mahuʻinga ʻo e Tohi ʻa Molomoná, fakaafeʻi ke nau vahevahe ʻa e meʻa ʻoku nau akó. Fakakaukau ke fakaʻaongaʻi ʻa e polokalama fetalanoaʻakí ke nau lava ai ʻo hiki ʻa e ngaahi potufolofola pe ngaahi veesi ʻoku nau saiʻia taha aí, ngaahi akonakí, pe ngaahi talanoa ʻoku matuʻaki mahuʻinga kiate kinautolú. Hili iá pea kole ki ha kau ako ʻe niʻihi ke nau fakamatalaʻi ʻenau ngaahi filí.

Molomona 8:27–41; 9:1–6, 27–37

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó naʻe hiki ʻa e Tohi ʻa Molomoná ke tokoniʻi kitautolu, ʻi he ngaahi ʻaho kimui ní, ke tafoki ki he ʻEikí.

• Teuteu ʻa e tokotaha akó: Fakakaukau ke fakaafeʻi ʻa e kau akó ke nau omi mateuteu ki he kalasí ke vahevahe ha potufolofola mei he Tohi ʻa Molomoná ʻe ala tokoni ke tau tafoki kia Sīsū Kalaisi.

• ʻŪ naunaú: Ko ha puha pe ko ha meʻa kehe ke ne fakafofongaʻi ha meʻa tukuʻanga koloa fakataimi

• Fokotuʻu ki hono akoʻi ʻi he konifelenisi vitioó: Fakakaukau ke vahevahe ʻa e kau akó ki he fanga kiʻi loki fealēleaʻakí ke nau vahevahe ʻa e ngaahi potufolofola mei he Tohi ʻa Molomoná ʻoku akoʻi fekauʻaki mo Sīsū Kalaisí pea ʻoku tokoniʻi kitautolu ke tau tui kiate Iá.

Molomona 9:7–27

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻe lava ke ʻomi ai ʻe he tui ki he ʻOtuá ha faingamālie ke Ne fakahoko ha ngaahi mana ʻi heʻenau moʻuí.

• Teuteu ʻa e tokotaha akó: Fakaafeʻi ʻa e kau akó ke nau lau pe fanongo ki he lea ʻa ʻEletā Lānolo A. Lasipeni ko e “Vakai! Ko e ʻOtua Au ʻo e Ngaahi Maná” pea fakakaukau ki he meʻa ʻoku nau akó pe ko e hā haʻanau ngaahi fehuʻi fekauʻaki mo e ngaahi maná. ʻOku maʻu ʻa e lea ko ʻení ʻi he ChurchofJesusChrist.org.

• Naunau maʻá e kau akó: Pepa, naunau ki he faitohí, ʻū fakatātā, kulū, mo e helekosi maʻá e kau akó ke nau faʻu ha fanga kiʻi tohi tufa

• Ngaahi Vitioó: “Fakamāʻoniʻoniʻi ʻa Kimoutolu” (4:37); “ʻI ha Palani Fakalangi” (14:51; mamata mei he taimi 7:16 ki he 8:19)

• Fokotuʻu ki hono akoʻi ʻi he konifelenisi vitioó: ʻI hono aleaʻi ʻa e ngaahi mana ʻi he kuohilí, fakakaukau ke huluʻi ha foʻi vitiō fekauʻaki mo hono fakahoko ʻe Sīsū Kalaisi ʻa e ngaahi maná. ʻI hono aleaʻi ʻa e ngaahi mana ʻoku hoko he ʻaho ní, te ke lava ʻo huluʻi ha taha ʻo e ngaahi vitiō ʻoku fokotuʻu mai ʻe he lēsoní.

Toe Vakaiʻi Hono 23 ʻo e Fakataukei Fakatokāteliné

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke nau ako maʻuloto ha ngaahi fakamoʻoni fakafolofola kehekehe mo ha ngaahi kupuʻi lea mahuʻinga he folofolá, pe ko ha potufolofola fakataukei fakatokāteline kakato mei he konga hono ua ʻo e Tohi ʻa Molomoná.

• Teuteu ʻa e tokotaha akó: Fakaafeʻi ʻa e kau akó ke nau fili ha kupuʻi lea mahuʻinga ʻo e fakataukei fakatokāteliné mo ha fakamoʻoni fakafolofola ke ako maʻuloto pea omi mateuteu ke vahevahe ʻi he kalasí.

• ʻĪmisí: Ko ha fakatātā ʻo e hā ʻa Molonai kia Siosefa Sāmitá.

• Fokotuʻu ki hono akoʻi ʻi he konifelenisi vitioó: ʻAi ke ʻilo ʻe he kau akó ʻe kole ange ke nau vahevahe ʻa e ngaahi potufolofola ʻoku nau fakaʻamu ke ako maʻulotó. Te ke lava ʻo tuku ange ha taimi ke nau fevahevaheʻaki ai ʻa e meʻa ʻoku nau fai ke ako maʻuloto aí, pe te ke lava ʻo fili ha founga ʻe taha ʻo e ako maʻulotó ke fakaʻaongaʻi ʻe he kau akó kotoa.