“ʻEta 8: ‘ʻOku ʻIkai Ke Ngāue ʻa e ʻEikí ʻi he Ngaahi Kautaha Fufū,’” Tohi ʻa Molomoná – Tohi Lēsoni ʻa e Faiakó (2024)
“ʻEta 8,” Tohi ʻa Molomoná – Tohi Lēsoni ʻa e Faiakó
ʻEta 8
“ʻOku ʻIkai Ke Ngāue ʻa e ʻEikí ʻi he Ngaahi Kautaha Fufū”
Naʻe fakaʻauha ʻe he ngaahi kautaha fufuú ha ngaahi kulupu kehekehe ʻo ha kakai ʻi he kotoa ʻo e Tohi ʻa Molomoná. Naʻe ʻilonga ʻa e sīpinga ko ʻení ʻi he lotolotonga ʻo e kau Sēletí pea naʻe iku ai ki honau fakaʻauhá. ʻI he tohi ʻa e palōfita ko Molonaí fekauʻaki mo e kau Sēletí, naʻá ne tānaki ki ai ha ngaahi moʻoni mahuʻinga te tau lava ʻo ako mei he ngaahi tūkunga fakaʻauha ko ʻení. ʻE lava ke tokoni ʻa e lēsoni ko ʻení ke mahino kiate koe ʻa e fiemaʻu ke fakafisingaʻi ʻa e ngaahi kautaha fufuú ʻaki haʻo muimui kia Sīsū Kalaisi.
Tokoni ke fekumi ʻa e kau akó ki he meʻa ʻoku mahuʻingá. ʻI he taimi ʻoku lava ke fakafelāveʻi ai ʻe he kau akó ʻa e meʻa ʻoku nau ako ʻi he folofolá ki honau ngaahi tuʻungá mo e tūkungá, ʻoku faʻa fakalotolahiʻi ange ai kinautolu ke nau ako pea moʻui ʻaki ʻa e ngaahi akonaki ʻo e ongoongoleleí. Fakaafeʻi ʻa e kau akó ke feinga ke ʻilo ʻene felāveʻi mo kinautolú ʻaki hono ʻeke ange ha ngaahi fehuʻi hangē ko e “ʻOku faitatau fēfē nai ʻa e meʻa ko ʻeni naʻe hokó pe akonakí mo hoʻo ngaahi aʻusiá?” pe “ʻOku kaunga fēfē nai ʻa e foʻi moʻoni ko ʻení ki hoʻo moʻuí?”
Teuteu ʻa e tokotaha akó: Fakaafeʻi ʻa e kau akó ke lau ʻa e “Kautaha Fufuú, Ngaahi” ʻi he Fakahinohino ki he Ngaahi Folofolá ʻi he scriptures.ChurchofJesusChrist.org.
Ngaahi ʻEkitivitī Ako ʻOku Ala Fakahokó
Ngaahi ngāue fakapulipulí
Tohiʻi ʻa e foʻi lea ko e fakapulipulií ʻi he palakipoé, pea ʻeke ange ʻa e ngaahi fehuʻi ko ʻení:
-
Ko e hā ha ngaahi founga ʻoku fakaʻaongaʻi ai ʻe Sētane ʻa e fakapulipulí ke aʻusia ʻene ngaahi taumuʻa koví?
-
ʻE uesia fēfē ʻe he fakapulipuli peheé ʻa e vā fetuʻutaki ʻo ha taha mo Sīsū Kalaisi? Ko e hā hono ʻuhingá?
-
Ko e hā te ke fiemaʻu ke ʻilo ʻe ha taha ʻokú ne ongoʻi te ne lava ʻo fai kovi pea hao pē koeʻuhí ʻokú ne tauhi ia ko ha fakapulipuli?
Te ke ako ʻi he ʻahó ni fekauʻaki mo ha falukunga kakai naʻa nau kau ʻi ha ngaahi angafai fakafufū ʻo e faiangahalá ʻoku ʻiloa ko ha kautaha fufuú. ʻI hoʻo akó, kumi ha ngaahi akonaki ʻe tokoni ke mahino kiate koe ʻa hono fakatuʻutāmaki ʻo e ngaahi kautaha fufuú.
Faiangahala ʻi he lotolotonga ʻo e Kau Sēletí
Mahalo te ke manatuʻi hili e tūʻuta ʻa e kau Sēletí ki he fonua ʻo e talaʻofá, naʻa nau fili ha tuʻi ke pule kiate kinautolu neongo ʻa e ngaahi fakatokanga ʻa e tokoua ʻo Sēletí ʻe iku ia ki ha nofo pōpula (vakai, ʻEta 6:22–23). ʻI he ngaahi toʻu tangata ne muiaki atú, naʻe fakatupu ʻe he ngaahi tuʻi faiangahalá ha māvahevahe mo ha faingataʻaʻia ʻi he lotolotonga ʻo e kakaí.
Te ke lava ʻo fakaafeʻi ha niʻihi ʻo e kau akó ʻe loto-fiemālie ke taufetongi ʻi hono lau leʻolahi ʻo e ngaahi veesi ko ʻení ki he kalasí kae muimuiʻi ʻe he toenga ʻo e kau akó ʻi heʻenau folofolá.
Lau ʻa e ʻEta 8:1–10, ʻo kumi ʻa e meʻa naʻe hoko ʻi he taimi naʻe hoko ai ha tangata ko hono hingoá ko ʻOmea ko e tuʻí.
Naʻe loto-fiemālie ʻa Sēleti ki he palani kovi ʻa hono ʻofefiné. ʻI he taimi naʻe kole ai ʻe ʻEikisi ke mali mo e ʻofefine ʻo Sēletí, naʻe faʻufaʻu ʻe ʻEikisi, Sēleti, mo hono ʻofefiné, mo ha kau mēmipa kehe ʻo e fāmilí ha kautaha fufū ke tāmateʻi ʻa ʻOmea (vakai, ʻEta 8:11–15).
Ko e fakatuʻutāmaki ʻo e ngaahi kautaha fufuú
Ko e kautaha fufuú “ko ha kautaha [ia] ʻo [ha] kakai ʻoku nau haʻisia ki ha ngaahi fakapapau ke nau fakahoko ʻa e ngaahi taumuʻa kovi ʻa e kulupú” (“Kautaha Fufuú, Ngaahi,” Fakahinohino ki he Ngaahi Folofolá, scriptures.ChurchofJesusChrist.org). Ko Sētane ʻa e tupuʻanga ʻo e ngaahi kautaha fufuú (vakai, Hilamani 6:25–30).
ʻI he hoko ʻa e palōfita ko Molonaí ko e tokotaha fakamatala ʻo e talanoa ko ʻení, naʻá ne vahevahe ha ngaahi akonaki mo ha fakatokanga mahuʻinga fekauʻaki mo e ngaahi kautaha fufuú. Lau ʻa e ʻEta 8:18–25, ʻo kumi e ongo ʻa e ʻEikí ki he ngaahi kautaha fufuú.
Fakaafeʻi ʻa e kau akó ke aleaʻi ʻa e meʻa naʻa nau ako mei he ngaahi veesi ko ʻení. Makehe mei he ngaahi fehuʻi ko ʻení, ʻe lava foki ke ke fehuʻi ange, “Ko e hā ʻa e ngaahi fakatokanga naʻe fai ʻe Molonai kiate kinautolu naʻe kau ʻi he ngaahi kautaha fufuú?”
-
Ko e hā naʻá ke ako fekauʻaki mo e ngaahi kautaha fufuú mei he ngaahi veesi ko ʻení?
Ko e moʻoni ʻe taha te tau lava ʻo ako mei he ngaahi veesi ko ʻení ʻoku fakalielia ʻa e ngaahi kautaha fufuú ʻi he ʻao ʻo e ʻOtuá (ʻEta 8:18).
Ke tokoni ke mahino lahi ange kiate koe ʻa e ʻuhinga ʻoku fakalielia ai ʻa e ngaahi kautaha fufuú ki he ʻEikí, lau ʻa e ongo potufolofola ko ʻení, ʻo kumi ʻa e meʻa ʻokú ke ako fekauʻaki mo Sīsū Kalaisí:
Fakaafeʻi ʻa e kau akó ke aleaʻi ʻa e meʻa naʻa nau ako mei he ngaahi veesi ko ʻení. ʻE lava ke fakaʻaongaʻi ʻa e ngaahi fehuʻi ko ʻení.
-
Ko e hā naʻá ke ako mei he ngaahi veesi ko ʻení naʻe mei tokoni ki he kakai naʻá ke ako ki ai ʻi he ʻEta 8?
-
Ko e hā naʻe akoʻi atu ʻe he ngaahi veesi ko ʻení fekauʻaki mo e ʻEikí?
-
ʻE lava fēfē ke tokoniʻi ʻe he ngaahi akonaki ko ʻení ʻa e toʻu tupú ʻi he ʻahó ni?
Naʻe fakaʻosi ʻe Molonai ʻene ngaahi akonaki fekauʻaki mo e ngaahi kautaha fufuú ʻaki ʻene fakamatalaʻi ʻa e ʻuhinga naʻá ne fakakau ai ʻa e ngaahi fakatokanga ko ʻení. Lau ʻa e ʻEta 8:26, ʻo kumi ʻa e meʻa naʻe fiemaʻu ʻe Molonai ke tau ʻiló.
-
Ko e hā naʻá ke ako fekauʻaki mo e ʻuhinga naʻe fakakau ai ʻe Molonai ʻa e ngaahi akonaki ko ʻení ʻi he Tohi ʻa Molomoná?
-
Ko e hā kuó ke ako ʻi he ʻahó ni te ne lava ʻo ueʻi koe ke ke muimui kakato ange kia Sīsū Kalaisí?
Fakakaukau ke vahevahe hoʻo fakamoʻoni fekauʻaki mo e founga ʻoku fakaʻaiʻai ai koe ʻe he ngaahi moʻoni ʻoku akoʻi ʻi he lēsoni ko ʻení ke ke falala mo muimui kia Sīsū Kalaisí.