“Eteru 12:23–27: ‘Ona Ou Faia lea o Mea Vaivai ia Avea ma Mea Malolosi ia te i Latou,’” Tusi Lesona a le Faiaoga o le Tusi a Mamona (2024)

“Eteru 12:23–27,” Tusi Lesona a le Faiaoga o le Tusi a Mamona

Eteru 12:23–27

“Ona Ou Faia Lea o Mea Vaivai ia Avea ma Mea Malolosi ia te i Latou”

Ata

O Moronae o loo tusitusi i luga o papatusi

A o faaauau pea ona otootoina e Moronae le tusi a Eteru, sa popole o ia o le a faatauemu Nuuese i lana galuega ona o lona vaivai i le tusitusi. Sa tali mai le Alii e faapea, a o tatou o mai ia te Ia i le lotomaualalo ma le faatuatua, e mafai ona Ia liliuina o tatou mea vaivai i malosiaga (tagai Eteru 12:27). O lenei lesona ua faamoemoe e fesoasoani ia te oe e sau ia Iesu Keriso e faatoilalo ai vaivaiga e ala i Lona alofa tunoa.

Fuafua ni gaoioiga e aoao ai e valaaulia ai le suesuega. O le ola ai i le talalelei a Iesu Keriso e manaomia ai le aoaoina faifai pea ma le naunautai e faatino i le faatuatua. Fuafua ni gaoioiga suesue e mafai ai e tamaiti aoga ona iloilo i latou lava ma vaai pe mafai faapefea e le faaaogaina o mataupu faavae o le talalelei ona faamanuiaina ai o latou olaga. Uunai tamaiti aoga e mulimuli i musumusuga a le Agaga a o latou suesue.

Sauniuniga a le tamaitiiti aoga: Valaaulia tamaiti aoga e faitau le Eteru 12:27 ma mafaufau i se vaivaiga i o latou olaga latou te mananao e faatoilalo i le fesoasoani a le Faaola.

Gaoioiga e Ono Mafai Ona Aoao Ai

Vaivaiga ma malosiaga

Valaaulia se tamaiti aoga e sau i luma o le potu ma faamaea se galuega o le a manaomia ai le malosi faaletino e sili atu nai lo le mea o ia te ia i le taimi nei. Talanoa pe faapefea ona atiina ae le malosi e manaomia ina ia manuia ai i lenei galuega.

I le olaga faitino, tatou te feagai uma lava ma vaivaiga. O nisi taimi e mafai ona faalotovaivaia lenei mea. I lenei lesona o le a e aoao ai e uiga i se mamanu na aoao atu e le Alii ia Moronae lea e mafai ona liliu ai vaivaiga i ni malosiaga.

Popolega o Moronae

Na tuuina atu ia Moronae le galuega o le otootoina o le tala ia Sa Iaretō, ma sa ia iloa o lenei tala o le a faitauina e le toatele o tagata i le lumanai. Ina ua uma lana otootoga, sa ia faamaumauina nisi o ona manatu faaiu ma faaaofia ai ona atugaluga ma popolega patino e uiga i mea na faatonuina o ia e fai.

Faitau le Eteru 12:23–25, ma vaavaai po o a popolega na i ai ia Moronae.

O le a le mea na faapitoa ona popole i ai Moronae?

Mafaufau e talanoaina ma lisiina o se vasega nisi o vaivaiga masani o loo i ai i tupulaga talavou. E mafai e tamaiti aoga ona mafaufau lē leoa ma tusifaamaumau i a latou api faamaumau mo suesuega nisi o o latou lava vaivaiga latou te mananao e faatoilalo. Faamalamalama atu o le a lē faasoaina maia e tamaiti aoga nei manatu patino i le vasega.

O le tali a le Alii ia Moronae

Faitau le Eteru 12:26–27, ma vaavaai pe na faapefea ona tali atu le Alii i popolega o Moronae.

O leEteru 12:27 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala tulaga ese ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

Fesoasoani i tamaiti aoga e faavasega ia faamatalaga i le fuaiupu 27 o loo lisi atu i lalo. E mafai ona e fai atu ia i latou e tusi fasifuaitau taitasi i luga o le laupapa i ni vaega eseese se fa. E mafai ona e taialaina se talanoaga o se vasega e faaaoga ai le anotusi o loo i lalo.

I se isi faiga, mafaufau e vaevae tamaiti aoga i ni vaega toalaiti, ma tuu atu ia tofu vaega taitasi ma se pepa. Tuu atu i vaega e vaevae a latou pepa i ni sikuea se fa. I sikuea taitasi, e mafai e tamaiti aoga ona tusifaamaumau ai se tasi o fasifuaitau mai le fuaiupu 27. Ma i le avea ai o se vaega, e mafai e tamaiti aoga ona faia ni fesili e mafai ona fesoasoani ia i latou e malamalama ai i fasifuaitau taitasi. A uma ona tusifaamaumau a latou fesili, e mafai ona latou vaevae ia fasifuaitau ma saili e i latou taitoatasi ni tali i fesili sa latou faamaumauina.

“Afai e o mai tagata ia te a’u o le a ou faaali atu ia te i latou o latou vaivaiga”

O le a sou manatu o le a le uiga o le sau ia Keriso?

O nisi tali atonu e tuuina mai e tamaiti aoga e mafai ona aofia ai le osia ma le tausia o feagaiga ma Keriso ma filifili e mulimuli i Ana aoaoga ma faataitaiga. Mo se fesoasoani faaopoopo i le taliina o lenei fesili, e mafai ona e faasino atu tamaiti aoga i le tusiga “Auala e O Mai ai ia Keriso” saunia e Elder Jeffrey R. Holland, lea e mafai ona maua i le ChurchofJesusChrist.org.

Mātau na fetalai mai le Alii o le a Ia faaali mai ia i tatou o tatou vaivaiga pe afai tatou te o atu ia te Ia.

Aisea e avea ai lenei mea o se faamanuiaga ia i tatou?

O le upu vaivaiga i lenei fasifuaitau e faasino i lo tatou tulaga pa’u, lea e aofia ai “mea vaivai” taitasi ma lo tatou lē gafatia ona atoatoa.

O le a se mea ua e aoao mai le Eteru 12:27 e uiga i le mafuaaga e finagalo ai le Faaola ia e iloa ou vaivaiga?

Fesoasoani i tamaiti aoga ia malamalama o le iloaina ma le lotomaualalo o o tatou tapulaa ma lē atoatoa e mafai ona taitai atu ai i tatou e valaau atu i lo tatou Tama Faalelagi mo se fesoasoani faalelagi. E ala i Lona alofa tunoa e mafai ai e le Alii ona liliu vaivaiga e avea ma malosiaga. (Tagai i le 2 Korinito 12:6-10; Eteru 12:37.)

E ono mafai foi ona e mafaufau e faasoa atu le saunoaga a Brother Douglas D. Holmes i le vaega o “Manatu ma Talaaga o Faamatalaga”.

Valaaulia tamaiti aoga e mafaufau loloto lē leoa pe na faaali mai e le Atua talu ai nei ia i latou o latou vaivaiga. Faamautinoa atu ia i latou o se faailoga lelei lenei o loo latou o atu ia te Ia.

“Ou te avatu i tagata ia vaivaiga ina ia faalotomaualalalo ai i latou”

Faitau nisi o faataitaiga o tagata i tusitusiga paia o e na iloaina o latou vaivaiga:

Eteru 3:2: O le uso o Iareto
Mosaea 4:2: O le nuu o le Tupu o Peniamina

Na faapefea e le iloaina o o latou vaivaiga ona fesoasoani i tagata taitoatasi i nei tala ia lotomaualalo?
“Aisea e te manatu e finagalo ai le Alii ia tatou lotomaualalo?

“Ua lava lo’u alofa tunoa mo tagata uma o e e latou te faalotomaualalaloina i latou lava i o’u luma”

O le a lou manatu o le a le uiga e faapea ua lava le alofa tunoa o le Faaola mo i latou uma o e e latou te faamaualalaloina i latou lava i Ona luma?

Afai e faigata i tamaiti aoga ona tali le fesili na muamua atu, mafaufau e faasoa atu le saunoaga lenei a Elder Kevin S. Hamilton.

Na faamalamalama mai e Elder Kevin S. Hamilton o le Fitugafulu:

Ata
Elder Kevin S. Hamilton

O le alofatunoa [o Iesu Keriso] e mafai ai ona tatou maua le mana e faatoilalo ai mea faalavefau uma, luitau uma, ma vaivaiga uma a o tatou saili ina ia sui.

Na galueaiina e le Faaola Lana Togiola e le i’u ma faavavau ina ia mafai moni ai e i tatou ona sui, salamo, ma avea ma tagata sili atu. E mafai moni lava ona toe fanaua i tatou. E mafai ona tatou faatoilalo amio masani, mausa, e oo lava “i le le toe manao e fai mea leaga” [Mosaea 5:2]. (Kevin S. Hamilton, “Ona Ou Faia Lea o Mea Vaivai ia Avea ma Mea Malolosi,” Liahona, Me 2022, 51-52)

Mātau le ala na iloa ai e le nuu o le Tupu o Peniamina le alofa tunoa o le Alii i le Mosaea 4:3.

O ai se isi i tusitusiga paia na faaalia ai ua lava le alofa tunoa o le Faaola e fesoasoani ai ia i tatou e faatoilalo o tatou vaivaiga?

O nisi o faataitaiga atonu e faasoa mai e tamaiti aoga o Alema (tagai i le Mosaea 27:24–29) ma atalii o Mosaea (tagai i le Mosaea 28:4).

“Afai latou te faalotomaualaloina i latou lava i o’u luma, ma faatuatua mai ia te a’u, ona ou faia lea o mea vaivai ia avea ma mea malolosi ia te i latou.”

Sa ta’ua e Elder Hamilton o “mea vaivai” i lenei fuaiupu e mafai ona faasino i a tatou amioga o loo avea ma vaivaiga.

Ata
Elder Kevin S. Hamilton

A o tatou suia muamua o tatou natura pa’ū, o tatou vaivaiga, ona mafai lea ona tatou suia a tatou amioga, ma o tatou vaivaiga. (Kevin S. Hamilton, “Ona Ou Faia Lea o Mea Vaivai ia Avea ma Mea Malolosi,” Liahona, Me 2022, 51.)

Ina ia fesoasoani i tamaiti aoga e mafaufau e uiga i mea ua latou aoaoina i le asō, valaaulia i latou e fai se tasi po o gaoioiga uma nei i a latou api faamaumau mo suesuega.

I se parakalafa o fuaiupu e lē itiiti ifo ma le tolu, tusi ai mea ua e aoaoina ma manao e manatua mai lenei lesona.
I se parakalafa o fuaiupu e lē itiiti ifo ma le tolu, faamatala pe faapefea ona e faaaogaina mea ua e aoaoina i le asō.

Manatu ma Talaaga o Faamatalaga

Aisea ua avea ai o se faamanuiaga le faaali mai e le Atua ia te a’u o o’u vaivaiga?

Na faamalamalama mai e Brother Douglas D. Holmes, o lē sa avea muamua ma fesoasoani i le Au Peresitene Aoao o Alii Talavou:

Ata
Brother Douglas D. Holmes

[O le vaaia o i tatou lava i lo tatou tulaga pa’ū] atonu e lē pei o le telē o se taui mo le iloaina atili o le Atua. Pe tatou te le mananao ea i se Atua e faia i tatou ia maua se lagona lelei ma atiae i tatou i luga? Ioe, ae tatou te mananao foi ma tapuai i se Atua o le upumoni, o se Atua e le faia taumatemate ni mea ae o mea moni, e le o o le sa’o lelei ae i le mana ma le mamalu. Tatou te le na ona fia iloa o le Atua, tatou te mananao ia avea faapei o Ia, ma seiiloga tatou vaai ia i tatou lava o tagata moni e i ai i tatou, e le mafai lava ona avea i tatou ma tagata moni e i ai o Ia. (Douglas D. Holmes, “The Doctrine of Christ: Our Daily Walk,” [Brigham Young University devotional, Jan. 17, 2017], 3, speeches.byu.edu)

Ae faapefea pe afai ou te faia pea lava pea ia mea sese e tasi?

Na faamamafa mai e Elder Dale G. Renlund o le Korama a Aposetolo e Toasefululua:

Ata
Elder Dale G. Renlund

Peitai, e tusa lava pe ua uma ona salamo faamaoni, e mafai lava ona tatou tautevateva. O le tautevateva e le faapea ua le lava le salamo ae atonu e atagia ai vaivaiga faaletagata. E maeu le mafanafana o le iloaina “e ese le silasila a le Alii i vaivaiga nai lo Lana [silasila] i le fouvale.” E le tatau ona tatou masalosalo i le tomai o le Faaola e fesoasoani ia i tatou i o tatou vaivaiga, aua “pe a fetalai mai le Alii e uiga i vaivaiga, e i ai i taimi uma le alofa mutimutivale” [Richard G. Scott, “Malosi Patino e ala i le Togiola a Iesu Keriso,” Liahona, Nov. 2013, 83]. (Dale G. Renlund, “O Lou Natura Paia ma le Taunuuga e Faavavau,” Liahona, Me 2022, 76)

O vitiō nei ua faapupula mai ai tagata taitoatasi o e na liliuina vaivaiga i malosiaga faatasi ai ma le fesoasoani a le Alii.

“Weak Things Become Strong” (1:32)

“Faith Murray’s Story: Overcoming Adversity through Service” (4:52)

“Wheelz: Overcoming Is Possible” (7:13)

“With All Your Heart” (3:26)

Gaoioiga Faaopoopo e Aoao Ai

O faamanuiaga o le o mai ia Keriso

I totonu o tusitusiga paia, tatou te maua ai le valaaulia e o mai ia Keriso. O se tasi o nei tulaga o loo i le Eteru 12:27. Afai o le a manuia tamaiti aoga mai le tilotilo i isi taimi o lenei valaaulia ma faamanuiaga folafolaina, e mafai ona e valaaulia tamaiti aoga e suesue i tusitusiga paia mo le fasifuaitau “o mai ia Keriso” po o le “o mai ia te a’u” e faaaoga ai fesoasoaniga mo suesuega o tusitusiga paia po o le polokalama o le Gospel Library. A latou maua valaaulia, e mafai ona latou faailoa mai pe o a faamanuiaga e oo mai pe a tatou o mai ia Keriso. O nisi o faataitaiga atonu latou te maua e aofia ai le Mataio 11:28–30 ma le 3 Nifae 9:14–15. A o maua e tamaiti aoga nei mau, atonu e te manao e lisi ia faamanuiaga i luga o le laupapa ma valaaulia tamaiti aoga e talanoaina pe faapefea ona manaomia nei faamanuiaga i olaga o le autalavou i aso nei.

Faataitaiga o le faamalolosia e Keriso e faatoilalo ai vaivaiga

O Mose ma Enoka o ni faataitaiga se lua o tagata taitoatasi o e na liliuina o laua vaivaiga i malosiaga faatasi ai ma le fesoasoani a le Alii. E mafai e tamaiti aoga ona suesue se tasi o nei faataitaiga i fuaitau o mau e o faatasi ai. A o latou suesue, valaaulia i latou e mafaufau loloto i mea o loo aoao mai e nei tala e uiga i le mana o le Faaola ma le tomai e liliu ai o tatou vaivaiga i malosiaga.

Mose (Esoto 4:1, 10–12)
Enoka (Mose 6:31–34)

Fautuaina tamaiti aoga e gauai lelei atu i tali a le Faaola ia Mose ma Enoka e uiga i o laua vaivaiga. Ona mafai lea ona e fesili atu, “O le a sou manatu o le a le fetalaiga a le Faaola ia te oe e uiga i ou vaivaiga?”