Eteru 12:28-41

Iesu Keriso: ‟O Le Puna o le Amiotonu Uma”

E faalagolago i mea tatou te sailia, e mafai ona tatou maua le tele o le lelei po o le tele o le leaga i le lalolagi. Ina ua uma ona iloa le faatafunaga o Sa Iaretō ma molimauina le faatafunaga o Sa Nifae, sa aioi atu Moronae i lana aufaitau uma e saili Iesu Keriso ma faamanuiaga ua Ia ofoina mai. O lenei lesona e mafai ona fesoasoani ia te oe e lagona ai se naunautaiga sili atu e saili Iesu Keriso i lou lava olaga.

Fesoasoani i tamaiti aoga ia iloa faamanuiaga a le Alii i o latou olaga. E faaopoopo atu i le aoaoina atu o mea moni e uiga ia Iesu Keriso, tuu atu i tamaiti aoga ni avanoa e toe manatunatu ai i Lona alofa, mana, ma le alofa mutimutivale. Fautuaina i latou e manatua aafiaga na latou lagonaina ai le mana o le Faaola ma le alofa mutimutivale ua faasafua atu ia i latou po o i latou latou te alolofa i ai. O le faia o lenei mea e mafai ona fesoasoani ai i tagata aoao e o mai atoatoa ai ia Iesu Keriso.

Sauniuniga a le tamaitiiti aoga: Mafaufau e tuu atu i tamaiti aoga se kopi o le aafiaga a Elder Melvin J. Ballard o loo aofia ai i lenei lesona. Valaaulia i latou e o mai saunia e faasoa mai mea na latou aoaoina ma lagonaina e uiga ia Iesu Keriso e ala i le faitauina o le aafiaga a Elder Ballard.

Gaoioiga e Ono Mafai Ona Aoao Ai

Puna

Mafaufau e faaali atu le faauigaga ma le ata lenei.

O se puna ua faauigaina ‟o le puna lea e sau ai pe tuuina mai ai se mea”—mo se faataitaiga, ‟o se vaipuna e puna mai le eleele” (Merriam-Webster.com Dictionary, ‟fountain”).

• Afai na e mauaina se punavai faavavega na tuuina mai ai se tafe faifaipea o soo se mea na e filifilia, o le a se mea e te manao e na te tuuina mai?

Tusi se ata faatopetope o se puna e maua ai mea sa e filifilia, ma faamatala faapuupuu mai pe aisea o le a e manao ai i lena mea.

Fuafua e valaaulia ni nai tamaiti aoga e faasoa puupuu mai a latou ata.

Faitau le Eteru 12:28, ma vaavaai mo le puna na faatatau i ai le Alii ina ua uma ona aoao atu Moronae e uiga i Lona gafatia e liuaina o tatou vaivaiga ia avea ma malosiaga.

• O le a le puna na faatatau i ai le Alii?

• O le a se mea o aoao mai e lenei fuaiupu e uiga i le ala tatou te o mai ai ia Keriso?

O le upumoni e tasi o loo aoao mai e lenei fuaiupu o le faatuatua, faamoemoe, ma le alofa mama e aumaia ai i tatou ia Iesu Keriso, o le Puna o le Amiotonu Uma.

• Aisea ua avea ai ‟le Puna o le Amiotonu Uma” o se faalagiga lelei mo Iesu Keriso?

• O le a sou manatuo le a se mea e te lagona e sau mai ia te Ia i taimi uma?

• O le a sou manatu e faapefea e le atiina a’e o le faatuatua, faamoemoe, ma le alofa mama ona aumaia i tatou ia Iesu?

Mo le gaoioiga fautuaina lenei, mafaufau e tuu tamaiti aoga i ni vaega taitoatolu. Valaaulia tagata taitasi e mafaufau ma faasoa atu se faataitaiga se tasi i la latou vaega.

Lisi nisi o faataitaiga e faapupula mai ai pe faapefea ona avea le Faaola ma Puna o le Amiotonu Uma. O nei faataitaiga e mafai ona aumai mai tusitusiga paia, mai lou olaga, pe mai olaga o tagata e te iloa. Afai e te manaomia se fesoasoani e mafaufau ai i se faataitaiga, e mafai ona e faitau i le tala i le Faaola o i le Mareko 2:1–12 pe matamata i le “Jesus Forgives Sins and Heals a Man Stricken with Palsy” (2:57).

Ua Faamagalo e Iesu Agasala ma Faamalolo se Tagata ma’i Supa

Ua faaali e Iesu e ia te Ia le mana e faamagalo ai agasala ma faamalolo ai tulaga le atoatoa faaletino. Mareko 2:1-12

Mafaufau loloto pe mafai faapefea e nei faataitaiga ona aafia ai ou lagona ia Iesu Keriso. Mafaufau i lou manao i le taimi nei e sau ia Iesu Keriso ma taumamafa i le amiotonu lea e sau mai ia te Ia. Pe o malosi ea lou manao e pei ona e manao i ai? Aisea pe aisea foi e leai ai?

A o faaauau pea ona e suesue, saili upumoni e uiga ia Iesu Keriso ia e mafai ona uunaia lelei ai lou manao ma le tomai e sau ai ia te Ia ma tofo i le amiotonu ua Ia ofoina mai.

Meaalofa e tafe mai ia Keriso

Faitau le Eteru 12:29–37, ma vaavaai mo faamanuiaga ua ofoina mai e Iesu Keriso ia i latou o e o atu ia te Ia ma le faatuatua, faamoemoe, ma le alofa mama.

• O a faamanuiaga na fai mai Moronae e sau mai le sailia o Iesu?

• O le fea o nei faamanuiaga ua e oo i ai po o isi foi a o e saili atu i le Faaola?

• O le fea o nei faamanuiaga e sili ona e tulimatai atu i ai i le mauaina i le lumanai? Aisea?

Saili Iesu

I le faaiuga o le Eteru 12, na faasoa mai ai e Moronae se aafiaga paia sa ia maua. Faitau le fuaiupu 39, ma taumafai e vaai faalemafaufau pe na faape’i lena aafiaga mo Moronae.

Faitau ma mafaufau e faailoga le valaaulia a Moronae i le fuaiupu 41.

• Ina ua mavae le aafiaga na ia faamatalaina i le fuaiupu 39, aisea e te manatu ai o le a ofoina mai e Moronae lenei valaaulia ia i tatou?

E pei o Moronae, na maua e Elder Melvin J. Ballard (1873–1939) o le Korama a Aposetolo e Toasefululua se aafiaga paia ma le Faaola. Faitau lana faamatalaga o lenei aafiaga, ma toe taumafai e vaai faalemafaufau pe na faape’i.

Sa oo ina ou i ai i se tasi afiafi i miti o le po i lena fale paia, le malumalu. Ina ua mavae se vaitau o le tatalo ma le olioli sa faailoa mai ia te a’u e tatau ona ou maua le avanoa e ulu atu ai i se tasi o na potu, e feiloai ma se peresona mamalu, ma, a’o ou ulu atu i le faitotoa, sa ou vaaia, ao nofo i luga o se tulaga maualuga, le tagata aupito sili ona mamalu ua vaai i ai o’u mata pe ua ou vaaia o loo i lalolagi uma e faavavau.

A o ou latalata atu e faailoa atu a’u, sa Ia tu a’e ma laa mai ia te a’u ma aao faaloaloa mai, ma sa ata’ata o Ia a o Ia ta’u lemu mai lo’u igoa. Afai ou te ola seia miliona o’u tausaga o le a le galo lava ia te a’u lena ata’ata. Sa Ia ave a’u i Ona aao ma sogi mai ia te a’u, opo atu a’u i Lona fatafata, ma faamanuia a’u, seia oo ina foliga mai ua liusuavai atu le su o o’u ivi! Ina ua uma, sa ou faapa’u i Ona aao, ma, a o ou mulumuluina ona aao i o’u loimata ma sogi, sa ou vaaia tulaga o fao i aao o le Togiola o le lalolagi. O le lagona sa i ai ia te a’u i le afioaga o Ia o lē ua i ai mea uma i Ona aao, ia maua Lona alofa, Lona mutimuti alofa, ma Lona faamanuiaga sa faapena, afai e mafai ona ou maua lena mea ae na o se muai taula’i mai, o le a ou tuuina atu mea uma ua ia te a’u, mea uma ou te faamoemoe i ai, ia lagona mea sa ou lagonaina i lena taimi!

… Ou te le o vaai nei ia Iesu i luga o le satauro. Ou te le o vaai atu i Lona muaulu ua tuia i mea matuitui po o Ona lima ua masae i fao, ae ua ou vaai ia te Ia o ata’ata, ma aao o loo faaloaloa mai, ma fetalai mai ia i tatou uma: “O mai ia te au!” (Melvin J. Ballard, ‟Ua Ou Iloa o Loo Soifua o Ia,” Ensign, Tes. 2014, 80)

• O le a se mea sa tulaga ese ia te oe mai le aafiaga a Elder Ballard? Aisea?

• O a ni manatu po o ni lagona e uiga i le Faaola e aumaia e aafiaga o Elder Ballard ma Moronae i lou mafaufau?

Ina ia faaiuina le lesona, mafaufau e tuu atu i tamaiti aoga le valaaulia lenei. Atonu e fesoasoani le faasoa atu e uiga i ou lava manaoga e saili Iesu Keriso ma faamanuiaga ua oo mai a o e sailia o Ia.

Mafaufau loloto i mea ua e aoaoina ma lagonaina i lenei aso. O le a le mea na sili ona uunaia ai lou manao e saili Iesu i lou olaga? Tautino atu e faatino soo se uunaiga po o uunaiga na e maua.

Manatu ma Talaaga o Faamatalaga

O le a le alofa mama?

Na aoao mai Elder Marvin J. Ashton (1915-94) o le Korama a Aposetolo e Toasefululua:

O le alofa moni e le o se mea e te foai atua; o se mea e te ausia ma avea ma vaega o oe. Ma a oo ina teufatuina le mana o le alofa mama i lou loto, e le toe tutusa lava oe. …

Atonu o le alofa moni maoae o le a maua pe a tatou agalelei i le tasi ma le isi, pe a tatou lē faamasino atu pe faatusatusa se isi tagata, pe a tatou taumafai e mafaufau i mea sili e uiga i le tasi ma le isi, pe gūgū foi e aua le faia se tala. O le alofa mama o le talia lea o uiga e ese o se tasi, vaivaiga, ma faaletonu; ma onosai i le isi tagata ua ia tuu i tatou i lalo; pe o le tetee atu foi i le lagona o le faaonoono pe a le taulimaina e le isi tagata se mea i se ala atonu sa tatou faamoemoe i ai. O le alofa mama o le musu lea e faaaoga vaivaiga o le isi tagata mo so tatou lelei, ma naunau e faamagalo atu i se tasi ua faatiga mai ia i tatou. O le alofa mama o le faamoemoe lea i mea sili ona lelei mai le tasi i le isi. (Marvin J. Ashton, “The Tongue Can Be a Sharp Sword,” Ensign, Me 1992, 19)

Eteru 12:41 E mafai faapefea ona ou sailia Iesu, ma o a faamanuiaga e mafai ona oo mai pe a ou faia?

Na folafola mai e Peresitene Russell M. Nelson:

Afai e te faaauau ona aoao mea uma e te mafaia e uiga ia Iesu Keriso, ou te folafola atu ia te oe … o le a faateleina lou tomai e liliu ese ai mai le agasala. O lou naunau e tausi poloaiga o le a siitia. (Russell M. Nelson, “Prophets, Leadership, and Divine Law” [faigalotu i le lalolagi atoa mo talavou matutua, Ian. 8, 2017], broadcasts.ChurchofJesusChrist.org)

Matamata i le “Wise Men Still Seek Him” (3:31) po o le ‟Seek, and Ye Shall Find” mai le faailo taimi 13:59 i le 15:16 e vaai ai i nisi o faataitaiga e mafai ona fesoasoani e tali ai lenei fesili.

Wise Men Still Seek Him

Three modern-day wise men show us that the greatest gift we can give Jesus Christ is the will of our hearts.

"Seek, and Ye Shall Find"

Elaine L. Jack delivers a message titled "Seek, and Ye Shall Find."

Gaoioiga Faaopoopo e Aoao Ai

Eteru 12:36-38 O Le faamasinoga a le Alii

O leEteru 12:36–38 o loo atagia mai ai le upumoni lenei: O le a le faamasinoina i tatou e le Alii mo le amioleaga o i latou o siomiaina i tatou. O le a Ia faamasinoina i tatou e faavae i o tatou lava manaoga ma galuega. Afai e mafai ona manuia tamaiti aoga mai le malamalama atili i lenei upumoni, mafaufau e faasoa atu mea nei.

O Ailama Samita, ina ua uma ona faafalepuipui sese i le Falepuipui o Karefasi, sa ia susueina le itulau i le Eteru 12 i le kopi o le Tusi a Mamona sa ia te ia. O ia ma lona uso o le Perofeta o Iosefa Samita o le a vave ona faamaturo i lena falepuipui mo o laua talitonuga. A o lei faamaturoina i laua, sa faitau e Ailama ia fuaiupu 36–38 (tagai i le Mataupu Faavae ma Feagaiga 135:4–5). Valaaulia tamaiti aoga e faitau ma le faaeteete le Eteru 12:36–38 ma vaavaai mo faamaoniga o le upumoni o loo i luga. Mafaufau e fai atu fesili e pei o nei:

• O le a sou manatu o le a le uiga ia Ailama o fuaiupu 36–38 i lena taimi?

• O a nisi o tulaga na e feagai ai pe e mafai ona e feagai ai lea o le a fesoasoani ai upumoni o loo i nei fuaiupu?

• O a ni mea ua fesoasoani ai nei fuaiupu ia te oe e te malamalama ai e uiga i le Tama Faalelagi ma Iesu Keriso? Aisea e taua ai na upumoni ia te oe?

O uiga o Keriso

E mafai ona manuia tamaiti aoga mai le taulai atili atu i uiga o Iesu Keriso i le Eteru 12:29–41. A uma ona faailoa mai i le Eteru 12:28 le faalagiga o le Faaola ‟o le Puna o le Amiotonu Uma,” valaaulia tamaiti aoga e tusi le ulutala lenei i le ogatotonu o se pepa. I ona autafa, e mafai ona latou lisi ai mea o loo aoao mai e lenei faalagiga e faatatau i uiga o Keriso.

Valaaulia i latou e faitau le Eteru 12:29–41, faailoa mai ni uiga faaopoopo o le Faaola, ma faaopoopo i a latou lisi. Mo se faataitaiga, atonu latou te matauina i le Eteru 12:29 le ala e faamafanafanaina ai i tatou e le Faaola ma o Lona finagalo e amiotonu i taimi uma. E mafai foi ona fesoasoani le faasino atu o aoaoga a Moronae e faapea, o le alofa o le Tama Faalelagi ma Iesu Keriso mo i tatou o le alofa mama lea (tagai i le Eteru 12:32–34). A uma ona fai e tamaiti aoga a latou lisi, valaaulia i latou e saili le fesoasoani a le Alii e atiina ae se tasi o nei uiga e i latou lava.