Eteru 13–15

Faatoilaloina o le Ita

I Lona alofa sili, ua faatagaina ai i tatou e le Tama Faalelagi ia oo i ni lagona eseese i le olaga nei, e pei o le alofa, filemu, faanoanoaga, ma le lē fiafia. O le lagonaina o nei lagona e mafai ai ona tatou aoao. A o faaauau pea ona fouvale Sa Iaretō i le Alii, sa latou faatagaina o latou lagona e taitai atu ai i faaiuga na afua ai le faatafunaga o lo latou nuu. O lenei lesona e mafai ona fesoasoani ia te oe e faatoilalo ai le faaosoosoga e faatino le ita i lou olaga atoa.

Valaaulia tamaiti aoga e faatino mea sa latou aoaoina. Tuu atu i tamaiti aoga ni avanoa e fai ai se fuafuaga e faatino ai mea ua latou aoaoina. Fautuaina i latou ina ia faaauau pea. Fesoasoani ia latou iloa faamanuiaga o le ola i auala faa-Keriso.

Sauniuniga a le tamaitiiti aoga: Mafaufau e valaaulia tamaiti aoga e mafaufau loloto i le uiga o Iesu Keriso o le ‟Aloalii o le Filemu” (Isaia 9:6) ma le uiga mo i tatou o le avea ma Ona soo.

Gaoioiga e Ono Mafai Ona Aoao Ai

O taunuuga o le ita

Faitau pe matamata i le tala lenei, na faasoa mai e Peresitene Thomas S. Monson (1927–2018), o ni uso se toalua sa nonofo faatasi i o laua olaga atoa.

E tele tausaga ua mavae sa ou faitau ai i le lomiga a le Associated Press sa i ai i le nusipepa: O se toeaina na faamatalaina i le falelauasiga o lona uso, lea sa la nonofo faatasi mai lava i lo la talavou, se tamai falelaau e tasi le potu e lata i Canisteo, Niu Ioka, lea ina ua uma se la feupua’iga, sa la vaeluaina loa le potu i se laina sioka, ma sa lei toe sopoia e le tasi le laina pe tautala se upu i le isi talu mai lena aso—62 tausaga ua mavae. Sei tau lava ina mafaufau i le taunuuga o lena ita. (Thomas S. Monson, “Ia Pulea Ou Lagona, Lo’u Uso,” Liahona, Nov. 2009, 68–69)

• O le a se mea ua e aoaoina mai le tala a Peresitene Monson e uiga i le auso e toalua? Aisea e te manatu ai e taua lenei sāvali i le lalolagi i aso nei?

Mafaufau i ou lava lagona ma pe faafia ona e ita. Mafaufau po o fea o tulaga e te ono ita ai ma pe mafai faapefea e lena ita ona faatosinaina ou mafaufauga, amioga, ma sootaga.

O se tulaga maaleale na faatama’iaina e le ita

I le taimi o le perofeta o Eteru, sa matua amioleaga lava tagata. Sa tatau ona nofo Eteru i se ana e lafi ai mai ia i latou o e sa saili e fasioti o ia. Sa faaauau pea ona tau i ai autau. O se tasi o autau sa taitaia e se tupu na igoa ia Korianetuma, ma o le isi sa taitaia i taimi eseese e tagata tetee, e aofia ai se tagata na igoa ia Sareto. Sa lapataia Korianetuma e Eteru ia salamo po o le a faaumatia tagata.

Faitau le Eteru 13:22–31, ma vaavaai pe na faapefea e le ita ona faatosinaina faatinoga a tagata.

• O le a se mea sa e mauaina?

O le faatafunaga o Sa Iaretō ua faapupula mai ai le matautia o le tumau pea i le ita. Na iu ina faamanuiaina Korianetuma ma ana autau i le faatoilaloina o Sareto. Ae o isi na tutulai mai e taitai le au tetee, e aofia ai Sesa. Ina ua mavae le faitau miliona o ona tagata ua maliliu, sa taumafai Korianetuma e taofi le faamasaatoto e ala i le tusia o ni tusi se tele ia Sesa e saili ai le filemu.

Faitau le Eteru 15:5–6, 15–30, ma vaavaai mo le aafiaga o le ita o Sa Iaretō i tagata taitoatasi ma vaega o tagata.

• O a ni auala na aafia ai ia tagata e pei o Korianetuma, Sesa, ma isi ona o le ita? Na faapefea e lo latou ita ona aafia ai tagata na siomia i latou?

O le upumoni e tasi o loo aoao mai e lenei tala o le, ita e mafai ona taitai atu ai i tatou i le faia o filifiliga e faatiga ai i tatou lava ma isi.

Ona o le natura maaleale o le fesili lenei, atonu e sili ai mo tamaiti aoga ona toe manatunatu lemu i ai ma tusi a latou tali i a latou api talaaga.

• O faapefea ona e vaaia le ita o aafia ai sootaga i le va o uo, au taaalo, tagata o le uarota, po o tagata o le aiga?

Na faamalamalama mai e Elder Jeffrey R. Holland o le Korama a Aposetolo e Toasefululua, le mafuaaga e tatau ai ona tatou saili e faatoilalo lagona o le ita ma finauga:

Ua poloai mai Iesu ia tatou “nonofo faatasi i le alofa” [Mataupu Faavae ma Feagaiga 42:45] ma ia “leai ni finauga i totonu ia te outou” [3 Nifae 11:22]. “O le e i ai le agaga o le finauga ua le mai ia te au o ia,” sa Ia lapataia ai sa Nifaē [3 Nifae 11:29]. O le mea moni, i se tulaga maoae, o lo tatou sootaga ia Keriso o le a fuafuaina—pe aafia foi—i a tatou sootaga i le tasi ma le isi. (Jeffrey R. Holland, “O le Galuega o le Faaleleiga,” Liahona, Nov. 2018, 78)

Fesoasoani i tamaiti aoga e mafaufau pe mafai faapefea e le ita ona faatosinaina o latou olaga ma mea e mafai ona latou faia e faatoilalo ai. E mafai ona fesoasoani ni isi o fesili nei.

• Aisea e te manatu ai o ō tatou sootaga ma isi e aafia ai lo tatou sootaga ma Iesu Keriso?

• O le a le mea e faigata ai ona aloese mai le tali atu i le ita?

• E mafai faapefea e Iesu Keriso ona fesoasoani ia i tatou e faatoilalo le ita?

Ina ia fesoasoani i tamaiti aoga ia faailoa mai auala e mafai ona latou sailia ai le fesoasoani a le Alii e faatoilalo ai le ita, e mafai ona e tuu atu ia i latou e faauma se tasi po o gaoioiga uma nei. E mafai ona latou faamaeaina se filifiliga se tasi o se vasega ma le isi filifiliga e fai e le tagata lava ia. Faaali atu faatonuga mo tamaiti aoga e mulimuli ai.

Filifiliga A. O le faataitaiga a le Faaola o le agalelei

Suesue ia lē itiiti ifo ma le tasi se faataitaiga i le soifuaga o le Faaola lea sa mafai lava ona Ia tali atu i le ita ae sa filifili e tali atu i le alofa ma le agalelei. E mafai ona e suesue i Lona Faasatauroga (tagai i le Luka 23:33–43) po o le taimi na aumai ai ia te Ia se fafine na mulilua (tagai i le Ioane 8:1–11).

Valaaulia tamaiti aoga e faasoa mai pe faapefea ona latou mulimuli i faataitaiga a le Faaola. E mafai ona latou mafaufau i se aafiaga ua tuanai ina ua latou faatinoina le ita ma tusifaamaumau i a latou api faamaumau mo suesuega le ala atonu na ese ai le taunuuga pe ana faapea latou te galulue atili e pei o le Faaola.

Filifiliga E. Mulimuli i le faataitaiga a le Faaola o le agalelei

Mo le gaoioiga lenei, fesoasoani i tamaiti aoga ia manatua e tausisia le talafeagai o ata faataitai.

Fatu se ata faataitai ae moni lea e ita ai se tasi i se isi tagata. Faaopoopo nisi o faamatalaga, e aofia ai igoa ma se mafuaaga mo le ita.

Mafaufau e valaaulia tamaiti aoga e tusi a latou ata faataitai i se fasipepa ma ao mai. E mafai ona e iloiloa vave ona faitau lea o ni ata faataitai, valaaulia tamaiti aoga e fautua mai ni auala faa-Keriso e tali atu ai.

I se isi itu, e mafai e tamaiti aoga ona galulue faatasi ma se tasi o le vasega ma faatino le tali atu i a latou ata faataitai.

Valaaulia e aloese mai le ita

Na saunoa mai Peresitene Russell M. Nelson: “E leai ma se tasi o i tatou e mafai ona puleaina malo po o amioga a isi e oo lava i tagata o o tatou lava aiga. Ae e mafai ona tatou puleaina i tatou lava” (“O Le Mana o le Malosiaga Faaleagaga,” Liahona, Me 2022, 97).

Fai se fuafuaga mo mea e mafai ona e faia e pulea ai oe lava ma faatoilalo ai le ita. Atonu e fesootai lau fuafuaga i le ala e te taulimaina ai pe tali atu ai i ni tagata patino. E mafai ona aofia ai auala e mafai ona e mulimuli ai i le faataitaiga a le Faaola. Ia mautinoa e faaaofia ai auala e mafai ona e aapa atu ai i le Tama Faalelagi mo se fesoasoani faalelagi a o lei oo mai po o le taimi foi o tulaga faigata.

Faasoa atu lau molimau o le a fesoasoani le Faaola i tamaiti aoga a o latou sailia Lana fesoasoani i le aloese ma le faatoilaloina o le ita.

Manatu ma Talaaga o Faamatalaga

Ae faapefea pe afai o taumafai se tasi e faaita a’u?

Na saunoa mai Elder David A. Bednar o le Korama a Aposetolo e Toasefululua e faapea:

I le vaevaega ofoofogia o foafoaga uma a le Atua, e i ai mea e galue, atoa ma mea e galueaiina (tagai i le 2 Nifae 2:13–14). Ona o i tatou o atalii ma afafine o lo tatou Tama Faalelagi, ua faamanuiaina i tatou i le meaalofa o le faitalia, o le mana e fai ai au lava faatinoga ma filifiliga. Ina ua faaeeina i le faitalia, o lea o oe ma a’u o sui, o lona uiga o oe ma a’u e tatau ona tatou galulue ae lē tau galueaiina. O le talitonu e mafai e se tasi po o se mea ona faia i tatou ia lē fiafia, ita, tiga, pe matua faaitiitia ai lo tatou faitalia ma faaliliuina ai i tatou i ni mea faitino ina ia galueaiina ai. Peitai i le avea ai ma sui, ua iai ia te oe ma a’u le mana e galulue ai ma filifili pe faapefea ona tatou tali atu i se tulaga e le fiafia pe tiga ai. (David A. Bednar, “E Leai Foi se Mea e Tausuai ai i Latou,” Liahona, Nov. 2006, 90)

O fea se isi mea e mafai ona ou aoao ai e uiga i le ita ma le auala e faatoilalo ai?

Thomas S. Monson, “Ia Pulea Ou Lagona, Lo’u Uso,” Liahona, Nov. 2009, 62–69

‟Handbook for Families: Dealing with Anger and Contention,” Ensign, Set. 1988, 62–65.

Gaoioiga Faaopoopo e Aoao Ai

Eteru 13:1–12. O Le Ierusalema Fou

Ina ia fesoasoani i tamaiti aoga ia malamalama i mea e tutupu i le lumanai, valaaulia i latou e suesue e uiga i le Ierusalema Fou. Na aoao mai Eteru o le a fausia le Ierusalema Fou i le konetineta o Amerika ma o le a faia foi e Ierusalema anamua se matafaioi taua i aso e gata ai. Mafaufau e valaaulia ni tamaiti aoga se toalua e o mai i le laupapa ma ia tofu i la’ua ma se ata o se aai e tusi. E mafai e tamaiti aoga ona faitau le Eteru 13:1–12 ma le Mataupu Faavae o le Faatuatua 1:10, ma vaavaai mo mea e faaigoa ai aai e lua o loo i luga o le laupapa ma pe o afea o le a faatuina ai nei aai.

Fesoasoani i tamaiti aoga ia malamalama o le Ierusalema Fou ma le Ierusalema Tuai, o i latou o e nonofo ai iina o le a faasinasinaina o latou ofu i le toto o le Tamai Mamoe (tagai i le Eteru 13:10–11). O lona uiga, o le a latou maua le atoatoaga o le talalelei, ia papatisoina i le Ekalesia a le Alii e ala i le pule tatau, ma maua le meaalofa o le Agaga Paia.

Aveesea o le mafutaga a le Agaga Paia

Ina ia faapupula le sootaga i le va o le ita ma le aveesea o le mafutaga a le Agaga Paia, valaaulia tamaiti aoga e faasoa mai ni faataitaiga o se taimi na leiloa ai se mea taua ia i latou. Valaaulia i latou e faitau le Eteru 13:14–22; 15:19, ma vaavaai mo mea na leiloloa ia Sa Iaretō ma pe aisea na leiloloa ai. Ona mafai lea e tamaiti aoga ona talanoaina mea e mafai ona fai e toe maua ai le Agaga. E mafai ona e valaaulia i latou e mafaufau i mea o loo latou faia e faatumauina ai le i ai o le Agaga Paia i o latou lava olaga po o mea atonu e manaomia ona latou faia e toe maua ai Lana mafutaga.

Faaolaina i le malo o le Atua

Ina ia fesoasoani i tamaiti aoga ia malamalama i le taua o le vaaiga e faavavau, e mafai e tamaiti aoga ona suesue i faamatalaga faaiu a Eteru. Ina ua uma ona molimauina taua ma le faatafunaga o lona nuu, sa ta’ua e Eteru o le faaolaina i le malo o le Atua o lana taulaiga aupito silisili lea.

I le amataga o le lesona, valaaulia tamaiti aoga e mafaufau i sini taua, manaoga, ma mea e fiafia i ai. E mafai ona latou tusia se ata e suitulaga i a latou sini. A uma ona suesue tamaiti aoga e uiga i taua ma le faatafunaga, valaaulia i latou e faitau le Eteru 15:34, ma vaavaai po o le a le mea na ta’ua e Eteru o le mea aupito sili lea ona taua ia te ia. E mafai e tamaiti aoga ona talanoaina pe mafai faapefea e le mauaina o lenei vaaiga e faavavau, lea e mafai e ala i le Faaola, ona faamafanafanaina Eteru i lenei taimi faigata. Ona mafai lea ona latou tomanatu filemu i a latou lava sini ma vaaiga.