‟Atamai i Aoaoga Faavae: Eteru 12:27—Faatoilaloina o ō Tatou Vaivaiga,” Tusi Lesona a le Faiaoga o le Tusi a Mamona (2024)

“Atamai i Aoaoga Faavae: Eteru 12:27,” Tusi Lesona a le Faiaoga o le Tusi a Mamona

Atamai i Aoaoga Faavae: Eteru 12:27

Faatoilaloina o ō Tatou Vaivaiga

I lau suesuega o le Eteru 12:23–27, ua e aoao ai afai tatou te lotomaualalo ma faatino le faatuatua i le Alii, e mafai ona Ia liliuina o tatou vaivaiga i ni malosiaga. O lenei lesona e mafai ona fesoasoani ia te oe e tauloto ai le mau o le atamai i aoaoga faavae ma le fasifuaitau autu o le mau mo le Eteru 12:27, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni o le olaga.

Tuu atu i tamaiti aoga se taimi e faaaoga ai mataupu faavae o le mauaina o le malamalama faaleagaga. Tuu atu i tamaiti aoga ni faatonuga manino, ona tuu atu lea ia i latou se taimi e faaaoga ai mataupu faavae o le mauaina o le malamalama faaleagaga. Faataga i latou e saili ni tali mo i latou lava. Uunaia tamaiti aoga e liliu atu ma le faatuatua ma faalagolago i le Alii.

Sauniuniga a le tamaitiiti aoga: Valaaulia tamaiti aoga e taumafai e tauloto le Eteru 12:27.

Gaoioiga e Ono Mafai Ona Aoao Ai

O lenei lesona o le fuaitau o le atamai i aoaoga faavae ua mamanuina e aoao atu pe a uma le lesona o le “Eteru 12:23-27,” o le lesona faatatau lea mo le fuaitau o le atamai i aoaoga faavae Eteru 12:27. Afai e manaomia le toe tuu atu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Faamatala ma tauloto

Tuu atu i tamaiti aoga se gaoioiga faigofie e fesoasoani ai ia i latou e faamalamalama le aoaoga faavae o loo aoao mai i le Eteru 12:27. O se tasi lenei o gaoioiga e ono mafai ona fai.

E aunoa ma le tilotilo i le Eteru 12:27, vaai pe mafai ona e faatumuina avanoa o loo misi i lenei fuaiupu e faavae i aoaoga a le Alii ia Moronae:

Afai ou te , , ma , ona faia lea e Iesu Keriso o mea vaivai ia avea ma mea malolosi ia te a’u.

O le a sou manatu o le a le mea e taua mo se tasi e manatua e uiga i lenei fuaiupu?

Fesoasoani i tamaiti aoga e faataitai ona tauloto le mau faasino ma le fasifuaitau autu o le mau. E mafai e tamaiti aoga ona faia le mea lenei i ni paga po o ni vaega toalaiti. Mafaufau e seti se taimi faatapulaa e faamautinoa ai ua lava le taimi o tamaiti aoga e faataitai ai le faaaogaina o mataupu faavae o le mauaina o le malamalama faaleagaga i le vaega “Faataitai le faaaogaina” o le lesona.

Ina ia fesoasoani ia te oe e tauloto le mau faasino ma le fasifuaitau autu o le mau, toefaamanatu mo ni nai taimi ona taumafai lea e tusi mai i lou manatuaga i lau api faamaumau mo suesuega.

Eteru 12:27: “Afai e o mai tagata ia te a’u … ona ou faia lea o mea vaivai ia avea ma mea malolosi ia te i latou.”

Faatusatusa mea na e tusia mai lou manatua i le mau ma le fasifuaitau autu o le mau o i luga, ma faia soo se faasa’oga e manaomia. Taumafai e tusi le mau faasino ma le fasifuaitau autu o le mau faatolu pe faafa pe seia oo ina mafai ona e tusia mai i lou manatua.

Faataitai le faaaogaina

Tuu atu i tamaiti aoga le avanoa e toe faamanatu ai ia mataupu faavae o le mauaina o le malamalama faaleagaga. Mafaufau e valaaulia ni tamaiti aoga se toatolu e tusi taitasi se tasi o mataupu faavae o le mauaina o le malamalama faaleagaga i luga o le laupapa. Valaaulia ni tamaiti aoga faaopoopo e tusi ni faamalamalamaga i autafa o mataupu faavae taitasi mai le mafaufau. Tuu atu i tamaiti aoga ni nai minute e toefaamanatu ai nei mataupu faavae i le parakalafa 5–12 o le Pepa Autu o le Atamai i Aoaoga Faavae (2023) ma faaopoopo i ai soo se faamatalaga atonu na latou misia.

O le gaoioiga lenei ua faamoemoe e fesoasoani i tamaiti aoga e faataitai ai le faaaogaina o mataupu faavae o le mauaina o le malamalama faaleagaga i se vaivaiga talafeagai. E mafai e tamaiti aoga ona faamaea le gaoioiga i le taimi muamua i ni vaega toalaiti, i ni paga, po o se vasega. Ona mafai lea e tamaiti aoga ona toe fai le gaoioiga e le tagata lava ia mo se vaivaiga ese pe sili atu ona patino.

Afai e te manao e faaaoga se ata faataitai, tagai i fautuaga o i le vaega o le ‟Gaoioiga Faaopoopo e Aoao ai” o le lesona.

I lau api faamaumau mo suesuega, lisi ai ni vaivaiga e ono afua ai ona lagona e se talavou le lē gafatia po o le lē agavaa.
Filifili se tasi o nei vaivaiga e te lagona e talafeagai mo le toatele o le autalavou, ma tusifaamaumau pe mafai faapefea e se talavou ona faaaoga mataupu faavae o le mauaina o le malamalama faaleagaga e faatoilalo ai lenei vaivaiga.
O se tasi o auala e faia ai lenei mea o le lisi lea o mataupu faavae taitasi o le mauaina o le malamalama faaleagaga i lau api faamaumau mo suesuega i lalo o vaivaiga na e filifili e taulai i ai. Ona mafai lea ona e lisiina i lalo o mataupu faavae taitasi pe faapefea ona faaaoga i vaivaiga, pe e mafai foi ona e faamaumauina fesili e ono fesili ai se tasi e uiga i le mataupu faavae.

E mafai ona e faaali atu le faataitaiga lenei mo tamaiti aoga. E mafai ona fesoasoani lenei mea ia i latou a o latou faia a latou lava faataitaiga.

Mo se faataitaiga, afai e tatau ona e filifilia se vaivaiga po o se popolega e pei o le ‟E faaalu e le autalavou le tele o le taimi i luga o a latou telefoni,” atonu e foliga faapea lau tusiga i lau api faamaumau:

E faaalu e le autalavou le tele o le taimi i luga o a latou telefoni

Faatino i le Faatuatua

Atonu o i latou o e tauivi ma lenei mea e mafai ona tatalo faapitoa mo se fesoasoani i lenei faafitauli. A o lei tatalo, e mafai ona latou mafaufau loloto po o le a le fesoasoani atonu latou te manaomia mo lena aso. Atonu e mafai foi ona latou tatalo ae latou te lei faaaogaina la latou telefoni.
Ua tuuina mai e le Atua ia i tatou tekinolosi e faamanuia ai o tatou olaga ma fesoasoani ai ia i tatou ma isi ia latalata atili atu ia te Ia; e mafai faapefea ona tatou faaaogaina i lenei auala?
Eteru 12:27: E mafai faapefea ona tatou faaali atu i le Alii tatou te lotomaualalo, faalagolago ia te Ia, ma manaomia Lana fesoasoani e faaleleia ai lenei mea?

Vaaiga e Faavavau

Afai e le faatoilaloina e se tasi lenei mea, o le a faapefea ona aafia ai a latou sootaga i le lumanai, galuega, faavavau, ma isi mea faapena?
O le a se mea ua ou iloa e uiga i le Atua ma Ona tulaga faatonuina? Aisea e taua ai ia te Ia lo tatou faaaogaina o tekinolosi?

Punavai Paia Ua Atofaina

Ou te iloa na saunoa lo’u epikopo e uiga i lenei mea, ma ou te manatua lana talanoa mai e uiga i mea sa ia faia. O le a ou fesili atu ia te ia po o a punaoa sa ia faaaogaina ma mea na fesoasoani ia te ia.

A uma loa, toe faamaea le gaoioiga talu ai. O le taimi lenei ia taulai atu i se vaivaiga patino e te manaomia ai le fesoasoani. O le a lē talosagaina oe e faasoa atu lenei mea i isi.

Mafaufau e tuu atu se taimi mo tamaiti aoga e manatunatu ai i o latou aafiaga ma faasoa mai mea na latou aoaoina mai le gaoioiga i le asō. Molimau atu i le mana ma le manao o le Faaola e fesoasoani ia i tatou ia faaleleia atili ma avea atili e faapei o Ia.

Toefaamanatu le atamai i aoaoga faavae

Faaaoga le gaoioiga toefaamanatu lenei i se lesona o le a e aoao atu i le taimi lava e uma ai le gaoioiga lenei.

Fai atu i tamaiti aoga pe mafai ona latou manatua le fasifuaitau autu o le mau mo le Eteru 12:27. I le avea ai o se vasega, toe fai le mau faasino ma le fasifuaitau autu o le mau, ‟Eteru 12:27: Afai e o mai tagata ia te a’u … ona ou faia lea o mea vaivai ia avea ma mea malolosi ia te i latou,” i ni nai taimi.