Moroni 6

Pag-apil ug Pag-alagad sa Simbahan sa Ginoo

Isip nabunyagan nga mga miyembro sa Simbahan ni Kristo, aduna kitay mga kahigayonan sa pag-apil ug pag-alagad sa nagkalainlaing mga paagi. Sa Moroni 6, gipadayon ni Moroni ang iyang mga instruksiyon sa pagtabang sa pagpalig-on ug pagtukod sa Simbahan. Kini nga leksiyon makatabang kanimo sa pagpaningkamot sa pag-alagad sa uban ug sa pagsunod sa Manluluwas isip usa ka miyembro sa Ang Simbahan ni Jesukristo sa mga Santos sa Ulahing mga Adlaw.

Paningkamot nga mahimong ehemplo sa paghigugma sa uban. Ang Manluluwas makanunayong nagpakita sa Iyang sinsero nga pag-amuma sa matag tawo. Sa imong pag-ugmad og espiritu sa gugma ug pagtahod alang sa imong mga estudyante, ang imong Kristohanong ehemplo makadasig kanila sa pagpasalamat sa usag usa. Dasiga ang mga estudyante sa paglig-on sa usag usa ug pagpangita sa kaayohan sa matag usa.

Pagpangandam sa estudyante: Mahimong andam ang mga estudyante nga mopakigbahin og mga paagi nga ang tanang miyembro sa Simbahan makapalig-on sa usag usa, bisan walay pormal nga calling sa ward o branch.

Mga Posibleng Kalihokan sa Pagkat-on

Mga miyembro sa Simbahan ni Kristo

Ikonsiderar ang pagpakita og hulagway sa kongregasyon sa Simbahan ug hisgoti ang nagkalainlaing mga rason nga gipili sa mga tawo nga mahimong miyembro sa Simbahan sa Manluluwas.

Alang sa mosunod nga kalihokan, ikonsiderar ang pagdrowing og latid [outline] sa usa ka tawo diha sa pisara aron makompleto sa mga estudyante ang kalihokan isip usa ka klase.

Diha sa imong journal sa pagtuon o sa lain nga piraso sa papel, pagdrowing og linya aron matunga ang pahina sa tunga. Sa usa ka bahin, pagdrowing og latid [outline] sa usa ka tawo, nga nagrepresentar nga usa ka miyembro sa Simbahan sa Manluluwas. Himoa nga igo ang gidak-on sa latid [outline] aron makasulat ka sulod sa porma. Sulod sa hulagway nga imong gidrowing, pagsulat og duha o tulo ka mga butang nga imong gibuhat o gipaabot nga buhaton sa pagpangandam alang sa bunyag sa Simbahan. Mahimo nimong ipadayon ang pagdugang sa lista diha sa imong drowing sa tibuok leksiyon.

Sa Moroni 6, gipadayon ni Moroni ang iyang mga pagtulun-an mahitungod sa pagtukod sa Simbahan ug pagpalig-on sa mga miyembro niini. Niini nga kapitulo, atong makat-onan ang pipila sa atong mga tahas ug mga kahigayonan sa paghimo sa buhat sa Ginoo sa Iyang Simbahan.

Basaha ang Moroni 6:1–3, mangita sa unsay gitudlo ni Moroni kon sa unsang paagi ang usa ka tawo makapakita nga sila andam na alang sa bunyag ngadto sa Simbahan ni Kristo. Idugang ang imong nakaplagan sa lista sa sulod sa imong hulagway.

• Sa imong hunahuna sa unsang paagi kini nga mga buhat ug mga kinaiya nag-andam sa usa ka tawo alang sa bunyag?

Si Moroni mitudlo nga sa higayon nga kita mabunyagan, kita “giihap uban sa mga katawhan sa simbahan ni Kristo” (Moroni 6:4). Nahimo kitang mga partisipante sa usa ka organisasyon sa simbahan nga gituyo sa paglig-on ug pagtukod kanato isip mga disipulo ni Jesukristo. Samtang magpadayon ka sa pagtuon sa Moroni 6, hunahunaa kon unsaon nimo pag-alagad ug paglig-on ang uban isip usa ka nabunyagan nga miyembro sa Ang Simbahan ni Jesukristo sa mga Santos sa Ulahing mga Adlaw.

Mga kahigayonan ug mga responsibilidad

Sa palibot sa hulagway nga imong gidrowing kaniadto, isulat ang pipila ka mga panginahanglan, mga paglaom, o mga gusto sa mga miyembro sa Simbahan.

Tabangi ang mga estudyante nga makasabot nga ang pag-ila niini nga mga panginahanglan sa ilang kaugalingon ug sa uban makatabang nila nga makat-on gikan sa sunod nga mga pagtulun-an ni Moroni. Pagpakasensitibo ug pagpasalig sa mga estudyante nga dili sila kinahanglan nga mopakigbahin ang ilang gisulat. Hatagi sila og igong panahon sa pagrekord og daghang mga ideya sa ilang mga drowing.

Isulat diha sa pisara ang mosunod nga dili kompleto nga kamatuoran, nga maghatag og luna sa mga estudyante sa paghuman sa pamahayag sa daghang mga paagi.

Sa laing katunga sa imong pahina sa papel o journal, isulat ang mosunod nga dili kompleto nga kamatuoran: Isip mga miyembro sa Simbahan sa Manluluwas, kita makatabang ug makapalig-on sa usag-usa samtang kita …

Tun-i ang Moroni 6:4–9, mangita og daghang paagi nga mahuman nimo ang pamahayag. Isulat ang imong lista sa nagkalainlaing mga pamahayag diha sa imong papel. Mahimong makatabang ang pagkahibalo nga ang pag-amuma nagpasabot sa pagsuporta o pagdasig sa pagtubo.

Mahimong kompletohon sa mga estudyante ang pamahayag sa daghang mga paagi, lakip ang mosunod:

• paghinumdom sa ubang mga miyembro sa Simbahan (bersikulo 4).

• pag-amuma sa usag-usa sa espirituhanon nga paagi pinaagi sa maayong pulong sa Dios (bersikulo 4).

• pagbantay ug pag-ampo alang sa usag usa (bersikulo 4).

• pagtabang ang usag usa nga mosalig sa Manluluwas ug sa Iyang Pag-ula (bersikulo 4).

• magtigom kanunay aron magpuasa ug mag-ampo nga magkauban (bersikulo 5).

• paglig-on sa usag usa sa espirituhanong paagi (bersikulo 5).

• pag-ambit sa sakramento agig paghinumdom ni Jesukristo (bersikulo 6).

• pasayloa ang uban kon sila maghinulsol (mga bersikulo 7–8).

• pagtudlo ug pag-ampo sumala sa gahom sa Espiritu Santo (bersikulo 9).

Ikonsiderar ang paggamit sa pipila sa mosunod nga mga pangutana aron matabangan ang mga estudyante nga makasabot sa matag responsibilidad ug maghunahuna kon unsaon kini pagtuman. Kini mahimo usab nga usa ka maayong panahon sa pagdapit sa mga estudyante sa pagpakigbahin og dugang nga mga ideya gikan sa ilang pagpangandam sa estudyante.

• Hain niini nga mga buhat ang daw mas sayon alang kanimo? Unsa kaha ang usa ka hagit? Ngano man?

• Unsa kaha ang hitsura niini nga mga buhat diha sa imong klase o korum?

• Sa unsang paagi nga ang pagbuhat niini nga mga kamatuoran makatabang kanimo sa imong mga panginahanglan?

Paghatag ug pagdawat

Mahimong makatabang ang pagpakita sa mosunod nga pamahayag nga basahon og kusog sa usa ka estudyante.

Si Presidente Bonnie L. Oscarson, kanhi Kinatibuk-ang Presidente sa Young Women, nakaobserbar:

Dili lang ta mga tigdawat ug tigkuha sa unsay gitanyag sa simbahan; gikinahanglan kita nga mahimong mga tighatag ug mga tigsangkap. Sa mga young women ug young men, sunod higayon nga naa mo sa [usa ka kalihokan sa kabatan-onan], imbis mo mag-celfon aron motan-aw unsay gibuhat sa inyong mga higala, hunong, tan-aw sa palibot, ug pangutan-a inyong kaugalingon, “Kinsa ang nanginahanglan nako karon?” Tingali ikaw ang hinungdan sa pagtimbaya ug pag-impluwensya sa kinabuhi sa usa ka higala o sa paghatag og pagdasig sa usa ka higala kinsa hilom nga nakigbisog.

Hangyoa ang imong Langitnong Amahan sa pagpakita diha kanimo kadtong naa sa imong palibot nga nanginahanglan sa imong tabang ug pagdasig nimo kon unsay labing maayo nga maserbisyo nimo kanila. Hinumdomi nga ang Manluluwas kasagaran moalagad ngadto sa usa ka tawo matag higayon. (Bonnie L. Oscarson, “Ang mga Panginahanglan nga atong Giatubang,” Liahona, Nob. 2017, 26)

• Unsa sa imong hunahuna ang importante nga hinumdoman gikan sa tambag ni Sister Oscarson, ug ngano?

• Kanus-a nimo nakita ang mga kamatuoran nga gitudlo ni Moroni diha sa buhat? Unsa ang kalainan nga nahimo sa pagbuhat niini nga mga kamatuoran sa kinabuhi sa uban?

• Sa unsang paagi nga ang pagsunod sa tambag ni Moroni makatabang nimo nga mahimong mas mahisama sa Manluluwas?

Alang sa ehemplo sa usa ka batan-ong babaye kinsa migamit sa tambag ni Moroni, tan-awa ang “Mata aron sa Pagtan-aw” gikan sa time code 4:55 hangtod sa 6:55 saChurchofJesusChrist.org.

Kon imong ipakita ang bidyo, ikonsiderar ang paghisgot og mga paagi nga ang batan-ong babaye migamit sa tambag ni Moroni ug misunod sa ehemplo sa Manluluwas.

Akong sunod nga mga lakang

Hatagi ang mga estudyante og igong panahon sa pagpamalandong ug pagrekord sa ilang mga impresyon diha sa ilang mga journal sa pagtuon. Kon itugot sa panahon, dapita ang mga estudyante sa pagpakigbahin sa ilang mga hunahuna ngadto sa klase.

Pamalandongi sa makadiyot ang imong nakat-onan ug gibati karon. Dayon hunahunaa ang paglakaw ngadto sa imong sunod nga miting o kalihokan sa Simbahan. Unsa sa imong hunahuna ang gusto sa Manluluwas nga imong buhaton? Ikonsiderar ang paghimo og mubo nga mga sulat diha sa imong journal sa pagtuon aron sa pagtabang kanimo sa paghinumdom sa giya nga imong nadawat.

Mahimo usab ka nga mangayo og tabang sa Langitnong Amahan diha sa pag-ampo aron makahibalo kinsa ang nagkinahanglan sa imong pagtagad ug tabang. Dapita Siya sa pagtabang kanimo nga makahibalo unsay imong mahimo sa pag-atiman sa ubang mga miyembro sa Simbahan sama sa buhaton sa Manluluwas.

Komentaryo ug Background nga Impormasyon

Unsaon nako pagtabang sa uban nga mobati nga sila sakop sa Simbahan?

Si Presidente Bonnie L. Oscarson, kanhi Kinatibuk-ang Presidente sa Young Women, mitudlo:

Akong batan-ong mga higala, makagarantiya ko nga sa kanunay adunay tawo sa kada miting sa Simbahan nga imong tambongan kinsa magul-anon, kinsa nagsagubang og mga hagit ug nagkinahanglan og usa ka higala, o kinsa mibati nga siya wala maapil. Aduna kay importanteng butang nga mahatag sa kada miting o kalihokan, ug ang Ginoo nagtinguha nga mangita ka diha sa imong mga higala ug dayon mangalagad sama sa Iyang gibuhat. …

Tinuod nga mitambong kita sa atong senimana nga mga miting sa Simbahan sa pag-apil sa mga ordinansa, pagkat-on sa doktrina, ug madasig, apan ang laing importante kaayong rason sa pagtambong mao nga, isip pamilya sa ward ug isip mga disipulo sa Manluluwas nga si Jesukristo, nagbantay ta sa usag usa, nag-awhag sa usag usa, ug nangita og paagi nga makaserbisyo ug makalig-on sa matag usa. (Bonnie L. Oscarson, “Ang mga Panginahanglan nga atong Giatubang,” Liahona, Nob. 2017, 26)

Ikonsiderar ang pagtan-aw sa bidyo nga “Maayong Pag-abot” (1:05), anaa sa ChurchofJesusChrist.org, alang sa mga ideya sa mga paagi sa pagpakita sa uban nga sila adunay dapit sa Simbahan.

Unsa ang akong mahimo kon akong gibati nga ang simbahan dili alang kanako?

Si Presidente Dallin H. Oaks sa Unang Kapangulohan mitambag:

Ang uban moingon nga ang pagtambong sa mga miting sa simbahan wala nakatabang kanila. Ang uban moingon, “Wala koy nakat-onan karon” o “Walay tawo nga mahigalaon kanako” o “nasilo ko.” Ang personal nga mga kasagmuyo kinahanglan dili gayod mopugong kanato gikan sa doktrina ni Kristo, kinsa mitudlo kanato sa pagserbisyo, dili nga serbisyohan. Uban niini sa hunahuna, gihulagway sa laing miyembro ang iyang gitutokan sa pagtambong sa Simbahan:

“Sa mga tuig nga milabay, giusab nako ang akong kinaiya mahitungod sa pagsimba. Dili na ako mosimba alang sa akong kaayohan, apan sa paghunahuna sa uban. Akong gisiguro ang pagpangumusta sa mga tawo kinsa nag-inusarang naglingkod, sa pag-abiabi sa mga bisita, … sa pagboluntaryo alang sa usa ka buluhaton. …

“Sa ato pa, moadto ko sa Simbahan kada semana uban sa tuyo nga mahimong aktibo, dili kay mag-urong lang, ug maghimo og positibo nga kalainan sa mga kinabuhi sa mga tawo.” (Dallin H. Oaks, “Ang Panginahanglan alang sa usa ka Simbahan,” Liahona, Nob. 2021, 24–25)

Mahimo kang motan-aw sa bidyo nga “This Is Church” (1:10), nga anaa sa ChurchofJesusChrist.org, alang sa dugang nga mga ideya kon unsaon sa pagtabang sa uban.

Dugang nga mga Kalihokan sa Pagkat-on

Moroni 6:7–8. “Ingon sa kanunay nga sila maghinulsol ug mangayo og kapasayloan”

Mahimong adunay mga pangutana ang mga estudyante kon nganong ang mga ngalan sa mga miyembro mahimong “pagapapason” ug sa unsang paagi ang proseso sa paghinulsol nag-andam sa mga miyembro sa pagbalik ngadto sa hingpit nga pakigdaitan. Ikonsiderar ang pagpakigbahin sa mga pulong sa Ginoo ngadto ni propeta Alma sa Mosiah 26:29–30. Si Presidente Dallin H. Oaks mipamatuod usab sa maloluy-on ug mahigugmaong katuyoan sa konseho sa pagkamiyembro sa seksiyon II sa “Ang Panginahanglan alang sa usa ka Simbahan” (Liahona, Nob. 2021, 25).

Moroni 6:9. “Subay sa paagi sa mga kalihokan sa Espiritu”

Human mabasa ang Moroni 6:9, ikonsiderar ang paghisgot sa usa o labaw pa sa mosunod nga mga pangutana:

• Unsa nga tahas ang mahimo sa Espiritu Santo sa pagtabang kanimo sa pagtubag sa mga panginahanglan sa ubang mga miyembro? (tan-awa sa bersikulo 9).

• Unsa sa imong hunahuna ang gipasabot nga ang Espiritu Santo “makagiya” kanimo sa pag-alagad sa uban? Unsa kahay hitsura niana sa imong korum o klase?

• Sa unsang paagi sa imong hunahuna ang pagsunod sa Espiritu makatabang kanimo sa pagbuhat sa unsay buhaton sa Manluluwas?

• Unsa nga mga babag ang mahimong makapugong sa imong gibati sa Espiritu sa mga miting ug mga kalihokan sa Simbahan? Unsaon nimo pagtabang sa pagbuntog niini nga mga babag?

Dapita ang andam nga mga estudyante sa pagpakigbahin og mga paagi nga ilang matubag ang mga panginahanglan sa mga miyembro.