Moroni 1

Ako Dili Makalimod kang Kristo

Ang pagkahimong sumusunod ni Jesukristo dili gayod sayon. Duol sa katapusan sa Basahon ni Mormon, si propeta Moroni mipadayag nga ang mga sumusunod ni Kristo gipahamtangan og kamatayon gawas kon sila molimod sa Manluluwas (tan-awa sa Moroni 1:2). Tungod kay si Moroni midumili sa paglimod ni Jesukristo, siya napugos sa paglatagaw bisan asa nga iyang mahimo aron sa pagpangita og kaluwasan ug magpabilin nga nagtagotago gikan sa mga Lamanite. Tingali mibati ka nga nag-inusara sa dihang naningkamot sa pagsunod sa imong hugot nga pagtuo ug magpabiling matinud-anon sa Manluluwas ug sa Iyang Simbahan. Kini nga leksiyon makatabang sa pagdasig kanimo sa pagsunod kanunay ni Jesukristo ug dili molimod Kaniya.

Pagpangutana og mga pangutana nga nagdapit sa lawom nga paghinuktok [introspection]. Mga pangutana nga nagdapit sa mga estudyante sa pagpamalandong sa mga kasulatan, sa ilang kasamtangan nga sitwasyon, sa ilang mga pagbati ngadto sa Manluluwas, o sa paggamit sa mga baroganan nga makadapit sa Espiritu sa pagtudlo kanila.

Pagpangandam sa estudyante: Dapita ang mga estudyante sa paghunahuna og usa ka kasinatian sa dihang sila o ang usa ka tawo nga ilang nailhan misunod ni Jesukristo bisan og mibati sila nga nag-inusara o gibiaybiay.

Mga Posibleng Kalihokan sa Pagkat-on

Pag-atubang sa pagsupak

Paggahin og panahon sa paghunahuna mahitungod sa unsang paagi ikaw kalagmitan molihok kon ikaw gipalibotan niadtong kinsa tingali dili sama sa imong mga sumbanan o pagtuo mahitungod sa Dios.

Ikonsiderar ang pagpakita niini nga dayagram diha sa pisara. Ang laing kapilian mao ang pagbaton og upat ka nagkalainlaing kolor nga mga papel nga kuptan sa mga estudyante atol sa kalihokan. Ang pagbuhat sa ingon mahimong makatabang sa pag-apil sa mga estudyante sa leksiyon.

Ang mga kolor niini nga dayagram makatabang kanimo sa paghanduraw sa nagkalainlaing lebel sa pagsupak nga mahimong atubangon sa usa ka disipulo ni Jesukristo. Ang berde mahimong nagrepresentar nga walay pagsupak. Ang dalag [yellow] ug kahil [orange] mahimong magsugyot sa pagtaas sa mga lebel sa pagsupak, samtang ang pula [red] mahimong simbolo sa labing lisod nga pagsupak.

Human ipaila kon unsa ang girepresentar sa mga kolor sa dayagram, ikonsiderar ang pagpakigbahin og personal nga mga kasinatian o mga kasinatian nga gipakigbahin sa kinatibuk-ang komperensiya diin ang usa ka tawo nag-atubang og pagsupak isip disipulo ni Kristo. Dapita ang mga estudyante sa pagpili sa kolor nga ilang gibati nga labing makahulagway sa gibug-aton sa matag sitwasyon. Makatabang kini sa pagsugod og panag-istoryahanay mahitungod sa pagkamatinud-anon ngadto ni Jesukristo.

Si Presidente Thomas S. Monson (1927–2018) nag-alagad sa militar isip usa ka batan-ong lalaki ug nakasaksi og daghang mga buhat sa kaisog. Iyang gipakigbahin ang mosunod nga ehemplo.

Hunahunaa ang kolor nga imong pilion nga magrepresentar sa lebel sa pagsupak nga nasinati niining batan-ong lalaki. Unsa sa imong hunahuna ang imong buhaton sa susama nga sitwasyon?

Usa niini nga dili gayod nako makalimtan mao ang mahilom nga kaisog sa 18 anyos nga seaman—dili nato kauban sa tinuohan—kinsa wala mahadlok nga mag-ampo. Sa 250 ka mga tawo sa pundok, siya lamang ang moluhod matag gabii sa kilid sa iyang higdaanan, taliwala sa mga dili matuohon nga mobiay-biay niya. Sa pagduko, siya nag-ampo ngadto sa Dios. Wala gayod siya mahadlok. Wala gayod siya magduha-duha. Duna siyay kaisog. (Thomas S. Monson, “Magmakusganon Ka ug Magmaisug,” Liahona, Mayo 2014, 67)

• Unsa ang mipatigbabaw kanimo mahitungod niini nga pananglitan?

• Unsa sa imong hunahuna ang lisod mahitungod sa kanunay nga pagsunod ni Jesukristo? Unsay makatabang kanimo?

Ilista ang ubang mga sitwasyon diin ang pagsunod ni Jesukristo mahimong mahagiton. Sulayi paghanduraw ang piho nga mga detalye ug hunahunaa kon unsang kolor sa dayagram ang labing angay sa matag sitwasyon.

Siyempre, mas sayon ang paghisgot mahitungod sa atong pasalig ngadto ni Jesukristo kay sa pagsunod sa higayon nga kita gihagit. Samtang magtuon ka, tinguhaa ang pagpangita sa kadasig nga imong gikinahanglan aron magpabiling matinud-anon sa imong pagtuo kang Jesukristo ug sa mga sumbanan sa Iyang gipahiuli nga Simbahan.

Si Moroni gipangita sa mga Lamanite

Sa dihang si Moroni gihatagan og responsibilidad sa pagtipig ug pagpreserbar sa mga rekord sa mga Nephite nga katawhan, siya usab nag-atubang og pagsupak.

Basaha ang Moroni 1:1–4, ikonsiderar kon unsaon nimo paggrado ang pagsupak nga iyang giatubang.

Aron matabangan ka nga makakuha og mas maayong ideya kon unsa kaha ang kinabuhi ni Moroni, mahimo ka usab nga motan-aw sa “Si Moroni Nagdapit sa Tanan sa Pagduol ngadto kang Kristo” gikan sa time code 0:00 to 3:59, anaa sa ChurchofJesusChrist.org.

• Unsa ka grabe ang imong paggrado sa pagsupak ni Moroni?

• Unsa ang atong makat-onan gikan sa ehemplo ni Moroni?

Usa ka kamatuoran nga atong makat-onan mao nga kita mahimong magmatinud-anon kang Jesukristo sa bisan unsa nga kahimtang ug dili molimod Kaniya.

Ikonsiderar ang pagsulat niini nga kamatuoran diha sa pisara. Niining paagiha makita kini sa mga estudyante samtang magbasa sila og nagkalainlaing mga ehemplo sa mga tawo nga nagpuyo niini nga kamatuoran.

• Ngano nga importante alang kanato nga magmatinuoron, o maunongon, kang Jesukristo?

• Unsa sa imong hunahuna ang mga kasinatian ni Moroni nga nakatabang kaniya nga hilabihan nga magmaunongon kang Jesukristo?

• Unsa ang imong nahibaloan mahitungod ni Jesukristo nga makadasig kanimo sa dili paglimod Kaniya?

Ikonsiderar ang pagmarka sa mga pulong ni Moroni sa bersikulo 3. Mahimo usab nimong irekord ang imong ngalan tupad ni Moroni aron makatabang sa pagdasig kanimo sa pagsunod kanunay ni Jesukristo.

Dapita ang mga estudyante sa pagpakigbahin og mga ehemplo sa mga indibidwal diha sa mga kasulatan kinsa matinud-anon kang Jesukristo sa lisod nga mga kahimtang. Ikonsiderar ang paggamit sa pipila sa mga pananglitan sa ubos. Paghatag og konteksto kon gikinahanglan. Tabangi usab ang mga estudyante nga makaila nga si Jesukristo kanunay nga maunongon ug tinuod. Siya kinabubut-ong nagpakamatay alang sa matag usa kanato.

• Reyna Ester (tan-awa sa Ester 4:16)

• Shadrach, Meshach, ug Abed-nego (tan-awa sa Daniel 3:17–18)

• Abinadi (tan-awa sa Mosiah 17:20)

• Joseph Smith (tan-awa sa Doktrina ug mga Pakigsaad 135:4–5)

• Ang mga anak nga babaye ni Onitah (tan-awa sa Abraham 1:11)

Pagpakita sa atong pasalig

Kini tingali usa ka maayong panahon alang sa mga estudyante sa pagreport sa ilang mga pagpangandam alang sa klase. Makatabang ka sa mga estudyante sa pagbuhat niini pinaagi sa pagpangutana sama sa mosunod.

• Kanus-a ka o ang usa ka tawo nga imong nailhan nakapakita og pasalig kang Kristo sa lisod nga mga kahimtang?

  Ikonsiderar ang pagpatubag sa mga estudyante sa mosunod nga mga pangutana diha sa ilang mga journal sa pagtuon.

• Aduna bay bisan unsang mga kahimtang diin ikaw nag-atubang og pagsupak tungod sa pagsunod kang Jesukristo?

• Unsa ang imong mahimo aron magmatinuoron kang Jesukristo niana nga mga kahimtang?

Aron matabangan ang mga estudyante sa pagpamalandong sa unsay ilang nakat-onan niini nga leksiyon, ikonsiderar ang pagdapit kanila sa paghimo og poster o post sa social media nga makadasig kanila ug sa uban nga magpabiling matinud-anon kang Kristo sa bisan unsang kahimtang. Mahimo nila kining ibutang sa usa ka dapit alang sa personal nga kadasig o ipakigbahin kini sa uban. Ihatag ang mga materyal nga gikinahanglan sa mga estudyante ug ang mga instruksiyon alang niini nga kalihokan. Kon mahimo, ipakita ang bag-ohay lang nga ehemplo gikan sa Alang sa Kalig-on sa mga Kabatan-onan nga magasin. Sa ubos mao usa ka ehemplo.

Mahimong magsugod ang mga estudyante pinaagi sa pagpangita og hulagway nga magamit diha sa “Mga Koleksiyon sa Hulagway” nga seksiyon sa www.ChurchofJesusChrist.org/media. Dayon tabangi ang mga estudyante sa pagpangita sa mga kasulatan nga mahitungod sa pagkamatinuoron kang Jesukristo aron ilakip sa ilang mga mensahe. Mahimo silang mogamit og bersikulo gikan sa Moroni 1, usa ka kasulatan nga ilang kaugalingong nakaplagan, o usa gikan sa lista nga imong gihatag sama sa mosunod.

• Josue 1:9

• Mga Taga-Roma 1:16

• Mosiah 18:8–9

• 3 Nephi 12:10–12

• “Pasalig” diha sa Topical Guide

Hatagi ang mga estudyante og igong panahon sa paghimo sa ilang post o poster, ug tugoti sila sa pagpakigbahin sa unsay ilang gibuhat ngadto sa ilang mga klasmeyt. Hinumdomi sa pagpangita og mga paagi sa paghimo og luwas nga palibot diin ang mga estudyante makahibalo nga unsa ang ilang gibuhat gihatagan og bili ug makahuloganon.

Komentaryo ug Background nga Impormasyon

Sa unsang paagi ako magmatinuoron kang Jesukristo ug mobarog alang sa akong mga gituohan?

Ang mosunod nga mga artikulo ug mga bidyo naghatag og mga pananglitan nga makatabang sa pagtubag niini nga pangutana.

• “Pagbarog, Pagsulti, ug Pagsidlak”

• “Ang mga tawo nagbiaybiay kanako sa pagbarog alang sa unsay matarong, bisan sa mga kalihokan sa Simbahan. Unsay akong mahimo?”

• “Pagbarog Alang sa Atong Gituohan”

• “Pagpangandam ni Joseph F. Smith: Di Matarog sa Pagkamaunungon, Sa Hingpit” (1:31)

• “Duol ngari Kanako, O Balay ni Israel” (gikan sa time code 0:00 hangtod sa 3:05)

Unsaon nako pagpakamatinud-anon ngadto kang Jesukristo taliwala niadtong dili motuo?

Si Elder Neil L. Andersen sa Korum sa Napulog Duha ka Apostoles mitudlo:

Samtang ang uban mibaliwala sa ilang hugot nga pagtuo, ang uban nangita sa kamatuoran. Kita midala diha sa atong mga kaugalingon sa ngalan sa Manluluwas. Unsa pay atong buhaton? …

Kamo ug ako naghisgot bahin ni Jesukristo, apan kita makahimo kanunay og mas maayo pa. Kon ang kalibotan dili kaayo maghisgot mahitungod Kaniya, kinsa ang maghisgot og dugang mahitungod Kaniya? Kita! Uban sa laing mahalaron nga mga Kristiyano! …

Samtang ang kalibotan maghisgot og gamay ni Jesukristo, maghisgot kita og daghan bahin Kaniya. Samtang ang atong tinuod nga kinaiya isip Iyang mga disipulo mapadayag, daghan sa naglibot nato ang maandam sa pagpaminaw. Samtang kita mopaambit sa kahayag nga atong nadawat gikan Kaniya, ang Iyang kahayag ug ang Iyang balaan nga makaluwas nga gahom modan-ag niadtong andam nga moabli sa ilang mga kasingkasing. Si Jesus miingon, “Mianhi … ko [ingon] nga kahayag sa kalibotan” [Juan 12:46]. (Neil L. Andersen, “Kita Naghisgot kang Kristo,” Liahona, Nob. 2020, 88–90)

Si Elder D. Todd Christofferson sa Korum sa Napulog Duha ka Apostoles miingon:

Sa pagpatunhay sa kalig-on ug pagkamakanunayon sa hugot nga pagtuo kang Kristo magkinahanglan nga ang ebanghelyo ni Jesukristo modulot sa kasingkasing ug kalag sa usa ka tawo, nagpasabot nga ang ebanghelyo mahimong dili lamang usa sa daghang mga impluwensya sa kinabuhi sa tawo apan ang makahuloganong pagtutok sa iyang kinabuhi ug kinaiya. …

Kadaghanan nato makakita sa atong kaugalingon niining duha ka nagkalahi nga sitwasyon tali sa nadasig nga moapil sa mga tulumanon sa ebanghelyo tungod sa sosyal nga mga konsiderasyon apan mapakaaron-ingnon sa pagbuhat sa mga butang nga may kalabotan sa ebanghelyo ug sa laing bahin ang hingpit nga paglambo sa Kristohanon nga pasalig ngadto sa kabubut-on sa Dios. Niining duha ka nagkalahi nga sitwasyon, ang maayong balita sa ebanghelyo ni Jesukristo mosulod sa atong kasingkasing ug moangkon sa atong kalag. Tingali dili kini mahitabo diha-diha, apan kita kinahanglan nga nagpaingon nianang bulahan nga kahimtang. (D. Todd Christofferson, “Lig-on ug Makanunayon diha sa Hugot nga Pagtuo kang Kristo,” Liahona, Nob. 2018, 31–32)

Dugang nga mga Kalihokan sa Pagkat-on

Moroni 1:1–4. Si Joseph Smith wala molimod ni Kristo

Makabenepisyo ang mga estudyante gikan sa paghisgot mahitungod ni Joseph Smith isip usa ka ehemplo sa usa ka tawo nga matinud-anon kang Jesukristo. Bisan tuod siya gibiaybiay tungod sa pag-ingon nga siya nakakita sa Langitnong Amahan ug ni Jesukristo, si Joseph miingon nga siya “dili makalimod niini” (Joseph Smith—Kasaysayan 1:25). Si Joseph Smith nagpabilin nga matinud-anon sa Dios sa tibuok niyang kinabuhi ug gibugkos ang iyang pagpamatuod uban sa iyang dugo sa dihang siya gipatay sa Carthage (tan-awa sa Doktrina ug mga Pakigsaad 135).

Ikonsiderar ang pagpakita sa “Pagpamatuod sa Basahon ni Mormon” (4:39), diin si Elder Jeffrey R. Holland sa Korum sa Napulog Duha ka Apostoles mihulagway sa dili matarog nga hugot nga pagtuo ug pasalig ni Joseph Smith kang Jesukristo.

Mga ehemplo sa pag-ampo ug pagsupak

Human sa pagpakigbahin sa istorya ni Presidente Monson mahitungod sa batan-ong marinero kinsa nag-ampo matag gabii, dapita ang mga estudyante sa pagpamalandong sa mosunod nga mga pangutana: Unsa ka lagmit ka mag-ampo kon ikaw nag-inusara, uban sa uban, o uban niadtong mobiaybiay kanimo? o kon pagasilotan ka tungod sa pag-ampo? Basaha ug hisgoti ang Daniel 6:7–10 o Mosiah 24:11–12 alang sa mga ehemplo sa dihang ang mga disipulo ni Kristo gihulga sa kamatayon kon sila mag-ampo ngadto sa Dios. Unsa ang atong makat-onan gikan niini nga mga ehemplo?