Moroni 1–6

Kinatibuk-ang Pagpasabot

Tungod kay si Moroni midumili sa paglimod ni Jesukristo, napugos siya sa paglatagaw sa kamingawan nga mag-inusara ug magpabilin nga nagtagotago gikan sa mga Lamanite. Sa pipila sa iyang kataposang mga pulong ngadto sa umaabot nga mga henerasyon, mitudlo siya mahitungod sa awtoridad sa pagpahigayon sa mga ordinansa sa pagkapari. Sa pagbuhat niini iyang gipreserbar ang importante nga mga kamatuoran kon sa unsang paagi gigamit ang pagkapari, ug mihatag usab siya og mga instruksiyon sa pagtabang sa pagpalig-on ug pagtukod sa Simbahan.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Moroni 1

Katuyoan sa leksiyon: Kini nga leksiyon makatabang sa pagdasig sa mga estudyante nga mosunod kanunay ni Jesukristo ug dili molimod Kaniya.

• Pagpangandam sa estudyante: Dapita ang mga estudyante sa paghunahuna og usa ka kasinatian sa dihang sila o ang usa ka tawo nga ilang nailhan misunod ni Jesukristo bisan og mibati sila nga nag-inusara o gibiaybiay.

• Sulod nga ipakita: Usa ka dayagram sa mga kolor, o mga papel alang sa mga estudyante sa lunhaw [green], dalag [yellow], kahil [orange], ug pula [red]; mga ehemplo sa mga poster o mga post sa social media nga makadasig sa mga estudyante nga magmatinuoron kang Jesukristo

• Mga Bidyo: “Magmakusganon Ka ug Magmaisug” (16:18; tan-awa gikan sa time code 5:41 hangtod sa 6:22); “Si Moroni Nagdapit sa Tanan sa Pagduol ngadto kang Kristo” (8:37; tan-awa gikan sa time code 0:00 hangtod sa 3:59)

• Sugyot sa pagtudlo pinaagi sa videoconference: Sa dihang maghisgot sa pagsupak nga mahimong atubangon sa mga disipulo ni Kristo, ikonsiderar ang pagpaapil sa tanang estudyante sa pipila ka paagi. Mahimo nimong hangyoon ang mga estudyante nga isulat diha sa chat ang kolor nga labing naghulagway sa matag sitwasyon. Mahimo usab nimong tugotan ang mga estudyante nga mangolekta og mga butang sa upat ka mga kolor sa ilang kwarto, o gamiton ang background nga feature aron ipakita ang lunhaw [green], dalag [yellow], kahil [orange], ug pula [red].

Moroni 2–3

Katuyoan sa leksiyon: Kini nga leksiyon makatabang sa mga estudyante nga makasabot sa awtoridad sa pagkapari sa Simbahan sa Manluluwas.

• Pagpangandam sa estudyante: Ikonsiderar ang pagdapit sa mga estudyante sa pagpakigsulti sa usa ka naghupot sa pagkapari o sa usa ka tawo nga nag-alagad sa usa ka calling sa Simbahan. Mahimong pangutan-on sa mga estudyante kana nga indibidwal kon unsay iyang gibati mahitungod sa pagdawat sa awtoridad sa Manluluwas sa pagbuhat sa iyang mga responsibilidad.

• Leksiyon nga naggamit og usa ka butang: Usa ka kopya sa linya sa awtoridad sa pagkapari; usa ka kadena

• Sugyot sa pagtudlo pinaagi sa videoconference: Aron madasig ang pag-apil, mahimo nimong dapiton ang mga estudyante sa paggamit sa whiteboard nga feature sa paglista og mga paagi nga ang Espiritu Santo mipanalangin sa ilang mga kinabuhi. Mahimo dayon nimong dapiton ang pipila ka mga estudyante sa pagpakigbahin og personal nga mga kasinatian.

Moroni 4–5

Katuyoan sa leksiyon: Kini nga leksiyon makatabang sa mga estudyante sa pagtuman sa pakigsaad nga ilang gihimo kon mopakigbahin sila sa sakramento aron makabaton sila sa Espiritu sa Ginoo uban kanila.

• Pagpangandam sa estudyante: Ikonsiderar ang pagdapit sa mga estudyante nga motambong sa klase nga andam sa pagsaysay sa mga pag-ampo sa sakramento gikan sa panumdoman kutob sa ilang mahimo.

• Sulod nga ipakita: Ang tsart nga giulohan og “Ang Pakigsaad sa Sakramento”

• Sugyot sa pagtudlo pinaagi sa videoconference: Ikonsiderar ang pagbahin sa mga estudyante ngadto sa tulo ka mga breakout room aron hisgotan ang usa sa tulo ka mga saad nga atong gihimo kon kita moambit sa sakramento. Mahimo dayon nimong ibutang ang mga estudyante ngadto sa bag-ong mga grupo sa breakout uban sa mga estudyante nga nagtuon sa usa sa ubang mga saad. Dapita ang mga estudyante sa pagtudlo sa usag usa mahitungod sa saad nga ilang gihisgotan uban sa ilang orihinal nga grupo.

Moroni 6

Katuyoan sa leksiyon: Kini nga leksiyon makatabang sa mga estudyante nga maningkamot sa pag-alagad ngadto sa uban ug sa pagsunod sa Manluluwas isip mga miyembro sa Ang Simbahan ni Jesukristo sa mga Santos sa Ulahing mga Adlaw.

• Pagpangandam sa estudyante: Mahimong andam ang mga estudyante nga mopakigbahin og mga paagi nga ang tanang miyembro sa Simbahan makapalig-on sa usag usa, bisan walay pormal nga calling sa ward o branch.

• Hulagway: Usa ka nagkalainlaing mga tawo nga kongregasyon sa Simbahan

• Mga Bidyo: “Ang mga Panginahanglan nga atong Giatubang” (12:06; tan-awa gikan sa time code 7:40 hangtod sa 8:25); “Mata aron sa Pagtan-aw” (9:44; tan-awa gikan sa time code 4:55 hangtod sa 6:55)

• Sugyot sa pagtudlo pinaagi sa videoconference: Dapita ang mga estudyante sa paggamit sa chat nga feature sa pagpakigbahin sa mga baroganan nga ilang nailhan sa Moroni 6:4–9.

Rebyo 25 sa Doktrinal nga Kahanas

Katuyoan sa leksiyon: Kini nga leksiyon maghatag sa mga estudyante og kahigayonan sa pagpraktis sa paggamit sa mga tudling sa doktrinal nga kahanas sa ilang mga tumong nga mahimong mahisama sa Manluluwas.

• Pagpangandam sa estudyante: Ikonsiderar ang pagdapit sa mga estudyante sa pagpakigsulti sa ilang mga ginikanan o sa usa ka lider sa Simbahan mahitungod sa mga tumong nga ilang gitakda. Mahimo nilang hisgotan ang mga kalamposan ug mga hagit nga ilang nasinati.

• Sulod nga ipakita Usa ka kopya sa Personal nga Kalamboan: Giya nga Basahon sa Kabatan-onan