Moronae 6

Auai ma Auauna Atu i le Ekalesia a le Alii

I le avea ai ma tagata papatisoina o le Ekalesia a Keriso, ua tatou maua avanoa e auai ai ma auauna atu i le tele o auala eseese. I le Moronae 6, na faaauau ai e Moronae ana faatonuga e fesoasoani e faamalosia ma fausia ai le Ekalesia. O lenei lesona e mafai ona fesoasoani ia te oe e taumafai ai e auauna atu i isi ma mulimuli i le Faaola o se tagata O Le Ekalesia a Iesu Keriso o le Au Paia o Aso e Gata Ai.

Taumafai e avea ma se faataitaiga o le alofa atu i isi. Sa faaalia pea lava pea e le Faaola Lana tausiga faamaoni mo tagata taitoatasi. A o e atiina a’e se agaga o le alofa ma le faaaloalo mo au tamaiti aoga, o lau faataitaiga faa-Keriso e mafai ona musuia ai i latou e talisapaia e le tasi le isi. Fautuaina tamaiti aoga e atia’e e le tasi le isi ma vaavaai mo le lelei i tagata uma.

Sauniuniga a le tamaitiiti aoga: E mafai ona o mai saunia tamaiti aoga e faasoa mai ni auala e mafai ai e tagata uma o le Ekalesia ona faamalosia le tasi ma le isi, e tusa lava pe leai se valaauga aloaia i se uarota po o se paranesi.

Gaoioiga e Ono Mafai Ona Aoao Ai

Tagata o le Ekalesia a Keriso

Mafaufau e faaali atu se ata o se faapotopotoga a le Ekalesia ma talanoaina mafuaaga eseese e filifili ai tagata e avea ma tagata o le Ekalesia a le Faaola.

Mo le gaoioiga lenei, mafaufau e tusi se auivi o se ata o se tagata i luga o le laupapa ina ia mafai ai e tamaiti aoga ona faamae’a le gaoioiga o se vasega.

I lau api faamaumau mo suesuega po o se isi fasipepa, tusi ai se laina e vaelua ai le itulau i le afa. I le tasi afa, tusi ai se auivi o se ata o se tagata, e fai ma sui o se tagata o le Ekalesia a le Faaola. Ia lava le telē o le ata e mafai ona e tusitusi ai i totonu. I totonu o le ata na e tusia, tusi ai ni mea se lua pe tolu na e faia pe o le a faamoemoe e fai e saunia ai mo le papatisoga i totonu o le Ekalesia. Atonu e te manao e faaauau pea ona faaopoopo i le lisi i lau ata i le aluga o le lesona.

I le Moronae 6, na faaauau ai e Moronae ana aoaoga e uiga i le fausiaina o le Ekalesia ma le faamalosia o ona tagata. I le mataupu lenei, tatou te aoao ai i nisi o a tatou matafaioi ma avanoa i le faatinoina o le galuega a le Alii i Lana Ekalesia.

Faitau le Moronae 6:1–3, ma vaavaai mo mea na aoao mai e Moronae e uiga i le ala e mafai ai e se tagata ona faaali atu ua latou saunia mo le papatisoga i le Ekalesia a Keriso. Faaopoopo mea e te maua i le lisi i totonu o lau ata.

• O le a sou manatu e faapefea ona saunia e nei amioga ma uiga se tagata mo le papatisoga?

Na aoao mai Moronae o le taimi lava tatou te papatiso ai, ua “faitauina i tatou i totonu o tagata o le ekalesia a Keriso” (Moronae 6:4). E avea i tatou ma tagata auai i se faalapotopotoga a le ekalesia ua faamoemoe e faamalosia ma fausia i tatou o ni soo o Iesu Keriso. A o faaauau pea ona e suesue i le Moronae 6, mafaufau pe mafai faapefea ona e auauna atu ma faamalosia isi o se tagata papatiso O Le Ekalesia a Iesu Keriso o le Au Paia o Aso e Gata Ai.

Avanoa ma tiutetauave

Tusi faataamilo i le ata sa e tusia muamua nisi o mea e manaomia, faamoemoega, po o manaoga o tagata o le Ekalesia.

Fesoasoani i tamaiti aoga ia malamalama o le iloaina o nei manaoga ia i latou lava ma isi e mafai ona fesoasoani ia i latou e aoao ai mai aoaoga e sosoo ai a Moronae. Ia nofouta ma faamautinoa atu i tamaiti aoga e le manaomia ona latou faasoa mai mea na latou tusia. Tuu atu ia lava se taimi ia i latou e faamaumau ai ni manatu se tele i luga o a latou ata.

Tusi le upumoni lē uma lenei i luga o le laupapa, tuu se avanoa mo tamaiti aoga e faauma ai le faamatalaga i ni nai auala.

I le isi afa o lau itulau o le pepa po o le api talaaga, tusi ai le upumoni lē uma lenei: I le avea ai ma tagata o le Ekalesia a le Faaola, e mafai ona tatou fesoasoani ma faamalosia e le tasi le isi a o tatou …

Suesue le Moronae 6:4–9, ma vaavaai mo le tele o auala e mafai ona e faaumaina ai le faamatalaga. Tusi lau lisi o faamatalaga eseese i luga o lau pepa. Atonu e fesoasoani le iloa o le fafagaina o lona uiga o le lagolago pe uuna’ia le tuputupu a’e.

E mafai e tamaiti aoga ona faauma le faamatalaga i ni auala se tele, e aofia ai mea nei:

• manatua isi tagata o le Ekalesia (fuaiupu 4).

• fafaga e le tasi le isi faaleagaga i le afioga lelei a le Atua (fuaiupu 4).

• leoleo ma tatalo mo le tasi ma le isi (fuaiupu 4).

• fesoasoani le tasi i le isi ia faalagolago i le Faaola ma Lana Togiola (fuaiupu 4).

• potopoto soo faatasi e anapopogi ma tatalo faatasi (fuaiupu 5).

• faamalosi le tasi i le isi faaleagaga (fuaiupu 5).

• aai ma feinu i le faamanatuga e manatua ai Iesu Keriso (fuaiupu 6).

• faamagalo atu i isi pe a latou salamo (fuaiupu 7–8).

• aoao atu ma tatalo e tusa ai ma le mana o le Agaga Paia (fuaiupu 9).

Mafaufau e faaaoga nisi o fesili nei e fesoasoani ai i tamaiti aoga ia malamalama i tiutetauave taitasi ma mafaufau pe faapefea ona faataunuuina. E mafai ona avea o se taimi lelei lenei e valaaulia ai tamaiti aoga e faasoa mai manatu faaopoopo mai a latou sauniuniga a le tamaitiiti aoga.

• O le fea o nei faatinoga e foliga mai e faigofie atu mo oe? O le fea atonu o se luitau? Aisea?

• Faamata o a foliga o nei faatinoga i lau vasega po o le korama?

• E mafai faapefea e le faatinoina o nei upumoni ona fesoasoani ia te oe i ou manaoga?

Tuuina atu ma le taliaina

E mafai ona fesoasoani le faaali atu o le faamatalaga lenei mo se tamaiti aoga e faitau leotele.

Na maitauina e Sister Bonnie L. Oscarson, o lē sa avea ma Peresitene Aoao o Tamaitai Talavou:

Ua le na o i tatou o ni e taliaina ma ave mea ua ofoina mai i le lotu; e manaomia foi i tatou ina ia avea ma tagata e tuuina atu ma ni e e sauniaina. Tamaitai talavou ma alii talavou, o le isi taimi e te i ai i [se gaioiga a le autalavou], nai lo o le piki i luga o lau telefoni e vaai po o a mea a au uo o fai, taofi, vaavaai solo, ma fesili ifo ia te oe lava, “O ai o manaomia au i le asō?” Atonu o oe o le ki e aapa atu ma pai atu i le olaga o se paaga pe tuuina atu se faamalosiauga i se uo o loo tauivi le leoa.

Ole atu i lou Tama Faalelagi e faaali mai ia te oe i latou o siomia oe o manaomia lau fesoasoani ma uunaia oe i le auala sili e auauna atu ai ia i latou. Ia manatua sa masani lava ona auauna atu le Faaola i se tagata e toatasi i le taimi. (Bonnie L. Oscarson, “O Manaoga i o Tatou Luma,” Liahona, Nov. 2017, 26)

• O le a sou manatu i le mea e taua ona manatua mai le fautuaga a Sister Oscarson, ma pe aisea?

• O anafea na e vaai ai o faatino le upumoni na aoao mai e Moronae? O le a le eseesega na faia e le faatinoina o nei upumoni i olaga o isi?

• E faapefea ona fesoasoani le mulimuli i le fautuaga a Moronae ia te oe ia avea atili e faapei o le Faaola?

Mo se faataitaiga o se tamaitai talavou sa faaaogaina le fautuaga a Moronae, matamata i le “Eyes to See” mai le faailo taimi 4:55 i le 6:55 ChurchofJesusChrist.org.

Afai e te faaalia le vitiō, mafaufau e talanoaina auala na faaaoga ai e le tamaitai talavou le fautuaga a Moronae ma mulimuli i le faataitaiga a le Faaola.

O a’u laasaga e sosoo ai

Tuu atu i tamaiti aoga ia lava se taimi e mafaufau loloto ai ma tusifaamaumau uunaiga i a latou api faamaumau mo suesuega. Afai e lava le taimi, valaaulia ni tamaiti aoga ua loto i ai e faasoa mai o latou manatu i le vasega.

Mafaufau loloto mo sina taimi i mea sa e aoaoina ma lagonaina i le asō. Ona vaai faalemafaufau lea i lou savali atu i le isi a outou sauniga po o gaoioiga a le Ekalesia. O le a sou manatu o le a le mea e ono finagalo le Faaola e te faia? Mafaufau e tusi ni faamatalaga i lau api faamaumau mo suesuega e fesoasoani ia te oe e manatua ai le taitaiga ua e mauaina.

Atonu foi e te manao e saili le fesoasoani a le Tama Faalelagi i le tatalo ia iloa ai po o ai e manaomia lou gauai atu ma le fesoasoani. Valaaulia o Ia e fesoasoani ia te oe ia iloa mea e mafai ona e faia e tausia ai isi tagata o le Ekalesia e pei ona faia e le Faaola.

Manatu ma Talaaga o Faamatalaga

E mafai faapefea ona ou fesoasoani i isi ia lagonaina o i latou o ni tagata o le Ekalesia?

Na aoao mai Peresitene Bonnie L. Oscarson, o lē sa avea ma Peresitene Aoao o Tamaitai Talavou:

A’u uo talavou e, e mafai ona ou faamautinoa atu o le a i ai lava se tasi i sauniga uma a le Ekalesia e te auai ai o loo tuuatoatasi, o loo feagai ma ni luitau ma manaomia se uo, pe o ia lagona e le o faitaulia. Ua ia te oe se mea taua e saofaga atu i sauniga ma gaoioiga uma, ma e finagalo le Alii e te vaavaai solo i lau tupulaga ona auauna atu lea e pei ona Ia faia. …

E moni tatou te auai i a tatou sauniga Lotu i vaiaso taitasi e faatino sauniga, aoao aoaoga faavae, ma ia musuia, ae o le isi mafuaaga taua tele mo le auai o le, i le avea ma se aiga o le uarota ma soo o le Faaola o Iesu Keriso, tatou te vaavaaia le tasi ma le isi, faamalosiau i le tasi, ma saili auala e auauna ma fefaamalosia’i ai le tasi ma le isi. (Bonnie L. Oscarson, “O Manaoga i o Tatou Luma,” Liahona, Nov. 2017, 26)

Mafaufau e matamata le vitiō “Welcome” (1:05), o loo maua i le ChurchofJesusChrist.org, mo manatu o auala e faaali atu ai i isi o loo i ai so latou nofoaga i le Ekalesia.

O le a se mea e mafai ona ou faia pe afai ou te lagona o le ekalesia e lē mo a’u?

Sa fautua mai Peresitene Dallin H. Oaks o le Au Peresitene Sili:

E fai mai nisi o le auai i sauniga faale-ekalesia e le o fesoasoani ia i latou. E fai mai nisi, “Ou te le’i a’oa’oina se mea ananei” po o le “E leai ma se tasi na fiauo ia te a’u” po o le “Sa ou tiga [i se tala].” O ni lē fiafia faaletagata lava ia e lē tatau ai lava ona taofia i tatou mai le mataupu faavae a Keriso, o lē na a’oa’o mai i tatou ia auauna atu [i tagata], ae le o le auauna mai [o tagata]. Faatasi ai ma lenei mea i le mafaufau, sa faamatala ai e se isi tagata le taulaiga o lona auai ai i le Ekalesia:

“I le tele o tausaga ua mavae, sa ou suia ai lo’u uiga faaalia e uiga i le alu i le lotu. Ua ou lē toe alu i le lotu mo a’u lava, ae ua ou mafaufau i isi. Ua fai ma au masani, lou faatalofa i tagata e nonofo na o i latou, ma faafeiloai tagata asiasi mai, … ua ou ofo atu lava a’u e faia se tofiga. …

“‘Pe a faapuupuu ou te alu i le lotu i aso taitasi, ma le faamoemoe ou te toaga, ou te le faatali sei ta’u mai se mea e fai, ma ua ou faia se eseesega lelei i olaga o tagata.” (Dallin H. Oaks, “O Le Manaomia o se Ekalesia,” Liahona, Nov. 2021, 24–25)

Atonu e te manao e matamata le vitiō “This Is Church” (1:10), o loo maua i le ChurchofJesusChrist.org, mo nisi manatu i le auala e aapa atu ai i isi.

Gaoioiga Faaopoopo e Aoao Ai

Moronae 6:7–8. “Ae o soo se taimi sa latou salamo ai ma saili le faamagaloga”

Atonu e i ai ni fesili a tamaiti aoga e uiga i le mafuaaga e ono “soloia” ai igoa o tagata o le ekalesia ma pe faapefea e le faagasologa o le salamo ona saunia tagata e toe foi mai i le faaaumeaina atoatoa. Mafaufau e faasoa atu upu a le Alii i le perofeta o Alema i le Mosaea 26:29–30. Sa molimau mai foi Peresitene Dallin H. Oaks e uiga i faamoemoega alofa mutimutivale ma agaalofa o fono o tagata o le Ekalesia i le vaega II o le, “O Le Manaomia o se Ekalesia” (Liahona, Nov. 2021, 25).

Moronae 6:9. “E tusa ma galuega a le Agaga”

A uma ona faitau le Moronae 6:9, mafaufau e talanoaina se tasi pe sili atu o fesili nei:

• O le a le matafaioi e mafai ona i ai i le Agaga Paia e fesoasoani ai ia te oe e faafetaiaia manaoga o isi tagata? (tagai i le fuaiupu 9).

• O le a sou manatu o le a le uiga e faapea, e mafai e le Agaga Paia ona “taitai” oe i le auauna atu i isi? O le a se foliga o lena mea i lau korama po o le vasega?

• O le a sou manatu e mafai faapefea e le mulimuli i le Agaga ona fesoasoani ia te oe e fai le mea o le a faia e le Faaola?

• O a ni mea faalavefau e ono faalavelaveina ai lou lagonaina o le Agaga i sauniga ma gaoioiga a le Ekalesia? E mafai faapefea ona e fesoasoani e foia nei luitau?

Valaaulia tamaiti aoga e mananao e faasoa mai ni auala e mafai ona latou taulimaina ai manaoga o tagata o le ekalesia.