Seminare
Moronae 1: O Le A Ou Le Faafitia le Keriso

“Moronae 1: O Le A Ou Le Faafitia le Keriso,” Tusi Lesona a le Faiaoga o le Tusi a Mamona (2024)

“Moronae 1,” Tusi Lesona a le Faiaoga o le Tusi a Mamona

Moronae 1

O Le A Ou Le Faafitia le Keriso

Moronae

O le avea ma se soo o Iesu Keriso e le’i faigofie lava. Ina ua lata i le faaiuga o le Tusi a Mamona, sa faailoa mai e le perofeta o Moronae e faapea, na fasiotia soo o Keriso sei vagana na latou faafitia le Faaola (tagai i le Moronae 1:2). Ona sa musu Moronae e faafitia Iesu Keriso, sa faamalosia o ia e alu i soo se mea na te maua ai le saogalemu ma lafi ai mai tagata Sa Lamanā. Atonu na e lagonaina le tuuatoatasi a’o e taumafai e ola i lou faatuatua ma tumau faamaoni i le Faaola ma Lana Ekalesia. O lenei lesona e mafai ona fesoasoani e faaosofia ai oe ia mulimuli pea ia Iesu Keriso ma aua le faafitia o Ia.

Fai ni fesili e valaaulia ai le suesue. O fesili e valaaulia ai tamaiti aoga e mafaufau loloto i tusitusiga paia, o o latou tulaga o i ai nei, o latou lagona i le Faaola, po o le faaaogaina o mataupu faavae e mafai ona valaaulia ai le Agaga e aoao i latou.

Sauniuniga a le tamaitiiti aoga: Valaaulia tamaiti aoga e mafaufau i se aafiaga na latou oo i ai po o se tasi fo’i latou te iloa na mulimuli ai ia Iesu Keriso e ui ina sa latou lagonaina le tuuatoatasi pe na sauāina ai.

Gaoioiga e Ono Mafai Ona Aoao Ai

Fetaia’i ma mea faafeagai

Faaalu sina taimi e mafaufau ai pe faapefea ona e tali atu pe a siomia oe e i latou atonu e lē tutusa o outou tulaga faatonuina po o talitonuga e uiga i le Atua.

Mafaufau e faaali atu le ata lenei i luga o le laupapa. O le isi faiga o le i ai o ni pepa lanu eseese se fa mo tamaiti aoga e uu i luga i le taimi o le gaoioiga. O le faia o lena mea e mafai ona fesoasoani e faaauai ai tamaiti aoga i le lesona.

sikuea lanu meamata, lanu samasama, lanu moli, ma lanu mumu

O lanu o i lenei ata e mafai ona fesoasoani ia te oe e vaai faalemafaufau ai i tulaga eseese o le tetee e ono feagai ma se soo o Iesu Keriso. O le lanumeamata e mafai ona faatusa i le leai o se tetee. O le lanu samasama ma le lanu moli e mafai ona faatusa i ai le faateleina o tulaga o le tetee, ae o le lanu mumu e mafai ona faatusa i le tetee sili ona faigata.

A uma ona folasia atu mea o faatusa i ai lanu o loo i le ata, mafaufau e faasoa atu ni aafiaga patino po o ni aafiaga na faasoa mai i le konafesi aoao lea na feagai ai se tasi ma le tetee i le avea ai ma se soo o Keriso. Valaaulia tamaiti aoga e filifili le lanu latou te lagona e sili ona faamatalaina ai le ogaoga o tulaga taitasi. E mafai ona fesoasoani lenei mea e amata ai se talanoaga e uiga i le faamaoni ia Iesu Keriso.

Sa auauna atu Thomas S. Monson (1927–2018) i le militeli o se alii talavou ma molimauina le tele o faatinoga o le lototele. Sa ia faasoa mai le faataitaiga lenei:

Mafaufau i le lanu o le a e filifili e fai ma sui i le tulaga o le tetee na oo i ai lenei alii talavou. O le a sou manatu e ono faapefea ona e tali atu i lea tulaga?

16:18
Peresitene Thomas S. Monson

O se tasi o ia faataitaiga e le mafai ona galo ia te au o le lototele leleoa o se aliivaa e 18 tausaga le matua—e le o se tasi o lo tatou faatuatuaga—o lē sa le faamaualuga tele e tatalo. Mai le 250 o alii i le militeli, sa na o ia lava le tagata e tootuli i po uma i talaane o lona moega e tatalo, a o faifai ma tauemu atu i ai ē sa le talitonu [i le Atua]. Sa punou pea o ia, ma tatalo atu i le Atua. Sa lei fefe lava o ia. Sa lei popole lava o ia. Sa ia te ia le lototele. (Thomas S. Monson, “Ia Faamalosi ma Loto Tele,” Liahona, Me 2014, 67)

  • O le a le mea e tumatila ia te oe e uiga i lenei faataitaiga?

  • O le a se mea e te lagona e faigata ai le mulimuli pea ia Iesu Keriso? O a ni mea e fesoasoani ia te oe?

Lisi nisi o tulaga e ono luitauina ai le mulimuli ia Iesu Keriso. Taumafai e vaai faalemafaufau i faamatalaga patino ma mafaufau po o le a le lanu o i le ata e sili ona fetaui i tulaga taitasi.

Ioe, e sili atu le faigofie o le talanoa e uiga i la tatou tautinoga ia Iesu Keriso nai lo le mulimuli i le taimi e luitauina ai i tatou. A o e suesue, saili ia maua le uunaiga e manaomia ona e tumau faamaoni i lou talitonuga ia Iesu Keriso ma i tulaga faatonuina o Lana Ekalesia toefuataiina.

Ua sailia Moronae e Sa Lamanā

Ina ua tuuina atu ia Moronae le tiutetauave e tausia ma faasaoina faamaumauga a tagata Sa Nifae, sa fetaia’i foi o ia ma le tetee.

Faitau le Moronae 1:1–4, mafaufau pe faapefea ona e fuaina le tetee sa fetaia’i ma ia.

Ina ia fesoasoani ia te oe ia maua se manatu sili atu pe faape’ī le olaga mo Moronae, e mafai foi ona e matamata i le “Ua Valaaulia e Moronae Tagata Uma ia O Mai ia Keriso” mai le faailotaimi 0:00 i le 3:59, o loo maua ChurchofJesusChrist.org.

8:37

  • O le a le malosi o le a e fuaina ai le tetee na fetaia’i ma Moronae?

  • O le a se mea ua tatou aoaoina mai le faataitaiga a Moronae?

O se upumoni e tasi e mafai ona tatou aoaoina o le, e mafai ona tatou faamaoni ia Iesu Keriso i soo se tulaga ma ia le faafitia o Ia.

Mafaufau e tusi le upumoni lenei i luga o le laupapa. O lenei auala e mafai ai e tamaiti aoga ona vaai i ai a o latou faitau i faataitaiga eseese o tagata o loo ola i lenei upumoni.

  • Aisea e taua ai mo i tatou ona tumau, pe faamaoni, ia Iesu Keriso?

  • O a ni aafiaga e te manatu na oo ia Moronae na fesoasoani ia te ia ia matuā faamaoni ai ia Iesu Keriso?

  • O le a se mea ua e iloa e uiga ia Iesu Keriso o le a uuna’ia ai oe ina ia le faafitia o Ia?

Mafaufau e faailoga upu a Moronae i le fuaiupu e 3. E mafai foi ona e tusia lou igoa i autafa o le igoa o Moronae e fesoasoani e faaosofia ai oe ia mulimuli pea ia Iesu Keriso.

Valaaulia tamaiti aoga e faasoa mai ni faataitaiga o tagata i tusitusiga paia o e sa faamaoni ia Iesu Keriso i tulaga faigata. Mafaufau e faaaoga nisi o faataitaiga nei. Tuu atu se talaaga o mau pe a manaomia. Fesoasoani foi i tamaiti aoga ia iloa o Iesu Keriso e faamaoni ma sa’o i taimi uma. Sa Ia maliu ma le loto i ai mo i tatou taitoatasi.

Faaali atu o la tatou tautinoga

Atonu o se taimi lelei lea mo tamaiti aoga e lipoti mai ai a latou sauniuniga mo le vasega. E mafai ona e fesoasoani i tamaiti aoga e faia lenei mea e ala i le fai atu o se fesili e pei o lenei.

  • O anafea na e faaalia ai po o se tasi e te iloa le tuuto atu ia Keriso i tulaga faigata?

    Mafaufau e tuu atu i tamaiti aoga e tali fesili nei i totonu o a latou api faamaumau mo suesuega.

  • Pe o i ai ni tulaga o loo e feagai ai ma ni tetee mo le mulimuli ia Iesu Keriso?

  • O le a se mea o le a e faia ia faamaoni ai ia Iesu Keriso i na tulaga?

Ina ia fesoasoani i tamaiti aoga e toe manatunatu i mea sa latou aoaoina i lenei lesona, mafaufau e valaaulia i latou e fai se pepa lautele o i ai se sāvali po o se faasalalauga faaagafesootai e mafai ona faaosofia ai i latou ma isi ia tumau faamaoni ia Keriso i soo se tulaga. E mafai ona latou tuuina i se mea mo le faaosofiaga o le tagata lava ia pe faasoa atu i isi. Saunia anomea o le a manaomia e tamaiti aoga ma faatonuga mo lenei gaoioiga. Afai e mafai, faaali atu se faataitaiga talu ai nei mai le mekasini o le Mo Le Malosi o le Autalavou . O loo i lalo ifo se faataitaiga.

pepa lautele o i ai se sāvali e uiga i le Togiola a Iesu Keriso

E mafai e tamaiti aoga ona amata i le su’eina o se ata e faaaoga mai i le “Image Collection” www.ChurchofJesusChrist.org/media. Ona fesoasoani lea i tamaiti aoga e sue mau e uiga i le faamaoni ia Iesu Keriso e faaaofia ai i a latou savali. E mafai ona latou faaaogaina se fuaiupu mai le Moronae 1, o se mau latou te maua e i latou lava, po o se mau mai se lisi e te tuuina atu e pei o nei.

Tuu atu ia lava se taimi i tamaiti aoga e fatu ai a latou pepa lautele o i ai se sāvali, ma tuu atu ia i latou e faasoa mai mea na latou fatuina ma tagata o le latou vasega. Manatua e vaavaai mo auala e fatufatu ai se siosiomaga saogalemu lea e iloa ai e tamaiti aoga o mea na latou faia e taua ma anoa.