Moroni 7:1–19

“Magmakugihon sa Pagpangita diha sa Kahayag ni Kristo”

Mahimong lisod usahay ang pagkahibalo kon unsa ang sakto ug kon unsa ang dili. Apan, ang Dios mihatag og tabang alang kanato. Si Moroni, nga naggamit sa mga pulong sa iyang amahan, midasig kanato sa paggamit sa Kahayag ni Kristo aron makahibalo sa sakto gikan sa sayop. Kini nga leksiyon makatabang kanimo nga mosalig kang Jesukristo sa paghukom tali sa maayo ug sa daotan.

Dasiga ang mga estudyante sa paghunahuna og lawom mahitungod sa mga baroganan sa ebanghelyo. Ang mainampingong pagtuon sa mga kasulatan makadasig sa mga estudyante sa paghinumdom kon sa unsang paagi ang mga baroganan sa ebanghelyo nakaimpluwensiya sa ilang mga kinabuhi. Dapita ang mga estudyante sa paghinumdom sa nangaging mga kasinatian nga nakatabang kanila nga mas maduol ngadto kang Jesukristo.

Pagpangandam sa estudyante: Dapita ang mga estudyante sa pagtambong nga andam nga mopakigbahin kon sa unsang paagi ang mga pagpili nga ilang gihimo naimpluwensiyahan sa ilang pagtuo kang Jesukristo.

Mga Posibleng Kalihokan sa Pagkat-on

Hain nga kuwadro ang mas hayagon og kolor?

Ikonsiderar ang pagsugod sa klase pinaagi sa pagpakita sa mosunod nga hulagway. Dapita ang mga estudyante sa pagtan-aw sa duha ka abohon [gray] nga mga kuwadro ug sa pagsulti ngadto sa ka pares kon hain ang mas hayagon og kolor.

Matingala ka ba nga mahibalo nga ang duha ka abohon [gray] nga mga kuwadro susama ra og kahayagon sa kolor? Ang imong utok nakasabot nga ang duha ka abohon [gray] nga mga kuwadro adunay nagkalainlain nga kahayagon sa kolor tungod sa kahayag o kangitngit nga mga kolor nga nagpalibot kanila.

Imbes basahon ang mosunod nga parapo, ikonsiderar ang pagdapit sa mga estudyante sa pagbasa sa Isaias 5:20 ug hangyoa sila sa pagtandi sa ilusyon sa mga kuwadro ngadto sa panagna ni Isaias mahitungod sa atong panahon.

Sama niini nga ilusyon, mahimong adunay mga sitwasyon diin lisod ang paghimo sa sakto nga mga paghukom. Si Isaias nanagna nga sa kataposang mga adlaw, pipila ka mga tawo “nagangalan sa daotan nga maayo, ug sa maayo nga daotan; [ug] nagabutang sa kangitngit nga ilis sa kahayag, ug sa kahayag nga ilis sa kangitngit” (Isaias 5:20; tan-awa usab sa 2 Nephi 15:20).

Aron matabangan ang mga estudyante sa paghunahuna kon sa unsang paagi nila nakita ang panagna ni Isaias nga natuman sa atong panahon, ikonsiderar ang paghisgot sa usa o sa daghan pa niini nga mga pangutana ngadto sa mga estudyante.

• Unsa ang usa ka paagi nga imong nakita ang mga tawo sa atong panahon nga “nagangalan sa daotan nga maayo ug sa maayo nga daotan”?

• Unsa ang nakapalisod sa usa ka tawo nga dali o klarong makita ang kamatuoran?

Dapita ang mga estudyante sa pagpamalandong sa hilom sa ilang mga tubag sa mosunod nga mga pangutana.

• Unsaon nimo pagtino kon ang usa ka butang sakto o sayop?

• Unsa ka kamasaligon nga ikaw makaila sa maayo gikan sa daotan? Ngano man?

Hunahunaa ang usa ka butang nga gusto nimo nga mas klaro nga mailhan nga maayo o daotan. Pananglitan, ang usa ka tawo tingali maghunahuna nga ang ilang pagpili sa musika maayo, apan ang ilang mga ginikanan mahimong dili mouyon. Kinsa ang sakto? Ang uban pang mga ehemplo mahimong ang pagdesisyon kon unsa nga isyu sa komunidad ang barogan, pagpili kon kinsay mahimong higala, pag-apil og sa usa ka kalingawan, ug uban pa.

Samtang magtuon ka karon, pangitaa kon unsay makatabang kanimo nga makahibalo kon ang usa ka butang maayo o dili.

Ang kalainan tali sa maayo ug daotan

Sama ni Isaias, nakita usab ni Moroni ang atong panahon (tan-awa sa Mormon 8:35). Siya naglakip og tabang alang kanato diha sa Basahon ni Mormon. Human matudlo ang kamahinungdanon sa pagbuhat og maayo nga mga buhat nga adunay tinuod nga katuyoan (tan-awa sa Moroni 7:1–11), iyang girekord ang mga pulong nga gitudlo sa iyang amahan, si Mormon, sa mga miyembro sa Simbahan mahitungod sa paghukom tali sa maayo ug sa daotan.

Basaha ang Moroni 7:12–17, ug ikonsiderar ang pagmarka sa imong nakaplagan alang sa matag pag-aghat sa ubos:

1. Unsaon nato pagkahibalo kon ang usa ka butang maayo

2. Unsaon nato pagkahibalo kon ang usa ka butang daotan

3. Unsa ang gibuhat sa Manluluwas aron sa pagtabang kanato

Kon gibati nimo nga mas epektibo kini, isulat diha sa pisara ang tulo ka mga pag-aghat sa ibabaw ug dapita ang mga estudyante sa pagsulat og tukma nga mga hugpong sa mga pulong nga ilang nadiskobrehan ubos sa matag usa.

• Base sa unsay imong nakaplagan niini nga mga bersikulo, unsaon nimo pagpamubo ang mga baroganan nga gihisgotan?

Gikan sa Moroni 7:12–17 atong madiskobrehan nga ang tanan nga mga butang nga iya sa Dios nagdapit kanato sa pagbuhat og maayo, pagtuo kang Jesukristo, ug paghigugma ug pag-alagad sa Dios. Sa laing bahin, kana nga daotan nagdani kanato sa pagpakasala, paglimod kang Jesukristo, o pagpakig-away batok sa Dios.

Mahimong buhaton sa mga estudyante ang mosunod nga kalihokan nga magtinagsa, diha sa gagmay nga mga grupo, o isip usa ka klase.

Aron matabangan ka nga makasabot sa mga pagtulun-an ni Mormon, hunahunaa nga ang usa ka tawo nagtuo nga ang musika nga ilang gipaminaw ug ang paagi sa ilang paggamit sa ilang telepono ug ubang teknolohiya maayo, apan ang ilang mga ginikanan o mga lider dili mouyon.

• Base sa mga kamatuoran nga imong nahibaloan, unsa ang mahimo nga ipangutana niini nga tawo diha sa iyang kaugalingon aron madiskobrehan kon maayo ba o dili ang iyang paggamit sa musika ug teknolohiya?

Paminawa ang mga tubag sa mga estudyante ug ikonsiderar ang pagsulat niini diha sa pisara. Kon dili kini hisgotan sa mga estudyante, ikonsiderar ang paggamit sa mosunod nga mga ehemplo:

• Ang pagpaminaw ba niini nga musika o ang paggamit sa akong telepono ug teknolohiya sa paagi nga akong gibuhat …

  • … makapuno ba sa ang akong hunahuna og mga ideya sa pagbuhat og maayo o sa pagbuhat og sala?

  • … makadasig ba kanako sa pagbuhat sa mga butang nga buhaton o dili buhaton sa usa ka sumusunod ni Jesukristo?

  • … makatabang ba kanako sa paghigugma sa mga butang sa Dios o dili?

Timan-i nga tingali kinahanglan nimong pamalandongan ang pipila ka mga artist o mga kanta sa tagsa-tagsa, ingon man ang pipila ka mga app, mga dula, o media. Dugang pa, ang gidaghanon sa oras nga imong gigahin sa usa ka kalihokan mahimong usa ka importante nga butang nga ikonsiderar.

Kahayag aron matabangan ka nga makakita

Tingali namatikdan nimo nga sa pipila ka mga sitwasyon mahimong lisod ang paghukom tali sa sakto o sa sayop.

Ikonsiderar ang pagtabang sa mga estudyante nga makasinati sa unsay gihangyo kanila nga ihanduraw sa mosunod nga parapo.

Mahimo kini pinaagi sa pagpalong sa mga suga ug paghangyo sa mga estudyante sa pagsulay sa paghulagway sa usa ka larawan o sa pagbasa og usa ka butang. Dayon pasigaa og balik ang mga suga ug dapita sila sa paghulagway o sa pagbasa niini pag-usab.

Maghunahuna niini nga paghanduraw, bantayi ang mga hugpong sa mga pulong diha sa bersikulo 16 nga nagpakita kon sa unsang paagi kita gitabangan sa Manluluwas.

Basaha ang mosunod nga pamahayag ni Presidente Henry B. Eyring sa Unang Kapangulohan aron matabangan ka nga makasabot sa Kahayag ni Kristo:

Ang matag anak sa Langitnong Amahan nga natawo sa kalibotan gihatagan sa pagkahimugso, isip libre nga gasa, [og] Kahayag ni Kristo. Inyong gibati kana. Mao kini ang pagbati sa unsay sakto ug sa unsay sayop ug sa unsay tinuod ug sa unsay dili tinuod. Diha na kana kaninyo sukad nagsugod ang inyong panaw sa kinabuhi. …

… Kamo mohimo og mga pagpili sa matag adlaw ug hapit sa matag oras nga maoy maghimo kaninyo nga maglakaw diha sa kahayag o modala kaninyo ngadto sa kangitngit. (Henry B. Eyring, “Lakaw diha sa Kahayag,” Liahona, Mayo 2008, 123–124)

• Unsa ang imong nakat-onan mahitungod sa Kahayag ni Kristo?

Alang sa dugang nga impormasyon sa Kahayag ni Kristo, tan-awa sa Gospel Topics, “Light of Christ,” topics.ChurchofJesusChrist.org.

Basaha ang Moroni 7:18–19, mangita og dugang nga tambag nga gihatag ni Mormon mahitungod sa paghukom tali sa maayo ug sa daotan.

• Unsa kaha sa imong hunahuna ang gipasabot sa “magmakugihon sa pagpangita diha sa Kahayag ni Kristo”?

  Paminaw og maayo sa mga tubag sa mga estudyante. Mahimong hisgotan sa mga estudyante ang pagpamalandong sa hilom, paghunahuna sa mga desisyon, ug pagpaminaw sa atong konsensiya o sa tingog sa atong kinahiladman. Ang laing ideya mao ang paghunahuna kon unsay makapaduol kanato kang Jesukristo. Kon mapuslanon, ikonsiderar ang pagpangutana sa pipila sa mosunod nga mga pangutana:

• Sa unsang paagi nga ang ehemplo ug ang mga pagtulun-an sa Manluluwas mahisama sa kahayag nga makatabang kanato sa hustong paghukom tali sa sakto ug sa sayop karon?

• Unsa ang ubang mga paagi nga atong madungog ang Iyang mga pulong ug mabati ang Iyang impluwensiya nga naggiya kanato?

Mahimo usab nga mapuslanon ang pagpangutana, “Kanus-a ka nakaila sa usa ka butang nga maayo o daotan tungod sa kahayag ni Kristo diha sa imong kinabuhi?”

Paggamit sa unsay imong nakat-onan

Hinumdomi ang sitwasyon nga imong gihunahuna kaganena sa dihang gihangyo ka sa paghunahuna og usa ka butang nga gusto nimo nga mas mailhan kon maayo o dili. Paggahin og pipila ka minuto sa mainampoong pagkonsiderar kon unsaon nimo paggamit ang mga baroganan nga imong nakat-onan karon aron sa pagtino kon kini sakto o sayop. Sulayi nga magmakugihon sa pangpangita diha sa Kahayag ni Kristo samtang imong pamalandongan ang sitwasyon. Irekord ang imong mga hunahuna diha sa imong journal sa pagtuon.

Ang mosunod nga mga pangutana mahimong gamiton sa pagtapos sa klase gamit ang panaghisgot mahitungod sa unsay nakat-onan sa mga estudyante.

• Unsa ang imong nakat-onan karon nga makatabang kanimo sa pagpalambo sa imong abilidad sa pagpili tali sa sakto ug sa sayop?

• Sa unsa nga duha o tulo ka bahin sa kinabuhi imong nakita ang panginahanglan sa malamposong pag-ila sa maayo gikan sa daotan? Ngano man?

Komentaryo ug Background nga Impormasyon

Unsay mabuhat sa Kahayag ni Kristo?

Si Elder Timothy J. Dyches sa Seventy mitudlo:

Sa Iyang hingpit nga gugma, ang Dios mihatag sa Kahayag ni Kristo ngadto sa matag tawo “nga moanhi sa kalibotan” [Doktrina ug mga Pakigsaad 93:2] nga sila “masayod sa maayo gikan sa daotan” [Moroni 7:16]ug maaghat “sa paghimo og maayo sa kanunay” [Moroni 7:13]. Kana nga kahayag, nga mismong nagtug-an pinaagi sa unsay atong gitawag sa kanunay og atong konsensiya, nanawag kanato sa paglihok ug pagkahimong mas maayo, aron mahimong pinakamaayo sa atong kaugalingon. (Timothy J. Dyches, “Ang Kahayag Mounong ngadto sa Kahayag,” Liahona, Mayo 2021, 113)

Sa unsang paagi ang Kahayag ni Kristo makatabang kanato ug sa uban?

Si Elder Mark A. Bragg sa Seventy mitudlo:

Ang Kahayag ni Kristo makatabang nga makita nato ang uban pinaagi sa mga mata sa Manluluwas. Mahimo kitang mas mahigugmaon ug masinabtunon sa mga panlimbasog sa uban. Makatabang kini kanato nga mahimong mas mapailobon niadtong tingali dili mosimba o moserbisyo sama kanato. Makatabang kini kanato nga mas masabtan ang mahinungdanong plano sa kalipay ug makita kon sa unsang paagi nga mahaom kitang tanan nianang mahinungdanon nga mahigugmaong plano. Naghatag kini og kinabuhi, kahulogan, ug katuyoan sa tanan natong buhaton. (Mark A. Bragg, “Labaw Kahayag ug Labaw sa Kahayag hangtod sa Hingpit nga Adlaw,” Liahona, Mayo 2017, 38)

Dugang nga mga Kalihokan sa Pagkat-on

Usa ka alternatibo nga pagsugod

Ikonsiderar ang pagpakita og hulagway sa usa ka siyudad o usa ka balay ug dayon balihon kini.

Sultihi ang mga estudyante nga si Elder Richard J. Maynes sa Seventy mihulagway sa atong moderno nga kalibotan isip “nabali” (“ A Celestial Connection to Your Teenage Years,” Liahona, Nob. 1997, 30). Dapita ang mga estudyante sa pagbasa sa Isaias 5:20–21 ug sa pagpakigbahin sa mga paagi diin ang atong kalibotan mahimong nabali.

Ipakigbahin ang mosunod nga pamahayag ni Elder Maynes:

“Samtang ang mga batan-on nagdako niining nabali nga kalibotan, aduna kamoy dako nga hagit sa pag-atubang sa nagkalainlaing mga kabug-at sa modernong adlaw nga kinabuhi” (Richard J. Maynes, “A Celestial Connection to Your Teenage Years,” Liahona, Nob. 1997, 30).

Moroni 7:5–12. Adunay tinuod nga katuyoan

Dapita ang mga estudyante sa pagtubag sa mosunod nga mga pangutana: “Unsa ka importante ang atong katuyoan kon kita maningkamot sa pagbuhat og maayong mga buhat? Ngano man?” Mahimong basahon sa mga estudyante ang Moroni 7:5–12 nga mangita sa mga tubag niini nga mga pangutana. Tabangi ang mga estudyante nga makasabot sa mga pulong ug sa mga hugpong sa mga pulong sama sa “tinuod nga katuyoan” ug “daotan nga buot” nga makahulagway sa atong pasalig sa pagsunod ni Jesukristo o sa kakulang niini. Dapita sila sa paghulagway og mga paagi nga ang usa ka tawo makahimo sa mosunod nga adunay tinuod nga katuyoan: pag-ampo, pagsimba, ug pagserbisyo sa uban. Dapita usab sila sa pagpakigbahin unsa ang mahimo sa usa ka tawo sa pagtinguha sa sakto nga katuyoan kon wala sila niini karon.

Pagtabang sa usa ka tawo nga makahibalo sa maayo gikan sa daotan

Dapita ang mga estudyante sa paghunahuna nga ang Alang sa Kalig-on sa mga Kabatan-onan nga magasin adunay mosunod nga pangutana sa ilang “Mga Pangutana ug mga Tubag” nga seksiyon:

“Ako nasayod nga sayon ang pagsulti kon unsa ang maayo ug kon unsa ang daotan, ug sagad sa panahon mahimo nako. Apan, usahay ang akong mga higala adunay maayo nga mga hinungdan sa pagbuhat ug sa pagtuo sa mga butang nga ilang gibuhat. Unsaon nako pag-ila kon unsay maayo ug kon unsay daotan kon ang linya sa maayo ug sa daotan dili kaayo klaro?”

Dapita ang mga estudyante sa pagsulat og tubag niini nga pangutana. Hatagi ang mga estudyante og igong panahon sa pagtuon sa Moroni 7:12–19 ug dugang nga mga kasulatan o propetikanhong mga pagtulun-an mahitungod sa hilisgotan.