Moroni 8

“Ang Gagmay nga mga Bata Buhi diha kang Kristo”

Sa iyang mga sinulat, si propeta Moroni mipakigbahin og sulat nga gisulat ngadto kaniya sa iyang amahan, si Mormon, mahitungod sa bunyag sa gagmay nga mga bata. Ang mga sinulat ni Mormon bahin sa hilisgotan resulta sa usa ka pagpadayag nga iyang nadawat gikan ni Jesukristo. Ang pagpadayag nagpakita sa gahom sa Pag-ula sa Manluluwas ug sa unsang paagi kini makaapekto sa gagmay nga mga bata. Kini nga leksiyon gituyo aron sa pagtabang kanimo nga mas makasabot kon nganong ang gagmay nga mga bata wala magkinahanglan og bunyag ug unsa ang gitudlo niana kanato mahitungod sa Langitnong Amahan ug ni Jesukristo.

Hatagi ang mga estudyante og mga kahigayonan sa paghisgot sa mga kamatuoran sa ebanghelyo. Paggahin og panahon alang sa mga estudyante sa pagpraktis sa paghisgot mahitungod sa unsay ilang nakat-onan kabahin sa Manluluwas ug sa Iyang ebanghelyo. Makatabang kini sa mga estudyante nga masulod sa ilang alimpatakan [internalize] ug mahinumdoman kini nga mga kamatuoran ug mapahayag kini sa klaro. Kini nga pagbansay makadugang usab sa pagsalig sa mga estudyante nga sila makahimo sa pagpakigbahin sa mga kamatuoran sa ubang mga kahimtang.

Pagpangandam sa estudyante: Mahimo nimong ipakigbahin ang istorya gikan sa sinugdanan sa leksiyon o ang susama niania ug hangyoa ang mga estudyante sa paghunahuna kon unsaon nila sa pagtubag ang sitwasyon.

Mga Posibleng Kalihokan sa Pagkat-on

Unsaon nimo pagtubag?

Ikonsiderar ang pagpakita sa mosunod nga bidyo o ang pagpakigbahin sa istorya sa imong kaugalingong mga pulong.

Basaha ang mosunod nga istorya nga gipakigbahin ni Presidente Boyd K. Packer (1924–2015) sa Korum sa Napulog Duha ka Apostoles, o tan-awa ang “Ug usa ka Bata nga Gamay Maoy Magamando Kanila” gikan sa time code 4:42 hangtod sa 5:59, anaa sa ChurchofJesusChrist.org. Handurawa nga usa ka sa mga misyonaryo diha sa sitwasyon.

Duha ka mga misyonaryo ang nagtrabaho sa kabukiran sa habagatang Estados Unidos. Usa ka adlaw, gikan sa tumoy, nakita nila ang mga tawo nga nagtapok sa hawan sa ubos. Ang mga misyonaryo panagsa ra kakita og mga tawo aron matudloan, busa nanglugsong sila sa hawan sa ubos.

Usa ka batang lalaki ang nalumos, ug ilubong. Ang iyang ginikanan mipatawag og ministro aron “mowali” sa lubong sa ilang anak. Ang mga misyonaryo nagbarog sa luyo sa ministro nga miatubang sa masulub-ong amahan ug inahan ug misugod og wali. Kon nagdahom ang ginikanan nga sila makadawat og kahupayan gikan niining tawhana, masagmuyo lang sila.

Gikasab-an niya sila og maayo kay wala pabunyagi ang bata. Gilangan nila kini kay dunay hinungdan, ug karon ulahi na kaayo ang tanan. Prangka siyang misulti nila nga ang ilang anak tua na sa impyerno. Kadto ilang sayop. Sila ang angayng basulon sa iyang walay kataposang kasakit.

Human sa wali ug ang lubong gitabonan, ang mga elder miduol sa masulub-ong ginikanan. “Mga sulugoon kami sa Ginoo,” miingon sila sa inahan, “ug mianhi kami nga may mensahe alang ninyo.” (Boyd K. Packer, “Ug Usa ka Bata nga Gamay Maoy Magamando Kanila,” Liahona, Mayo 2012, 7)

Gradohi ang imong tubag sa mosunod nga pangutana sa sukdanan nga 1 ngadto sa 4, nga ang (1) dili gayod masaligon, (2) medyo masaligon, (3) masaligon, ug (4) masaligon kaayo.

• Unsa ka kamasaligon paminaw nimo sa pagtudlo ug sa paghupay niining nagsubo nga mga ginikanan ug sa pagtabang kanila nga mobati sa gugma sa Ginoo?

Ang mga estudyante aduna unyay kahigayonan diha sa leksiyon sa pagpakigbahin kon unsaon nila sa pagtubag ang sitwasyon.

Samtang magtuon ka sa Moroni 8, ikonsiderar kon unsaon nimo sa pagtabang kini nga mga ginikanan nga mas makasabot sa Pag-ula ni Jesukristo kalabot sa gagmay nga mga bata. Hunahunaa usab kon sa unsang paagi ang mga kamatuoran gikan sa Moroni 8 mahimong makatabang kanimo nga mas masabtan ang kaayo ug kaluoy sa Langitnong Amahan ug ni Jesukristo.

Ang gagmay nga mga bata walay sala

Bag-o lang nga gitawag sa pangalagad ni Jesukristo, si Moroni nakadawat og sulat gikan sa iyang amahan, si Mormon. Si Mormon misulat ngadto sa iyang “hinigugma nga anak” (Moroni 8:2) nga siya “naghunahuna kanunay [kaniya] sa [iyang] mga pag-ampo” (Moroni 8:3). Iyang gitambagan si Moroni mahitungod sa mga panaglalis nga mitumaw taliwala sa mga Nephite mahitungod sa bunyag sa gagmay nga mga bata. Sa kaulahian sa iyang kinabuhi, si Moroni midugang niini nga sulat ngadto sa iyang talaan diha sa bulawan nga mga palid.

Basaha ang Moroni 8:4–8, mangita kon unsay reaksiyon ni Mormon sa dihang nakadungog siya sa panaglalis.

Dapita ang mga estudyante sa pagpakigbahin og bisan unsang mga ideya nga ilang naangkon gikan niini nga mga bersikulo.

Ikonsiderar ang pagdrowing sa mosunod nga tsart diha sa pisara ug ang pag-organisar sa mga tubag sa mga estudyante ngadto sa tukma nga mga kolum. Hangyoa ang mga estudyante sa pagpakigbahin kon nganong ang ilang mga panabot mahimong mahinungdanon o makahuloganon.

Kopyaha ang mosunod nga tsart ngadto sa imong journal sa pagtuon, ug irekord unsay imong nakat-onan gikan niini nga mga bersikulo. Magdugang ka niini nga tsart sa ulahing bahin niini nga leksiyon.

Ngano nga ang gagmay nga mga bata wala magkinahanglan nga bunyagan	Unsa ang atong nakat-onan mahitungod sa Langitnong Amahan ug ni Jesukristo

Usa ka kamatuoran nga atong makat-onan gikan niini nga mga bersikulo mao nga ang gagmay nga mga bata walay sala pinaagi sa Pag-ula ni Jesukristo.

Usa ka makatabang nga himan sa pagtuon sa kasulatan mao ang paggamit sa mga footnote. Bantayi ang footnote d tapad sa pulong nga “pagpakasala” sa bersikulo 8.

Basaha ang bisan usa sa mosunod nga mga bersikulo gikan sa footnote, mangita kon ngano nga ang gagmay nga mga bata walay sala:

• Doktrina ug mga Pakigsaad 29:46

  Mahimo nimong ipabasa usab sa mga estudyante ang bersikulo 47, diin ang Ginoo naghisgot nga ang mga bata dili makasala hangtod sila mahimong may tulubagon. Ang Ginoo miingon nga ang mga bata magsugod nga mahimong may tulubagon sa Iyang atubangan sa edad nga otso. Ang mga pagpadayag niini nga kamatuoran makita diha sa Hubad ni Joseph Smith sa Genesis 17:11 ug sa Doktrina ug mga Pakigsaad 68:25–27. Ikonsiderar ang pagpakigbahin sa pipila o sa tanan niini ngadto sa mga estudyante kon aduna silay mga pangutana.

• Doktrina ug mga Pakigsaad 74:7

• Unsa ang gipasabot sa Moroni 8:8 nga ang “gagmay nga mga bata walay sala”?

Ang gagmay nga mga bata wala magkinahanglan og bunyag

Ikonsiderar ang pagpares sa mga estudyante ug dapita ang matag pares sa pagbasa sa usa sa mosunod nga mga hugpong sa mga bersikulo.

Si Mormon mihatag og dugang nga mga panabot nga makatabang kanato sa pagkat-on og dugang pa mahitungod sa Langitnong Amahan ug ni Jesukristo gikan niini nga doktrina kalabot sa gagmay nga mga bata. Basaha ang mosunod nga mga bersikulo, mangita sa mga punto nga imong madugang sa duha ka bahin sa imong tsart.

• Moroni 8:10–15

• Moroni 8:18–24

Dapita ang mga estudyante sa pagdugang diha sa tsart. Kon mapuslanon, ikonsiderar ang pagpangutana kon unsa nga sayop nga mga ideya nga mahimong anaa sa mga tawo nga gitul-id niini nga mga bersikulo.

Paggahin og panahon sa pagtan-aw sa mga kamatuoran nga imong gisulat sa ikaduhang kolum sa tsart. Pamalandongi ang mosunod nga pangutana:

• Sa unsang paagi kaha ang pagsabot niini nga mga kamatuoran mahitungod sa Langitnong Amahan ug ni Jesukristo makatabang kanato sa atong mga kinabuhi karon?

Dapita ang pipila ka mga estudyante sa pagtubag sa pangutana sa ibabaw. Kon mapuslanon, ikonsiderar ang paghangyo sa mga estudyante sa pagpakigbahin og mga sitwasyon nga mahimo nilang atubangon diin ang pagkahibalo niini nga mga kamatuoran mahimong makatabang. Mahimong maglakip kini sa dihang sila o ang uban matintal sa pagtuo nga ang Dios motugot lamang sa pipila ka mga tawo nga maluwas. Sunda ang mga pag-aghat sa Espiritu, ug pangitaa ang mga kahigayonan sa pagtabang sa mga estudyante nga mobati sa gugma sa Ginoo.

Hunahunaa og balik ang istorya sa duha ka mga misyonaryo gikan sa sinugdanan sa leksiyon.

• Base sa unsay imong nakat-onan karon, unsay imong isulti ngadto sa mga ginikanan niini nga bata aron matabangan sila nga makakaplag og kalinaw diha ni Jesukristo?

Dapita ang mga estudyante sa pagsulat og tubag niini nga pangutana gamit ang labing menos duha ka bersikulo nga ilang gitun-an niini nga leksiyon. Ang laing kapilian mao ang pagbansay sa mga estudyante sa pagsulti sa ilang tubag sa usa ka pagdrama-drama kay sa pagsulat lang niini. Seguroa nga masabtan sa mga estudyante nga ang tuyo niini nga pagbansay mao ang pagtabang sa mga tawo nga mobati og paglaom ug kalinaw pinaagi sa Pag-ula ni Jesukristo; dili ang pagsaway sa relihiyosong mga buhat sa uban.

Komentaryo ug Background nga Impormasyon

Makasala ba ang gagmay nga mga bata?

Si Presidente Dallin H. Oaks sa Unang Kapangulohan mitudlo:

Atong nasabtan gikan sa atong doktrina nga sa wala pa ang edad sa pagkamay-tulubagon ang usa ka bata “dili makahimo sa pagpakasala” [Moroni 8:8]. Nianang panahona, ang gagmay nga mga bata makahimo og mga sayop, bisan sa grabe kaayo ug makadaot nga mga butang nga kinahanglang tul-iron, apan ang ilang mga buhat dili isipon nga mga sala. (Dallin H. Oaks, “Sins and Mistakes,” Ensign, Okt. 1996, 65)

Doktrina ug mga Pakigsaad 29:47. Unsay buot ipasabot nga ang gagmay nga mga bata “magsugod nga mahimo nga adunay tulubagon”?

Si Elder Bruce R. McConkie (1915–85) sa Korum sa Napulog Duha ka Apostoles mitudlo:

Ang pagkamay-tulubagon dili mobuswak sa hingpit sa usa ka bata sa bisan unsang panahon sa iyang kinabuhi. Ang gagmay nga mga bata mahimong adunay tulubagon sa hinay-hinay, sa daghang mga katuigan. Ang pagkahimong may tulubagon usa ka proseso, dili usa ka tumong nga makab-ot kon ang usa ka piho nga gidaghanon sa mga tuig, mga adlaw, ug mga oras milabay na. Sa atong pagpadayag ang Ginoo miingon, “Sila dili makasala, kay ang gahom wala ihatag ngadto kang Satanas sa pagtintal sa gagmay nga mga bata, hangtod nga sila magsugod nga mahimo nga adunay tulubagon sa akong atubangan.” (D&P 29:47.) Adunay moabot nga panahon, bisan pa niana, nga ang pagkamay-tulubagon tinuod ug aktuwal ug ang sala gipasangil diha sa mga kinabuhi niadtong kinsa normal nga molambo. Otso anyos na kini, ang edad sa bunyag. (Bruce R. McConkie, “The Salvation of Little Children,” Ensign, Abr. 1977, 6)

Moroni 8:12, 19, 22. Unsa ang gipasabot sa mahimong “buhi diha kang Kristo”?

Ang mahimong buhi diha kang Kristo nagpasabot nga matubos pinaagi sa Pag-ula ni Jesukristo ug takos nga mopuyo sa celestial nga gingharian. Kadtong walay tulubagon gitubos ug gibuhi diha kang Kristo pinaagi sa gahom sa Pag-ula ni Jesukristo. Kadtong kinsa adunay tulubagon makadapit sa matubsanong gahom ni Jesukristo diha sa ilang mga kinabuhi pinaagi sa hugot nga pagtuo, paghinulsol, bunyag, ug pagdawat sa Espiritu Santo (Moroni 8:25–26).

Dugang nga mga Kalihokan sa Pagkat-on

Moroni 8:8, 11. Ang gagmay nga mga bata walay sala pinaagi kang Jesukristo

Usa ka kamatuoran nga mahimo nimong hisgotan mao nga ang gagmay nga mga bata nga namatay sa wala pa ang edad sa pagkamay-tulubagon naluwas sa celestial nga gingharian. Ikonsiderar ang pagdapit sa mga estudyante sa pagbasa sa Moroni 8:8, 11 ug sa Doktrina ug mga Pakigsaad 137:10 aron sa pag-ila niini nga kamatuoran. Tabangi ang mga estudyante nga makasabot nga ang gagmay nga mga bata naluwas diha sa celestial nga gingharian nga wala magkinahanglan og paghinulsol ug bunyag (tan-awa sa Moroni 8:11). Ang mosunod nga bidyo mahimong makatabang sa mga estudyante sa pagpalawom sa ilang pagsabot.

Moroni 9:6. “Maghago kita nga makugihon”

Kon aduna kay panahon, mahimo nimong dapiton ang mga estudyante sa pagbasa gikan sa laing sulat nga gisulat ni Mormon ngadto ni Moroni. Ikonsiderar ang pagpakigbahin og sitwasyon sama sa mosunod: “Isip sakop sa imong klase o korum, gihangyo ka sa pagdapit og usa sa ubang mga miyembro kinsa wala makaadto sa mga miting sa simbahan o mga kalihokan sulod sa kapin sa usa ka tuig. Human nimo ipaabot ang personal nga mga pagdapit sa miaging tulo ka bulan, kini nga tawo wala gihapon motambong sa bisan unsang mga miting o kalihokan.” Dapita ang mga estudyante sa pagpakigbahin kon unsay ilang mahimo niini nga sitwasyon. Hangyoa ang mga estudyante sa pagbasa sa Moroni 9:1–6, mangita og tambag nga magamit sa senaryo. Dapita ang mga estudyante sa pagpakigbahin og mga hunahuna mahitungod sa unsay gitudlo ni Mormon. Mahimo kang mangutana sama sa mosunod: Nganong lisod man ang pagbuhat sa unsay gitudlo ni Mormon? Ngano nga ang pagbuhat sa unsay gitudlo ni Mormon maayo?

Moroni 9:25. “Hinaot unta nga si Kristo mobayaw kanimo”

Ikonsiderar ang paghulog sa usa ka gipanitan nga orange ug usa ka wala pa gipanitan nga orange sa tubig aron masuta kon kini manglutaw ba. Dapita ang mga estudyante sa pagpamalandong kon unsay makapaubos nato ug kon unsay makapabayaw nato sa kinabuhi.

Dapita ang mga estudyante sa pagbasa sa Moroni 9:25–26, mangita kon unsay gisulti ni Mormon nga tingali nakapabayaw sa espiritu ni Moroni. Ikonsiderar ang pagpangutana og sama niini: Unsa nga mga pagtulun-an niini nga mga bersikulo ang makapadasig sa imong espiritu? Ngano man? Unsa sa imong hunahuna ang gipasabot niini nga si Jesukristo makabayaw kanato? Kanus-a nimo nasinati ang makapabayaw nga impluwensiya ni Kristo diha sa imong kinabuhi?