Paghunahuna og mga higayon nga gibati nimo ang Kristohanong gugma. Unsa ang kalainan nga nahimo sa Kristohanong gugma diha sa imong kinabuhi? Girekord ni Moroni ang panapos nga wali nga gihatag sa iyang amahan, si Mormon, diha sa sinagoga mga tuig na ang nakalabay. Si Mormon mitudlo kon unsaon nga “mohupot sa matag maayo nga butang” (Moroni 7:20, 25), ilabi na sa gugma nga putli, “ang tiunay nga gugma ni Kristo” (Moroni 7:47). Kini nga leksiyon gituyo aron sa pagtabang kanimo sa pagsabot ug sa pagtinguha sa gugma nga putli diha sa imong kinabuhi.
Tinguhaa ang gasa sa gugma nga putli. Si Mormon mitudlo nga mas hingpit natong madapit ang gasa sa gugma nga putli pinaagi sa kinasingkasing nga pag-ampo alang niini (tan-awa sa Moroni 7:48). Hangyoa ang Langitnong Amahan nga pun-on ang imong kasingkasing sa gugma nga putli alang sa imong mga estudyante. Ang imong matinud-anong mga paningkamot sa paghatag og kaluoy ug pagsabot makatabang sa imong mga estudyante nga mobati sa tiunay nga gugma sa Manluluwas.
Pagpangandam sa estudyante: Dapita ang mga estudyante sa paghunahuna og mga ehemplo sa dihang ang Manluluwas mipakita og gugma, ingon man usab sa mga ehemplo sa Kristohanong gugma karon.
Mga Posibleng Kalihokan sa Pagkat-on
Kristohanong gugma
Kon mahimo, ikonsiderar ang pagsugod sa klase pinaagi sa pagpakita o sa pagbasa og bisan usa sa mosunod nga mga istorya sa usa ka tawo nga mitabang gumikan sa gugma. Dapita ang mga estudyante sa pagpamalandong kon unsa nga kalainan ang mahimo sa Kristohanong gugma.
Usa ka batang lalaki nga walay paghinakog nga mihatag ngadto sa laing bata nga nanginahanglan. Tan-awa ang “The Coat” (2:07), anaa sa ChurchofJesusChrist.org,o basaha ang istorya, nga ang tinuod nga asoy gikan ni pagkabata ni Presidente Heber J. Grant’ (“The Coat,” Friend, Mar. 2012, 16–17).
Imbes nga mangomedya sa usa ka estranghero, duha ka batang lalaki ang mihukom sa pagtabang kaniya. Tan-awa ang “Gordon Hinckley: Lessons I Learned as a Boy” (4:04), anaa sa ChurchofJesusChrist.org.
Usa ka grupo sa batan-ong mga babaye mitabang sa pagkamabination ug gugma nga putli sa usa ka estudyante nga adunay kakulangan. Tan-awa ang “Charity: An Example of the Believers” (4:50), anaa sa ChurchofJesusChrist.org.
Ngano sa imong hunahuna nga ang Kristohanong gugma mahimo nga usa ka gamhanan nga impluwensiya sa atong mga kinabuhi?
Kinsa ang nahimong ehemplo sa Kristohanong gugma sa imong kinabuhi?
Ikonsiderar ang pagdapit sa mga estudyante sa pagsukod sa ilang kaugalingon kon giunsa nila pagpalambo ang gugma nga putli. Ang mosunod maoy usa ka paagi nga mahimo nila kini.
Si Mormon ug si Apostol Pablo mitudlo nga ang pagpalambo og Kristohanong gugma mahinungdanon alang sa atong pag-uswag (tan-awa sa Moroni 7:44; 1 Mga Taga-Corinto 13:2). Aron matabangan ka sa pagsukod kon unsa ka maayo ang imong pagpalambo sa Kristohanong gugma, pamalandongi kon unsa ka tinuod ang mosunod nga mga pamahayag alang kanimo sa sukdanan nga 1 ngadto sa 5 (1 = dili gayod tinuod; 5 = kanunay nga tinuod):
Naningkamot ko sa pagtabang ug sa pagserbisyo sa uban, ilabi na kon sila naglisod o nawad-an sa kadasig.
Naningkamot ko nga mahimong mabination, mapailobon, ug mapinasayloon sa uban, bisan pa man nga lisod sila ikauban.
Kon angay, gisultihan nako ang uban nga gihigugma ko sila ug nagpakabana kabahin nila.
Samtang magtuon ka sa Moroni 7, hangyoa ang Ginoo sa pagtabang kanimo nga makasabot ug magtinguha sa gugma nga putli.
Ang wali ni Mormon mahitungod sa gugma nga putli
Duol sa kataposan nga bahin sa iyang rekord, gilakip ni Moroni ang usa ka wali nga gihatag sa iyang amahan, si Mormon, ngadto sa “malinawon nga mga sakop ni Kristo” (Moroni 7:3). Si Mormon mitudlo sa mga baroganan sa gugma nga, kon gipatalinghogan, makapugong unta sa kalaglagan sa mga Nephite. Kini nga mga pagtulun-an magamit usab kang Moroni, kinsa nakasaksi sa mabangis nga kalaglagan sa mga Nephite pinaagi sa mga Lamanite ug naglatagaw nga nag-inusara sulod sa mga katuigan.
Basaha ang Moroni 7:47 ug markahi ang hugpong sa mga pulong nga naghulagway sa gugma nga gitudlo ni Mormon.
Ikonsiderar ang pagsulat niini nga kamatuoran diha sa pisara: Ang gugma nga putli mao ang tiunay nga gugma ni Kristo.
Si Jesukristo mihatag og hingpit nga ehemplo alang kanato kon unsaon sa paghigugma ang uban. Basaha ang Moroni 7:45–48, mangita sa mga hugpong sa mga pulong nga (1) dugang nga naghulagway sa gugma nga putli, o kon unsaon paghigugma sama sa Manluluwas, ug (2) sa pagdugang sa imong tinguha sa pagpalambo sa gugma nga putli diha sa imong kinabuhi.
Ang Moroni 7:45–48 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
Aron makadugang og kalainan ug kahulogan niini nga kalihokan, mahimo kang magbutang og hulagway sa Manluluwas diha sa pisara. Sa palibot sa hulagway, isulat ang mga hugpong sa mga pulong nga makit-an sa mga estudyante. Kon mapuslanon, tabangi ang mga estudyante nga makasabot sa mosunod nga impormasyon.
Ang mosunod nga mga kahulogan mahimong makatabang:
“mainantoson” = mapailobon nga molahutay sa mga pagsulay
“dili masinahon” = dili masina sa uban
“dili manghambog” = mapaubsanon
“dili mangita alang sa iyang kaugalingon” = nagbutang sa Dios ug sa mga panginahanglan sa uban sa dili pa ang kaugalingon
“dili dali nga masuko” = dili dali nga mapungot
“matuohon sa tanan nga mga butang” = modawat sa tanang kamatuoran
Ikonsiderar ang pagmarka gikan sa hugpong sa mga pulong nga “ang gugma nga putli dili mopakyas” sa bersikulo 46 hangtod sa hugpong sa mga pulong nga “kini molahutay sa kahangtoran” sa bersikulo 47. Si Elder Jeffrey R. Holland sa Korum sa Napulog Duha ka Apostoles mitudlo:
Imahe
Elder Jeffrey R. Holland
Ang kinabuhi adunay bahin sa mga kahadlok ug kapakyasan. Usahay ang mga butang magkulang. Usahay ang mga tawo mopakyas kanato, o mga ekonomiya o mga negosyo o ang mga gobyerno mopakyas kanato. Apan usa ka butang dinhi o sa kahangtoran dili mopakyas kanato—ang gugma nga putli ni Kristo. (Jeffrey R. Holland, Christ and the New Covenant: The Messianic Message of the Book of Mormon [1997], 337)
Ngano sa imong hunahuna nga ang tiunay nga gugma ni Kristo dili gayod mopakyas kanato?
Sa unsang paagi nga ang gugma sa Manluluwas makatabang kanato sa mga paagi nga walay laing makahimo?
Si Presidente Thomas S. Monson (1927–2018) detalyado nga mitudlo mahitungod sa gugma nga putli. Kon mahimo, tan-awa ang “Charity Never Faileth,” anaa sa ChurchofJesusChrist.org, gikan sa time code 15:05 hangtod sa 17:22. O basaha ang pakigpulong, sugod sa “Akong gikonsiderar ang gugmang putli” ug taposon sa “pagbatok sa aghat sa pagkategoriya sa uban” (“Ang Gugma nga Putli Dili Gayod Mopakyas,” Liahona, Nob. 2010, 124). Pangita og dugang nga mga hugpong sa mga pulong nga gigamit ni Presidente Monson sa paghulagway sa tiunay nga gugma ni Kristo.
Dapita ang mga estudyante sa pagpakigbahin sa unsay ilang nadungog o nabasa ug sa pagsulat og dugang nga mga hugpong sa mga pulong o mahinungdanon nga mga pulong sa palibot sa hulagway sa Manluluwas.
Ang imong mga pangutana bahin sa gugma nga putli
Unsa ang imong mga pangutana mahitungod sa unsa ang gugma nga putli o kon unsaon nga mapuno niini nga gugma?
Ikonsiderar ang pagsulat sa mga pangutana sa mga estudyante diha sa pisara.
Tinguhaa ang giya sa Espiritu Santo aron makahibalo kon ang mga estudyante kinahanglan bang mobuhat sa mosunod nga kalihokan sa tinagsa o sa gagmay nga mga grupo.
Aron makatabang sa pagtubag sa imong mga pangutana, buhata ang mosunod:
Paghunahuna og asoy sa kasulatan sa dihang ang Manluluwas nagpakita og gugmang putli. Pangitaa ug basaha ang ehemplo nga imong gihunahuna, o gamita ang usa sa mosunod:
Ang Manluluwas mikaon uban sa mga maniningil sa buhis ug sa mga makasasala (tan-awa sa Mateo 9:10–13). (Ang usa ka maniningil sa buhis maoy usa ka kobrador og buhis alang sa mga Romano, nga niadtong panahona misakop sa Israel.)
Ang Manluluwas mitabang ug mitudlo sa babaye nga nasakpan sa pagpanapaw (tan-awa sa Juan 8:1–11).
Ang Manluluwas miayo ug mipanalangin sa katawhan sa Amerika (tan-awa sa 3 Nephi 17:5–12, 21–24).
Paghunahuna og mga kasinatian sa dihang gibati nimo ang tiunay nga gugma sa Langitnong Amahan ug ni Jesukristo alang kanimo o sa dihang mibati ka og gugma nga putli ngadto sa laing tawo.
Dapita ang mga estudyante sa pagpakigbahin unsay ilang nakat-onan o nahinumdoman ug sa unsang paagi kini makatabang sa pagtubag sa ilang mga pangutana.
Unsaon pagbaton ug pagpakita og gugma nga putli
Ikonsiderar ang pagmarka sa awhag ni Mormon sa “pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma” (Moroni 7:48).
Sa unsang paagiha sa imong hunahuna ang pag-ampo ngadto sa Langitnong Amahan makatabang sa pagpuno kanato sa gugma nga putli?
Mahimong makatabang ang paghisgot sa mga estudyante nga ang gugma nga putli usa ka balaanong gasa nga gikan sa Langitnong Amahan aron sa pagtabang kanato nga mahimong mas mahisama ni Jesukristo. Kita makahimo sa atong labing maayo sa pagsunod sa ehemplo ni Jesukristo, apan sa kataposan, ang gasa sa gugma nga putli nagagikan sa Langitnong Amahan pinaagi sa Pag-ula sa Iyang Anak.
Tabangi ang mga estudyante sa paghimo og tinuod sa kinabuhi nga senaryo diin ang tubag sa usa ka tin-edyer makapakita kon napuno ba siya sa gugma nga putli o wala. Dayon ipahisgot sa mga estudyante ang mosunod nga mga pangutana.
Sumala sa unsay imong nakat-onan gikan sa Moroni 7:45, 47–48 ug sa ehemplo sa Manluluwas, unsaon nimo pagpakita og Kristohanong gugma niini nga sitwasyon?
Sa unsang paagi nga ang kinasingkasing nga pag-ampo makatabang kanimo sa pagtubag uban sa gugma niini nga sitwasyon?
Unsa kaha nga mga hagit ang mahimo nimong atubangon samtang maningkamot ka sa paggamit sa imong nakat-onan? Unsaon nimo sa paglihok uban sa hugot nga pagtuo bisan niini nga mga hagit?
Paggahin og kadiyot sa pagsulat unsa ang gusto nimong buhaton aron mas masabtan ug mapalambo ang hiyas sa gugma nga putli.