Moroni 10

Kinatibuk-ang Pagpasabot

Sa pipila sa iyang kataposang mga sinulat, si Moroni mihatag og gibug-aton nga ang Dios mao ang tinubdan sa tanang kamatuoran. Siya mitudlo nga kon kita mangutana sa Dios sa kinasingkasing, tinuod nga katuyoan, ug hugot nga pagtuo kang Kristo, kita makahibalo nga ang Basahon ni Mormon tinuod pinaagi sa gahom sa Espiritu Santo. Siya mipamatuod sa mga gasa nga gihatag sa Dios sa Iyang mga anak pinaagi sa Espiritu aron makabenepisyo kanila. Sa kataposang mga bersikulo sa Basahon ni Mormon, gidapit ni Moroni ang tanan sa pagsunod sa Manluluwas ug paghingpit diha kaniya.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Moroni 10:1–7

Katuyoan sa leksiyon: Kini nga leksiyon makatabang sa mga estudyante nga makahibalo sa ilang kaugalingon nga ang Basahon ni Mormon tinuod.

• Pagpangandam sa estudyante: Dapita ang mga estudyante sa pagbasa sa Moroni 10:1–7, mangita og bisan unsang mga pulong o mga hugpong sa mga pulong nga makatabang kanila nga makasabot unsay gikinahanglan aron makahibalo sa kamatuoran mahitungod sa Basahon ni Mormon.

• Mga bidyo: “Si Moroni Nagdapit sa Tanan sa Pagduol ngadto kang Kristo” (8:37; tan-awa gikan sa time code 4:39 hangtod sa 5:32); “Usa ka Buhing Pagpamatuod” (20:29; tan-awa gikan sa time code 13:51 hangtod sa 14:31)

• Sulod nga ipakita: Mga instruksiyon alang sa kalihokan nga giorganisar pinaagi sa tulo ka mga hugpong sa mga pulong sa tambag ni Moroni.

• Sugyot sa pagtudlo pinaagi sa videoconference: Ikonsiderar ang pagbahin sa mga estudyante ngadto sa breakout nga mga grupo aron sa paghisgot sa tulo ka mga hugpong sa mga pulong sa tambag ni Moroni gamit ang sulod nga gilakip sa leksiyon. Seguroha nga kopyahon ang sulod alang sa matag grupo ug ipakigbahin kini kanila sa chat o pinaagi sa email aron sa paggiya sa ilang diskusyon.

Doktrinal nga Kahanas: Moroni 10:4–5

Katuyoan sa leksiyon: Kini nga leksiyon makatabang sa mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan alang sa Moroni 10:4–5, mapasabot ang doktrina, ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

• Pagpangandam sa estudyante: Dapita ang mga estudyante sa pagsag-ulo sa pakisayran sa kasulatan ug sa mahinungdanon nga tudling sa kasulatan sa Moroni 10:4–5: “Mangutana sa kinasingkasing, uban sa tinuod nga katuyoan, nga may hugot nga pagtuo kang Kristo. … Ug pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang.”

• Sugyot sa pagtudlo pinaagi sa videoconference: Human mahatagi ang mga estudyante og igong panahon nga makaandam sa ilang tubag sa post nga “Mga Pangutana ug mga Tubag,” ikonsiderar ang paghatag kanila og panahon sa pagpakigbahin. Mahimo kini nga magpares, diha sa gagmay nga mga grupo sa mga breakout room, o uban sa tibuok klase.

Moroni 10:8–25

Katuyoan sa leksiyon: Kini nga leksiyon makatabang sa mga estudyante sa pagtinguha sa mga gasa sa Espiritu.

• Pagpangandam sa estudyante: Dapita ang mga estudyante sa pagkat-on mahitungod sa mga gasa sa Espiritu. Mahimo silang mogamit sa mga tabang sa pagtuon sa kasulatan sama sa entry sa Gospel Topics anaa sa (topics.ChurchofJesusChrist.org).

• Bidyo: “Pagserbisyo uban sa Espiritu” (19:12; tan-awa gikan sa time code 5:33 hangtod sa 5:48)

Moroni 10:26–34

Katuyoan sa leksiyon: Kini nga leksiyon makatabang sa mga estudyante nga “moduol ngadto kang Kristo, ug paghingpit diha kaniya” (Moroni 10:32).

• Pagpangandam sa estudyante: Dapita ang mga estudyante sa pagtambong nga andam sa pagpakigbahin kon unsa sa ilang hunahuna ang gipasabot sa hugpong sa mga pulong nga “duol ngadto kang Kristo”. Mahimong pangitaon sa mga estudyante ang hugpong sa mga pulong diha sa Gospel Library nga app kon nagkinahanglan sila og tabang.

• Mga butang: Pipila ka mga butang (o mga hulagway sa mga butang) nga adunay klaro nga katuyoan

• Sulod nga ipakita: Ang tsart nga naglista sa mga pagdapit ni Moroni ug sa mga saad sa Langitnong Amahan

• Bidyo: “Come unto Christ: 2014 Theme Song” (4:48)

• Sugyot sa pagtudlo pinaagi sa videoconference: Mahimong gamiton sa mga estudyante ang chat nga feature aron ipakigbahin kon unsay gipasabot sa mga pagdapit ug mga saad ni Moroni sa ilang kaugalingon nga mga pulong (tan-awa sa Moroni 10:30–34).

Sukda ang Imong Nakat-onan 10

Katuyoan sa leksiyon: Kini nga leksiyon gituyo aron matabangan ang mga estudyante sa pagsukod sa pag-uswag ug paglambo nga ilang nasinati atol sa ilang pagtuon sa Basahon ni Mormon karong tuiga.

• Pagpangandam sa estudyante: Mahimong mamalandong ang mga estudyante sa ilang pagtuon sa Basahon ni Mormon ug mangandam sa pagpakigbahin og panabot o kamatuoran nga ilang nakat-onan nga nakapadugang sa ilang gugma alang ni Jesukristo.

• Sugyot sa pagtudlo pinaagi sa videoconference: Alang sa seksiyon nga “Unsa ang imong nasabtan mahitungod sa Langitnong Amahan ug ni Jesukristo?” Ikonsiderar ang pagtugot sa mga estudyante sa paggamit sa whiteboard o chat nga function sa pagpakigbahin sa mga kamatuoran nga ilang nakat-onan gikan sa Basahon ni Mormon mahitungod sa Langitnong Amahan ug ni Jesukristo.