Moroni 10:8–25

“Matag Maayo nga Gasa Nagagikan ni Kristo”

Unsa ang usa ka gasa nga imong nadawat nga nakahimo og makahuloganon nga kalainan diha sa imong kinabuhi? Unsa ang gisulti niini nga gasa kanimo mahitungod sa tawo nga mihatag niini? Si Moroni mipamatuod sa mga gasa nga gihatag sa Dios sa Iyang mga anak pinaagi sa Espiritu aron maghatag og kaayohan kanila. Si Moroni dayon miawhag sa mga magbabasa sa pag-ila ug sa pagdawat niining espirituhanong mga gasa. Kini nga leksiyon makatabang kanimo sa pagtinguha sa mga gasa sa Espiritu.

Tabangi ang mga estudyante nga mobati nga gitahod ug gihatagan og bili. Ang matag estudyante usa ka anak sa Dios nga adunay talagsaon nga mga hiyas, talento, ug mga gasa. Pagmabinantayon ug dayega ang mga estudyante nga naningkamot sa pagtampo sa positibo nga mga paagi. Dasiga ang kinaiya sa pagdawat ug sa paghigugma taliwala sa tanang sakop sa klase.

Pagpangandam sa estudyante: Dapita ang mga estudyante sa pagkat-on mahitungod sa mga gasa sa Espiritu. Mahimo silang mogamit sa mga tabang sa pagtuon sa kasulatan sama sa entry sa Gospel Topics sa “Spiritual Gifts,” makita sa topics.ChurchofJesusChrist.org.

Mga Posibleng Kalihokan sa Pagkat-on

Mga Gasa

Hunahunaa ang pipila sa labing maayong tighatag og gasa nga imong nailhan.

• Unsa nga mga kinaiya niini nga mga tawo nga naghimo kanila nga maayong mga tighatag og gasa?

Si Jesukristo mitudlo sa Iyang mga disipulo mahitungod sa usa sa mga kinaiya sa Langitnong Amahan diha sa Mateo 7:9–11. Basaha kini nga mga bersikulo, mangita kon unsay gitudlo sa Manluluwas mahitungod sa Amahan.

Ikonsiderar ang paglista sa mga tubag sa mga estudyante sa mosunod nga pangutana diha sa pisara. Depende sa mga tubag sa mga estudyante, mahimo nimong basahon ang mga bersikulo nga gilista sa kataposan sa pangutana isip usa ka klase.

• Unsa ang pipila sa labing bililhon nga mga gasa nga gihatag o gitinguha sa atong Langitnong Amahan nga ihatag kanato? (Kon gikinahanglan, basaha ang Juan 3:16; 2 Nephi 31:12; ug Doktrina ug mga Pakigsaad 14:7.)

Karong adlawa makabaton ka og kahigayonan sa pagkat-on mahitungod sa mga gasa gikan sa Dios nga gitawag og mga gasa sa Espiritu o espirituhanong mga gasa. Samtang magtuon ka, hunahunaa kon sa unsang paagi kini nga mga gasa ebidensiya sa gugma sa Langitnong Amahan ug ni Jesukristo alang kanimo ug sa uban. Hunahunaa usab kon sa unsang paagi nga ang pagkanapanalanginan niini nga mga gasa makaimpluwensiya sa imong pasalamat ug gugma alang sa Langitnong Amahan ug ni Jesukristo.

Espirituhanon nga mga gasa gikan sa Dios

Ipakita ang mosunod nga kahulogan aron ang mga estudyante maglakip niini diha sa ilang journal sa pagtuon.

Ang espirituhanong mga gasa mahimong ipasabot nga ang “mga panalangin o mga abilidad nga gihatag sa Dios ngadto sa Iyang mga anak pinaagi sa gahom sa Espiritu Santo. Ang mga gasa sa Espiritu gihatag aron sa pagpanalangin ug sa paghatag og kaayohan niadtong nahigugma sa Ginoo ug nagtinguha sa pagtuman sa Iyang mga sugo. (Tan-awa sa Doktrina ug mga Pakigsaad 46:9.)” (Gospel Topics, “Spiritual Gifts,” topics.ChurchofJesusChrist.org).

Basaha ang Moroni 10:8, mangita sa unsay gitudlo ni Moroni mahitungod sa espirituhanong mga gasa.

• Unsa ang imong nakat-onan mahitungod sa espirituhanong mga gasa gikan niini nga bersikulo?

Usa ka kamatuoran nga atong makat-onan gikan niini nga bersikulo mao nga ang Dios naghatag sa Iyang mga anak og mga gasa sa Espiritu aron sila makabenepisyo niini.

• Sa imong hunahuna sa unsang paagi nato magamit ang mga panalangin o abilidad nga gihatag sa Dios kanato pinaagi sa Espiritu Santo aron sa pagtabang sa atong kaugalingon o sa uban?

Hunahunaa ang mga pangutana nga aduna ka pa bahin sa espirituhanong mga gasa. Isulat kini nga mga pangutana diha sa imong journal sa pagtuon. Samtang magpadayon ka sa pagtuon, pangitaa ang mga pagtulun-an nga makatabang sa pagtubag sa imong mga pangutana.

Ikonsiderar ang pagdapit sa mga estudyante sa pagpakigbahin sa pipila sa ilang mga pangutana. Mahimo nimo kining isulat diha sa pisara. Mahimong adunay mga pangutana ang mga estudyante nga susama sa mosunod: Unsa ang mga ehemplo sa espirituhanong mga gasa? Unsa nga espirituhanong mga gasa ang gipanalangin sa Dios kanako? Unsaon nako pagkadawat og espirituhanong mga gasa?

Unsa ang mga pananglitan sa espirituhanong mga gasa?

Si Moroni mipakigbahin og pipila ka mga pananglitan sa espirituhanong mga gasa nga mahatag sa Dios kanato. Basaha ang Moroni 10:9–16, mangita niini nga mga ehemplo.

Mahimong makatabang ang pagkahibalo nga ang pagtudlo sa “pulong sa kaalam” (bersikulo 9) mahimong nagpasabot sa abilidad sa pagtabang sa uban sa paggamit sa maayo nga panghukom o paggamit sa ilang kahibalo; ang pagtudlo sa “pulong sa kasayoran” (bersikulo 10) mahimong nagpasabot sa abilidad sa pagtabang sa uban nga makahibalo sa Dios ug sa Iyang mga balaod; ug “sa tanan nga matang sa mga pinulongan” (bersikulo 15) mahimong nagpasabot sa abilidad sa pagsulti sa langyaw o wala mailhi nga mga pinulongan.

• Unsa nga mga gasa sa Espiritu ang gihisgotan niini nga mga bersikulo?

• Unsa ang pipila ka mga ehemplo kon giunsa nimo pagkakita niini nga mga gasa nga gipakita?

Si Elder Bruce R. McConkie (1915–85) sa Korum sa Napulog Duha ka Apostoles mitudlo nga “ang espirituhanong mga gasa dili maihap ug nagkalain-lain” (A New Witness for the Articles of Faith [1985], 371).

Ikonsiderar ang pagdapit sa mga estudyante sa paghunahuna og mga ehemplo sa espirituhanong mga gasa nga mahimong ipanalanginan sa Dios kanila agi og dugang sa mga gilista sa Moroni 10. Kon gikinahanglan, mahimo nimong ipakigbahin ang mga ehemplo sama sa mosunod.

Ang Dios makapanalangin kanato og walay kataposan nga gidaghanon sa espirituhanong mga gasa, lakip ang hugot nga pagtuo kang Jesukristo, personal nga pagpadayag, dugang nga kapasidad sa pagsunod sa mga sugo, ug pagbati og Kristohanong gugma alang sa uban.

Aron maandam ang mga estudyante sa paghisgot sa mosunod nga mga pangutana, dapita sila sa paghunahuna sa mga higayon sa ilang kinabuhi nga napanalanginan sila og espirituhanong mga gasa gikan sa Dios. Mahimo nimo silang dapiton sa pagpakigbahin og mga ehemplo nga dili kaayo personal. Mahimo ka usab mopakigbahin og mga ehemplo gikan sa imong kaugalingong kinabuhi.

• Unsay imong makat-onan mahitungod sa Langitnong Amahan kon imong ikonsiderar ang mga gasa nga gusto Niyang ihatag kanato?

• Sa unsang paagi nga ang espirituhanong mga gasa makatabang kanato nga mahimong mas mahisama sa Dios?

Unsaon nato nga makadawat og espirituhanong mga gasa?

Basaha ang Moroni 10:24–25, 30, mangita sa unsay gitudlo ni Moroni mahitungod sa pagdawat og espirituhanong mga gasa gikan sa Dios.

• Unsa ang gitudlo niini nga mga bersikulo kanimo kon sa unsang paagi kita mapanalanginan sa mga gasa sa Espiritu?

Ang mosunod nga mga pamahayag mahimong gamiton sa pagtabang sa mga estudyante nga mas makasabot kon unsaon nila sa pagsunod sa tambag ni Moroni nga “mohupot diha sa” espirituhanong mga gasa (Moroni 10:30). Ikonsiderar ang pagpakita niini nga mga pamahayag ug pagdapit og mga boluntaryo sa pagbasa niini og kusog.

Si Presidente George Q. Cannon (1827–1901) sa Unang Kapangulohan mipakigbahin og usa ka paagi nga kita makapangita og espirituhanong mga gasa:

Kon si bisan kinsa kanato dili hingpit, kini atong katungdanan ang pag-ampo alang sa gasa nga makahimo kanatong hingpit. … Walay tawo nga angay nga moingon, “Ah, dili ko makatabang niini; mao kini ang akong kinaiya.” Dili siya kahatagan og kaangayan niini, tungod sa rason nga ang Dios nagsaad … aron sa paghatag sa mga gasa nga mowagtang [sa atong mga kahuyang]. (George Q. Cannon, “Pagtinguha sa Espirituhanong mga Gasa,” Liahona, Abr. 2016, 80)

Si Presidente Henry B. Eyring sa Unang Kapangulohan mipakigbahin og laing paagi nga kita mahimong takos alang sa mga gasa sa Espiritu:

Nag-ugmad kita og espirituhanong mga gasa pinaagi sa pagsunod sa mga sugo ug pagpaningkamot sa pagpuyo og usa ka walay lama nga kinabuhi. Nagkinahanglan kana og hugot nga pagtuo kang Jesukristo sa paghinulsol ug malimpyohan pinaagi sa Iyang Pag-ula. (Henry B. Eyring, “Pagserbisyo uban sa Espiritu,” Liahona, Nob. 2010, 60)

• Unsa ang imong nakat-onan gikan niini nga mga pamahayag mahitungod sa mga paagi nga kita mahimong mapanalanginan og espirituhanong mga gasa?

• Ngano sa imong hunahuna nga ang mga buhat nga gihisgotan gikinahanglan aron mahimong takos alang sa mga gasa sa Espiritu?

Hatagi og panahon ang mga estudyante sa paghunahuna mahitungod sa unsay ilang nakat-onan ug kon unsaon nila kini sa paggamit pinaagi sa pagpakigbahin sa mosunod nga mga instruksiyon. Dayon pagpamatuod sa mga kamatuoran nga inyong gitun-an karon ug dasiga ang mga estudyante sa pagtinguha og espirituhanong mga gasa.

Hunahunaa kon unsay imong nakat-onan karon mahitungod sa espirituhanong mga gasa nga gusto nimong mahinumdoman, lakip na sa unsang paagi ang espirituhanong mga gasa makahimo og kalainan diha sa imong kinabuhi. Tinoa kon unsay imong buhaton aron makabaton og mas dakong paagi sa paggamit sa espirituhanong mga gasa nga gitinguha sa Langitnong Amahan nga ipanalanginan kanimo. Irekord ang imong mga hunahuna ug mga impresyon diha sa imong journal sa pagtuon.

Komentaryo ug Background nga Impormasyon

Unsa pa ang ubang espirituhanong mga gasa?

Si Elder Marvin J. Ashton (1915–1994) sa Korum sa Napulog Duha ka Apostoles mitudlo:

Atong rebyohon ang pipila niining dili kaayo makita nga mga gasa: ang gasa sa pagpangayo; ang gasa sa pagpaminaw; ang gasa sa pagkadungog ug paggamit sa hinay, hinagawhaw nga tingog; ang gasa nga makahimo sa pagbakho; ang gasa sa paglikay sa panaglalis; ang gasa nga dali rang mouyon; ang gasa sa paglikay sa kawang nga pagbalik-balik; ang gasa sa pagpangita kon asa ang matarong; ang gasa nga dili dayon mohukom; ang gasa sa pagpangayo sa Dios og giya; ang gasa sa pagkadisipulo; ang gasa sa pag-amuma sa uban; ang gasa nga makahimo sa pagpamalandong; ang gasa sa paghalad og pag-ampo; ang gasa sa paghatag og makapatandog nga pagpamatuod; ug ang gasa sa pagdawat sa Espiritu Santo. (Marvin J. Ashton, “There Are Many Gifts,” Ensign, Nob. 1987, 20)

Unsa ang mga ehemplo sa mga tawo nga gipanalanginan og espirituhanong mga gasa?

Ang mosunod mao ang mga ehemplo sa mga indibidwal kinsa napanalanginan og espirituhanong mga gasa sa panahon sa panginahanglan. Hunahunaa kon unsa ang gitudlo niini nga mga ehemplo diha kanimo mahitungod sa Langitnong Amahan ug ni Jesukristo.

• Pananglitan 1: Si Amanda Barnes Smith desperado alang sa tabang sa Ginoo human ang iyang sayis anyos nga anak nga lalaki, si Alma, gipusil sa manggugubot nga panon sa Hawn’s Mill sa Missouri, USA, niadtong 1838. Ang bana ni Amanda ug usa sa iyang mga anak nga lalaki namatay sa pag-atake.

  Aron makita kon giunsa pagpanalangin sa Ginoo si Amanda atol sa panahon sa iyang panginahanglan, basaha ang kapitulo 30 sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018), gikan sa hugpong sa mga pulong nga “Ang samad presko pa” sa pahina 403 ngadto sa parapo sa pahina 404 nga nagsugod sa “Sa dihang iyang nahibaloan …” Dayon basaha sa kapitulo 32 gikan sa hugpong sa mga pulong nga “Samtang miikyas ang mga Santos sa Missouri …” sa pahina 431 ngadto sa parapo sa pahina 432 nga nagsugod sa “Mibaliwala kaniya …”

• Pananglitan 2: Sa dihang si Presidente Russell M. Nelson nagtrabaho isip usa ka doktor sa kasingkasing sa wala pa mahimong Apostol, nag-atubang siya og usa ka sitwasyon diin nagkinahanglan siya og tabang sa Ginoo.

Dugang nga mga Kalihokan sa Pagkat-on

Kalihohan sa pag-cross-reference

Kon makabenepisyo ang mga estudyante gikan sa pagrebyo sa ubang mga ehemplo sa espirituhanong mga gasa nga gilista diha sa mga kasulatan, dapita sila sa pag-cross-reference o pag-link sa 1 Mga Taga-Corinto 12:1–11 ug sa Doktrina ug mga Pakigsaad 46:8–26 ngadto sa Moroni 10:8–16. Mahimo nimong bahinon ang klase ngadto sa duha ka grupo ug dapita ang usa ka grupo sa pagtuon sa mga tudling sa 1 Mga Taga-Corinto 12 ug ang uban sa pagtuon sa mga tudling sa Doktrina ug mga Pakigsaad 46. Dapita sila sa pagpakigbahin sa unsay ilang nadiskobrehan ug sa unsang paagi kini nakadugang sa ilang pagsabot sa unsay gitudlo sa Moroni 10. Unsa ang dugang nga mga panabot ang ilang naangkon mahitungod sa espirituhanong mga gasa o mahitungod sa Langitnong Amahan ug ni Jesukristo?

Moroni 10:19. Ang dili mausab nga kinaiya sa Dios

Kon makabenepisyo ang mga estudyante gikan sa pagkat-on og dugang mahitungod sa dili mausab nga kinaiya sa Dios, ikonsiderar ang pagtutok sa Moroni 10:19. Dapita ang mga estudyante sa pagpakigbahin og ebidensiya sa espirituhanong mga gasa nga ilang nakita sa mga kasulatan, kasaysayan sa Simbahan, ug sa ilang personal nga mga kinabuhi. Ang mga ehemplo gikan sa “Komentaryo ug Background nga Impormasyon” nga seksiyon mahimong magamit isip kabahin niini nga panaghisgotan. Dayon dapita ang mga estudyante sa pagpakigbahin kon unsay gitudlo niini mahitungod sa Langitnong Amahan ug ni Jesukristo. Hangyoa sila sa pagbasa sa Moroni 10:19 aron makita kon unsay gitudlo ni Moroni mahitungod sa dili mausab nga kinaiya sa Dios. Nganong importante man nga kini masabtan?