Moroni 10:26–34

“Duol ngadto kang Kristo”

Gipadala kita sa kalibotan aron makakat-on ug molambo aron kita makaangkon og kinabuhing dayon. Aron sa pagtabang kanato, ang Langitnong Amahan mipadala sa Iyang Anak, si Jesukristo. Mitawag usab siya og mga propeta sa pagtudlo ug sa pagpamatuod kang Jesukristo. Sa kataposang mga bersikulo sa Basahon ni Mormon, gidapit ni Moroni ang tanan sa pagsunod sa Manluluwas. Kini nga leksiyon makatabang kanimo sa “pagduol ngadto kang Kristo, ug paghingpit diha kaniya” (Moroni 10:32).

Dasiga ang mga estudyante sa pagpaningkamot nga mahimong mahisama ni Jesukristo. Tabangi ang mga estudyante nga makaila sa mga pag-aghat gikan sa Espiritu Santo sa pag-ila sa mga paagi nga sila mahimong mas mahisama ni Jesukristo. Dasiga ang mga estudyante nga mainampoong mokonsiderar og piho nga mga lakang nga ilang mahimo sa ilang mga paningkamot nga mahimong mas mahisama sa Manluluwas.

Pagpangandam sa estudyante: Dapita ang mga estudyante sa pagtambong nga andam sa pagpakigbahin kon unsa sa ilang hunahuna ang gipasabot sa hugpong sa mga pulong nga “duol ngadto kang Kristo”. Mahimong pangitaon sa mga estudyante ang hugpong sa mga pulong diha sa Gospel Library nga app kon nagkinahanglan sila og tabang.

Mga Posibleng Kalihokan sa Pagkat-on

Timan-i: Kini nga leksiyon nagatutok sa doktrina nga gitudlo sa Moroni 10:26–34. Adunay kahigayonan ang mga estudyante sa pagreport sa ilang mga kasinatian sa pagtuon sa kinatibuk-an sa Basahon ni Mormon sa leksiyon sa “Sukda ang Imong Pagkat-on 10”.

Mga katuyoan sa Basahon ni Mormon

Ikonsiderar ang pagpakita og hulagway sa nagkalainlaing mga butang o dad-on kini ngadto sa klase. Hangyoa ang mga estudyante sa pagpamubo kon unsa ang katuyoan sa matag butang. Dayon ipataas ang kopya sa Basahon ni Mormon ug hisgoti ang mga katuyoan niini.

Diha sa ulohan nga pahina sa Basahon ni Mormon, si Moroni mipahayag nga ang Basahon ni Mormon gisulat aron sa pagkombinser kanato nga “si Jesus mao ang Kristo.” Ang termino nga “Kristo” mao ang “katumbas sa pinulongan nga Gresyanhon sa Mesiyas. Kini nagpasabot nga ang dinihugan nga Propeta, Pari, Hari, ug Tigluwas” (Giya ngadto sa mga Kasulatan, “Mesiyas,” scriptures.ChurchofJesusChrist.org).

• Sa unsang paagi nga ang pagtuon sa Basahon ni Mormon nakapalig-on sa imong pagtuo kang Jesukristo?

• Sa unsang paagi nga ang pagtuon sa Basahon ni Mormon nakatabang kanimo sa pagsunod ni Jesukristo?

  Ang mosunod nga pangutana gituyo alang sa personal nga pagpamalandong.

• Paminaw nimo kumusta man ka karon sa imong mga paningkamot sa pagsunod Kaniya?

Ang kataposang mga pagdapit ni Moroni

Human sa pagtudlo mahitungod sa mga gasa sa espiritu ug sa pagpasidaan mahitungod sa mga sangpotanan sa pagkawalay pagtuo, si Moroni namulong mahitungod sa Basahon ni Mormon.

Basaha ang Moroni 10:27–29, mangita sa unsay gipanagna ni Moroni nga mahitabo.

• Unsa ang imong hunahuna mahitungod sa pagpakigkita ni Moroni diha sa hukmanan?

Si Moroni mihatag dayon sa iyang kataposang mga pag-awhag, o mga pagdapit.

Basaha ang Moroni 10:30–34, mangita sa unsay gidapit ni Moroni nga atong buhaton ug sa gisaad nga mga panalangin nga iyang gipakigbahin

Ang katuyoan sa mosunod nga pagbansay mao ang pagtabang sa mga estudyante sa pagpalawom sa ilang mga pagsabot sa pipila ka mga hugpong sa mga pulong ni Moroni.

Mahimo nimong ipakita ang mosunod nga tsart o buhata kini pag-usab diha sa pisara. Kon imo kining buhaton pag-usab diha sa pisara, isulat ang mga ulohan sa matag kolum ug ipabasa sa mga estudyante ang Moroni 10:30–34 ug ilista kon unsay anaa sa matag kolum. Dayon, mahimo nimong idugang ang mga pakisayran sa kasulatan ug mga tabang sa pagtuon alang sa mga estudyante aron sa pagpalawom sa ilang pagsabot.

Ikonsiderar ang pagbahin niini nga mga pagdapit ug mga saad ngadto sa mga estudyante ug dapita sila sa pagpasabot ngadto sa klase kon unsay gipasabot niini. Mahimo usab nga magtuon ang mga estudyante diha sa gagmay nga mga grupo. Human ang igong panahon, dapita ang mga estudyante sa paghisgot kon unsay ilang nadiskobrehan. Ang mga pangutana nga nagsunod sa tsart makatabang sa pagpahigayon sa panaghisgotan.

Mahimo usab nimong ibutang ang mga piraso sa papel nga adunay mga pagdapit, mga saad, ug ang kauban niini nga mga kasulatan sa palibot sa lawak klasehanan. Dapita ang mga estudyante sa paglibot sa lawak ug sa pagtuon sa nagkalainlaing mga pagdapit ug mga saad.

Unsa ang kinahanglan natong buhaton (mga pagdapit ni Moroni)

Unsa ang gisaad sa Langitnong Amahan

Unsa ang kinahanglan natong buhaton (mga pagdapit ni Moroni) Mohupot diha sa matag maayo nga gasa. (Tan-awa sa Moroni 7:19; Doktrina ug mga Pakigsaad 6:7.) Likayi ang daotan nga mga gasa ug mahugaw nga mga butang. (Tan-awa sa 2 Nephi 4:27–28; Mormon 9:28.) Isalikway ang atong kaugalingon sa tanang pagkadili diosnon. (Tan-awa sa Hubad ni Joseph Smith, Mateo 16:25–29; Mosiah 3:19.) Higugmaa ang Dios sa tibuok natong gahom, hunahuna, ug kusog. (Tan-awa sa Mateo 22:36–38; Omni 1:26.)

Unsa ang gisaad sa Langitnong Amahan Ang Iyang grasya paigo ug makahimo kanato nga hingpit. (Tan-awa sa 2 Nephi 10:24; 25:23; Ether 12:27; Giya ngadto sa mga Kasulatan, “Grasya,” scriptures.ChurchofJesusChrist.org.) Kita pagabalaanon ug makadawat sa kapasayloan sa atong mga sala. (Tan-awa sa 3 Nephi 27:20; Doktrina ug mga Pakigsaad 76:41; Giya ngadto sa mga Kasulatan, “Pagbalaan,” scriptures.ChurchofJesusChrist.org.) Kita mahimong balaan nga walay buling. (Tan-awa sa Levitico 19:2; Doktrina ug mga Pakigsaad 87:8; Giya ngadto sa mga Kasulatan, “Balaan,” scriptures.ChurchofJesusChrist.org.)

• Hain nga mga pagdapit o mga saad ang labing makahuloganon diha kanimo ug ngano?

• Sa unsang paagi nga ang pagbuhat niini nga mga pagdapit makatabang kanimo sa pagduol ngadto ni Jesukristo?

• Unsa nga mga baroganan ang atong makat-onan sa Moroni 10:30–34?

Usa ka baroganan nga atong makat-onan mao nga samtang kita moduol ngadto kang Jesukristo, kita mahimong hingpit diha Kaniya.

“Duol ngadto kang Kristo, ug paghingpit diha kaniya”

Mahimo nimong ipakita ang bidyo nga “Come unto Christ: 2014 Theme Song” (4:48), anaa sa ChurchofJesusChrist.org. Dapita ang mga estudyante samtang nagtan-aw sila sa pagpamalandong kon sa unsang paagi ang grasya sa Manluluwas nakatabang kanila sa ilang mga panahon sa panginahanglan.

• Unsa ang gibuhat ni Jesukristo aron kita makadawat sa mga saad diha sa Moroni 10:30–34 ug mahingpit diha Kaniya?

• Sa unsang paagi nimo nakita ang grasya (balaang tabang o kalig-on) sa Langitnong Amahan ug ni Jesukristo nga naglihok sa imong kinabuhi?

Aron matabangan ang mga estudyante nga moduol ngadto kang Kristo nga mas hingpit, ikonsiderar ang pagpakigbahin og pagpamatuod sa gahom sa Manluluwas sa paghingpit ug pagputli kanato kon kita moduol ngadto Kaniya.

Ang mosunod nga mga pangutana makatabang sa mga estudyante sa paghunahuna og usa ka butang nga ilang mahimo aron makaduol ngadto kang Kristo ug mahingpit diha Kaniya. Mahimo nimong ipakita ang mosunod nga mga pangutana ug dapita ang mga estudyante sa pagrekord sa ilang mga tubag diha sa ilang mga journal sa pagtuon. Hatagi og panahon ang mga estudyante diha sa klase sa pagbuhat sa ilang mga desisyon, kon mahimo. Kon nagtrabaho ang mga estudyante sa mga tumong sa pagpalambo sa kabatan-onan nga nagtabang kanila sa pagduol ngadto kang Kristo, makapadayon sila sa pagbuhat niadto nga mga tumong.

• Aduna bay bisan unsa nga dili diosnon sa akong kinabuhi nga kinahanglan nakong ihikaw sa akong kaugalingon (pananglitan, mga impluwensiya sa media o dili maayo nga mga pamatasan)?

• Unsaon nako sa paghigugma sa Dios sa tibuok nakong gahom, hunahuna, ug kusog?

• Sa unsang paagi nga ang pagbuhat niini nga mga butang makatabang kanako nga mahimong mahisama ni Jesukristo?

Komentaryo ug Background nga Impormasyon

Sa unsang paagi ako mapanalanginan samtang akong dawaton ang pagdapit sa pagduol ngadto kang Kristo?

Si Elder Gerrit W. Gong sa Korum sa Napulog Duha ka Apostoles mipakigbahin:

Ang pagdapit sa Dios napuno sa gugma ug posibilidad tungod kay si Jesukristo mao “ang dalan, kamatuoran, ug ang kinabuhi” [Juan 14:6]. Alang niadtong mibati nga nabug-atan, Siya miawhag, “Umari kanako,” ug niadtong miduol Kaniya, Siya misaad, “papahulayon ko kamo” [Mateo 11:28]. “Duol ngadto kang Kristo, ug paghingpit diha kaniya, … mohigugma sa Dios uban sa tibuok ninyo nga gahom, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo” [Moroni 10:32].

Niini nga pasalig “pinaagi sa iyang grasya kamo mahimo nga hingpit diha kang Kristo” mao usab ang kahupayan, kalinaw, ug panaad nga kita makapadayon uban sa hugot nga pagtuo ug pagsalig diha sa Ginoo bisan kon ang mga butang dili mahiuyon sa atong gilaoman, gipaabot, o gani sa unsay angayan, pinaagi sa dili nato sala, bisan human nato gibuhat ang labing maayo. (Gerrit W. Gong, “Ang Atong Campfire sa Hugot nga Pagtuo,” Liahona, Nob. 2018, 42)

Si Elder Jeffrey R. Holland sa Korum sa Napulog Duha ka Apostoles mitudlo:

“Oo, duol ngadto kang Kristo, ug paghingpit diha kaniya … ,” mihangyo si Moroni. “Mohigugma sa Dios uban sa tibuok ninyo nga gahom, hunahuna ug kusog, niana … pinaagi sa iyang grasya kamo mahimo nga hingpit diha kang Kristo” [Moroni 10:32]. Ang atong bugtong paglaom alang sa tinuod nga kahingpitan mao ang pagdawat niini isip gasa gikan sa langit—dili nato kini “mapaningkamotan.” Busa, ang grasya ni Kristo nagtanyag kanato dili lamang sa kaluwasan gikan sa kasubo ug sala ug kamatayon apan sa kaluwasan usab gikan sa atong kaugalingong makanunayon nga pagpanaway sa kaugalingon. (Jeffrey R. Holland, “Busa, Kamo Kinahanglan Magmahingpit—sa Kataposan,” Liahona, Nob. 2017, 41)

Si Elder D. Todd Christofferson sa Korum sa Napulog Duha ka Apostoles mitudlo:

Hinumdomi, ang maulaong gahom o grasya ni Kristo dili lang mowagtang sa pagbati nga sad-an ug nasayop, apan mobalaan kini kanato, aron makapuyo sa presensiya sa Dios. (D. Todd Christofferson, “Pagpili ug Pasalig,” [tibuok kalibotan nga debosyonal alang sa mga young adult, Enero 12, 2020], broadcasts.ChurchofJesusChrist.org)

Moroni 10:34. Sama sa unsa kaha ang Kataposang Paghukom?

Si Presidente Dieter F. Uchtdorf, kanhi sa Unang Kapangulohan, mitudlo:

Kanang Adlaw sa Paghukom mahimong usa ka adlaw sa kaluoy ug gugma—usa ka adlaw diin ang masub-anong mga kasingkasing mahupay, diin ang mga luha sa kasubo mailisan og mga luha sa pasalamat, diin ang tanan mahimong husto.

Oo, dunay hilabihan nga kasubo tungod sa sala. Oo, magmahay kita ug gani masubo tungod sa atong mga sayop, sa atong mga kabuang, ug sa atong kagahi og ulo nga maoy hinungdan nga mawad-an kita sa mga oportunidad alang sa mas nindot nga kaugmaon.

Apan masaligon ko nga dili lang kita matagbaw sa paghukom sa Dios; matingala usab kita ug mapuno sa Iyang walay kinutuban nga grasya, kaluoy, kamanggihatagon, ug gugma alang kanato, nga Iyang mga anak. Kon ang atong mga tinguha ug mga binuhatan maayo, kon kita dunay pagtuo sa usa ka buhi nga Dios, nan makapaabot kita sa unsay gitawag ni Moroni nga “malipayon nga hukmanan sa halangdon nga Jehova, ang Maghuhukom sa Kahangturan” [Moroni 10:34]. (Dieter F. Uchtdorf, “O Unsa Kamahinungdanon sa Laraw sa Atong Dios!,” Liahona, Nob. 2016, 21)

Dugang nga mga Kalihokan sa Pagkat-on

Bidyo sa Basahon ni Mormon

Aron matabangan ang mga estudyante nga makonektar ang mga pagdapit ni Moroni sa atong panahon, ikonsiderar ang pagpakita sa bidyo nga “Si Moroni Nagdapit sa Tanan sa Pagduol ngadto kang Kristo” gikan sa time code 5:35 hangtod sa 8:37. Mahimo dayon nimong hisgotan kon giunsa ni Joseph Smith pagpatungha ang Basahon ni Mormon, nga nagtugot kanato sa pagbasa ug mapanalanginan sa mga pagdapit ni Moroni.

Mga tumong sa pagpalambo sa kabatan-onan

Mahimong makabenepisyo ang mga estudyante gikan sa paglakip sa ilang plano sa pagduol ngadto kang Kristo isip usa sa ilang mga tumong sa pagpalambo sa kabatan-onan. Kon gikinahanglan, tudloi ang mga estudyante mahitungod sa programa ug dasiga sila sa pagsulat sa ilang plano diha sa ilang kopya sa Personal nga Kalamboan: Giya nga Basahon sa Kabatan-onan (2019).

Moroni 10:27, 34. Pakigkita kang Moroni

Ang mosunod nga kalihokan makatabang sa mga estudyante sa pagpamalandong sa mga kontribusyon ni Moroni:

Ipakita ang hulagway ni Moroni, ug basaha ang Moroni 10:27, 34. Hisgoti kon unsaon nato “pagsugat si [Moroni] sa atubangan sa malipayon nga hukmanan sa halangdon nga Jehova.” Dapita ang mga estudyante sa pagpakigbahin kon unsay ilang isulti ngadto ni Moroni. Mahimong ipakigbahin sa mga estudyante kon unsa ang ilang gipasalamatan o unsa nga mga pangutana ang ilang ipangutana kaniya.