Molonai 10

Vakai Fakalūkufuá

ʻI ha niʻihi ʻo e ngaahi tohi fakaʻosi ʻa Molonaí, naʻá ne fakamamafaʻi ai ko e ʻOtuá ʻa e tupuʻanga ʻo e moʻoni kotoa pē. Naʻá ne akoʻi kapau te tau kole ki he ʻOtuá ʻi he loto-fakamātoato, loto-moʻoni, mo tui kia Kalaisi, te tau lava ʻo ʻiloʻi ʻoku moʻoni ʻa e Tohi ʻa Molomoná ʻo fakafou ʻi he mālohi ʻo e Laumālie Māʻoniʻoní. Naʻá ne fakamoʻoni ki he ngaahi meʻafoaki kuo foaki ʻe he ʻOtuá ki Heʻene fānaú ʻo fakafou ʻi he Laumālié ke ʻaonga kiate kinautolu. ʻI he ngaahi veesi fakaʻosi ʻo e Tohi ʻa Molomoná, naʻe fakaafeʻi ʻe Molonai ʻa e taha kotoa ke muimui ki he Fakamoʻuí pea hoko ʻo haohaoa ʻiate ia.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

Molonai 10:1–7

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau ʻiloʻi maʻanautolu pē ʻoku moʻoni ʻa e Tohi ʻa Molomoná.

• Teuteu ʻa e tokotaha akó: Fakaafeʻi ʻa e kau akó ke nau lau ʻa e Molonai 10:1–7, ʻo kumi ha faʻahinga foʻi lea pe kupuʻi lea ʻoku tokoni ke mahino kiate kinautolu ʻa e ngaahi fiemaʻu kae lava ke ʻiloʻi ʻa e moʻoni fekauʻaki mo e Tohi ʻa Molomoná.

• Ngaahi Vitiō: “ʻOku Fakaafeʻi ʻe Molonai ʻa e Tokotaha Kotoa ke Haʻu kia Kalaisi” (8:37; mamata mei he taimi 4:39 ki he 5:32); “Ko Ha Fakamoʻoni Moʻui” (20:29; mamata mei he taimi 13:51 ki he 14:31)

• Meʻa ke fakaʻaliʻalí: Ngaahi fakahinohino ki he ʻekitivitī naʻe fokotuʻutuʻu ʻe he kupuʻi lea ʻe tolu ʻo e faleʻi ʻa Molonaí

• Fokotuʻu ki hono akoʻi ʻi he konifelenisi vitioó: Fakakaukau ke vahevahe ʻa e kau akó ki ha ngaahi kulupu ʻi ha loki fakataha ke aleaʻi ʻa e kupuʻi lea ʻe tolu ʻo e faleʻi ʻa Molonaí ʻo fakaʻaongaʻi ʻa e fakamatala ʻi he lēsoní. Fakapapauʻi ke hiki tatau ʻa e fakamatalá maʻá e kulupu takitaha pea vahevahe ia mo kinautolu ʻi he polokalama fetohiʻakí pe ʻi he ʻīmeilí ke tataki ʻenau fealeaʻakí.

Fakataukei Fakatokāteliné: Molonai 10:4–5

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea folofola mahuʻinga ki he Molonai 10:4–5, fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi ʻa e kau akó ke ako maʻuloto ʻa e fakamoʻoni fakafolofola mo e kupuʻi lea folofola mahuʻinga ki he Molonai 10:4–5: “Kole ‘i he loto-fakamātoato, mo e loto-moʻoni, ‘o maʻu ‘a e tui kia Kalaisi. … Pea ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.”

• Fokotuʻu ki hono akoʻi ʻi he konifelenisi vitioó: Hili hono maʻu ʻe he kau akó ha taimi ke teuteu ʻenau tali ki he konga “Ngaahi Fehuʻí mo e Talí”, fakakaukau ke ʻoange ha taimi ke nau vahevahe ai. ʻE lava ke fakahoko tautau toko ua ʻeni, ʻi ha fanga kiʻi kulupu iiki ʻi he ngaahi loki fakatahá, pe fakataha mo e kalasí kotoa.

Molonai 10:8–25

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke fekumi ki he ngaahi meʻafoaki ʻo e Laumālié.

• Teuteu ʻa e tokotaha akó: Fakaafeʻi ʻa e kau akó ke nau ako fekauʻaki mo e ngaahi meʻafoaki ʻo e Laumālié. Te nau lava ʻo fakaʻaongaʻi ʻa e ngaahi tokoni ki he ako folofolá hangē ko e Ngaahi Tefito ʻo e Ongoongoleleí “Ngaahi Meʻafoaki Fakalaumālié” (topics.ChurchofJesusChrist.org).

• Vitiō: “Ngāue ʻaki ʻi he Laumālié” (19:12; mamata mei he taimi 5:33 ki he 5:48)

Molonai 10:26–34

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau “haʻu kia Kalaisi, pea hoko ʻo haohaoa ʻiate ia” (Molonai 10:32).

• Teuteu ʻa e tokotaha akó: Fakaafeʻi ʻa e kau akó ke omi mateuteu ke vahevahe ʻenau fakakaukau ki he ʻuhinga ʻo e kupuʻi lea “haʻu kia Kalaisí.” ʻE lava ke kumi ʻe he kau akó ʻa e kupuʻi leá ʻi he polokalama Gospel Library kapau ʻoku nau fiemaʻu tokoni.

• Naunaú: Ko ha ngaahi meʻa ʻe niʻihi (pe fakatātā ʻo ha ngaahi meʻa) ʻoku ʻi ai hano ngaahi taumuʻa pau

• Meʻa ke fakaʻaliʻalí: Ko e saati ʻoku lisi ai ʻa e ngaahi fakaafe ʻa Molonaí mo e ngaahi talaʻofa ʻa e Tamai Hēvaní

• Vitiō: “Come unto Christ: 2014 Theme Song (Haʻu kia Kalaisi: Hiva ʻo e Kaveingá 2014)” (4:48)

• Fokotuʻu ki hono akoʻi ʻi he konifelenisi vitioó: ʻE lava ke fakaʻaongaʻi ʻe he kau akó ʻa e polokalama fetalanoaʻakí ke vahevahe ʻa e ʻuhinga ʻo e ngaahi fakaafe mo e ngaahi palōmesi ʻa Molonaí ʻi he lea pē ʻanautolu (vakai, Molonai 10:30–34).

Siviʻi Hono 10 Hoʻo Akó

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke vakaiʻi ʻa e fakalakalaka mo e tupulaki kuo nau aʻusia lolotonga ʻenau ako ʻa e Tohi ʻa Molomoná ʻi he taʻu ní.

• Teuteu ʻa e tokotaha akó: ʻE lava ke fakakaukauloto ʻa e kau akó ki heʻenau ako ʻa e Tohi ʻa Molomoná pea teuteu ke vahevahe ha fakakaukau pe foʻi moʻoni naʻa nau ako kuó ne fakatupulaki ʻenau ʻofa kia Sīsū Kalaisí.

• Fokotuʻu ki hono akoʻi ʻi he konifelenisi vitioó: ʻI he konga “Ko e hā ʻoku mahino kiate koe fekauʻaki mo e Tamai Hēvaní mo Sīsū Kalaisí?” fakakaukau ke fakaʻatā ʻa e kau akó ke fakaʻaongaʻi ʻa e polokalama palakipoé pe fetalanoaʻakí ke vahevahe ʻa e ngaahi moʻoni kuo nau ako mei he Tohi ʻa Molomoná fekauʻaki mo e Tamai Hēvaní mo Sīsū Kalaisí.