“Fakataukei Fakatokāteliné: Molonai 10:4–5—‘ʻI he Mālohi ʻo e Laumālie Māʻoniʻoní Te Mou Lava Ai Ke ʻIloʻi hono Moʻoni ʻo e Ngaahi Meʻa Kotoa Pē,’” Tohi ʻa Molomoná – Tohi Lēsoni ʻa e Faiakó (2024)
“Fakataukei Fakatokāteliné: Molonai 10:4–5,” Tohi ʻa Molomoná – Tohi Lēsoni ʻa e Faiakó
Fakataukei Fakatokāteliné: Molonai 10:4–5
“ʻI he Mālohi ʻo e Laumālie Māʻoniʻoní Te Mou Lava Ai Ke ʻIloʻi hono Moʻoni ʻo e Ngaahi Meʻa Kotoa Pē”
ʻI hoʻo ako ʻa e Molonai 10:1–7, naʻá ke ʻilo ai kapau te tau kole ki he ʻOtuá ʻi he loto-fakamātoato, loto-moʻoni, pea tui kia Kalaisi, te tau lava ʻo ʻiloʻi ʻoku moʻoni ʻa e Tohi ʻa Molomoná ʻi he mālohi ʻo e Laumālie Māʻoniʻoní. ʻE lava ke tokoni ʻa e lēsoni ko ʻení ke ke ako maʻuloto ʻa e potufolofola fakataukei fakatokāteline mo e kupuʻi lea folofola mahuʻinga ki he Molonai 10:4–5, fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.
Tokoni ke mahino ki he kau akó ko hono maʻu ʻo e ʻilo fakalaumālié ko ha sīpinga fakalangi ia. ʻI he folofolá, ʻoku fakaafeʻi maʻu pē ʻe he ʻEikí ʻEne fānaú ke nau kole, kumi, mo tukituki (hangē ko ʻení, vakai ki he Mātiu 7:7–8; 1 Nīfai 15:11; Tokāteline mo e Ngaahi Fuakava 18:18, 42:61). ʻI hono akoako fakahoko ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié, fakamanatu ange ke nau faivelenga mo faʻa kātaki ʻi he fekumi ki ha ngaahi talí. Fakamoʻoni ange te tau lava ʻo falala ki he Tamai Hēvaní ke fakahā ʻa e moʻoní ki hotau ʻatamaí mo e lotó ʻi he mālohi ʻo e Laumālie Māʻoniʻoní.
Teuteu ʻa e tokotaha akó: Fakaafeʻi ʻa e kau akó ke ako maʻuloto ʻa e potufolofola mo e kupuʻi lea folofola mahuʻinga ki he Molonai 10:4–5: “Kole ‘i he loto-fakamātoato, mo e loto-moʻoni, ‘o maʻu ‘a e tui kia Kalaisi. … Pea ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.”
Ngaahi ʻEkitivitī Ako ʻOku Ala Fakahokó
ʻOku fokotuʻutuʻu ʻa e lēsoni fakataukei fakatokāteline ko ʻení ke akoʻi ia ʻi he hili ʻa e lēsoni “Molonai 10:1–7,” ʻa ia ko e lēsoni puipuituʻa ki he potufolofola fakataukei fakatokāteline Molonai 10:4–5. Kapau ʻoku fiemaʻu ke ʻunuakiʻi ʻa e lēsoni ʻo e potufolofola fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni puipuituʻa fekauʻaki mo iá ʻi he lolotonga ʻo e uike ko iá.
Ako maʻuloto pea fakamatalaʻi
Te ke lava ʻo kamata ʻaki hano fakaafeʻi ʻa kinautolu naʻa nau fakakakato ʻa e ʻekitivitī teuteu ʻa e tokotaha akó, ke lau maʻuloto ʻa e potufolofola fakataukei fakatokāteliné mo e kupuʻi lea folofola mahuʻinga ki he Molonai 10:4–5.
ʻE lava ke fakaʻaongaʻi ʻa e ʻekitivitī ko ʻení ke tokoni ki he kau akó kapau naʻe ʻikai ke nau fai ʻeni kimuʻa ʻi he kalasí. ʻE lava ke taufetongi ʻa e kau akó ʻi hono toutou lau ʻa e ngaahi konga takitaha ko ʻení mo hanau hoa kae ʻoua kuo nau lava ʻo lau maʻuloto ʻa e potufolofolá mo e kupuʻi lea folofola mahuʻingá ʻiate kinautolu pē.
-
“Kole ʻi he loto-fakamātoato,
-
Mo e loto-moʻoni, ʻo maʻu ʻa e tui kia Kalaisi. …
-
Pea ʻi he mālohi ʻo e Laumālie Māʻoniʻoní
-
Te mou lava ai ke ʻiloʻi hono moʻoni ʻo e ngaahi meʻa kotoa pē.”
Fakafanongo fakalelei ki he ngaahi tali ʻa e kau akó ki he fehuʻi ko ʻení ke tokoni atu ke ke ʻiloʻi ʻa e tuʻunga ʻo ʻenau mahino ki he meʻa naʻe akoʻi ʻe Molonai ʻi he potufolofola ko ʻení.
-
Ko e hā ʻe lava ke fai ʻe ha taha ke maʻu ha fakamoʻoni ʻoku moʻoni ʻa e Tohi ʻa Molomoná?
Akoako hono fakaʻaongaʻí
ʻOange ha faingamālie ki he kau akó ke toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié. Ko e founga ʻe taha ke fai ai ʻení ko hono kole ki he kau akó ke fili ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié pea fakamatalaʻi ʻa e founga ʻoku ʻuhingamālie ai kiate kinautolú.
Fakakaukau ke fakaʻaongaʻi ʻa e tūkunga ko ʻení pe ko ha meʻa ʻe taha ʻoku mahuʻinga ange ki hoʻo kau akó ke tokoniʻi kinautolu ke nau akoako fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié.
ʻE lava ke maʻu ha ngaahi fokotuʻu kehe ʻi he konga “ʻEkitivitī Fakalahi ki he Akó” ʻi he fakaʻosinga ʻo e lēsoni ko ʻení.
Fakakaukauloto ʻoku maʻu ʻa e tūkunga ko ʻení ʻi he konga “Ngaahi Fehuʻí mo e Talí” ʻi he makasini Ki Hono Fakamālohia ʻo e Toʻu Tupú. Ke vakai ki ha sīpinga, ʻalu ki ha makasini kimuí ni mai ʻi he ChurchofJesusChrist.org.
-
“Kuó u hoko ko ha mēmipa ʻo e Siasí ʻi he konga lahi taha ʻo ʻeku moʻuí. ʻOku ou feinga ke tauhi ʻa e ngaahi fekaú, lau ʻeku folofolá, lotu, mo ʻalu ki he Lotú. ʻOku ou fanongo ki hono vahevahe ʻe he kakai kehé ʻenau ngaahi aʻusia fekauʻaki mo hono ʻiloʻi ʻoku moʻoni ʻa e Tohi ʻa Molomoná. Ko e hā ʻoku teʻeki foaki mai ai ʻe he ʻOtuá ʻa e faʻahinga aʻusia tatau kiate aú?”
Fakakaukau ke vahevahe fakakulupu hoʻo kalasí. Te nau lava ʻo aleaʻi ʻa e founga ʻe lava ke tokoni ai hono fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ki ha taha ʻoku loto-hohaʻa ʻo tatau mo e tokotaha mei he tūkunga ʻi ʻolungá.
-
Ko e tefitoʻi moʻoni fē ʻo hono maʻu ha ʻilo fakalaumālié te ke poupouʻi ke ʻuluaki fakakaukau ki ai ʻa e tokotaha ko ʻení? Ko e hā hono ʻuhingá?
-
ʻE tokoniʻi fēfē koe ʻe he tokāteline ʻoku akoʻi ʻi he Molonai 10:4–5 ke ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ki he tūkunga ko ʻení?
Lolotonga ʻa e vahevahe ʻa e kau akó, fakapapauʻi ʻoku nau ʻilo ʻoku ʻikai ha tali tonu pe hala. Kapau te ke fakatokangaʻi naʻe ʻikai ʻohake ʻe he kalasí ʻa e tefitoʻi moʻoni kotoa ʻe tolu ki hono maʻu ʻo e ʻilo fakalaumālié, te ke lava ʻo fai ha ngaahi fehuʻi fekauʻaki mo e tefitoʻi moʻoni naʻe ʻikai ke nau lave ki aí, ko ha konga ʻo e fealeaʻakí. Mahalo te ke fie fakaʻaongaʻi ha niʻihi ʻo e ngaahi fehuʻi ko ʻení ko ha konga ʻo e fealēleaʻakí ni.
Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí
-
Ko e ngaahi foʻi lea pe kupuʻi lea fē ʻi he Molonai 10:4–5 te ke poupouʻi ʻa e tokotahá ni ke ne ako mo feinga ke ne maʻu ha mahino lelei angé? Ko e hā hono ʻuhingá?
-
Ko e hā ha ngaahi maʻuʻanga tokoni kuo fokotuʻu fakalangi ʻe lava ʻo tokoni ki he tokotahá ni ke ne maʻu ha fakamoʻoni fakataautaha ki hono moʻoni ʻo e Tohi ʻa Molomoná?
Ngāue ʻi he tuí
-
ʻE fēfē nai kapau te ke akoako fakahoko ha niʻihi ʻo e ngaahi fakaafe ʻa Molonai mei he Molonai 10:4–5 ʻi he tūkunga ko ʻení? ʻOku fekauʻaki fēfē ʻa e ngaahi meʻá ni mo e ngāue ʻi he tuí?
Vakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
-
Ko e hā ha ngaahi moʻoni fekauʻaki mo e ʻOtuá, founga ʻo ʻEne fetuʻutaki mo ʻEne fānaú, pea mo Hono finangaló ʻe lava ʻo tokoni ki ha taha ʻi he tūkunga ko ʻení?
-
Te ke fakaʻaongaʻi fēfē ʻa e tokāteline ʻoku akoʻi ʻi he Molonai 10:4–5 ke tokoni ki he ngaahi fehuʻi kehe ʻoku ʻikai fekauʻaki mo e Tohi ʻa Molomoná?
Toe vakaiʻi ʻo e fakataukei fakatokāteliné
‘Oku totonu ke ngāue ʻaki ha ʻekitivitī toe vakaiʻi hangē ko ʻení ʻi ha lēsoni ʻe akoʻi ʻi he kahaʻu ofi maí.
Fakamanatu ki he kau akó ʻa e ʻekitivitī naʻa nau fai ke ako maʻuloto ʻa e potufolofolá mo e kupuʻi lea mahuʻinga ki he “Molonai 10:4–5: Kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisi. … Pea ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.” Fakaafeʻi ha kau ako pē ʻoku nau kei maʻuloto ʻeni ke lau maʻuloto ia ki he kalasí. Kapau ʻoku fiemaʻu tokoni ʻa e niʻihi kehé, fakakaukau ke fakaʻaliʻali ʻa e potufolofolá mo e kupuʻi lea folofola mahuʻingá ʻi he palakipoé. Tamateʻi ha ngaahi foʻi lea ʻe niʻihi ʻi he taimi ʻe taha pea ʻai ke lau maʻuloto ʻe he kau akó ʻa e kupuʻi leá kae ʻoua kuo nau manatuʻi.